Hatorangan ni Sibasaon Minggu, 4 Desember 2011: Lukas 21 : 28-33

Hata Hangoluan Na Manongtong Minggu Advent II Hatorangan ni Sibasaon  Turpuk Sibasaon : Lukas 21 : 28-33 Patujolo Muda diparrohahon ma angka na masa saonari di portibi on; adong porang, masa bencana alam na tompu, jolma marroharoha, pangalaho mur tu na so ada, hakorason, hamaolon, hapogoson, pamunuon mutilasi, na paotootohon, dohot marragam dope tahe, tarhalomong do roha. Sipata inda sadar, mangkuling pamangan; bah..., nadung matobang do hape portibi on, na giot salpu noma hape, jana kiamat. Baru sajo dope hita digaori “kiamat 2012”; marroan pangajaran na sesat, marmunculan angka panurirang pargapgap; sasude na i karejo ni si bolis do i. Songon pandohan ni hita Batak i:           hujur mundimundi, martotoran hau halak           pargoar sibunibuni, siago anak ni halak  Masa angka na so jungada masa jana tarjadi ma na so jungada tarjadi. Ima na ro tu pikiran dohot parngoluonta. Jamita na Denggan sian Lukas di turpuk on giot patolhaskon tu hita, bahaso muda pe masa sasude na i, mamungka hatiha na do pe i. Bahkan halak na mangolu saonnari on pe, giot ma nian padorgak ulu na, angke botoonnia ma, haluaan i sian Tuhan ta Jesus ro ne ma i. Madung donok Harajaan ni Debata, βασϊλειά τόϋ ϑέού (=basilia tu theu). Astuanna, sude halak na porsaya angkon satia jana taat ma di pamarentaon ni Jesus na di bagasan holong, jana dipateankon ma i tu generasi dohot regenerasi mangihut. On ma na gabe hata hangoluan na manongtong. Hatorangan Ay. 23; Jongjong ma, jana padorgak hamu ma ulumunu, ro ma haluaan i. Ro ma haluaan i, marojahan do tu hapastian haporsayaan ni angka halak na mangihutkon pangajaran ni Jesus. Angka halahi angkon jongjong do, laho manatap “tu dohot sian” siahadaoan songon dia do bontuk, warna, cara, dohot na nidok na haluaan i. Harana songon na holip jana songon salippotpot tarida (=phatamorgana), gabe angkon di padorgak ma ulu manatap, anso bisa mur tangkas tarida. Mur jonok hita tu si, jana mur mandonok haluaan i, gabe manjadi dohot adong ma hapastian, sian na ro i na gumogo jana sun markuaso, paluaonNa ma hita sian nasa boban dohot hamaolon, bahkan sian hadosaonta. Marragam do memang cara dohot hagiot ni Tuhan tu halak na porsaya i, anso dohot dapotan haluaan i, dibaen tigor do dalan ni Tuhan jana pita do palito ni Tuhan mambaen hataNa markuaso mangalehen haluaan. Pat do hapayahan ni si manjojak laho jongjong, ulu do pamusatan ni pikiran, parnidaan, panangihonon, pandaion, hosa hangoluan, jana tongtong ma i gabe dorgak manatap, mangaranapi sian dia do pangurupion ro. Tuhan i do na ro jana Ia sandiri do haluaan i.  Ay. 29-32; Umpama ni Jesus taringot tu hayu                 galagala Dipatorang jana dipatota Jesus do tu halak na mananggung boban dohot dosa na nabahat i, songon dia ia mangastui haluaan i sarupa do dohot jonok na Harajaan ni Debata na giot ro. Anso doparrohahon ma bona ni hayu galagala dohot sian sude angka hayu na asing. Di bagasan umpama do Jesus laho patorangkon Harajaan ni Debata, tudos songon dia musim logo (= musim panas) mambaen hayu i gabe hiang inda adong be bulung na songon hayu na mate,  tapi martunas do muse  hayu i di musim udan paboahon madung salpu ari logo. Pangajaran on pabotohon tu sude halak, bahkan tu angka bangso, adong hatiha dohot adong sada situasi na maruba di ngolu ni sude jolma, jana ujungujung na masuk tu sangkap ni Tuhan. Ngolu na niamudihon sangkap ni Tuhan do, na mambaen ari na marragam gok dohot hamaolon dohot hadosaon on, adong hatiha parasianan ni Tuhan i, anso hita pe mararop ni roha. Sian sude na masa dohot sude na nipardokkonan ni Jesus i, nada mambaen halak na porsaya i dope tu hamagoan. Tapi sian i, gabe adong ma hapastian, anggo Harajaan ni Debata i, ima situasi dohot keadaan didia jolma i gabe satia jana taat di pamarentaon ni Jesus na gok dohot holong. Anso beha ? Tarjadi ma angka na nidokNia i, anso gabe botoon ni jolma i, madung donok Harajaan Ni Debata. Tutu do na Hudok di hamu! Anggo so tarjadi dope sudena i, nada mate muse dope angka jolma na mangolu saonnari on. On mayakinkon dohot mambaen tota pangastuion, bahaso angkon gabe hasongtion ma sasude na ni dok ni Hata i, basa: Mat. 1: 22; 2: 15+17+23; 4: 14; 8: 17; 12: 17; 13: 35; 21: 4; 26: 56; 27: 9, jana pat. Luk. 21: 24; Joh. 12: 38.     Ay. 33; Hata ni Tuhan i nada maruba jana mago             sapanjang manyahena Lamamlamam hata ni begu risirisi hata ni jolma, tapi anggo Hata ni Tuhan na da muba jana nada mose i ro di dalolot ni lolot na. Manongtong do Jesus na dung gabe Hata i, Joh. 1: 1-3+14, pat. Ibr. 13: 8. Hata ni jolma bisa do i maruba satongkinan on, tapi muda hata ni Tuhan nada. Hata ni jolma bisa do gabe marbegu, tapi hata ni Tuhan i nada, bahkan gabe sinondang do i mambaen mabiar angka begu. I do umbaen diajarkon tu hita anso manat di angka hata, Jak. 1: 19’ jana pat. Hal. 22: 18. Markuaso situtu do Hata ni Tuhan manontuhon aha na nibaen jana ni karejohon jolma i markite HataNa, laing sian hata ni jolma i sandiri na mangkarejohon hagiot ni Tuhan dibagasan ngoluna, markuaso muse do hatana i manontuhon aha na nidokna jana na giot tarjadi. Adong do alasan na gogo mambaen halak Kristen porsaya; Hata ni Tuhan, ima ”habonaran mutlak na so bisa digantihon ilmu dohot bisuk aha pe i” na adong di portibi on na ni tompaNia. Dibaen aha ? Hara na sude na adong di Buku na Badia i, madung singkop ima:   1.Kewibawaan sanga sahala na adong  madung singkop ; a. infallibilitas (=inda mungkin kaliru) b.Neccesitas (=torang) c.Otoritas (=markuaso) d.Suffecientia (=cukup) e.Perpicuitas (=tangkas) f. Efficax (=lalu tu tujuan) g.Dan unitas (=sada hasadaon); na mur patoguhon haporsayaanta Bibel on ma Hata ni Tuhan. 2.Objektifitasna dohot nilai sejarah, na akurat mardongan bahat bukti dohot saksi, Luk. 1: 1-4; 2 Petr. 1: 16.   3.HataNa patandahon Debata namanjalahi hita jolma., Luk. 15. 4.Adong hapastian dalan manuju  tu Surgo, Joh.14:6 5.Tanda hahomangan ni Kristus tongtong dope bisa dialami, Ibr. 13: 8. 6.Parsoalan dosa disalosehon dohot  jaminan na togu dohot pasti dungi menyejarah, 1 Ptr. 2: 24; Ep. 1: 7 7.Perjanjian Baru merupakan kegenapan Perjanjian Lama, Har. 24: 6-8; Ibr. 9: 11-28; Jer. 31: 31-33, Mat. 26; 26-29. 8.Pangajaran moral na sampurna, Mat. 5-7; 22: 37-40 dan Har. 20.   Hara ni i ma nada porlu hita on porsaya dohot caracara marbagudung (=kebatinan) sanga mardomu dohot wilayah ni tondi hasiangan laho maruli di Hata ni Tuhan anso dapotan haluaan. Marbahaya situtu do cara na songon i, dibaen nada adong sitiopan na jelas. Halak Kristen dipodahon do anso dao bahkan mayoadahon praktek kebatinan, Ep. 6; 10-20; 1 Joh. 4: 1; Kol. 2: 18-23. Buku na Badia sanga Bibel, i ma Hata ni Tuhan na sasintong na. Sego pe langit jana maronco pe portibi on, anggo Hata ni Tuhan hot do salolotlolot na. Hahonaanna/ applikasi Minggu adven na paduahon, di na managam hita halak na porsaya laho manomunomu haroro ni Tuhan, tongtong ma nian dohot pamujion na mandok; markuaso situtu do Hata ni Tuhan laho mangalehen haluaan. HaroroNia tu portibi on nada na giot manguhumi, tapi sakaligus do dohot mambaritahon Harajaan ni Tuhan madung jonok. Hangoluan na imbaru madung manguba hita anso mangolu di hatiha parasi ni rohaon i. Hangoluan na imbaru i manandahon Debata marpamuati rohaNa. Haruar ma ganup jolma sian na sa boban ni ngolu dohot hadosaon na. On sada situasi na imbaru, hasonangan na baru, (=Neo Porlak Eden), na ni dok dohot Harajaan ni Debata madung ro, βασϊλειά τόϋ ϑέού (=basilia tu theu).  Debata do na mangalehen haimbaruan i, pungka ma jana muloi ma hangoluan na sian Tuhan. Na marastuan ma i, Debata madung pataridahon kuaso dohot diriNa (=Deus Revelatus). Astuan na, nada sibedahononkon jana nada be marimbar anggo Debata di bagasan sude partingkian, di inganan dia pe i sapanjang ngoluon. Haimbaruon madung ro, hatiha pe madung maruba, suasana di bagasan dame dohot sonang numma ro, “ Debata manjadi holong (=caritas) tu sude, di sude, jana sasude dohot di bagasan sasudena, basa jana paheba ma, Roma 5: 10// 2:5+1:18; Joh. 1: 12. On ma nani dok ni Sahalak teolog na margoar Paul Tillich,”Debata bisa do botoon di bagasan na sa na adong, anso angka sibahenon  (= semua kenyataan) na so marsyarat, sabotulna madung mambaen ngolu na nyato di portibi on adong keterbatasan na”. Jadi hum Hata ni Tuhan na so maruba i do, kuaso na mambaen anso tabaritahon haluaan i tu sude bangso. Hata hangoluan na manongtong do i dohot hajojop ni rohanta, anso Jesus pe gabe Sipalua tu hita dohot portibi on, Joh. 3: 16, pat. I Tim. 3: 16. Pangarimpunan Debata manjadi parholong, jana nada ligion be rimasNa, dibaen hasintonganNia. HataNi na marKuaso situ madung manjadihon songon i. Di patogu Debata do janjiNia on tu jolma anso marhamubaan ni roha mamolus dalan haluaan nadung diparade Ia, i ma marhite hamatean ni Jesus Kristus di hayu parsilang di Dolok Golgata, na gabe haulta tu haluaan i, tapi na ro do Ia muse mangulahi tu portibi on paduahalihon. Harani i porlu do hita martarimakasi tu Ibana, dibaen madung dipalua Ia hita sian rimas dohot uhuman ni Debata, laho manatap tu masa depan. Minggunta pe di na mangingan i Adven II Parlagutan i, naeng do tangkas ondolhononta hasaksian ni parkarejoan ni angka Rasul songon na gabe patujolo haroro ni Jesus. Holong ni roha ni Debata tu sude jolma, i ma na gabe dalan  pangokuan manopot dohot manghajopkon Tuhan Jesus nadung ro gabe paimbaruhon. Harani i ma salolot adong tano on, nada porlu be adong roha na marganggu, boban na dodok, hamaolon bahkan hadosaaon i, dibaen Harajaan ni Debata madung mambaen adong hatiha tu hita, masa suanon dohot sabion, ari ngali dohot ari na las, logo ni ari dohot nonat, arian dohot borngin tongtong do adong. Antong hita sapai be madirinta aha do sibaenonta parayakkon hasaksian ni pangokuon dohot haporsayaan na di ginjang ?  Hita alusi ma marhite haporsayaan ta be, aha do nadung tabaen tu Tuhan!.                 Harajaan ni Debata anso tajagit ma, hita topot dohot hita hangoluhon, anso tibu ia ro, na mambaen ngolunta sonang so hariboriboan di bagasan holongNia na so maruba. Ngolunta be gabe pasupasu. Tapateankon ma i tu angka anak lopus tu angka pahompu, hadameon, jop ni roha, na sian Tondi Parbadia i do na gabe Harajaan ni Debata, na dung tulus di hita, basa Rom. 14: 17.                 Sudena na tarsurat di Buku Na Badia i na nituturkon ni Debata i, na marguna do i laho mangajarkon na sintong, manggorahon dohot paturehon na sala bope laho mangajari jolma anso mangolu di bagasan hatigoran. Mardongan Buku Na Badia i dipasingkop do sadenggan-dengganna sanga ise na mangoloi Debata di sude ragam ni parkarejoan na denggan. II Tim 3: 16-17.                        A m e n !!! Pdt. B.M. Siregar GKPA Depok