JAMITA BONA TAON EPHORUS GKPA

JAMITA BONA TAON  1 JANUARI 2011 TAPUJI MA DEBATA NA MAROBAN HALUAAN DI HITA Jamita         : Lukas 4:16-21 Sibasaon     : Masmur 121:1-8                                                    PATUJOLO Selamat Taon na Imbaru ma di hita sudena! Damang, dainang na nihaholongan ni Tuhanta Jesus Kristus! Dibagasan serep dohot toruk ni roha tapasahat ma roha tarimkasi dohot puji-pujian tu Tuhanta pardenggan basa i, na manogu jana mandongani hita manaripari  taon 2010 i, bolkas hita tu bona ni taon 2011 on. Tangkas do tapangkilalahon holong ni roha ni Debata dipardalanan ni ngolunta atik pe nian laing adong dope angka hamaolon dohot angka parungkilon na taadopi. Saluhut ragam ni na masa i tajagit ma i gabe pangalaman na mararga laho mandalani angka ari na giot ro. Saonnari madung masuk hita tu bona ni taon na imbaru on, pungkaonta ma mandalani taon 2011 on marojahan tu hata ni Debata na tarsurat di Lukas 4 : 16 – 21 di bagasan tema “Tapuji ma Debata Na Maroban Haluaan di Hita.” Dipuldit do tema on marningot na dung masuk hita tu taon palimahon sanga taon parpudi di periode on, ima periode “Bergiatlah Dalam Pekerjaan Tuhan” (I Kor 15:58b) Di taon 2006 tapungka do tadalani periode on dohot tema “Jamitahon ma Jesus do Haluaan i (Luk 2:22-40).” Di taon 2007 ditogu hita dohot tema “Pos ma Rohamu, Au do Mandongani Ho (Haruruar 3:12“  ima tema na patoguhon dohot na paposkon roha  laho mandalani sada taon pardalanan na imbaru. Masuk tu taon 2008 mardalan hita dibagasan tema “Marpos ni Roha tu Debata” (Masmur 127:1) ima sada soso tu ganup ripe di GKPA anso mangolu dibagasan pos ni roha tu Debata.  Di taon 2009 mardalan muse hita dohot tema “Parkarejo na Tama di Debata” (2 Tim 2:15-19). Jana di taon 2010 marjop ni roha hita dibagasan panoguon ni tema “Ligi Jana Dai ma Denggan Basa ni Debata” (Masmur 34:8-11).  Tema na manyosoi hita laho mandok tarimakasi tu denggan basa ni Debata di na masa sijop ni roha bo parungkilon, anso tongtong gomos martangiang dohot marpangkirimon na mangolu tu Debata. Angke dibagasan na songon i do ligionta jana daionta denggan basa ni Debata. Sadarion, di na masuk hita tu taon 2011 on tama do taparade  rohanta laho mangadopi angka karejo na godang na giot sitohapanta di taon on, ima: Kebaktian Ucapan Syukur 150 taon Ha-Kristenon di Luat Angkola, na giot patupaonta di sekitar bulan Juli 2011 na giot ro. Di na marningot hita tu  asi ni roha ni Tuhan na mangalehen haluaan  tu Bangso Batak, haluaan sian sihapelebeguon marhite hataridaan ni parkarejoan ni Tuhanta na manogu Simon Siregar dohot Jakobus Tampubolon tu sondang hatiuron ni Tuhanta di taon 1861. Ihut tu Kebaktian Ucapan Sukur on laing patupaonta do Synode AM XVII GKPA, sanga na tagoari Synode Periode laho mamuldit angka pimpinan di GKPA na giot manguluhon hita. Pos do rohanta sude karejo on na gabe parhitean ni Debata ma on laho patuduhon denggan basaNa tu GKPA, anso mur marsangap jana marmulia Goar ni Tuhanta Jesus Kristus ulu ni Parlagutan i. Damang, dainang na nihaholongan ni Tuhanta Jesus Kristus! Turpuk jamita di hita sadarion ima na manaringoti parkarejoan ni Tuhanta Jesus na maroban barita haluaan tu bangso-Na. Barita haluaan on madung lolot dipainte, angke lalu tu tingki i laing tong dope halahi dibagasan gomgoman ni Kaisar Romawi na angkon torus manggarar pajak tu pamarenta Roma. Pardalanan ni Tuhan Jesus na manjamitahon barita haluaan di huta hagodanganna di Nasaret tarmasuk ma on bagian na parjolo sian pelayanan ni Tuhanta Jesus di Galilea. Maol do nian melayani di huta hagonangan niba, songon na tarsurat di ayat 24b na mandok: “Nada adong  sada panurirang na dipasangap di hutana sandiri” tapi harupe songon i laing porlu do pelayanan tu huta niba sandiri. Marsiajar sian pelayanan ni Tuhanta Jesus di Nazaret adong do tolu parsiajaran na porlu situtu si ihutkononta, na bisa gabe tiruan na denggan tu hita anso dohot hita manjagit haluaan i jana parsidohot muse hita manjamitahon barita haluaan i tu dongan jolma. Tolu parsiajaran nagiot sitangkasanta ima: 1.      Manghalungunkon Paribadaton (kebaktian) dohot Mambaca Hata ni Debata, anso gabe hasomalan na denggan i dingolunta (ayat 16-17). Manghalungunkon dohot  mangharingkotkon paribadaton madung gabe hasomalan i di ngolu ni Tuhanta Jesus, gabe hasomalan na denggan na mendarah-daging. Tu dia pe Ia kehe tongtong do Ia manjalahi Bagas Joro ni Debata laho maribadat, laho marsaor dohot  martangiang raphon dongan na porsaya, angke ima dalan na dumenggan laho mambangun fundasi na togu di ngolu ni partondionta. Sadar do Tuhanta Jesus bahaso muda giot markarejo na mardomu tu ngolu ni partondion hita angkon parjolo do manghobasi dohot patoguhon ngolu ni partondion niba sandiri. Jadi janggal do dipangkilalaanta muda adong na martugas  na marhadomuan tu ngolu partondion tapi malas ia maribadat, malas tu gareja, malas marsaor dohot dongan na porsaya inda gabe tiruan na denggan i songon na nihangoluhon ni Tuhanta Jesus. Ihut tu paribadaton on laing dihajopkon Jesus do mambaca Hata ni Debata, ima hata na mangolu na gabe panganon partondion ni jolma, songon na nidok ni Tuhanta: “Nada sian roti sajo hangoluan ni jolma, tapi sian sude hata na nidok ni Debata do” (Mat. 4:4). Porlu situtu do mambaca Hata ni Debata angke marhite Hata ni Debata taboto ma mangajarkon na sintong, taboto manggorahon dohot paturehon na sala, jana taboto manogu jolma anso mangolu dibagasan hatigoran. On ma na pasingkophon hita na sadenggan-dengganna tu sude ragam ni parkarejoan na denggan (2 Tim. 3:16-17).                                             Muda marningot hita songondia borat ni karejo nagiot siadopanta lumobi tu sude parkarejo di porlak anggur ni Tuhanta gomos dipaingot anso marsitutu maribadat dohot na mambaca Hata ni Debata anso gabe hasomalan na denggan i di hita songon sipaingot ni si Paulus tu si Timoteus na mandok: “Gumonan ma pasomal-somal dirimu marhadaulaton tu Debata (1 Tim 4:17b) anso ulang nayang pangalaho i di hita tapi na gabe tiruan na denggan i di ngolunta.  2.      Manghalungunkon Pamasumasuon (dimiahi) ni Tondi Parbadia (ayat 18-20) Damang, dainang na nihaholongan ni Tuhanta Jesus Kristus! Hara ni sikolanta, hara ni pangalamanta mambaca buku dohot pangalamanta mandohoti angka seminar gabe jotjotdo lupa hita mangido pandonganion ni Tondi Parbadia, panghilalaanta madung margogo hita, hape lupa hita karejo partondion do na takarejohon. Na angkon manghaporluhon pandonganion ni Tondi Parbadia. Tondi do na mengalehen silehen-lehen na tumbuk tu sude alus na porluh di karejonta, isara na mangalehen alus di na mangadopi situasi na sulit, mangalehen gogo di na maralohon hagolapan, mangalehen bisuk mamutuskon parkaro na sulit dohot angka na asing dope. Pasupasu ni Tondi i do sahala sanga kuaso, kuaso na mambedahon jamita ni halak parise sian jamita ni Tuhanta Jesus. Si Mateus manyuratkon: “Dung sidung Jesus mangajarkon hataNa sinangkinan i, homang-homang ma roha ni halahi na umbege pangajaranNia i. Harana nada songon pangajari ni Siboto Surat ni halahi i pangajaran ni Jesus, tapi marsahala (markuaso) do”(Mat.7:28-29). Kuaso sisongon on ma na tahaporluhon laho: a.      Manjamitahon Jamita na Denggan tu Halak na Pogos Jamita na denggan na parjolo dijamitahon Tuhanta Jesus ima tu halak na pogos, tu halak na marhahurangan di arta jana na dangol di tondi,  na tongtong paintehon pangurupion. Halahon ma na manghilala bia do porluna pangurupion. Angke tu halak na mamorluhon do dilehen pangurupion, inda tu halak na so marhagiot. Huhul bisa do sapa-sapa rohanta mandok; Biasi gabe humurang roha ni halak marugamo di angka Negara na kayo? Alus na pendek do ima, inda adong be na hurang di panghilalaan ni halahi, madung singkop sude, sude bisa do tarpatupa halahi. Antong tutu do pandohan ni Jesus i maol do halak na mora masuk tu harajaan ni Debata, angke inda porlu be pangurupion ni Tuhan di panghilalaan ni halahi, tapi sabalikna do didok : “Martua ma angka na dangol di tondina, dibaen di halahi do Harajaan Ni Banua Ginjang!”  Mare ma hita tongtong managam pangurupion ni Tuhanta Jesus di ngoluta.   b.      Paboahon Haluaan tu Halak na Tartangkup Jamita na denggan na mangihut ima haluaan ni halak na tartangkup. Ditingkinta saonnari murporlu do di jolma pambela. Murbahat do halak na manjalahi Pengacara muda adong parkaronia, lumobi muda tartangkup ia anso bisa sigop di palua. Porlu  do haluaan, angke muda tartangkup sada halak tarbatas do na bisa sibaenonnia. Suang songon i do dingolunta on. Ditatap Tuhanta Jesus do hahurangan di ngolunta, angke tarhurung do hita dibaen dosanta. Tapi madung ro Tuhanta Jesus mangondihon (membela) hita, gabe malua hita sian hurungan ni si Bolis. c.       Maroban Parnidaan tu Halak na Mapitung Muda tasapai angka donganta na so marnida, aha do silehen-lehen na umarga di halahi? Alusna ima parnidaan angke parnidaan na na mambaen parkarejoan tu nagumodang. Marsaringar do di pinggolta mambege pio-pio ni sada bayo na mapitung na mamiohon: Ale Jesus halak na Zaret urupi ma au, di na nibegenia mamolus Tuhanta Jesus sia huta nia. Lungun situtu rohania anso marnida, anso tarkarejohon ia angka karejo nagumodang di ngoluna. d.      Maroban Haluaan tu Halak na Marhancit (tertindas, stress) Di tingki saonnari murmaju zaman, tamba hapistaran, maju teknologi, tamba hamoraon tapi inda na gae bisa mangalusi sude parhancitan. Murbahat do halak na marhancit, murbahat hajahaton, bahat peninindasan jana bahat halak na sitress. Bahat do halak na gabe marsak, mandele hara ni sitaonon i. Mandok tarimakasi do hita tu Tuhanta Jesus, rodo ia paluahon hita. Ibana nadung manaon parhancitan i Ibana do ro mangurupi hita, na paluahon hita sian pardangolan. “Dibaen do Ia santongkin tumoruk saotik sian suru-suruan anso tarbaen Ia mate laho manghopkop sude jolma hara ni denggan ni roha ni Debata (Ibr. 2:9a). e.       Paboahon Taon Denggan Basa na sian Tuhan Sude do halak Israel managam Taon Denggan Basa. Marmungka do i sian Taon Sabat ima taon papituhon dipartingkian, digoari do taon i taon paradianan. Maradian ma sude sian parkarejoan na somal. Dung lalu tu pitu taon taon sabat masuk ma muse tu Taon Jobel, ima taon sijop ni roha, dohot taon pembebasan. Bebas ma dison angka utang-piutang, bebas na tartaban sian gomgoman ni tauanna, sude ma halak marjop ni roha. Haroro ni Tuhanta Jesus inda hum mambebaskon sian pardangolan fisik tapi dohot do paluahonpardangolan ni tondi na tartaban. On ma denggan basa dohot silehen-lehen na ummarga. Jadi ganup tajagit Tuhanta Jesus tajagit muse ma denggan basa ni Tuhan i, inda porlu be na angkon paitehon taon na khusus songon hasomalan di taon sabat dohot taon jobel. Muda malungun ho tu denggan basai ro ma ho saonnari tu Tuhanta i. 3.      Manghalungunkon Hasongtian ni Hata ni Debata (ayat 21) Hasongtian sanga hatutulus ni Hata ni Debata ido sada na umporlu di ngolunta. Sada hahurangan bolon do di ngolu ni halak na porsaya muda bahat manangihon, bahat marsiajar, bahat manghatahon Hata ni Debata tapi hurang manghaporsayai hatutulus ni hata i di bagasan ngoluna. Sasintongna angkon songon si Maria do hita na mandok: Naposo ni Tuhan do au, sai tulus ma di au songon na nidokmi (Luk. 1:18b)” jadi tulus ma tutu hasintongan ni hata i, ima na gabe hasongtian dingoluna. PANUTUP Damang, dainang na nihaholongan ni Tuhanta Jesus Kristus! Madung rap tabege Hata ni Tuhan i, mdung tapahusor-husor i gabe jamita na denggan di hita. Mandalani taon na imbaru on tama do hita manghaporluhon paribadatan songon na nitiruhon ni Tuhanta, ido na patoguhon partondionta. Taharinggaskon ma na mambaca Hata ni Debata anso marbisuk hita mangadopi angka namasa di ngolunta. Ringggas ma hita manjamitahon jamita na denggan i tu halak na marhahurangan, dung parjolo hita mangauhon hata i di ngolunta anso tulus sanga hasongtian mai di ngolunta, gabe tangkas tarida songon tiruan na denggan di  ngolunta. Amen. Selamat Taon na Imbaru ma di hita sudena. Pdt. Abraham L Hutasoit (Ephorus)