Selasa, 04 Januari 2011

JAMITA MINGGU, 2 JANUARI 2011: MATIUS 2:13-23


“ Mangungsi tu tano Mesir“



HATORANGAN NI JAMITA

MINGGU DUNG TAON BARU

MINGGU, 2 JANUARI 2011

Jamita : Mateus 2 : 13 – 23
Sibasaon : Masmur 20 : 1 – 10



Patujolo :
Dung kehe parilmu bintang i, diida si Josep ma sahalak suru-suruan di bagasan nipinia. Didok suru-suruan on ma tu sia, “Jongjong ma ho, boan ma Dakdanak i dohot InangNai mangungsi tu tano Mesir. Di si ma hamu maringanan lopus ro Au mangulahi manghatai dohot ho. Harana ditahi roha ni si Herodes do manjalahi Dakdanak i laho mamunusa”. Tung mancai kejam jana tragis do tahi ni roha nisi Herodes na giot mambunuh sude dakdanak ditoru ni umur 2 taon. Jadi borhat ma si Josep dohot si Maria natoras ni Dakdanak i, laho palua diri sian tahi na jahat sian si Herodes na kejam i mangungsi sian Jerusalem tu Mesir.

Biar do roha ni si Herodes anso  ulang jabat Dakdanak na baru sorang i gabe mandabuhon martabatna naung gabe Raja, angke inda ra ia tarsaingi (adong imbangna) sanga na ise pe, apalagi sian dakdanak na baru sorang.
Dua noli ma marturut sitaonon na angkon adopan ni Tuhan Jesus. Na parjolo hatiha giot sorang Ia tu portibion inda adong na mangalehen inganan parbornginan, gabe angkon sorang di bara ni pahan-pahanan do Ia. Dung sorang pe Ia. Tarancam do hosana na angkon bunuon ni Raja Herodes. Mulus do pardalanan ni si Josep dohot si Maria lopus lalu tu Mesir harani partolongan/campur  tangan ni Debata di AnakNia  ima Jesus Kristus.

Tafsiran
Ay 13-15 Pardalanan tu Mesir

Di pingkiri roha ni jolma do laho palua diri sian na mangadopi  musu bope bahaya sanga pe ancaman anso salamat, tontu angkon kehema sa dao-dao na sian adopan ni musu i. Tapi parenta ni Tuhan marbeda situtu do sian pamikirion ni jolma. Hape parenta ni Tuhan mandok, angkon mur di padonok do tu inganan ni musu i.
Marangkat tonga borngin do si Josep dohot si Maria dohot Dakdanak i anso ulang jabat ditanda halak dohot dikojar angka soridadu ni si Herodes. Gabe laos tinggal di Mesir do halahi lopus dung marujung ngolu ni si Herodes. Dung marujung ngolu ni si Herodes ima na gabe haluaan di angka dakdanak na marumur ditoru ni 2 taon. Sobar do tongtong si Josep dohot si Maria paintehon lopus tarbege barita nadung marujung ngolu ni si Herodes. Jongjong ma si Josep, di oban ia ma Dakdanak i dohot si Maria mulak tu tano Israel.

Ayat 16-18

Dipainte jana arop do roha ni si Herodes painte haroro ni Parilmu Bintang i laho maroban barita tu si Herodes sanga na didia do Jesus Raja na baru sorang i. Gabe suru-suruan i marsuru tu parilmu bintang i anso ulang be mulak mangadop si Herodes, tapi mardalan ma sian dalan na asing. Tapi diboto si Herodes do bahaso nadung ditipu angka parilmu bintang i ia. Gabe diparentahon si Herodes ma tu angka sordadu nia i laho mambunu sude dakdanak na marumur ditoru ni dua taon na adong di Jerusalem. Harani i tarbegema soara na martangisan/andung ni angka natoras ni dakdanak na dibunu ni soridadu i.

Ayat 19-29 Mulak sian tano Mesir
Dung mate si herodes, diida si Josep ma mangulahi sahalak suru-suruan di bagasan nipi nia. Didok suru-suruan i ma “Jongjong ma ho! Buat ma Dakdanak i dohot InangNai, oban ma halahi mulak tu tano Israel. Harana, ma mate angka halak nagiot mamunu Dakdanak i”. Muda disangkapi jolma i pe hajahaton tarlobi giot mangalo hagiot ni Debata, nada tulus i tarpatupa. Hombar ma tu sangkap na jahat na ni sangkapan ni si Herodes giot mamunu Tuhan Jesus, nada di loas Debata i tarjadi. Nada hum si Herodes na mate tapi dohot do mate angka pare soridadu ni raja Herodes i, nadung mambunu angka daganak na menek-menek i.
Dung mate raja Herodes, gabe digontihon anakna i do ia na margoar si Arkelaus na gabe raja di huta Judea. Dohot do manurun hakejamon ni Raja Herodes i tu anaknia si Arkelaus i dung diangkat ia gabe raja. Hombar do songon pandok ni angka natobang-tobang i “Inda dao tubis sian bonana”.


Aplikasi
Angka jolma na sai tongtong mangkarejohon hajahatan sangape marsangkap na jahat, sarupa do i na mangalo hagiot/parenta ni Debata.
Raja Herodes hara inda ra disaingi/dibuat harajaan nai sian ia, gabe nekad do ia giot mambunu Tuhan Jesus Raja ni Hadameon i, tapi diondihon Debata do Tuhan Jesus marhite panogu-noguon Nia tu natoras ni Dakdanak i ima si Josep dohot si Maria. Gabe malua do sian parmaraan godang halahi. Bahat do pangalaho na sarupo tu pangalaho ni Raja Herodes i tarjadi di zaman sannari on. Giot mambuat arta ni dongan gabe hosa melayang, marebut jabatan na adong di dongan pe jot-jot do tarjadi pembunuhan (menghilangkan nyawa orang lain).

Sijosep dohot si Maria natoras ni dakdanak i rade do rohana dipimpin jana ditogu-togu Debata dipardalanan ni ngoluna, gabe tongtong do halahi dapotan haluaon jana malua sian parmaraan. Hitape salaku jolma na porsaya tu IbaNa, angkon ra do hita dipimpin jana ditogu-togu Debata marhite TondiNa anso dapotan haluaan si salolot ni lolotna. Malua sian angka parmaraan, dipadao nasa hajahatan.
Jagit ma Jesus dingolumu, di bagasan rohamu, paloas ma IbaNa na mangatur pardalanan ni ngolumu. Porsaya ma ho tu IbaNa. Porsaya jana satia ma ho tu Jesus salolotna…..(Yes 26 : 4)
Ambungkon ma hajahatan i sian bagasan rohamu, tapi paloas ma Raja ni Hadamean i tongtong sorang di bagasan rohamu, ate-atemu ro di sude panggulmiton ni ngolumu. Amen.

Pdt.DRP Hutabarat,STh
Res.Aek Bingke

Tidak ada komentar:

Posting Komentar