Rabu, 29 September 2010

HORJA MARHAROAN


HORJA MARHAROAN




I.       PARDOMUAN NI ROHA NI ANAK DOHOT PARUMAEN :
1.     M a r t a n d a n g.
2.     M a n g a r i r i t.
3.     M a n u n a n g.

II.   PARBOLKAS NI PARUMAEN :
1.     M a r l o j o n g.
2.     N i p a b u a t.
3.     M a r h a b u a t a n.

A.     MARLOJONG
1.     Dung lalu tu bagas ni paranak, disapa hatobangan-harajaon bonabulu.
2.     Boruna na ro manjagit manjaluangi sapa-sapa
3.     disantan
4.     mangan indahan las
5.     manyuru na manopoti tu huta ni parboru, sada sian kahanggi, sada sian Anakboti dohot sada sian hatobangon.
6.     dung dijagit parboru topottopot, na manopoti mulak lalu paboahon tona ni raja ni bonabulu ni amang ni parbaru.
7.     disuru ma na manghobar.
8.     ro ma indahan tompurobu sian parboru.
9.     kehe ma na malungun tu huta ni parboru
10.            kehe ma muse  malungun paduanolihon.

B. NA NIPABUAT :

1.     roma rombongan ni paranak dohot bayo na giot mambuat boru tu bagas tu huta ni boru na giot alapon.
2.     boru dohot bayo songon i dohot rombongan dilehen mangan.
3.     sidung mangan, rombongan di pabuat parboru.
4.     ro ma na manghobar sian paranak.
5.     sidung hobaran ro ma muse parnak malungun.
6.     dung i ro ma muse na paranak malungun paduanolihon.

C.               BORU NA MARHABUATAN :

1.     Boru namarhabuatan dijujur paranak tu Bonabulu ni parboru na disaksihon ni haruaya mardomu Bulung
2.     Di ari nadung ditontuhon dohot nadung disepakati bersama keduabola pihak sama-sama marontang dohot panaek gondang.
3.     boru namarhabuatan, dibutongi dohot lahananna anak ni bontar (horbo).
4.     sidung dibutongi, dipabuat ma dohot mangampar barang di alaman. Tamba ni barang boru na biasa laing dipayakkon dope barang adat : taka tuku tapakuda dohot bulang, payung rarangan podang tombak.
5.     Dung dijagit rombongan na ro, dipakehon ma barang adat i tu bayo pangoli dohot tu baru nanioli, lalu marsilanyango ma halahi dohot nauli bulung songon parsiranganna sian nauli bulung tu na matuabulung, lalu digondangan ma lalu tu adian sisunggul lungun balkka sitolu-tolu, asa disi ma pihak paranak manjagit boru i marhite-hite gondang ni halahi lalu maroban tu huta ni halahi.
6.     Dung lalu di huta ni paranak, na nioban ni halahi i dipashat paboahon na dipabuat dohot adat na gok, asa halahi na ro i pe dapotanna laing songon i do muse.
7.     Acara horja selanjutna ma di bagas ni paranak.
8.     Dung sidung horja di paranak, ro ma muse bagian malungun paduanolihon tu pihak parboru naroban sipanganon na masak i ma bagian na mora hian.

MANGHOBAR / MANJUJUR BORU


MANGHOBAR / MANJUJUR BORU




Adong tolu pangalaho sibotoon ni raja pamusuk muda manghobar :
1.     Pihak paranak i, anakboruniba hian.
2.     Pihak paranak i, na baru manombak do pe.
3.     Pihak paranak i dongan sahutaniba.

Partordingna :
1.     Marsapa tu hasuhuton aha dalanna dibaen na di galagut hatobangon-harajaon di bagasnai.
2.     Mangalusi hasuhuton paboahon langka niboruna.
3.     Utusan ni na ro mandok hatana dalan dibaen na ro halahi.
4.     Manjagit manjaluangi ma sian dalihan na tolu ni parboru
5.     Manjagit muse ma hatobangon-harajaon ni bonabulu
6.     Panjagitan ni dalihan na tolu dohot bondul na opat dibobok dipudun raja pamusuk.
7.     Dipulaan ma na manghobar taringot tu jujuran :
a.     Dibuat ma tanda na manghobar boru sian ingananana, dipanyakkon tu jolo ni raja lalu disurduhon hatobangon-harajaon.
b.     Marlidung ma na ro i paboahon pangidoanna taringot tu adat ni boru anso dipasidung.
c.      Disuru raja ma orangkayana mangaligi sanga madung adong pandokdokna.
d.     Dipangido ma parjolo : ungkap horbangan ( bagian ni anakboru ni bonabulu ); kecuali na ro i dongan sahuta.
e.      Na paduahon : gorukgoruk hapinis/ tompas handang (bagian ni anakboru ni bagas i / anakboru ni hasuhuton) kecuali na ro i anakboruniba hian.
f.       Marsapa ma raja tu na ro, sanga marruji do baenon jujuran ni boru na dialap ni dakdanak ni halahi i. muda marruji do angkon :
g.     Dipangido halahi ma jolo tu nampuna ruji anso dipake, lehenon ma bagian ni nampuna ruji.
h.     Suruan muse ma anakboru magalap ruji i tu sopogodang, lehenonna muse upana.
i.       Ungkap harkar ruji laing lehenon ni halahi ma tu raja, namangungkap dohot mangharkarina.
j.       Dibaen na giot mangampar ma di amparanna, laing lehenonna ma upa ampar dohot amparanna tu raja.
k.     Antong dia do ruji sipilionmunu anso binoto mamayakkonna ninna raja, anggo ulosna pada umumna sude ruji hami jujung.
l.       Patpa hamu ma na margoar : hariman ni halahi na marhamaranggi. 10 ruji.
m.  Hundulan ni raja, undung-undung-parsitijuran, bahatna 5 ruji.
n.     Batangboban / sers bahatna : 120 ruji
o.     Unduk dohot tulang rap 10 ruji
p.    Namuhut ni huta kecuali na ro i dongan sahuta, asa gontina dipatama ma ingot-ingot.
q.     Parsirangan tu naposo bulung bahatna : 7 ruji.
r.      Ingot-ingot dohot hotang na opat tola do i sakaligus masuk tu namuhut ni huta i, tapi tola do tarsandiri.
s.      Holting ruji tu raja Oamusuk/panusunan bulung : 1 ruji.
t.       Dipanaek ma bondil somba tu inanta soripada pasahatkon sere i.

Selasa, 28 September 2010

MANGARASMIHON PONDOM (BALE)

MANGARASMIHON PONDOM (BALE)




Bahat do halak Angkola di tingki on na so umboto ruhutruhut ni mangalaksanahon adat mangarasmihon pondom sanga pe bale. Marhite siguriton on hucoba ma mangalehen angka garis besar dipelaksanaan adat ni na mangarasmihon pondom songon na di toru on.

I.         Bangunan ni pondom di bangun parjol, tanpa tanduk.

II.      M A N G A R A S M I H O N :
1.     Martahi ulu nitot ma pomparan ni na dibagasan pondom i.
2.     Martahi marunungunung Nibodat.
3.     Martahi martuktuk Nisibaheu lalu torus nartahi Godang.
4.     Pasingkopkon na hasaya tu sipanganon tu si guleon dohot lahanan ni paresmian pondom,songon i dohot tu na panaek gondangna.
5.     Marontang harajaon torbingbalok-namangaluati dohot haruaya mardomu bulung.
6.     paboahon hasil ni parpokaton tu ina dohot naposo bulung parhutaon.
7.     Marontang ina tu hombarbalok dohot salapa na marisi burangir.
8.     Muda dung dapot arina :
1.     Panaek gondang; lahananna ditalpokkon; marsilayangon.
2.     Maralok-alok taringot tu niet.
3.     Di mata nihorja na di tontuhon :
a.     Manalpokkon na hasayana
b.     Marsilayangon painte-inte so masak na di lompa.
c.      Pabuatkon na giot tu pondom dohot barisan :     sitiop podang-sitiop tombak-Na mamayungi na dibarangan-siporsan tanduk na giot lohotkononkon-sioban santan-rombongan ina, ama sian suhut dalihan na tolu-pargondang.
d.     Marlidung ma
e.      Tanduk dilehen tu tukang lalu di pasang.
f.       Marlidung ma sian bagian ama na mardalihon na tolu.
g.     Dipudun lalu dibobok panusunan bulung lalu manyantanna paboahan nadung  resmi bangunan i pondom ni........................
h.     Pomparan sudena marsilayangon 7 hulilang di pondom i.
i.       Mulak ma tu bagas godang, lalau mangan arian.
j.       Di paujung ma harejoi dohoy hatobangon-harajaon bonabulu-haruaya  Mardomu bulung/ panusunan bulung dohot na diontang.
4.Marbagi labo/ paujung harejo :
1.     tu bagian mora
2.     tu bagian anakboru/pisang raut
3.     tu kahanggi.

PANGOKUON HAPORSAYAAN K O N F E S S I G K P A


PANGOKUON HAPORSAYAAN
K O N F E S S I
G K P A



HATA HUHUASI

PATUJOLO

ASTUAN, OJAHAN DOHOT TUJUAN NNI KONFESSI

A.     ASTUAN

         Konfessi astuanna: “pangokuon Haporsayaan”. Porlu do adong buku konfessi di parlagutan GEREJA KRISTEN ANGKOLA (GKPA) laho manyaksihon dohot pahotkon haporsayaanta, jana manulak angka poda haliluon.

         Di Parlagutan na parjolo adong do Pangoluon Haporsayaan Oikumene laho mangalo parpoda haliluon. Adong do surat Pangokuon di hatiha ni Reformasi laho mangalo poda ni Katolik Roma. Songon on ma sai marpupu do ganop noli tubu poda haliluon, karejo ni si bolis laho manggaori Parlagutan; sai tubu do angka Surat Pangokuon laho manamparkon poda haliluon na imbaru tubu i.

         Jadi angkon tongtong do marpangokuon na imbaru parlagutan laho mangalo angka poda haliluon na sai timbul di hatihana. Laho papitahon parlagutan di hatiha Reformasi, nada hum pangokuon na adong humani dipake halahi; angke asing do rumang dohot pangalaho ni poda haliluon na diadopan ni halahi si hatiha i.
        
         Nada tola tarpodom parlagutan hum mamake pangokuon na adong diadopan sajo. Angkon na sai pararaton jana papitaon do haithana, mardomu tu perkembangan ni jaman.

         Di luar jerman timbul do angka poda haliluon na imbaru mamungka sian taon 1933. Di hatiha I tarsunggul ma angka parlagutan nadi luat i, na mangkilala na so tuk be Pangokuon Haporsayaan na adong sipakeonna laho mangalo angka poda haliluon i.
        
         Gabe dipatupa ma sada pangokuon na imbaru, na margoar :” Die Barmen Thesen” (31-5-1934). Hum panggumgumion ni Kristus i sajo do siauhononkon, jana sialoon do pangajarion ni jolma di parugamoon, songon na nibaen ni si Hitler dohot angka dongan na .
        
         Di negeri belanda pe marusaho do deba parlagutan laho patupahon sada pangokuon na imbaru na marojahan tu pangokuon na dung adong, tapi marsora na imbaru, mardomu tu jaman modern on.

         Marbingkas sian angka poda dohot pangalaho na ro manyosak haKaristenonta di hatiha on angkon tubu ma di hita hagiot laho manulak jana manamparhon angka i.

         Mardomu tu si di parlagutan GKPA na ta haholongi on angkon adong do pangokuon Haporsayaan na marisi poda na polin, hombar tahajongjongkon sian mulana. Ima na gabe hajongjongan dohot siihutkononta.

         Laho patupahon pangokuon haporsayaan ni parlagutanta on, on ma dasar pamikiranna :
1.      haporsayaan ido manubuhon pangokuan, songon na nidok ni Rasul Paulus tu halak Korintus “madung porsaya do hami, harani I mangkobari hami” “porsaya au, gabe hara ni I do mangkobari au”.(2 kor 4:13).
2.      angkon mayaksihon do parlagutan maradopkon portibi on, songon na nidok ni Rasul Petrus : “Tontong ma hamu singkop mangalusi di barang ise pe na manyapai hamu taringot tu arop ni roha na di bagasan hamu” jana angkon singkop do hamu tontong laho mangalusi sanga ise na manyapai hamu taringot tu pos ni rohamunu di angka na niarop ni roha munu sian Tuhan.(1 Petrus 3:15). Laing songon I do di 1 Tim 4:6”: “muda di pajojor ho I angka dongan, jadi na poso na denggan di Jesus Kristus ma ho, di ajaran di bagasan hata ni haporsayaan dohot poda na denggan, na nidihutkonmunu salolot nai”.“Muda di jarkon ho sude nai tu angka dongan na porsaya, gabe pangoloi na denggan ma ho markarejo di Jesus Kristus. Jana angkon pupuonmu do padenggan rohamu hombar tu hata ni Debata na tahaporsayai i dohot angka pangajaran na sintong na dung di ihutkon ho sahonokna on”.
3.      si paingot do I maradopkon poda na mangaliluhon ( Joh 4:1-6)
4.      Diigil hasadaon di bagasan ngolu haKaristenon do hasadaon di pangokuon haporsayaan (Eps 4:5; Joh 17:21).
5.      Arga situtu do I muse siteanon ni pomparan ni parlagutan I ( Pangarataion 6:7)

         Buku na badia I, I ma (parjanjian na Honok ) dohot ( parjanjian na imbaru ) I do na marisi hata ni Debata na nisuratkon ni tondi parbadia do.na tarsurat di buku na badia I, na nidok ni Debata doi, angke harana ni Debata do I, na markuaso jana marhagogoan.

         Buku pangokuon haporsayaan on pe markuaso jana marhagogoan do, harana na di huhal sian buku na badia do i. Tutu hata jolma do na manyusunsa, tapi na marojahan do I tu hata Debata ( 1 Korintus 2:13; 2 Tim 13:16-17; 2 Petrus 1:19-21)

1.Ia buku pangokuon haporsayaan ( konfessi) ni GKPA on hombar tu konfenssi na dung adong humani, I ma konfessi na tolu I, pangokuon na angka ama ni parlagutan na parjolo I, angka na nigoaron :

1.1    Pangokuon Apostolicum
1.2    Pangokuon Niceanum
1.3    Pangokuon Athan nasianum

2.Ia pangokuon haporsayaan on I ma :
2.1      pangibulan ni na tahaporsaya I dohot na taarop do ngolunta on dohot dihangoluan sogot
2.2      Ojahan ni GKPA na gabe sipodahononkon, sihajongjongkonon dohot sihangoluhononkon .
2.3      Ojahan ni GKPA laho manulak dohot mangolu sasude poda na asing dohot poda haliluon na maralo tu hata ni Debata.

B.     OJAHAN

         Buku na badia I  ima parjajnjian na Robi / Na Honok dohot  Parjanjian Na Imbaru ido na marisi Hata ni Debata na nisuratkon ni Tondi Parbadia do na tarsurat di Buku Na Badia I, na nidok ni Debata do I,harana hata ni Debata doi namarkuaso jana namarhagogoan. Buku pangokuan haporsayaan on pe markuaso jana namarhagogoan do,  harana na niuhal sian buku na badia do i. Tutu hita jolma do namanyusunsa, tapi namarojahan si tutu do I tu hata ni Debata ( 1 kor 2 :13;2 tim 13 : 16-17;2 petr 1 : 19-21 ).

C.     TUJUAN
         Anso sude ruas ni parlagutan mangastui aha na ni haporsayaanna anso sude ruas manulak naso hombar tu na ni haporsayaanna huhut doi na gabe alat hasaksian, patoguhon haporsayaan, sinjata laho manulak angka poda haliluon dohot muse anso mur tu polinna pangajaran ni angka gareja. Patut do undukkononkon ni angka ruas ni parlagutan i kuasona i, di bagasan lapang ni roha, jana ulang di pamate panggora ni roha. Angkon bebas do ganup ruas manangkasi pangokuan haporsayaan i. Muda adong dumpangasa disi na maralo sanga na so hombar tu Hata Na Badia I, di hatahon ma i tu na manguluhon parlagutan i.



Ponggol 1
PANGOKUON TARINGOT TU DEBATA

Taoku jana tahaporsayai do :

Sada do debata, na so marmula jana  na so marujung. Pargogo na so hatudosan, na so maruba, haposan, parbinoto na sun, na so hadodoan, paruhum na tigor, Parasi roha na sumurung, Pardenggan Basa, Ibana do manggohi langit dohot tano, Parroha na tigor na Badia situtu, Parholong roha, Ama na manangihon tangiang, Sipasingkop na hasaya, jana Siparmahan. ( 5 Musa 6 : 4 ; Pangarataion 6: 4 ; Jes 44 :6; 2 Musa 3 : 14a; Haruruar 3 : 14a ;1 Musa  17 :1; Pamungkaan 17 : 1; Masmur 105 :8 ) 2 Tes 4 :3; Luk 1 :37; Pangarataion 10 :17; Rom 2 :11; 1 Kor 1 :30; Mas 103 : 8; Mas 24 : 1; Jes 6 : 3; Joh 3 : 16; Tim 6 : 15- 16; Joh 11: 22; 16 : 23; Plp 4 : 6 -7; Masmur  23).

Marhite poda on tatulak do hasomalan na mandok:”Ompung” tu Debata dibagasan pangkilalaan na mangarujungi na hum pardenggan Basa do Debata, dohot roha na manghaposi na tarbaen do ro pasupasu sian somangot  ni “Ompu” songon na nihasomalkon  ni halak sipelebegu. Laing songon i muse na manjujur ari, na mangarunding dohot sian Holong ni  RohaNa.

1.Hadirion ni Debata

Taoku jana tahaporsayai do:
Sada do debatanta, jana na sitolusada do i, i ma Debata Ama, Debata Anak, dohot Debata Tondi Parbadia. ( Joh. 5 : 19; 14 :11; 1 :1; 15 : 26; 2 Kor 13 :13; Mt 28 : 19 ).

Na nitubuhon ni Ama I do Anakna sian hadirionna sandiri sian mula ni mulana ro di salolot  ni lolotna, mandok: “Apala suang songon Ama I na so marmula jana na so marujung, laing songon  i do bope Anak i. Laing na so marmula na so marujung muse do Tondi Parbadia i. I ma na ro sian Debata Ama dohot Debata Anak i. (Joh 15, 26 ).

Marhite poda on taalo jana tatulak do pangantusion, na mandok: “Hum sada do Debata dibagasan pangantusion  na mandok: “Ia hadirion  ni sitolusada i, I ma: Debata Ama, AnakNa Tuhan Jesus Kristus dohot Ina Tondi Parbadia”.

  1. Karejo ni Debata
     
      Taoku jana tahaporsaya i do:

  1. Debata Ama do na manompa, manyarihon dohot manggomgomi sude na tarida dohot na so tarida pe. Marhite sian poda on tatalo jana tatulak do poda fatalismus, i ma: takdir, suratan dohot bagian.
  2. Debata Ama do gabe jolma, na nitubuhon ni Tondi Parbadia, na ni anakkon ni bujingbujing si Maria, na nigoaran Tuhan Jesus. Jadi gabe dua pangalaho dumping di ibana, i ma: Ha- DEBATA – on – JOLMA- on  dibagasan sada diri, na so bolas sirangon. Debata situtu do Kristus, tapi laing jolma situtu muse. Na manaon parhancitan do ibana di panguhuman ni si Latus, na nilabangkon di hayu parsilang, laho paluahon hita sian dosa, sian hamatean, dohot sian gomgoman ni sibolis. Na gabe haul na so tarsinsal do ia  baen pardenggan tu Debata hara ni sude dosa ni hajolmaon. Na manuat do ibana tu banua toru, dung ditanom, na mulak mangolu di ari patoluhon, manaek tu banua ginjang juguk di siamun ni Debata Jahowa, Amana i, na marhasangapon salolot ni lolotna. Di banua  ginjang do ia mangondihon  hita, dohot mangomgommi sudena. Lopus tu na mulak ia musa tu  tano on manguhumi na mangolu dohot na mate. ( Mt 28 :19; Eps 1 :20 -22; 1: 7; Joh 3 :19; Lbr 9 :14; Plp 2 : 6- 11 ).

Marhitehite poda on tatulak do angka poda na mandok:

  1. Na bolas do ina ni Tuhan Jesus, na nidok na badia manangiangkon hita tu Debata.
  2. Adong na tarbaen manghaulkon Kristus
  3. Nada adong jolma ( Paulus di tano on ).
Dung i tatulak do pikiran ni jolma padoskon Tuhan Jesus dohot angka Nabi panurirang na adong di portibi on.

  1. Debata Tondi Parbadia do na mamiohon dohot mangajari ruas ni Parlagutan i, jana pahotkon di bagasan haporsayaan dohot habadiaon marhitehite Jamita Na Denggan I baen hasangapon ni Debata (Roma. 8 : 14-17; 1 kor 3 : 16. Patudos muse astuan ni haporasayaan ponggol patoluhon ).

Marhitehite poda on tatulak do angka poda na mandok: “Tarbaen do songgop Tondi Parbadia tu jolma marhitehite sian usahona sandiri, so pola marhitehite jamita na denggan I”. Laing songon I muse taalo jana tatulak do poda na mandok: Hum marhitehite nasiarsiaran dohot na marhata sileban do songgop Tondi Pabadia. Laing suang songoni muse taalo jana tatulak poda na mandok: “Nada pola porlu marubat tu dokter angka na marnyae. Tuk ma muda martangiang iba tu Tondi parbadia”. Tatulak jana taalo do na mambaen panyurirangon gapgap, mangasahon Tondi Parbadia, parsaoran na solpu – solpu dohot matorbang tu  hara ni na dung digohi Tondi Parbadia halahi  [pandok ni halahi.
Sude sialoon jana situlahon, I ma angka: PODA MANGASAHON GOAR NI TONDI PARBADIA DI NA SO TURE DALANNA.

3. Hata ni Debata

Taoku jana tahaporsayai do:
Ia hata na tarsurat di Buku Na Badia i, i ma ( Parjanjian na Honok dohot Parjanjian na Imbaru ) TUT U SITUTU DO I HATA NI DEBATA.
Dibaen nada ni suratkon sian roharoha ni jolma, tapi na di bagasan ni panogu-noguan ni Tondi Parbadia do na manyuratkon i. ( 1 Petrus 1 : 21 ).

“ Sude surat na nilehen ni Debata do i, jadi hasaya do gabe poda, dohot pamincango, dohot na padenggankon, dohot na mangajari di bagasan hatigoran. Anso sanggam halak ni Debata jana tumbuk tu sude parkarejoan na denggan i”. ( 2 Tim 3 : 16 – 17 ).

Marhitehite on taondolkon do : Na dung singkop do Surat Na Badia I papatarkon hadirion ni Debata dohot lomo giot ni rohaNa, jana madung singkop dipodahon si Surat Na Badia i sihaporsayaan ni jolma, dalan parhitean tu hangoluan ni lolotna. (Halumbaan 22:18-19).

Hum Surat Na Badia I do pamungkaan dohot hapaten ni sude pamikiron, parbinotoan dohot parkarejoan di bagasan Parlagutan I, dohot didiri ni na porsaya.



Ponggol  2
TARINGOT TU SURUSURUAN

Taoku jana tahaporsayai do :
Ia angka surusuruan: Na ditompa ni Debata do I, I ma Tondi Pangoloi di Ibana, na nisuruhon hara ni angka na giot manean hangoluan sogot. ( Kol 1: 16; Ibr 1 : 14 ) jana muse laho mangurupi sanga ise halak na giot manjagit haluaan na nijanjihon ni Debata    ( Ibrani 1 : 7, 14 ).


Ponggol  3
S  I  B  O  L  I  S

1. Hadirion ni sibolis

Taoku jana tahaporsayai do :
Ia Sibolis: I ma na pargincat sian na ditompa ni Debata, tondi do i, na didabu sian banua ginjang hara ni ginjang ni rohana; giot dos jana mangoloi Debata, jana gabeSibolis. Digoar do ia, Herub na dimiahan, Sinbolis, Rja ni hasiangan on, Parjahat, Raja Parkuaso di awing-awang, Sipanguji, Siparjahat, Naga jana Ulok ( 1 KOR 21 : 1’ Jes 14: 12; 
Hes 28: 14; Mt 4:1; Joh 12:31; 17: 15; Eps 2:2; 1 Tes 3:5; 1 Joh5:18; Hal 12:7,9 ).


2. Karejo ni Sibolis

Sai di halangi sibolis do angka na porsaya i songon singa na mangaum-ngaum mangalului/ manjalahi sanga ise bondutonna ( 1 Petrus 5:8 ). Angkon aloon do sibolis i marhitehite haporsayaan na togu jana mamake pakean ni Debata, anso tartaon jonjong mangolu angka bisuk ni sibolis i. (1 Ptr 5: 9; Eps 6:11-13; Jak 4;7 ). Harani I ma jana mamoto ma hita di angka tahi dohot uti-utian ni sibolis.


Ponggol  4
J  O  L  M  A

1.Panompaon

Taoku jana tahaporsayai do : Debata do na manompa langit dohot tano on. Nada marumang do pe sudena i jana mamolgit do pangalahona. Dibagasan hataNia do manjadi sude na ni tompaNa, jana dibagasan onom ari Debata Ama manompa na sa jadi-jadianNa.  Ditompa Debata ma jolma I songon diriNa jana suman tuSia. Halaklahi dohot dadaboru jolma dijadihon Debata. Dipasupasu Debata do jolama I jana dipasahat tu jolma I laho mangarajai angka jadi-jadian ni Debata na asing i. ( Pamungkaan 1-2).

2. Mula ni dosa

Taoku jana tahorsayai do :
Sibolis I do mula ni dosa, jana diparsinta rohana anso sude jolma gabe pardosa, na marbalik sian Debata (Joh 8:44; Pamungkaan 3:1-17; Hal 20:10). Jadi haru pe denggan jolma na parjolo i, si Adam dohot si Hawa, angkon patupahon loma ni roha ni Debata hara nipangela-ela ni sibolis I dilaosi halahi do tona ni Debata, gabe marbalik sian Debata. Angke pangalaosion ni Dosa i. ( 1Joh 3: 4).


3.Dosa Teanon

Taoku jan tahaporsayai do :
Dung madabu si Adam dohot si Hawa tu bagasan dosa,taripar do dosa i tu ude turunanna.
Laing harani I do baen na sorang di bagasan dosa sude jolma manusia, jana laing dirajai dosa I sude jolma laho mangalaosi tona ni Debata. Hara ni dosa I do hona uhum jana dapotan hamatean salolot ni lolotna. ( Masmur 51:7; 58:4; Pamungkaan 8: 21; Rom 5 : 12; 3:12-13; Tit 3:5; Joh 3:5; 6:63 ).

Marhitehite poda on taalo jana tatulak do pikiran na mandok, nada mardosa dope anggo dakdanak na baru sorang.


Ponggol  5
Haluaon Sian Dosa

1.Panghopkopon ni Kristus :
 
Taoku jana tahaporsaya I do anggo ngoluon hum asi ni roha ni Debata di sude na jolma.Nada dapot haluaan sian dosa muda holan mangasahon pambaenan na denggan dohot gogo songoni muse dohot pikiran. Tapi hum marhite-hite jana di bagasan asi ni roha ni Debata do dibagasan panobuson ni Jesus Kristus. Ia dalan laho manjagit hasesaan ni dosa i, I ma marhitehite sian  haporsayaan na nipatupa ni Tondi Porbadia,anso diauhon hasesaan ni dosa i na di parade ni Jesus Kristus di bagasan na manaluhon hamatean i.Haporsayaan sisongon i do na dihagiot ni Debata na gabe hatigoran di hita jolma            ( joh 3 : 16;Roma 6 : 23;1 Kor 15 :22;2 Kor 5 : 21 ).

2.Hamubaan ni roha/Ngolu na imbaru

Dibagasan hamubaan ni roha na bolas dohonon ngolu na imbaru, jolma na honok I sanga ngolu na honok I dipaimbaru jana margonti tu jolma na imbaru dohot ngolu na imbaru. Tondi Porbadia do na mangalehen gogo jana na manguluhon jolma I tu hamubaan ni roha dohot marngolu na imbaru ( Luk 1:16-27;17:3; BAR 5:3; 1 Tes 1:8-9;Ibr 6:1; Kol 3:12-16 ).


Ponggol 6
PARPADANAN NA BADIA ( S A K R A M E N )

Taoku jana tahaporsayaido :
Hum dua sajo do sakramen naditonahon ni Tuhan Yesus sipatupaonta I ma: Pandidion Na Badia dohot Pamunan Na Badia.
I do na ditonahon Tuhan Yesus tu Parlagutan, laho pasahatkon marhite-hite tanda na tarida asi ni roha na so tarida, i ma  hasesaan ni dosa,  haluaon , hangoluan dohot hasonangan na nijagit marhite-hite haporsayaan. (Mat 28:19; Mark16:15-16; Mat 26:26-28; Mark 14:22-24;Luk 22:17-20;1 Kor 11:17-34 ).

Marhite-hite sian poda on, ta alo jala tatulak do poda na mandok : Adong do pe Sakramen na asing sian na dua i.

A.Pandidion Na Badia :

Taoku jana tahaporsayai do:

Ia pandidion Na Badia I parhitean ni asi ni roha ni Debata do i tu hita jolma, angke marhite-hite pandidion I do sahat hasesaan ni dosa i tu na mangkaporsayaisa, hatutubu padua nolihon, haluaan sian hamatean jana dapotan hasonangan na salolot-lolotna.
Marhite-hite sian poda i tasaksihon do: Sipandidihononkon do dohot dakdanak na baru sorang : angke marhite-hite sian i do ni pamasuk halahi tuparlagutan ni angka na dihopkop ni Kristus, mardomu muse do I panjagiton ni Tuhan Yesus di angka dakdanak,

Laho mamasu-masu halaki ( Mark10,14;Luk18:126). Tamba ni i nada pola sai husopkononkon tu aek mandidihon (BAR 2:41;10,48:48:16,33; Roma 6:3-4 1 Kor 10:2;Tit 3:5; Ibrani 11:29; 1 Petr 3:21 ).

B. Pamunan Na Badia:

Ia pamunan Na Badia i ma: Mangan roti parhitean ni pamatang ni Tuhan Jesus Kristus, dohot minum anggur parhitean ni mudar Na; anso tarjagit hasesaan ni dosa, hangoluan dohot hasonangan. ( 1 Kor 11 : 17- 34; Mat 26 :26 – 28; Mark 14 : 22 – 24; Luk 22 : 17 – 20 ).

Marhite- hite sian on, taalo jala tatulak do poda na mandok: hum roti I do silehenon tu ruas ni parlagutan I nada dohot anggur i. Jana na ganop noli do sai dihaulkan Tuhanta Yesus di bagasan na nipatupa Pamunan na Badia i. Angke songon on do pandok ni Tuhan Yesus di na patupaNia Pamunan Na Badia i “Sude ma hamu minum sian on”.Laing i do diihutkon Parlagutan na Parjolo i ( 1 Kor 11 :24 – 25 ).


PONGGOL 7
ARI PARPUDI
.
1. Haroro ni Jesus Kristus

Taoku jana tahaporsayai do:
Na ro do tuhan Jesus Kristus di ari na parpudi laho manyungguli angka nadung monding (Joh 5 :28; 1Tes 4 : 16; Mat 24 ; 3; Luk 21 : 28; Halum 20 :11 – 15 ), laho manguhumi nasa jolma ( M,at 25; 1 Kor 15 : 52; 2 Kor 5 : 10 ). Disi ma pioonNa angka na porsaya laho manean hangoluan na salolot ni lolotna. (Mat 25 : 41 )
Tapi anggo tu angka na so porsayai dokkononNia ma din a paorot halahi: Morot ma hamu sian ahu, hamu angka na marjaya, tu api na salolot ni lolotna, na nipauli di sibolis dohot di surusuruanna”. ( Mat 25 : 41 ). Hot ma disi jambar ni na porsaya I dilambung ni Debata ro di salolot ni lolotna. ( 1 Tes 4 ; 17 ).
Marhite poda on, taalo jana tatulak do poda na mandok: Na bolas do baenon ni jolma paretongan na manontuhon ombas haroro ni Kristus paduanolihon. Tambani i, tatulak dopoda na mandok: Na adong dope hatiha parasian dung monding jolma i. Taalo jana tatulak do muse muda adong na mangoku nada hum Tuhan Jesus Kristus panguhum na tigor i. Sandok taondolhon do: Di hatiha na so di ambang do haroroNa. ( 1 Tes 5:2; Mat 6:4,16), angka hata na tarpadongkoni. (Mat 12 :36 ).

2. Surgo dohot ngolu na manongtong

Taoku jana tahaporsayai do: Surgo I ma inganan ni Debata dohot inganan ni angka na porsaya tuSia jana angka suru- suruan marsomba tuSia. (Bar  26:15;Mat 5: 45; 6: 9,20;7:21; Nehemia 9 : 6; Makus 23:32). Debata do na na markuasa dohot na marharajaon disi. Surgo i ma inganan ni ngolu na manontong I marhite nadisuru Ia anakNa na sasadai, i ma Kristus tu portibi on. Haranai haluaon na nipatupa ni Tuhan Jesus Kristus, ngolu na manongtong dipasingkop Debata di hatiha masa Jerusalem na  imbaru, di naro Tuhan Jesus Paduanolihon. ( 2 Petr 3: 10- 13; Halum 21 : 1).

Mahite poda on, ta alo jana ta tulok do poda na mandok: Nada adong surgo ngolu na manontong i; harani pambaenanhu do umbaen na masuk au tu surgo, hujagit hangoluan na manongtong i.




                 

Ponggol 8
PARLAGUTAN

Taoko jala tahaporsayai do :

A. Ia parlagutan I na ni pajongjong na Tuhan Yesus Kristus do I gabe pardomuan ni angka halak na porsaya di ibana, na nipioNa, dipalagut-lagut, na diparbadiaan jana dipatong-tong ni Derbata marhite-hite tondi parbadia. ( Mat. 16,18; 1 Kor .1,2;        1Petr. 2,9; Efesus 1,22; I Kor .3,16).

Marhite-hite poda on ta alo jana ta ulak do :
  1. parlagutan ( sada kumpulan ) na pajongjong ni jolma do I sian giot-giot dohot tahi-tahi ni rohana sandiri ; na manyirang dirina sian parlagutan humami , sobagi hara nadung masa diparlagutan I poda na maralo sanga na so hombar tu hata ni Debata .
  2. Pikiran na mandok ; Hum kuaso uluan ,angka rapot-rapot dohot hak ni ruas do na manggomgomi parlagutan; angke hum Kristus do na markuaso di parlagutan, jana hum aturan na hombar tu hataNa do siihutkon . nada DEMOKRASI na mangarajai parlagutan tapi KRISTOKRASI do.
  3. Pikiran na mandok ; anson huria Negara parlagutan I angke asing kewajiban dohot tugas ni Negara sian tohonan dohot tugas ni parlagutan.
  4. Pikiran na mandok : kumpulan namarondolkon dohot namarihot tu parlagutan hara ni organisasi sajo.

B. Na badia do parlagutan i.

Dalanna baen na nigoran parlagutan I na badia , nada anggo harani habadiaon ni angka ruasna I sandiri, tapi harani habadiaon ni Kristus , ului do, jadi gabe badia do parlagutan I , harani na ni parbadian ni Kristus, jana na di rajumi ni Debata do halahi na badia . harani habadiaon ni parlagutan I do dibaen na digoaron bangso na badia ,bagas ni Debata dohot joro ni Tondi parbadia .( 1 Petr .2:9; Epes .2:22; Halumb .1 :6; Epes 3:21; 1 Kor. 3:16 ).

Marhite-hite sian poda on ta alo jala ta tulak do poda na mandok : harani karejo dohot  pambaenanna sandiri do dapotsa habadiaon , laing I muse pandelean dohot parsirangan na masa , harani adong ruas ni parlagutan I diida na mambaen dosa .

C. Hatopan do parlagutan i.

Ia parlagutan hatopan I, I ma parlagutan ni naporsaya , saroha bope satondi do halahi, angka na dung parjambar di Tuhan Jesus Kristus dohot silehen-lehenNia, Ima jamita Na Denggan, tondi parbadia, haporsayaan, haholongan dohot arop ni roha Ima na angkon na sian ganop luat songon bangso, marga dohot dila harupe marasing-asing ceremonie dohot ruhut-ruhut na be .(Bar .4:32; Halumb7:9).

Marhite-hite poda on ta alo jala ta tulak do pangastuion; na mangarajumi parlagutan I songon ugamo parbangsoan dohot na mamikiri na so adong do pardomuan ni parlagutan on tu parlagutan adu.

D. Adong parlagutan, marojahan do I tu Ep.4:4; 1 Kor.12:20. angke sada do pamatang I, I ma parlagutan i. Bahat sannari goarna, tapi hum sada pamatang do I, asing sian hasadaon portibi na somal, angke hasadaon partondion do I. ( Joh .17:20-21 ).

Marhite-hite sian poda on a alo jana ta tulak do; nasa parsirangon na so marondolkon tu poda haporsayaan, tapi hum marajohan tu ruhut-ruhut parduru sajo.

E. Tanda ni parlagutan natutu :

Ia tanda ni parlagutan natutu I ma ;
  1. Muda polin dijamitahon na denggan i.
  2. Muda sintong di padalan sakremen na dua I, songon na disuru ni Tuhan Yesus.
  3. Muda dipadalan ruhut parmahanion-pamincangon laho mangambati angka dosa.


PONGGOL 9
PARKAREJO NI PARLAGUTAN

Taoku jana tahaporsayai do:

Sude halak Kristen tarpio gabe saksi ni Kristus, laho mangkarejohon angka langgaman di tonga- tonga ni parlagutan i. Dipio Debata do marhite-hite Parlagutan I angka parkarejo,laho mangkarejohon hombar tu tohonan Hamaloimon.

Panurirang  dohot pangajarion ni kristus na tolu di bagasan parlagutan I ( 1 Kor .12,28 ).

Angka tugas ni pakarejo,I ma :
1.      Manjamitahon jamita na denggan I tu ruas ni parlagutan I, dohot tu na so masuk ruas dope.
2.      Mandalankon Sakramen na dua i, ima Pandidion Na Badia dohot pamunan Na Badia
3.      Marmahani tondi ni ruas Parlagutan i ( Seelessorge ).
4.      Pahot kon Poda Na polin Marhite-hite sian Pamincangon partondion dohot mangalo Poda Haliluon.
5.      Padalankon parasi Ni Rohaon ( Diaconie ). Tu angka Karejo si songon i ma di pabangkit di bagasan Parlagutan i Apostel,Panurirang,Evangelis,Parmahan dohot Guru.( Ep 4 :11 dohot diakon (Bar 6 ).


Marhite-hite poda on ta alo jana ta tulak do : Pikiran Ni halak namanulak , dohot mansuadahon langgam ni parkarejoan harani partimbangan-partimbangan ni rohana sandiri.Marhite-hite on ta alo jana ta tulak do : Sanga ise pen a da tola jongjong di parlagutan i laho marjamita,mangajari dohot mandalankon langgam parkarejoan ni parlagutan i sanga na di suru ni parlagutan i markarejohonsa.


PONGGOL 10
PARATURAN NI PARLAGUTAN

Taoku do :

Angkon adong do aturan ni parlagutan na marojahan tu Hata ni Debata.Angke sada parkokas do i laho mambaen renta jana sonang parlagutan i ( 1 kor 14 :33 ) Mardomu tusi, si pestahononkon do pesta Hatotopak, Hananaek, Hangongot dohot hamatean ni Tuhan ta Yesus, Songo I muse dohot Pesta Haroro ni Tondi Parbadia. Tapi angkon tangkas do ingoton : Nada haringgasonta mangkarejohon sude na i mambaen taruli hita di hasesaan dosa.



PONGGOL 11
HARI MINGGU


Siparbadiahononta do hari minggu :

“Ari ni Tuhan i ” ,Ari parmulaan di panompaon ni Debata ,Ari Hangongot ni Tuhan Yesus dohot Ari Haroro ni Tondi Parbadia,na nipestahon ni halak Kristen sian mulana jongjong dope parlagutan i.jadi na mulak be hita tu sabat ni jahudi ;Angke halak Kristen do hita .

Marhite-hite poda on ta alo jana ta tulak do poda na mandok :Ari sabtu do sabat si parbadiaan.



PONGGOL 12
PARNINGOTAN NI ANGKA NA MONDING

Taoku jana tahaporsayai do:

Songon utang ni jolma na so tardalihon, angkon mate sanoli, dung i hona uhum. (Heb 9:27) Namaradian halahi sian baenon ni halahi. (Halum 14: 13).Jana Yesus do Tuhan ni na mangolu dohot na mate.
Jadi ia tarbaen pe parningotan di angka na monding, na marningot ajalta sandiri do hita disi dohot pahotkon arop ni rohanta di hadodomu ni angka naporsaya tu Debata dohot na patoguhon roha do I dingolu nagok parhancitan on (Halum 7 : 9- 17).

Marhite- hite poda on ta alo jana ta tulak do poda ni hasipelebeguon na mandok:Adong do pardomuan ni tondi ni na madung monding dohot jolma na mangolu.Songon i poda namandok:Laing tinggal di tanoman I do tondi ni na dung monding i; dohot markuliang-kuliang di inganan na dung monding i do tondina. Laing songon i muse ta alo jana tatulak do poda na mandok; Api pangurason na angkon boluson laho mangurasi tondi na dung monding, anso tu hangoluan, jana na bolas adong tarpatupa di halak na dung monding, anso sumigop malua sian api pangurason i.

Songon i muse na martangiang tu tondi ni na dung monding dohot mangarop taripar hagogoon dohot habadiaon ni angka na dung monding-tanomanna, pakeanna, barang-barang na(Parmanoanna, reliqui ).


PONGGOL 13
AROP NI ROHA


Taoku jana tahaporsaya I do :

Na mangolu di bagasan arop ni roha do ganop ruas ni Parlagutan i, na disurduhon ni Debata mangihutkaon godang ni asi ni rohaNia marhite-hite hangongot ni Jesus Kristus. (Gal 5:5; Tit 1:2; 1Ptrus 1:3).

Dihorhon arop ni roha i do : Pos ni roha nada angka na marmalu-malu, sonang ni roha hapohomon, hasobaron manaon dohot habadian. (Rom 5:5; 8:24; 15:4; 1 Kor 13: 7; 1Yoh 3:3).

Jana di dasdasi do hita tu: Arop ni roha na so ni ida, hahohot ni haporsayaan, painte-intehon hatutulus ni arop ni roha i, marmomosi pos ni roha i, togu ni roha hara ni baga-baga ni Debata na so ra muba, habadiaan.( Rom 8:24; 15:13; Kol 1:23; Heb 3:6; 6:11; 1Ptrus 1: 11; Mas 31: 24; 42:4; 130: 7 ). Gabe sipanean ni hangoluan na so ra mantak do hita, mangihutkon arop ni roha i. ( Tit 3:7 ).

Marhite-hite poda on ta alo jana ta tulak do poda : na so adong do hangongot sian na mate, jana na mangolu di bagasan angan-angan do angka na marojahan di arop ni roha mangihutkon poda ni ugamo.


PONGGOL  14
HORSAYAAN DOHOT PAMBAENAN NA BADIA (SIPANGANON)

Taoku jana tahaporsayai do :

 Angkon parbatu ni happrsayaan do pambaenan na denggan i. Na lilu do halak muda diarop roha na dapotan hatigoran, hangoluan, apo-apo dohot hasonangan ma ia hara ni karejo dohot pambaenan na denggan sajo. Hum Yesus do na bolas manyesa dosa dohot padomuhon jolma dohot Debata.
Sipatuluson do tona na sampulu i. angke hum marhite-hite haporsayaan do mangolu jolma, asa nada sian na marpambaenan na denggan sajo.Tondi parbadia do na mangajarkon jolma laho patupahon pambaenan na denggan.(roma 5 : 1; Ef 2 :8;Gal 2:16;Rom 3:20,24,5,1).

Nada gabe badia jolma hara ni na patuluskon na nidok di pantang taringot tusi panganon. Angke haporsayaan do manjagit habadiaan sian Debata. Nada gabe jolma na mamantangkon si panganon.i do haranabaen na dialo Apostel Paulus angka tona ni jahudi angka taringotu sipanganon. Nada tola papudion jamita na denggan I hara ni angka pantang-pantang, bope baenon ni angka hasomalon pe.(Mat 15:11;Kol 2:21).

Marhite-hite poda on ta tulak do poda ni angka na mamodahon songon i. tapi haru pe songon I anso ulang mambaen pardandian tu na hurang togu  do pe haporsayaan na jana partuktuhan tu dongan, di na parayakkon gabe hasonangan, jana na padenggan hita sama hita mardomu tu luat hajongjongan ni parlagutan ta, tumbuk jana tama do taparate-atehon na tarsurat di Rom 14:21;” Denggan do muda So dipangan juhut, jana so di inum ho anggur, jana ulang di baen ho bagi na aha,nagabe partuktuhan bagi pardandian di dongan mu, bagi na gale ibana hara ni i”:dohot di 1 Kor 8 :13:” Dibaen I muda mardandi dongan ku hara ni panganonku gonan indangkon mangan juhut be au tu pudi on,anso ulang mardandi donganku hara ni au.



Ponggol 15
TARINGOT TU PAMARENTA

Ta oku jana ta haporsayai do :

Na marharoroan sian Debata do panggomgomi.ima pamarenta na mangalo hajahaton, na panjongjongkon hatigoran anso marsonang-sonang jana so targanggu angka na porsaya I, songon na tarsurat di Roma 13:1-6 dohot 1 Tim 2:22. Tapi laing sai ingot jana saiparate-atehononkon muse do na tarsurat di buku baenon ni angka Rasul 5:29,” angkon hum bahat mangalo I hata ni Debata ulang hata  ni jolma”.
Marhite-hite poda on ta oku jana ta saksihon do :”si tangiangkon di parlagutan do pamarenta anso jongjong dihatigoran.tapi sipatubegehonon ni parlagutan mandalankon tohonan.(Mat 22:21).
Marhite poda on ta alo jana ta tulak do pikiran na mandoh:”Anso Negara keagamaan Negara “,angke :Negara mandalankon tohonana jana Parlagutan mandalankon tohonanna.tambah ni I muda porlu di pangadilan, hara ni na manjalahi hatigoran ni parkaro, songon i muse dina manjagit pangkat, sanga jabatan ,tola do hum marjanji,nada pola marsumpa.


Ponggol 16
ARI PARUHUMAN PARPUDI


Taoku jana ta haporsayai do :
Na rodo Tuhan Yesus Kristus di ari na parpudi laho manyungguli angka na dung monding.(Yoh 5:28; 1 Tes 4:16; Mat 24:3; Lukas 21:28; Halum 20:11-15).Manguhumi nasa jolma (Mat 25: 1; 1 Kor 15: 52; 2 Kor 5 :10). Disima pioonNa angka na porsaya laho manean hangoluan na salolot ni lolotna. (Mat 25 :41).

Tapi ango tu na so porsaya I dokononNia ma di na paorot halahi :”Morotma hamu sian Au angka na marjaya, tu api na salolot ni lolotna, na ni pauli ni si bolis dohot suru-suruan na”( Mat 25:4). Hot ma di si jambar ni na porsayai I di lambung ni Debata ro di salolot ni lolotna.

Marhite-hite poda on ta alo jana ta tulak do poda mandok :Na bolas do baenon jolma paretongan na manontuhon ombas haroro ni Kristus Paduahalion.Tambah ni I : Ta tulak do poda mandok : Na adong do pe hatiha parasian dung monding jolma I. Sandok taondolkon do : Di hatiha na so diambang do haroroNa ( 1 Tes 5:2; Mat 24:42,44; Lukas 12:35-36). Harani I jonggor ma hita paintehon haroroNa I .

Pangokuan Haporsayaan ( Konfessi ) ni GKPA na tasurat di ginjang, di totopkon di Rapot Majelis Pusat GEREJA Kristen Protestan Angkola pada 15-16 April 1977 jana disahkan / di pahot di Rapot Sinode Am IV, 29 Oktober 1980 di Padangsidimpuan. Konfesi GKPA ini kemudian direvisi pada Synode Am GKPA XIV 2003.