Selasa, 14 September 2010

JAMITA MINGGU, 31 OKTOBER 2010

Uhum Na Hombar Tu Pambaenan

HATORANGAN NI JAMITA

Minggu 22 Dung Trinitatis
Minggu, 31 Oktober 2010

Jamita  : Jeheskiel 33 : 12 - 19 + 30 - 33
Sibasaon : 2 Timotius 2 : 1 - 7




I. Patujolona.
Somal do tabege pandohan songon on : Karena nila setitik air, rusak susu sebelanga. Muda di hata batak didok : Sayang ari logo sataon dibaen udan samanyogot. Astuanna songonon : sayang boti do pambaenan nadenggan nadung nimuloan sahonoknaon, muda di ujungna beralih/sanga mambaen hajahatan. Gumonan do hamubaan ni parjahat ulang pado na burju hinan jadi marroha haurahan. Bahat do pangalaho nasogononan di jamanta saonnarion, contona : Pandita, Voorghanger, Sintua hinan do ia, naringgas, naburju, tapi begitu pensiun/Emeritus ia, tu gereja pe inda, martangiangpe madung marlangkap, malah jadi parjuji, mangkail muda ari minggu. Tontu pangalaho nasongonon termasukma mangagohon haburjuon naparjolo. Padahal madung didok di buku ni Parjamita 7 : 8, Dumenggan do ujung ni sada pangalaho pado parmulaanna, gumonan do hasobaron ulang pado ginjang ni roha.
II. Hatoranganna.
1. Marsoara parmahanion do si Jeremia maradopkon bangso Israel paboahon tona ni Debata anso patar holong ni rohaNia maradopkon bangso nanipulditNa. Nada por roha Ni Tuhan muda jolma i marhaujungan tu hamatean, angke songon na nidok ni Jesus, bahat do inganan di bagas ni Damang, kehe pe Au parade inganan di hamunu do. Muda dung singkop sude mulak do Au muse mangalap hamu. (Johanes 14 : 2 - 3). Jadi anso sude hajolmaon parsidohot disi, di paingot si Jeremia ma Israel anso ulang be mangkarejohon na jahat. Didok di hata ni endenta (Buku ende A.M. na lolot No. 227 : 3) Umpe sahalak tola mago, angkon mangolu do sude. I do pikiran ni Debata, laing songoni hataNa pe. Sandok na ra porsaya i, mangolu sapanjangna i. Muda pe didok nada harani pambaenan sanga harani pangoloion di tona i anso marhangoluan na so mantak, nada mararti bebas jolma mangkarejohon hagiot ni rohana. Dipaingot Tuhanta do anso mardalan hita di bagasan pangoloion maradopkon Debata, jana mangantak sude pambaenan na jat. Ganop hajolmaon angkon mangoku taringot di keadilan ni Tuhan, nada manguhumi Tuhan rambus laos sajo sanga marguru tu hata ni halak sajo, tapi marhite-hite hatigoran do ditimbang la parkaro ni halak namarpardomuan marhite-hite hasintongan (basa Jesaya 11 : 3 - 4 ). Nada adong istilah manimbang isarani kilogram muda taringot tu pambaenan, harana adong do deba halak marpikir muda umbahat binaen nadenggan jadi masuk surgo ma hita, tapi muda umbahat do na jat jadi masuk api naroko. Patar do pandohan ni Tuhanta laho paingotkon, nada tarurupi hadengganan na parjolo hajahatan na parpudi. Di pardalanan ni ngolu ni si Abraham, madung dipatorang Tuhanta, bahaso halak panyomba gana-ganaan do amang ni si Abraham i ma si Terah jana termasuk do ia pe di si (basa Josua 24 : 2). Tapi harani haporsayaan ni si Abraham lopus tu ujung ni ngoluna, jadi diparetongkon Tuhan ma haporsayaannia i gabe hatigoran (Basa Galatia 3:6). Sude do hita bertanggungjawab paboahon taringot tu hasintongan ni hata ni Debata namanongtong i, anso tangkas di boto halak songon dia porlu ni kesetiaan salolot mangolu hita. Si Johanes mandok tu Parlagutan na adong di Smirna : Sai bonar ma hamu lopus tu ujungna, jadi lehenonku ma tu hamu tuku hangoluan (Hendaklah engkau setia sampai akhir, maka Aku akan memberikan kepadamu mahkota kebenaran) (basa Halumbaan 2 : l0b).
2. Terkadang ra do jolma i manangihon hata ni Tuhan, tapi nada jungada bertahan, harana diparhagiot rohana angkon songon nanipikiran ni halahima nian sipatuluson. Sering do hajolmaon humin sebatas dalan sajo, artina humin pamolusan, songon pandohan ni angka guru najolo : Masuk do nian parsiajaran i sian simanangi na di siamun, tapi manigor ruar sian simanangi na di siambirang, ning roha do naniparohahonmu parsiajaran i, hape hara na male do ho ninna. Jotjot do hita maol manjagit hasintongan, jana tahasogohon do jolma sidok natutu. Songononma na nialaman ni si Jeheskiel, hatiha di suru Debata ia palaluhon parenta i, malah sihata-hataan ia ditonga-tonga ni bangsonia. Ro do bangso i mangincahi mandok: Ketabo tatangihon hata ni Tuhan ninna, tapi parenta ni naniutus i nada diantureskon halahi. Namararga situtu do hata ni Debata, na patut si tangihonon jana sikarejohonkon do parentaNia, jadi nada tola langgus roha di pangajaran ni Tuhan, harana mangihutkon parkarejoanta do uhumonNia hita. Adongma sada carito na singkat, taringot tu paruhuman harupe rupani nada sude sesuai dohot hata ni Debata, didok songonon : Dung dapot ari paruhuman i, jongjong ma sandok hajolmaon di adopan ni Tuhan. Di pungka Tuhan ma laho mandalankon tuntutan parjolo ma tu angka naposoNa, Pandita, Voorghanger, Sintua baru pe tu angka ruas. Harana nada adong na tarbaen patigorkon dirina, angka parkobas nangkinan pe laing adong namasuk tu naroko. Rupana nanggo marsijolo-joloanan muda tu naroko, istilahna rupani andorang so sidung tuntutan ni Paruhum na tigor roha i, adong dope nanigoaran ruang tunggu, tapi nada tarbaen be ruar sanga ise sian i. Di ruang tunggu i, marsuo ma da sada ruas natangkang hinan di ngoluna dohot Sintua weykna, jadi tarsonggot situtu ma bayo i jana didokkon ia : Biasi masuk tu son hamu Sintua nami? Ninna. Ro Sintua weyk i mangalusina, ulang pola gogo dokkon, harana Pandita, Voorghanger pe laing tong do sahorong hita di inganan on ninna. Jadi inda harani tohonan baen na malua sian paruhuman i, tapi harani kesetiaan lopus tu ujungna marhaporsayaan dohot marpangoloion do namanontuhon hita tu surgo sanga tu api naroko.
III. Hahonaanna.
- Bahat do halak na burju, jana marpangoloi humin di masa-masa aktip melayani di gereja, tapi dung pensiun jadi pamola-mola, manjalahi angka hahurangan ni parkobas, mandok nadung beralih sistim pemerintahan di gereja. Dibagasan situasi nasongononan angkon sadar do hita, bahaso nada tarpalua haburjuon naparjolo hita sian uhum ni Debata.
- Adong juo do halak Kristen nasongonon, madung magodang hinan hakristenon dohot haporsayaanna jana madung mamungka marparbatu, tapi inda mampu ia membina, manjago anso ulang di soro si bolis, jadi di ujungna malos jana mate. Haporsayaan nasongon i pe nada tarbaen paluahon hita sian hamatean salolotnilolotna.
- Harani i tibu ma ro, tadingkon ma dosamu, rohamu bo parangemi, tu Debata Jahowa, angke na ro ancogot i, ise di he umboto i? 

GKPA Resort Batam
Pdt. H. Nainggolan, S.Th

JAMITA MINGGU, 24 OKTOBER 2010

Pesta  Olop-olop 35 tahun GKPA

HATORANGAN JAMITA

Minggu 21 Dung Trinitatis
Minggu, 24 Oktober 2010

Jamita  : Mateus 25 : 24-30
Sibasaon : Kolose 3 : 22-25




I.Patujolo.
Hampir sude do dipardalanan ni ngolu ni hita jolma mangkaporluhon Tanggung jawab, nada mardia imbar, namenek, namagodang, namatobang angkon martanggung jawab do domu tu parjugukna be didia ia tinggal, aha karejona dohot tu ise ia laho  mempertanggung-jawabhon nanikarejohon dohot na dihangoluhon nia. Isarana sada dakdanak parsikola, muda dung di akhir semester angkon pataridahonon nia do hasil ni karejo nia muda dung akhir semester tu orang tuana.Nada bisa dohonon nia ”Ala le bapa tutu ma kehe au ganop manyogot tu sikola, hudohoti parsiajaran, ulangan dohot ujian semester tapi inda adong  hasilna” Muda hita ma orang tuana, songon dia sikapta laho mangadopi i…? Tontu minimal dohononta ma, biasi songon i…? Ditabusi do saragammu, buku, partolot jana ganop mangogot dilehen do jajan tu sikola, nabia dehe, betak naso kehe do ho tu sikolaan..? bahkan mungkin do dohononta, ba mantak ma ho, angka iboto mi ma dipasikola. Pangalaho na sederhana on paboahon bahaso porlu ni Tanggung jawab sian sada sada halak samenek ni aha pe karejo na nipasahat tu sia.

Parlagutan nadihaholongi ni Jesus.
Suang songon i do nadigambarhon tu hita di turpuk jamita sadari on, ima si tolu halak parkarejo ni sada tuan namangkaporsayahon kerejona tu pangurupina.

II. Hasahatan ni karejo.

Di patorang Parumpamaan na di turpuk on do sada pangalaho namarpardomuan tu sada tugas tanggung jawab sian sada tuan tu 3 pangurupina. Di patorang di ayat 15 – 16, bahaso si tolu halak i ima 3 naposo haposan nia, artina angka parkarejo nadung terlatih, adong setifikat bahkan muda dipahombar tu hatiha sisaonnari mamarragam gelar ni on, jana harani ima didok Diporcayahon tuan i tu halahi be hombar tu kemampuanna be (ayat 16) artina secara bertanggung jawab tuan i pasahathon tohap hombar tu kemampuan ni marsasa halak jana harapan ni tuan i dapat hatihana jagiton nia ma hasil namarlompit ganda. Tontu sada hal na wajar do lungun ni tua i, angke angka namarkopetendo na ditugaskon nia i. Tarida do songon dia respon ni si tolu halak i. Parkarejo namanjagit lima talenta, manigor burangkit jana kehe ia laho manggunahon talenta na adong disia jana hasilna luar biasa, hasilna lima noli lipat. Jana napatuahon pe nada ketinggalan. Jos ningia, kehe muse ia, burangkit, jongjong bahkan marlojong mangkarejohon hal nasarupo dohot dongana parjolo gabe maruntung ma 2 noli lipat. Tapi anggo napatoluhon justru inda bereaksi tapi sebalikna, sikapna manuntut, bahkan mempersalahkan tuanna.

II. Hasil ni karejo.

Dua halak naposo na di porcayahon ni tuan i, secara bangga dohot martanggung jawab bahkan inda adong boban di halahi laho maradopan dohot tuanna mandok: “Lima talenta dipasahat tuan i tu au, ligima untungna lima nai” Songon i na paduahon mandok:” 2 talenta na dipasahat tuan i tu au, indon ma, madung maruntung 2 talenta.” Laporan dohot pertanggung njawaban ni 2 naposo on, langsung di respon tuan i dohot sada sikap na bangga marhite pujianna mandok:” luar biasa, tarimakasi ma, haposan do hamu jana patut do hamu mandai angka denggan basa, jana pasahaton ma tu hamu nagumodang”

Sikap ni tuan on pataridahon sada sikap naluar biasa dengganna, harana nada hum pengakuan, pujian na dipasahatnia tu si dua halak i, tapi sekaligus dorongan dohot semangat  bahkan hadiah (parsidohot ma hamu di jop ni roha ni tuanmu) dohot tanggung jawab na gumodang diampehon tu halahi.

Tapi sabalikna tu si sada halak i didok tuan i ”ho ale parkarejo na jahat dohot namalas, biasi inda dilehen ho talenta tanggung jawab i tu naposongku naburju i?” Artina nada dihagioti tuan i sikap namartaki-taki, bahat kecet, dan bahkan sikap mempersalahkan pihak lain.

Dua sikap nadipataridahon ni Parkarejo on, manggambarhon, kemauan dohot keterbebanan ni marsasahalak domu tu tugas nanipasahat tu halahi. Si dua naposoi, merasa hormat, patuh dohot bertanggung jawab laho mangkarejohon karejo nadipasahat tu halahi. Tapi si sada halak i pataridahon sikap semau gue, acuh ta acuh dohot merasa lebih tau sekaligus mempersalahkon tuanna.

IV. Hahonaanna.

Damang dainang haholongan ni Jesus, sadarion marpesta olop-olop Parlagutanta 35 taon, artina madung tadalani ngolu ni Parlagutan ta i sahonok 35 taon, tontu mahatihana adong alus sian hita, ma songon dia jana aha nadung takarejohon songon sada halak parkarejo  nadung diporcayahon Debata tu hita be. Bebas do hita mangalusi. Tapi muda taida naposo si dua halak i, secara bebas jana dibagasan olop-olop do ro halahi mandapothon tuanna mandok : Indon ma tuan nahukarejohon, jana on ma hasilna” Sikap si songon onma na diigil  Debata sian Parlagutan ta GKPA, ima sikap namembanggahon, bertanggung jawab sekaligus pataridahon olop-olop dohot jop ni roha, baik tu hita suang songon i tu Debata.

Tahaporsayai do bahaso Debata di bagasan Jesus nampuna Parlagutanta, jana madung dilehen Ia karejo tu Parlagutan i, ima : “Patanakkon Hata ni Debata tu luat dohot halak Angkola” Sada tugas do on, sada tanggung jawab do on. Songon sada parkarejao hita di tonga tonga ni Parlagutan i Aha ma laporan ta, aha ma nabisa paboaonta tu nampuna Parlagutan i, jana dihatihana muse aha ma alus ni respon ni ruas nadiporcayahon tu hita?

Angkon okuon ta do bahaso didongani, diperlengkapi Debata do Parlagutanna tu tohap nadipasahatna. Harani i angkon taalusi do i marhite angka hasil kerja nadung tapatupa. Nada songon naposo najahat i, Hum na martaki-taki, marargumentasi dohot pasalahon na asing. Tapi Marhite olop-olop ro hita tu Sia paboahon bahaso madung takarejohon jana marhasil do karejo i jana bisa dipertanggung jawabkon tu Ibana.

Tontu nada tuk hum marjop ni roha, tapi jop ni roha olop-olop i, sekaligus do marpio hita tu tanggung jawab na gumodang nagiot pasahaton ni Debata tu Parlagutan ta, tu hita hombar tu naniporcayahon tu hita.

V. Pangujungina.

Madung marumur Parlagutanta pola 35 taon, ra taingot dope songon dia Parlagutan ta GKPA dung ojak mulai sian taon 1975. Sude serba sederhana, baik jumlah jemaat, Bangunan Gareja, Parhobasna, dohot angka na asing. Tapi muda taparrohahon dohot tapangkilalahon di hatiha on, angkon okuon ta do bahaso basa do Debata,sian ari tu ari, minggu,bulan bahkan taon tu taon martamba-tamba do hauntungan dohot namambaen jop roha ni Debata dohot hita laho paihut-ihutkon pardalanan ni Parlagutan i. Harani i Patut marmoga-moga, marolop-olop roha dohot tondinta hara ni sude nabinaen ni Debata di bagasan ngolunta.

Pucuk Pimpinan GKPA
Pdt.P.H.Harahap,STh
Sekjend
Kantor Pusat GKPA

JAMITA MINGGU, 17 OKTOBER 2010

Hitape gabe Apostel do

HATORANGAN NI JAMITA

MINGGU, 20 DUNG TRINITATIS
Minggu, 17 OKTOBER 2010

Jamita : PILIPI 3 : 17 – 21
Sibasaon : 1 RAJA – RAJA 2 : 1 – 4



I.Patujolo :
Na jongjong do huria Pilipi marhite panghobasion ni apostel Paulus di pardalananna pararathon hata ni Debata ( Ul. 16 : 12 …). Tapi tarpaksa ditinggalkon ibana huta i hara ni bahat jolma ma mangkojar – kojar ibana hara ni Barita Nadenggan i (1 Tes. 2 : 2). Haru pe songon i, marbungaran do parlagutan i jana tongtong do hot roha ni halahi tu apostel i sebagai rasul ni Debata. Dung i tarkurung do muse apostel i jana sian hurungan i ma ibana manongos suratna on.
Bahat do halak na manggoari surat Pilippi on surat jop ni roha, tarida do i sian angka pandohan : “jop ni roha” (1 : 4, 4 : 1, 2 : 17, 1 : 18, 4:4), d.n.a. Sada na tangkas disi, apostel Paulus dibagasan jop ni roha haru pe bahat arsak di ibana, hara  ni Barita Nadenggan i. Angkup ni i dipatuduhon surat ni apostel Paulus na tu huria Pillippi on do togu ni parsaoranna dohot  ruas ni parlahutan i laho pasauthon karejo pararatkon Barita Nadengganni. Muda tapardiatehon hara ni  aha jop ni roha na i, dapot ma : inda hara ni na sai terpenuhi sude angka na porlu di ngolu on gabe didokkon jop ni roha. Tutu dihatarimakasihon apostel i do panyarihonon ni parlagutan Pillippi marhite silehenlehen  na  diboan ni si Epafrodius, pola marlobi - lobi ibana hara ni i. Tapi nada silehenlehen i na niidasa, parbatu ni Barita Nadenggan na dung mangolu di parlagutan i do apala na dihajopkonna (4 : 10–20). Jana di turpuk on tangkas do dipatuduhon ibana jop ni roha i, haru pe tarhurung ibana. Harani jop ni roha dibagasan Tuhan i gabe bisa sude situasi mamboan bahat jop ni roha. Hara ni i haru pe di bagasan kurungan ibana (harani Barita Nadenggan), diusahahon ibana do mambaehen suratna tu parlagutan i laho patuduhon holong dohot lungun ni rohana tu parlagutan i, anso mian na masihaholongan sama halahi, tongtong  dibagasan jop ni roha jana marpos ni roha tu Tuhan i haru pe manosak angka arsak ni roha di ngolu on.
Margogo apostel Paulus patariparhon poda tu parlagutan i, bope marhite surat, inda na manghirim ibana holan di ngolu na di tano on. Tujuan akhir di ibana ima : ngolu na di bagasan Kristus i. I do haroro ni gogo di ibana manjamitahon Barita Nadenggan i. Di bindu 3 on, torang do dihajongjongkon ibana hadirionna, haporseaonna dohot parlojongonna tu jolo di bagasan panghirimon na mangolu di Kristus Jesus i.

II.Hatorangan :

Ay. 17. Si  Paulus manyungguli ruas ni Parlagutan i taringot tu angka  “tudosan” ni ngolu ni angka Parbarita Nadenggan i. Tudosan i nada taringot tu keberhasilan ni ngolu na di tano on, tapi taringot tu “pengorbanan” ni halahi laho mamaritahon hata ni Debata. Tiruan na di patudu ni ibana i ma si jop ni roha dibagasan perjuangan ni haporsayaan. Memang muda etongan portibi rugi jala marsak situtu do, tapi di bagasan ni i adong dipangkilalahon hagogoon sian Debata na markarejo di bagasan ngolu ni angka jolma na porsaya i na mandok “marjop ni roha laho mangalehen pengorbanan” angke dipargogoi do halahi laho mamonangkon sasude pergumulan i istilah ni si Paulus jotjot didok “tilipsis/τιλιπσισ/kesengsaraan”. “Tiru hamu ma au, denggan ma parrohahon hamu sanga ise angka na mangihutkon tiruan na hami baen i” artina dung takarejohon angka parenta ni Debata di bagasan jop ni roha,  dungi tapardiatehon ma songon dia do na terjadi dibagasan ngolunta sandiri.

Bahat do tudosan ni angka parbarita na denggan i, tarmasuk ma angka amanta guru zending na jolo, etongi  ma bahat do binoto anak dohot boru ni angka guru zending i na marhasil sannari, tapi bia de he luai tu generasi selanjutnya?, hita pe bisa do gabe guru zending di keluarga, masyarakat bope di parlagutan i, dungi tapardiatehon ma bia do ngolunta dohot angka pomparanta, dipasupasu Debata de he sanga inda ?

Ay. 18 – 19. Di nalaho mangkarejohon tugas na sian Debata, bahat do tantangan siadopan ni angka naporsaya i. Di adopi si Paulus do i, ido umbaen na didok nia “bahat do halak na mangolu songon musu maradopkon hayu parsilang ni Kristus i”. Di dia mulai takarejohon angka na denggan otomatis disi muncul do angka tantangan di nalaho mangago hita, minimal pataluhon semangatta laho mangkarejohononsa. Biasa do i ro sian dirinta sandiri bope sian angka dongan. Tapi hata ni Tuhanta mandok hasesego do ujung ni ngolu ni na ra mangihutkon si songon i. Muda monang do hita maradopkon sasudena i gabe dokine/δοκινε/tahan uji  (emas murni inda luntur hara ni waktu dohot keadaan) songon i ma hita laho patuluskon hagiot ni Debata. Anggo angka jolma na so mangoloi hata ni Debata jagitonna ma bagianna sannari sanga haduan.

Ay. 20 – 21. Taingot do di hata ni Debata dihatiha tardidi “Ale si…, dipasupasu jana dijagahon Tuhan Debata maho, di hamamasukmon tu bagasan Harajaan ni Debata, olat ni on ro di salolot ni lolotna”. Artina disi sarupa do dohot pandohan ni si Paulus “anggo hita rayat ni banua ginjang do”. Anggo dung dohot do hita anggota Harajaan ni Debata, tontu ngolunta pe ingkon sesuai dohot parngoluan ni anggota Harajaan i, anggo inda, mungkin bisa do hita di pecat Tuhan Jesus sian i. Di na paintehon haganopan ni Harajaan  i ma hita sannari angkon mangolu dohot mangkirim di baga – baga i. Tutu gale do pamatang on, tapi pargogoon ni Kristus do hita disi, angke dung dapot hatihana lehenon Nia ma di hita pamatang na imbaru na sarupa rap dohot Ia. Ima dung digoaran hita gabe halak na monang.

Hahonaanna:

1.    Gabe halak Kristen, siihutkon Kristus inda marastuan i : sandok tiur sude  di dalan sidalanan. Hakristenon inda gabe songon tabas i na bisa manjamin kemulusan ni sude ngolu, Sai ro do tu hita jotjot ragam ni hamaolon i do dipaojak Debata Parlagutan i di portibi on. Di tonga – tonga ni angka pergolakan pribadi, keluarga, masyarakat dohot bangso, ingkon tampil do hita halak Kristen mangalehen angka na denggan. Harana hita madung gabe apostel tu dirinta sandiri, keluarga dohot  hulianangta.

2.    Panghobasion ni Parbarita Nadenggan i, ima laho pasangaphon Kristus. Hara ni i usaha ni halak Kristen, ima laho mangarahon dongan anso dihajongjong halahi Kristus i, haru pe bahat adopan hamaolon, pargogoan ni Jesus do hita laho mamonanghonsa.

Sorminan :
Di sada hatiha mangkatai do si Rintop dohot donganna doli-doli na baru marsitandaan. Di sapai dongan na i ma : “Karisten do te he  amanta ?”, dialusi si Rintop : “narohangku Karisten harana sian ari Senen lopus tu ari Sabtu ganop manyogot martangiang do ia laho kehe karejo, dungi madung martaon-taon amangku asal ari minggu mardasi dohot mar jas kehe tu gareja”. Muda inanta Karisten do ?. Ninna dongan nai mangulahi, “mungkin, harana selain sibuk arisan dohot angka punguan ni angka ina madung leleng ia gabe guru sikola mingu”. Muda ibotomi biado ?. Ninna dongan nai  mangulai. “ia pe hurasa Karisten do harana jot – jot do ia kehe latihan koor dohot kegiatan na asing di gareja”. Disapai dongan na i muse, “jungada de he halahi mamio ho anso dohot tu gareja sanga mamodai ho anso martangiang ?”. Dialusi si Rintop muse : “inda boto ho, nanggo jungada dipaboa halahi na giot tu gareja halahi, mur ma giot ma mio dohot mangajari au?, sibuk do halahi di kegiatan na be, gabe inda adong hatiha di halahi laho mampardiatehon au”. Anggo songon i sarupa do hita, beta ma tabaen kesibukanta u poken manjalahi uang kantong, etak adong rasokitta laho paoto-otohon halak sanga mancopet, ninna dongan na i.
Sannari on bahat do hita na terlalu sibuk di karejonta be, gabe lupa di tanggung jawab di keluarga termasuk lumobi partondionna. Bisa muse do sibuk di pelayanan tapi lupa paulihon partondion ni dongan sabagas dohot angka dakdanakna. Hape na umporlu jana na parjolo dikeluarganta do hita na gabe apostel ni Debata.

Pdt.GP Simbolon,S.Th
Resort Labuhan Batu