Kamis, 10 Januari 2013

Jamita Minggu, 27 Januari 2013: Lukas 4 : 14 – 21

widgeo.net

“Dipasingkop Jesus baga-baga Parjanjian Na Honok”

Minggu Septuagesima
Tanggal, 27 Januari  2013
Jamita : Lukas 4 : 14 – 21
Sibasaon :  Nehemia 8 : 1 - 11

I.Patujolona

Didok sian mulana, muda pandidion ni Tuhan Jesus nada sarupo artina dohot pandidion na somal isara ni tanda haubaon ni roha sangape parjanjian na dung manjagit  kuaso ni Tuhan.  Pandidion napinatupa ni si Johannes maradopkon Jesus ima na gabe tanda pelantikan dohot pangokuan tutu do Anak Ni Debata Ibana jana namangoloi di tona ni Amana ( basa. Matius 3 : 16 – 17 ). Harupe madung mangajari Tuhan Jesus mamungka sian na marumur dua bolas taon, tapi pamungkaan di parkarejoanNia barupe patar dung dipandidihon Ibana.

II. Hatoranganna.

1.     Ayat  14 – 15. Dipungka Jesus ma  
                      karejoNia di Galilea.

Pamungkaan karejo ni Jesus, nada marasing dohot pandohoan ni si Johannes na patorangkon: Pauba hamu ma rohamunu madung donok harajaan ni Debata (basa Matius 3 : 3 ). Laing songon i muse ma nanibaritahon ni Jesus nagok Tondi Ni Debata, mangajari ma Ia di Bagas Joro Ni Debata, mambaen homang-homang roha ni halak na umbegesa harana nada jungada dope dibege halahi jamita nasongoninan. Tutu dibasahon angka malim dohot siboto surat do Parjanjian na Honok i di Bagas Joro i, tapi nada sarupo dohot aha napinasahat ni Jesus. Tontu sapa-sapa rohanta mandok: Aha ma rupo nadung dijamitahon Jesus? Muda tatangkasi aha nadung pinabotohon ni si Simeon di Bagas Joro hatiha dioban si Josep dohot si Maria Jesus dihamenehanna, didokkon ia ma di si, madung rade haluaan ni sandok bangso di bagasan Jesus (basa Lukas 2 : 31 ). Jadi hatiha mamungka Jesus di parkarejoanNa, madung jadi hataridaan ni Harajaan i di sandok bangso, jana sanga ise halak na porsaya di barita i mardame sonang ma roha dohot pikiran ni halahi. Dapot do dibagasan rohanta sanga tarsongon dia pangajaran ni angka malim dohot siboto surat muda di paadop dohot cara ni Jesus mangajari. Angka malim mangajar  tanpa beban moral, tapi muda Jesus mangajari dibagasan Tondi dohot holong na so marpambuat. On ma dasar na mambaen bahat halak mamuji-muji Jesus, harupe muse laing adong na marbalik dipudian ni ari. 

2.     Ayat  16 – 19,  dibasa Jesus ma buku ni
                       panurirang Jesaya.

Muda halak batak mandok; Arga do bona ni pinasa di halak angka na marroha sanga namarastuan, dihalungunkon halak do huta hagodanganna. Angke di si ma hita muse marsuo dohot koum sisolkot, dongan saparmayaman dohot na asing.  Laing songon i ma Jesus andorang so tabege dope arga ni bona ni pinasa. Ke he ma Ia tu huta hagodanganNia Nazaret, tapi nada lupa Ia di tugas sikarejohononNia.  Hatiha dumpang ari Sabat, ke he ma Jesus tu bagas paribadatan, jana somal do rupa di pangisi ni huta i, muda adong tamu sanga na mulak tu hutana, dilehen kesempatan anso dohot marbarita. ( Barangkali di angka dongan parkobas, Sintua, Guru, Pandita, rap taalami do situasi na songon i, terkadang muda sian lojana sanga hara ni sibukna nada tarjagit roha laho manjamitahon turpuk sadari i, tapi hara ni holong dohot sopan ni angka parkobas di huta i, jadi maol sajo manjuasa ). Di pamasa ma nasongon i  tu Jesus, jadi dibasahon Ia ma nadung tarsurat di buku ni si Jesaya ( basa  Jesaya 11 : 1 – 9; 61 : 1 - 2  ).  Tondi ni Tuhan do na adong di Au… Muda tu angka raja di parjanjian na honok dipatupa do pelantikan sangape nanigoaran dimiahi, songon nadung pinatupa ni si Samuel maradopkon si Daud (basa 1 Samuel 16 : 13). Nada hagiot ni si Samuel patupahon na songon i, tapi parenta ni Debata sandiri do na nikarejohonnia.

Madung dimiahi Ia da Au laho mamaritahon Jamita Na Denggan na sian Debata tu halak na pogos, haluaan tu angka na tartangkup, parnidaan tu angka na mapitung, paluahon halak na markancit. Ise do na mamiahi Tuhan Jesus? Ise ma he na puluk pahotkon tohonanNia? Alusna nada jolma patupahonsa, tapi marhite pandidionNia di aek Jordan i, di miahi jana dipalalu ma tohonan sian banua ginjang tu Jesus marhite-hite tanda; Mungkap ma langit, mijurma Tondi Parbadia tu Sia sian ginjang songon darapati, jana tarbegema sora na mandok, On do Anak haholonganKu job do rohangKu mida Ho (basa psl. 3 : 21 – 22).  Marhite na nimiahan I, di pasahat ma tu Jesus tolu tohonan sekaligus :

-  Panurirang ( nabi ). Muda sian  jabatan sanga tohonanon marastuan ma on bahaso na angkon karejohonon ni Jesus parbaritaan. Jana on ma napinatupaNia di huta Nazaret, mambaritahon hata ni Debata, jana madung ditonga-tonga ni halahi harajaan banua ginjang i.

- Raja sanga panggomgomi. Mamungka sian parkarejoan ni Jesus, marlaku ma na nigoaran Teokrasi, Tuhan sandiri ma na mamarenta pardalanan ni ngolu bope secara pardagingon dohot partondion. Ia nadung manompa langit dohot tano, Ia muse ma dohot patotahon sandok haporluan lopus tu na manjagit haluaan na sannari bope dohot na giot ro muse (basa Matius 28 : 18).
-  Imam sanga Malim. Muda di parjanjian na honok, sada malim godang na patut masuk tu inganan na sun badia di bagas joro, angkon na ni undi muse ma i anso dapot botoon sanga ise na patut mandalanhon karejo hamalimon hatiha i ( basa . Lukas 1 : 8 – 10 ).
Jadi na tolu tohonanon ma na ni jagit ni Tuhan Jesus hatiha na nanidokNia: Madung dimiahi Ia do Au.

Sadarion ma hasongtian surat on, astuanna tulus ma tarjadi sude nadung dipabotohon Debata hatiha di padan na honok. Obanon ni Jesus ma pardengganan ni jolma dohot Debata, dapotan asi ni roha ma sandok hajolmaon marhite haluaan na giot patupaon ni Jesus. Ganop halak na markancit hara ni pangalaho ni penguasa, na jotjot manganggap nada porlu halak na pogos, sanga nada masuk etongan tingkat masyarakat rendahan, dipatorang Jesus ma tu halahi bahaso nada si ida rupa sanga jabatan Debata, tapi sarupo do jolma di joloNia muda porsaya halahi ( basa Rom 2 : 11 ).  Haluaan na giot lehenonNia pe laing hombar ma dohot haluaan ni Israel sian tano Babel, di oban halahi mulak tu tano hagodanganna, jana di si ma halahi manjalahi haporluanna si ganop ari. Nada buni be haluaan i, jana nada mabiar be halak masuk tu inganan na sun badia songon na adong di bagas joro ni Debata, angke sude madung patar, jana tarbaen ma sanga ise na giot ro mandapotkon Debata dibagasan hadirion ni Jesus. Lambok roha ni sude na umbege barita i, jana tarbarita muse ma Jesus di sandok luat i, haru pe muse di pudian ni ari laing adong halak na manulak Ibana.

III. Aplikasina.

- Madung ditonga-tonganta harajaan ni Debata, jana sanga ise na porsaya di Jesus berhak dapotan hasonangan a.l. Holong ni Debata, hagogonNia, dohot hasangapanNia. Haru pe laing bahat hamaolon di pardalanan ni ngolunta, tapi taingot ma nadung di pasada Jesus hita dohot Debata.

-  Na patut sikarejohononta hatiha di ngolunta saonnarion i ma : Manjagit Tuhan Jesus na gabe Tuhan jana Sipalua, manghaporsaya i jana patuluskon dohot mambaritahon hataNia, anso sude halak na pogos, na tarkurung, na mapitung dohot na markancit dapotan arop ni roha na manongtong.  Hitape madung di gohi Tondi Ni Debata do markite-hite Tuhan Jesus,  antong tapukkama haimbaruon laing songon pajagitta di taon na imbaru nadung di pasadio ni Tuhanta di hita.

GKPA Resort Jakarta I
Pdt.H.Nainggolan,STh

Jamita Minggu, 20 Januari 2013: 1Korintus 12:21-26

widgeo.net

PERHATIAN KHUSUS BAGI ANGGOTA YANG PALING LEMAH
“MARPARATE-ATEHON HALAK NA UN LAYAS”

Minggu Ephipanias 2
Tanggal, 20 Januari 2013
JAMITA                  :  1 KORINTUS 12 : 21-26
SIBASAON           : MAZMUR 36 :5-12

PATUJOLO :
Sude do hita mamboto olahragawan : BINARAGA. Muda marlomba halahi, sude do bagian-bagian ni pamatang ni halahi di pataridahon. Haranii inda holan urat-urat (otot)  ni tangan, lengan, andora, pat na di argahon ni halahi, tapi sude do angka urat-urat na so haru mararti i idaon, anggo di Binaragawan, tangkas do mamboto hinaarga jana ponting ni angka bagian ni pamatangta i. Marhite  latihan, perhatian khusus gabe jeges ma idaon pamatang ni halahi songon si Ade Ray.

Hamu na ni haholongan dibagasan Jesus Kristus!
Taboto do ulaning bahaso Tuhanta Jesus pe diparrohahon Ia do bagian-bagian ni pamatangta on? Tahaporsayai do bahaso  Ia do na manompa hita ganup. Ia do na manobus hita sian dosa, jana dilehen di hita hangoluan na so mantak ? Marhite i, taboto jana tahaporsaya i do ulaning bahaso ganop hita on mararga do di adopan ni Jesus naung manobus hita marhite mudarNa na arga i?
Muda taboto jana tahaporsayai do hina arga ni ngolunta, disuru do hita anso marsaor dohot donganta sahaporsayaan di Parlagutan i (Gareja) anso tarsusun dohot jeges (tersusun rapih) hita dohot na asing. Por do roha ni Jesus sude ruas ni Parlagutan i, na gale dohot na gogo, na pogos dohot na mora, Parhobas dohot Ruas, saling menopang, marsipaturean, rap tu ginjang rap tu toru, inda adong na merasa ‘warga lebih”. Marhite i ma gabe saksi na mangolu ma hita tu bahat jolma na so mananda holong dohot asi ni roha ni Jesus tu portibion.
Marhite turpuk sadarion di Minggu ephipania 2, dipangido Jesus Raja ni Parlagutan i do anso gabe sada tim na tangguh hita. Muda giot sada pamatang na “utuh”, sada, angkon sude do bagian-bagian ni pamatang rap bekerja bersama-sama. Ulang adong na angkon sipujion, sude karejo/pangkobasion di Parlagutan i angkon ia mangkarejohonsa. Bia do ulaning sugari rap sajuguhan / rap sauduran dohot dongan na torus marnida hita layas ? Pasti na tabo, na sonang. Tapi muda rap marsiargaan do, gabe holpu do na marhuria i. Hara ni i angkon rade do hita di Parlagutan i, “mambaen sangap angka dongan na idaon layas”, memberikan perhatian khusus kepada anggota yang paling lemah.
1. Rap tahaporluhon do sude ruas ni Parlagutan i. (saling tergantung satu dengan yang lain)
Nada tardok mata tu tangan, “Inda porlu ho di au”. Sanga ulu i mandok tu pat : “Inda porlu ho di au”.  Tutu adong do jolma mangolu bahkan mampu mangkarejohon dohot sempurna tanpa tangan sanga pe pat. Contona, para pejuang, na kecelakaan gabe so marpat sanga pe tangan. Dungi ra taboto do carito ni si Bonnie Consolo na tubu tu portibion tanpa tangan (lengan). Tapi bisa do ia mardahan, manyupir, berbelanja, dna bahkan manghaol anaknia marhite pat nia.
Tutu bope bisa pamatangtaon berfungsi, mardalan dohot jeges bope adong bagian-bagian ni pamatangtaon inda adong be, tapi anggo ParlagutanNa, nada dirancang anso songon i. Justru anso sude do bagian-bagian ni pamatangta on, saling tergantung, saling membutuhkan satu dengan yang lain. Di Roma 12 : 5 didok : “Laing songon i do hita. Haru pe bahat hita, laing sada pamatang do hita dibagasan Kristus, tapi laing goar-goaran do na sada tu na asing”.
Marhite  i giot dohonon ni si Paulus, tutu berhasil jana tarhatotong do iba di hamaloon ni si Bonnie Consolo laho paturehon dirina, karejo dohot  keluargana, tapi sanga na bia pe tong do dohononta bahaso inda adong be tangannia. Harani i angkon mur ingotonta do, muda giot denggan do mardalan Parlagutan i, angkon saling tergantung do hita di huria i. Tahaporluhon do sude nasa na adong di Parlagutan i, na malo dohot na oto, na kayo bope na pogos, na bahat hamaloonna dohot na otik dstna… Debata amanta i marnida jana marhite habisuhonNa i, diboto do bahaso hita on di huria i saling membutuhkan, rap manghaporluhon, na sada dohot na asing. HataNa mandok : “Tangkas ma hamu antong marsihaholongan sama hamu songon halak na martinodohon, jana marsijolo-joloan ma hamu marsipasangapan” (Roma 12 : 10), “Marsiurupan ma hamu mamorsan boban na dokdok i, songon i ma baen hamu patuluskon parenta ni Kristus” (Galatia 6 :2)
Antong marsihaholongan ma hita.

2. Disusun Debata do pamatangta i
    sadenggan-dengganna.
Nada dipaboa si Paulus angka bagian dia do sian pamatangta on angka na layas, na so haru mararga, na so jeges. Tapi bahat do mandok maksud ni si Paulus i ma organ halus songon mata, dohot organ internal (songon jantung).
Muda tutu doi maksud ni si Paulus, tontu ma taboto porlu ni mata dohot urat ni pusu-pusu (jantung). Muda so adong do i, susa do hita mangolu. Hurang parnidaan, bahat do hinorhon ni i. Songon i dohot jantung, muda marnyae i, susa do ngolunta. Sahit mata sanga pe sahit jantung maroban tu hamatean do i. Na paling menarik jungada do ditangiangkon si Daud tu Debata anso diondingi Ia si Daud songon anak ni mata ni Tuhan. (Bd. Mazmur 17 : 8).
Nada jungada tapadiar, sude bagian-bagian ni pamatangta. Nada jungada enek, sanga pe layas rohanta disi. Tapature, tapaias, tarawat jana tabaen do sagogo-gogona laho mambaen na denggan tu sude bagian ni pamatangta, so mardia imbar. Angkon songon i ma baenonta di Parlagutan i. Ulang adong na tapadiar sada pe ruas i. Rap taparate-atehon anso sude ambil bagian laho pamajuhon Parlagutan i.

Aha na masa di Korintus, bisa do masa di Parlagutanta, hara ummalo, umpistar, jumeges ngolunia, jumeges sora nia dstna… gabe ia sajo na menonjol di huria i, seolah-olah nada dihaporluhon be angka na asing i. Gabe ‘penonton’, ruas na ‘burju’, na jungada mambaen sanga aha be di huria i. Ro tu gareja, juguk jeges, marende, maribadah burju, bayar persembahan bulanan dohot angka na asingi, tapi sanoli nari nada adong dohot ia mambaen sanga aha pe, jeges dehe i? hata ni Tuhanta mandok : INDA!!!.

Nada muda malo iba di sude, i ma na lebih waahhh, inda! Justru angka bagian-bagian na layas, na so jeges, na so mararga, tusi do perhatian khusus tabaen. Na he talului do kacamata na jeges laho mambaen jeges matanta ? na he tabaen do pakean tu angka bagian-bagian ni pamatangta na so haru porlu idaon ? Di pasu-pasu Debata do sude bagian-bagian ni pamatangta, jana rap tahaporluhon doi.

3. Rap dipuji jana dipasu-pasu Debata do
 
    sude Ruas ni Parlagutan i.
Di rancang jana di susun Debata do pamatangta on anso marsipasari-sarian. Rap horas, rap torkis jana muda adong na marnyae, gabe marnyae sudena. Muda dipuji, dipasu-pasu tanganta, ba sude do bagian-bagian ni pamatangta manjagit hormat dohot pujian.
Na sangat menarik sude do bagian-bagian ni pamatangta saling merawat. Pikiranta paboahon aha sikarejohon ni angka bagian ni pamatangta. Ginjal menguras racun na masuk, paru-parunta maroban oxygen na tahaporluhon, ate-atenta mamompa mudar na gok nutrisi tu sude bagian ni pamatangta, system pencernaanta paradehon energy na porlu dstna…. Marhite  i sude do goar-goaran ni pamatangta i saling kait-mengkait di tompa Debata.
Songon i do dohot parlagutan i. Muda dilehen do karunia mangajar Sikola Minggu, jop ma rohanta, muda karunia marende do ba burju ma hita marende, muda martangiang do sian nasa rohanta ma martangiang. Muda burju mangalehen, ulang ma angkon dipuji-puji. Rap marsiargaan ma hita di Huria i. Angke rap pasu-pasu na sian Debata doi sudena. Inda adong hara ni malonta, hara ni na lebih hita sian angka jolma/warga na asing. Tuhan Yesus do sumber ni sude pasu-pasu, anso jop rohanta mangalehen tu harajaonNa.

Songon i mude do muda marnyae iponta, sude do pamatangta marnyae. Muda hancit pe ulunta, dohot do ipon hancitan. Pokokna sude do goar-goaran ni pamatangta arga di hita, inda adong na so porlu. Songon i do dohot pamatang ni Kristus i ma Huria i, Parlagutan i. Sude Ruas, arga do jana angkon rap dihaporluhon do. Antong rap mangalehen ngolunta ma hita di parlagutan i. Ulang adong na mandao-dao. Didok Hata ni Tuhanta do : ….Angke sanga ise na ummenek sian hamu, ia do na gumodang (Lukas 9 : 48c).

Tahaporsayai do muda jeges do mardalan Huria i, gabe adong do na manjagit pujian. Ulang pola gabe iri, hancit rohanta disi. Angke na rap dapotan jop ni roha do hita disi. Muda dipuji Sikola Minggu, hita do nampuna i, muda dipuji angka Punguan Ina, Ama, Naposobulung dna, rap dapotan do hita disi. Hara nii ulang adong na merasa minder hara inda sarupa karunia, silehen-lehen ni Debata tu hita ganup. Tahasonangkon jana rap marsiurupan ma hita di Parlagutan i.

PANUTUP.
Minggu Ephipania 2 ma hita sadarion, na marlapatan ma i bahaso madung mur tangkas taida Hamuliaon, hasangapon ni Debata dibagasan Jesus Kristus na manyondangi tanoon dohhot hita Parlagutan i.  Markarejo do Tondi Porbadia di ganup parlagutan i marhite na mangalehen silehen-lehen (karunia) tu ganup ruas ni parlagutan i. Inda adong Parhobas sanga Ruas na  ummarga. Rap mararga do hita sude. Rap dihaporluhon Parlagutan i do sude parhobas dohot Ruas ni Parlagutan i, bahkan angkon malo do angka Parhobas laho memberdayahon, mamanage sude Ruas ni Parlagutan i. Anso sude ambil bagian laho marhobas di parlagutan i.
Muda adong na merasa menek, pogos, dangol na mararti ia, Hata ni Tuhanta mandok tingkion, ARGA do hamu. Dipasu-pasu jana diperlengkapi Debata do hita be marhite Tondi Porbadia i. Harani I beta bo talehen na dumenggan tu parlagutan i, anso rap dapotan pujian hita. Amin.

Pdt. AHJ. Sibarani STh
Medan