SORMINAN: PARHOBAS NA BERHASIL

PARHOBAS NA BERHASIL Ragam do na masa di huria ni halak Kristen. Rap taida do na masa on asa gabe songon na heput do roha mamikirkonna. Deba ragamna na ni ida. I ma na tangkas otok-otik noma parminggu di ganop minggu, na gailna dope nang ari-ari pesta godang pe laing miduk do na so ro tu gareja marsibaen angka parkarejoanna kandiri ima na masa di huta Tonga. Hatiha dung salpu manyabi, dung muli sude na eme tu huta, marrapot ma angka pangula/majelis anso dipatupa parlagutan i Pesta Gotilon dalan laho marjop ni roha anso rap ro na sahuta i tu gareja, di patupa do parmanganon. Dung dapot hatihana umpe sapartolu pe ruas i na ro tu Pesta Gotilon i. Haru i pe laing miduk do na so ro alias malas ro tu gareja. Parhatian na asing muse di bahat gareja na ni ida bagian ama, bahat do na tu kode laho mambahas naso pola porlu. Adong na kehe mardalani na so pola binoto tujuanna. Na deba nari nahurang sehat/magis ma tongtong muda ari Minggu. Adong muse mandok natabo pangula i marjamita na binoto astuanna. Bahat ma angka alasan ni ruas i umbaen na so ro tu gareja. Tamba ni i muse sai masa do hata-hata di huria, parhata metmet na hebat pangaruh na tu hamajuon di huria. Maol situtu do paturehon huria si songon on, kadang-kadang ma tertular panyakit on tu parhalado i sandiri, gabe malas ia padalankon tugasna. Tapi sai adong do na bisa usaha taringot tu keadaan on. Sada hatiha dung solpu parminguon dibaen ma rapot ni Parhobas ni Parlagutan/huria, mangarapotkon bia cara na anso ro pangisi ni huta i tu Gareja. Marsiaben angka usulna ma parhobas i, Pandita/Guru Parlagutan/Sintua i mamikirhon dia noma sibaenonta di huria on. Sude usul i, usul nasomal talaksanahon do ima pangelek-elehon madung, tatopoti ganup bagas madung, pesta pe madung  ning pandita i, dia noma tapadalan….? Marap hohom be marpikir, tep ninna mangkatai ma sintua Galia. “Bia muda songon on amang Pandita ! Tabaen ma jolo sada sandiwara tarbuka, marbadai hita di hutaon di ari minggu torus marsikojaran dohot Pandita i! Pas situtu usul ni sintua anso jebu jolo angka ruas i. Tarsusun ma strategi parbadaan on marsitutu… Di ari minggu on tapaida ma parruar ni ruas sian bagas. Hita Sintua marhobas ma marlojong songon na giot marsibunuan, deba ma dongan ni Pandita, deba ma na mangkojar, adong muse na panonga-nonga i. Tiop be ma podang sanga na hujur dohot gupak bope umban-umban sanga soban. Dung dapot ari Minggu jam 10 manyogot diparnaek ni mata ni ari i, sian alaman ni gareja i gaor ma sintua-sintua manyintak podang, di kojar halahi pandita huhut marsurak sagogona nada husobarkon, jago…, tangkup tolonan i, angkon bunuon i….., nada husobarkan….ninna. Songon i ma dibolus halahi ma angka tonga ni huta i marsurahi gogo sajo songon na giot marsimatean, longang na sahuta gabe jebu sajo ma na sahuta/huria laho manyitopi/manolai parbadaan i. Jolma na di kode pe gabe rukkar, na di bagasan bagas pe gabe haruar na dipancur pe ruar, na ditonga alaman pe humalaput. Nada haoraan leng gaor songon i mur gumalaput nasa huta i mangorai, asa muli donok ma tu gareja madung rame situtu hatiha i. Masuk ma deba sintua tu gareja lalu mandok “tore dibagasan ma marsipatorangan anso tangkas be” asa mangihut ruas deba pangisi ni huta i. Masuk muse Pandita asa mangihut ma ruas deba na i. Pendek carito bubung ma gareja, hatiha i Pandita do dilambung pintu i. Madung dipangido halak sinjata na di tiop nia. Ditutup sintua i ma pintu ni gareja ma mungka ma Pandita marjamita. Parjolo hata-hata parhutaon ma hata na giot padame na marbada on, dung i muse hata-hata huria jana lalu ma tu turpuk JAMITA sadari i. Bia do pe baenon tarhalodang sude na di bagasan gareja i, deba tiop anduk na deba nari tiop sabun, adong na maniop ember, adong na maniop hail/pamaoran, adong na marsalaor pendek, adong na marabit lopes/ angka ina hum namarabit dohot obuk najuga-jage dope nanggo marsolop so sanga, nada adong na marbaju na jeges di hatiha i. Dung sidung tangiang panutup, mangkuling ma na tartobang mandok hata, anggo nada hara ni na marbada sintua i dohot pandita i nangkan na masuk hita tu garejaon, hape namarbada do amanta parhobas dohot angka pangalahonta, dohot on ma hami mandok tarimakasi tu angka parhobas na manyungguli hami ro tu gareja manyomba Tuhan. Adong dope muse di huria i na parhata mandok hatana ari namarsejarah ma ari on di hita nasa huria on. Ari na denggan ma on. Ari na gabe pasu-pasu ma di hita. Dohot sian rohangku ma mandok pestahononta ma ari on. Anso tangkas au ma panitia manghasuhutkon pesta sadarion dohot di angka dongan na rela manghagodangkon na masa on. Bahat do na satuju asa pesta halahi torus di na sadari i. Tu ari na mangihut tu minggu na mangihut gabe sai marminggu ma na sahuria on. Tagoar ma = Parhobas na berhasil. Sipikirhononta : Ulang tapasombu angka na malas. Dia ma usaha bahenonta pature Huria i/pParlagutan i anso jop rohana rot u Gareja laho mamuji Tuhan…? Evaluasi : Sada huria 100 ripe, ruasna 400 halak parminggu Na ro :              Koor Ina I                      30  halak                         Koor Ina II                     30 halak                         Ina                                30 halak                         Ama                             30 halak                         Sintua                           10 halak Naposo Bulung              30 halak Koor Ama                      20 halak d,n.a                             200 halak POIN =  200 x 100 = 50 PUNTEN = 5               400 Guru Karnein Siregar Resort Bungabondar