Jamita Minggu, 8 Januari 2012: MARKUS 1:4-11

PAUBA HAMU MA ROHAMUNU DIBAEN MADUNG RO HARAJAAN NI DEBATA Minggu Ephipanias Tanggal, 8 Januari 2012 Jamita : MARKUS 1:4-11 Sibasaon : Ba.Rasul 19 : 1-7 I.                    PATUJOLONA Ia si Johannes Pandidi i ma anak ni malim Zakaria dohot inang na namargoar si Elisabeth (basa Lukas 1:5-24,67-80) . Dung timpas godang si Johannes disonggopi Tondi ni Debata ma ia, dungi kehe ma ia sian bagas ni natorasna jana tinggal ma ia di halongonan di antara ni Judea dohot Laut Mati. Dison ma ia manjagit pangajaran sian Tuhan, dison ma ia dibentuk Tuhan  gabe parjamita na gok kuaso jana na marsahala.Bolas do nidok ia si Johannes ima sahalak Panurirang na ro sian halongonan na mangolu dibagasan gambaran ni hapogoson/kesederhanaan,  na nisuru ni Debata laho manjamitai halak na mora, na marpangkat dohot halak na sangap anso ra “paubahon rohana, angke na giot ro ma Harajaan ni Debata”. Tanda ni kesederhanaan dohot hapogoson na tarida sian hadirion ni si Johannes ima: tinggal di padang halongonan (tempat penghancuran=Yesyimmon). Na mangihut, pakeanna dohot bobatna sian bobak ni pahan-pahanan, jana sipanganonna siapor dohot madu (baca Im 11:22,23). Pakean dohot sipanganon na songoni di hatiha i, i ma manggambarkon parngoluon na sapogos-pogosna. Ngolu sisongon i ma na di dalani ni si Johannes, jana di situasi na songon i ma ia dipake Debata na gabe sioban barita haluaan tu bangso Israel.  Isi ni barita/jamita na,  i ma anso sude jolma paubahon rohana, paimbaruhon ngoluna, angke na giot ro ma Harajaan ni Debata II.        HATORANGAN  1.                   Bahat do naro mambege Jamita na tu halongonan : tubu do sapa-sapa, biasi tartarik bahat halak giot mambege jamita ni si Johannes. Pogos do ia, pakean nia pe inda layak ditonga-tonga  ni halak na bahat. Adong ma tolu ratus taon lobi, nada be jungada tarbege sora ni Panurirang di hatiha di Israel. Ma ngolngolan bangso i mambege jamita sanga pe hata ni Debata marhite panurirangNa, angke masa do ngolu na parir hatiha i na mamisat parngouon ni bangso Israel marhite Parkuso sian bangso na asing. Disi tabege adong sora na pio-pio di halongonan manigor marroanma jolma mandapotkon ibana. Marroan ma sian sude luat dohot torluk jolma na marragam rupa status sosialna. Adong ma disi pogos, na maradong, na sangap, namarpangkat, parpajak dohot angka na asing. 2.                   Isi ni jamita ni si Johannes Madung diangkat kampak, tabaon ma hayu na so marbatu  jana ambungkon0nkon ma  i tu api. Harani i andorang so dihuatkon kampak, pauba hamu ma roha munu. Sude jolma angkon palapangkon dalan ni Sipalua i, dalan balobung angkon di pahornop jana na margerdol-geldok di patigor (baca Yesaya 40:3-5). Nasa na giot marjagit haluaan angkon ni pauba rohana jana angkon di paimbaru ngoluna. Sude na ra paubahon rohana angkon di pandidihon (ayat 5). Pandidion na di maksud di turpuk on i ma : pengambilan keputusan, menolak atau menerima, bersedia atau tidak bersedia. Na manjagit dohot na rade di pandidihon dapotan haluaan, tapi naso manjagit dohot naso rade tabaon ma. 3.                   Parbatu ni jamita ni si             Johannes Dibaen ngolu na sederhana do penampilanna, serep dohot toruk ni roha do dipatuduhon ibana di pelayananna, gabe hona ma antong jamita nai tu ate-ate dohot tu taroktok ni ganup na umbege jamitana i. Bukti ni pangkorhon ni jamita na i, gabe rodo sian sahalak na bahat  mandok : Apakah yang harus kami perbuat?  Sian halak na sangap,  na maradong, na marpangkat maradu sude halak na bahat saurdot manyapai, aha ma si karejohonon-nami anso dapotan haluaan hami. Botul sajo do pandok ni halak na malo na mandok songonon, ternyata yang paling ampuh untuk merobohkan keangkuhan dan kesombongan adalah gaya kelemah-lembutan dan pendekatan dengan penampilan yang sederhana. Marparbatu do jamita ni si Johannes, angke hombar do ngolu nia dohot jamita nia. 4.                   Tujuan ni jamita ni si Johannes Haru pe mamanaek pamornia hatiha i harani wibawa ni jamitana, tapi mur dipamenek ia do dirinia (Lukas 3:15). Didok si Johanes di jamitana,  anggo naro dipudingku , hum mambuka tali ni sipatunape nada layak au.              Sada sitiruon do na ni baen ni si Johannes, haru pe marsahala jamita nia, nada di paloas ia gabe sipujion ia disi. Tapi  mur dipamenek ia do diri nia, anso mursangap na ni jamitahon nia i. III.      HAHONAANNA Sada soso-soso do turpuk on tu hita sudena angka parhobas, ruas ni parlagutan dohot keluarga. 1.                   Mardai do jamita ni si Johanes tu halak na marragam rupa status sosialna dohot pangalaho na be, marhite ngoluna na hombar tu jamita na. 2.                   Nada adong biar ni si Johannes mandok tu angka na sangap, na marpangkat anso ulang dibuat halahi lobi sian gaji ni halahi. (jamita didaskein =  poda pangajaran) 3.                   Nada hum di na umbege jamita i na dapotan haluaan i, tapi laing dohot do ia marsuo bohi dohot Sioban Hangoluan i. Tangkas diida jana dibege ibana sora sian banua ginjang na mandok: on do AnakKu, haholongan ni rohangKu, tangihon hamu ma Ibana (ayat 11). Perenungan : Parjamita dohot Pamodai na ideal, angkon sarupa do Jamita/poda na dohot parngoluonna. Kantor Pusat GKPA

JAMITA BONA TAON EPHORUS GKPA 2012: Galatia 4 : 4 - 7

JAMITA BONA TAON 01 JANUARI 2012 Jamita : Galatia 4 : 4 - 7                            Sibasaon : Masmur 148 : 1- 14 --------------------------------------------------------------------------------------- NADA ADONG BE PARHATOBANAN 1. Selamat Taon Baru ma di hita sude ruas ni huria GKPA di sude inganan. Horas ma di hita. Turpuk jamita na denggan di hita di bona ni taon on dienet sian Galatia 4 : 4-7 (dibacahon) Hatorangan : Porlu pabotohononton bahaso di tonga-tonga ni huria  Galatia adong piga-piga komunitas (luhutan) na marhagogoon laho mempengaruhi pardalanan ni huria i. Na parjolo, i ma kekuatan ni angka halak Kristen na marasal sian hajahudion, na paduahon  luhutan na marasal sian angka halak na dipengaruhi ni filsafat Junani, luhutan on berpendapat bahaso hasintongan, haluaon ni jolma marmual hum sian parbinotoan pengetahuan sajo. Asing ni i adong do pe halak Kristen na ro sian Gorik. Ganop angka luhutan (komunitas) sisongon on adong do hagogoanna, masing-masing luhutan on marusaha do anso pengaruh ni budaya, pikiran dohot haporsayaan ni halahi lebih menonjol jala diberlakuhon di tonga-tonga ni huria Galatia.  2.  Songon sada halak na pistar di bidang agama kejahudion si Paulus tertarik do laho mangalehen panorangion tu angka luhutan na di huria Galatia anso mardalan huria i dibagasan si jop ni roha. Nada hum i, songon sada halak na ahli di bidang filsafat laing tertarik do si Paulus laho patigorkon angka pendapat ni golongan filsafat na adong di huria Galatia anso laing mardalan huria I dibagasan jop ni roha tau maroban hasangapon ni Tuhanta. 3.  Luhutan ni halak Kristen na ro sian hajahudion porsaya do bahaso Debata madung patandahon diriNa di padan na robi, pandapot ni halahi bahaso muda giot masuk sasada halak tu bagasan luhutan ni Kristen angkon jolo dipatuhi do aturan ni Jahudi. Angke aturan sisongon i do na dipodahonni Debata tu si Abraham ompung ni halahi. 4.  Nada dijagit angka halak Kristen Jahudi i angka donganna Kristen na ro sian luar ni hajahudion songon jolma naung manjagit hasintongan muda so jolo diihutkon angka aturan ni hajahudion. 5.  Sangat do horasna angka halak Kristen Jahudi manulak angka Kristen na ro sian luar hajahudion na berpikiran bahaso halahi secara moral, etika madung singkop dibagasan Jesus nang pe sopola menempuh sunat sesuai tu aturan ni hajahudion. 6.  Damang, dainang na dihaholongan dibagasan goar ni Tuhan Jesus Kristus. Sude do halak Kristen na ro sian luar ni hajahudion i longang, tarsonggot jala bingung umbege angka aturan-aturan na dipatubegehon ni halak Kristen Jahudi di tonga-tonga ni huria Galatia. 7.  Di bagasan pikiran dohot haporsayaan ni halahi bahaso halahi madung mangolu di bagasan Kristus, diuba Tuhan Jesus, i maTuhan na sarupo naung manguba cara parngoluon ni si Paulus dungkon pasuo ibana dohot Tuhan i ditingki nagiot kehe ia tu Damsyik. 8. Porsaya do halahi bahaso Tuhan nadung manolong si Paulus, i ma Tuhan na laing tong rade laho manolong halahi sopola ingkon jolo mangihutkon poda adat ni hajahudion. Bahat situtu do halak Kristen di huria Galatia na bingung harani parrohaon dohot kepanatikan ni angka Kristen - Jahudi i di tingki i. Harana nada adong diastui halahi agia aha pe aturan ni hajahudion. 9.  Damang/dainang na dihaholongan di bagasan Jesus Kristus. Di hita pe ruas ni huria GKPA, nada pola ingkon jolo halak angkola dongan na asing anso bisa masuk gabe ruas ni hurianta GKPA. Sude do halak naporsaya tu Tuhan Jesus berkesempatan masuk gabe anggota ni GKPA. 10.Angka ruas na burju do halak Kristen na ro sian luar ni hajahudion na di huria Galatia tingki i. Rade do halahi marsiajar, dibimbing angka halak Kristen Jahudi anso diboto halahi angka aturan-aturan hajahudion songon na dumpang hita di angka Padan na Robi i. Nangpe sian ias ni rohana parbagasan i mandok bahaso angka aturan-aturan i nangkan na bisa karejohon ni halahi i. 11.Sabahagian sian angka ruas Galatia gabe tarungkap do rohana laho manjagit aturan sunat hombar aturan ni Jahudi i. (Gal.5:2-12). Tapi di sisi na asing bahat do sian tonga-tonga ni halahi na gabe sobisa laho menentukan sikap, bingung, nada diboto halahi aha do na patut sibaenon ni halahi. Damang dainang dibagasan goar ni Tuhanta Jesus Kristus, ulang ma masa sisongon i di tonga-tonga ni Hurianta. Ulang adong halak, ruas na bingung harani bahat ni angka aturan-aturan. 12.Sude parungkilon sisongon i tangkas do i dibege si Paulus jana laho mangalusi ragam ni parungkilon sisongon i do baen diguritkon si Paulus suratna tu huria Galatia. Dirajumi ibana anso ulang adong angka parungkilon na muldop ditonga-tonga ni huria Galatia, ulang adong angka parbolat-bolatan ditonga-tonga ni huria i hum harani angka paham na marasing-asing. Nang di hita pe ruas ni Huria GKPA ulang terpancing hita laho mambaen parbolat-bolatan hum hara ni perbedaan na menek, na saotik, na so tangkas taboto. 13.Damang/dainang jotjot do masa perbedaan pendapat na bisa maroban parbolat-bolatan ni namar huria. Muda perbedaan i do na tapatujolo borat situtu do hita lala laho manyalpuhon ari sadari apalagi sada taon na bolon. Harani i ulang sai pola tapatujolo laho mamikiri, mangkobari angka perbedaan ditonga-tonga ni hurianta. Tapikirima angka na pasadahon hurianta. Gira do roha nisi Paulus laho giot  mangunjungi huria Galatia laho mangantisipasi ulang sanga adong parbolat-bolatan na pasegohon huria i. Tapi bahat do pertimbangan ni Ibana harana status harasulon ni ibana pe disangsihon angka sebagian halak do sian tonga-tonga ni huria Galatia i. 14.Ditudu halak Jahudi do si Paulus na so sarupa tu angka suruan ni Tuhan Jesus na parjolo di utus sian Jerusalem. Hara ni i diantisipasi sebagian ruas ni huria Galatia do ibana anso ulang dohot laho mangalehen panorangion tu angka halak Kristen na asing nang pe tu halak kristen Jahudi. Somal do si songon on terjadi sahat sadarion. Jotjot masa ditonga-tonga ni huria angka na so marsiokuan antara parhalado tu parhalado, antara pelayan tu pelayan, antara gereja tu gereja. Gari ada jot-jot terjadi pemutusan hubungan status keanggotaan ni parhuriaon hum hara na so dihaporsayai be habadiaon ni donganna. Si Paulus mandok bahaso na da pola porlu ibana menerima kewenangan agia sian ise pe. Sanga na sian ise pe nada porlu pengakuan, wewenang harasulon tu ibana dibaen madung di jagit ibana kewenangan sian Tuhan Jesus. Jala pertemuan ni ibana dohot Tuhan Jesus, i do dietong ibana na mangalehen pengakuan tu ibana sebagai naposo ni Debata (Gal.1:11-12). 15.Damang/dainang di bagasan Tuhan Jesus Kristus. Nada adong hak ni halak Kristen Jahudi pautangkon jolma na asing harani hagogoon ni aturan Jahudi songon gogo ni Hukum Taurat. Nada adong gogo ni aturan Jahudi mambaen jolma gabe tongtong ingkon mangoku di toru ni hagiot ni aturan Jahudi. Harana nada adong bagi ise pe na margogo laho mangkarejohon aturan i. Hara na parhatobanan do dietong si Paulus sude aturan ni Jahudi i. Jala nada pola porlu i na gabe baenon na utama dipikiran dohot roha ni jolma. Tapi na parjolo dohot na porlu i ma manjagit Tuhan Jesus Sipalua termasuk na paluahon sian tabanan ni uhum Jahudi i. Nada porlu manjalahi gogo dohot pembelaan sian uhum ni Jahudi termasuk sian Hukum Taurat laho manjagit haluaan sian Tuhan Jesus. Didok si Paulus bagi ise na porsaya tu Tuhan Jesus, manjagit Tondi Parbadia do ibana songon tanda ni halak Kristen na polin. Nada hara ni na mangoloi hagiot ni HUkum Taurat (Roma 8 : 9; Gal.3:1-5). 16.Damang/Dainang di bagasan Jesus Kristus tutu do nian di Padan na robi dipasahat Debata do janji keselamatan tu ompung ni halak Jahudi – si Abraham dohot tu angka anak dohot pahompu na (Pamungkaan 17 : 7 – 8). Tapi nada na marastuan i bahaso sude halak na giot malungun masuk tu banua ginjang marhite-hite naporsaya tu Tuhan Jesus ingkon jolo gabe masuk anggota keluarga Jahudi marhite-hite na ingkon taat tu aturan Jahudi songon sunat (Pamungkaan 17 : 9-14). Dipatorang si Paulus do bahaso pasu-pasu janji ni Debata  na tu si Abraham i nada hum tu halak Jahudi i tapi tu sude halak na porsaya do i. Porsaya do si Abraham tu Debata, jala hara ni haporsayaannia i do baen na di jagit Debata ia. (Pamungkaan 12 :1-4). Suang songon i do nang sude na hita jolma, haporsayaanta i tu Tuhan Jesus i do napaluahon hita sian ragam ni hasusaan manipat sian 1 Januari 2011 lalu tu 1 Januari 2012 on. Jala haporsayaanta do na gabe patubuhon pangkirimon anso tubu semangat na pita laho mamolus taon 2012 on. 17.Hukum Taurat nada i wahyu/hata ni Debata na paling godang/gincat argana di hita halak Kristen. Sudena hata ni Debata setara do i di halak kristen. Tuntutan ni uhum Jahudi, madung digohi i di bagasan hadirion ni Tuhan Jesus. Harani i nada adong be parhatobanan di bagasan goar ni Tuhan Jesus. Ulang be adong di hurianta na mangkilala lebih luas kesempatan laho manjuguhi sada inganan sian donganna na asing hum harani napatubu-tubu issu perbedaan antara anak mata dohot na so anak mata. Sude do hita anak mata, anak emas dijolo di Debata. 18.Damang/dainang di bagasan Jesus Kristus lobi hurang 1 bulan hita mamestahon persiapan di haroro ni Anak ni Debata tu portibion (masa Advent) ima Tuhanta Jesus Kristus. Ia ma Sipalua hita sian ragam ni Dosa. Namangolu di toru ni Tona i do Ia rap dohot hita, tujuanna anso laing dipangolu huhut diangkat Ia ma hita jolma sian tuntutan ni Tona i anso lalu hita tu ampuan ni Ama i, diangkat Ia hita gabe dakdanakNa dibagasan Jesus Kristus sekaligus markite-hite si songon i nadung diangkat do hita gabe dakdanak ni Debata. Harani i mangolu ma Tondi ni Debata di bagasan rohanta be. 19.Tondi i piopio mandok “Abba astuanna Ale Amang”. Muda tondi na pio-pio i maringanan dibagasan hita antong hita pe nadung dohot do disi mamio goar ni Debata. Muda pio-pio do hita tu goar ni Debata ima tandana nadung tatanda Debata. Muda dung tatanda Debata na gabe Ama dihita, tongtong ma hita padonok diri tu Debata huhut Ibana ma parsigantunganta laho mamolus taon 2012 on. 20.Songon sada Anak, berhak do i manean harto ni natorasna. Disude pardalanan ni ngolunta di taon 2012 on tapio ma Debata anso dapotan hita arta ni Amanta Debata. Bahat disangkapi Kantor Pusat ni hurianta laho sitohaponta di taon 2012 on. Termasuk program na marmual sian hasil Synode di taon 2011 i. Isarana, peningkatan pelayanan marhite-hite peningkatan sumber daya (Parbinotoan) ni angka pelayan, pengembangan ni GKPA tu angka daerah terpencil, peningkatan ekonomi masyarakat pedesaan, kerjasama dohor Pamarenta, manjago kerukunan di tonga-tonga ni masyarakat, peningkatan persembahan syukuran na mangkorhon tu peningkatan ni kesejahteraan ni angka pelayanan di GKPA, dna. Sandok, sude panggulmiton ni huria GKPA naingma patuduhon bahaso sude ruas ima ruas na taat, soli (saleh) laho mangkarejohon hagiot ni Debata. Muda sude do ruasta gabe ruas na soli (taat): tu aturan ni huria, marminggu, tu aturan ni pamarenta, tu aturan ni na mardongan sahuta, dna, tontu sangat memungkinkan ma sude ruas ni GKPA na gabe pasonangkon roha ni Debata dohot pasonangkon roha ni dongan jolma. “Ruas ni GKPA na soli (sale, taat) dohot na pasonangkon”. On ma visi ni Hurianta tu joloan on”. 21.Damang-dainang di bagasan Tuhan Jesus Kristus, sada ma hita di sude ragam ni panggulmiton ni hurianta anso denggan ta capai sude na taparsitta. Talehen ma roha, pikiran, dohot sinaloanta laho manuju tonggak situjuonta. Rap ma hita mamikirkon anso gabe kenyataan ma  sude angka program ni hurianta. Ingkon gabe siulahon hata (Injil) ni Tuhanta ma hita, angke disi do hita gabe margogo mangkarejohon angka nadenggan i tu sude jolma di luat portibion. Dipasu-pasu Debata ma sude nasa ruas ni hurianta GKPA, dibaen madung sude hita anak ni Debata nadung malua sian angka hamaolon di taon 2011. 1 Januari 2012 Pucuk Pimpinan GKPA Pdt.A.B.Marpaung,MMin,MTh Ephorus