“PAMALUM NA NAMARSAHIT DI PARIDIAN BETHESDA”
1. Tanda halonganan pamalum na marsahit on nada dipaboa sude angka parbarita nauli na mandokhon holan di Galilea do tanda halongangan i. Tapi si Johanes manyurat sada tanda halongangan i di Jerusalem. Tingki i masa do parpestaan di Jerusalem ima pesta Paska. Dung i adong ma pesta ni halak Jahudi, gabe dohot ma Jesus tu Jerusalem. Adong piga-piga pesta na adong di halak Jahudi ima : a) Pesta Purim na biasa dilaksanahon tanggal 14-15 bulan Adar/Desember (Est.3:7, 9:24); b) Pesta Undung-undung Bulung Rata (Joh.7:2) na ditoruskon tu pesta Pantekosta di bulan September; c) Parningotan Pangompoion Bagas Ni Debata (10:22) di bulan November; dohot d) Pesta Paska (2:13; 6:4; 13:1) dohot angka pesta-pesta na asing na so pola targoaran di son. Songon halak Jahudi, Jesus sai torus do mandohoti pesta-pesta ni halak Jahudi on harana tiap taon do halahi mangarayahon pesta-pesta on. Pesta na biasa dipatupa di Jerusalem ima pesta Paska. Jadi kehe ma Jesus tu pesta Paska i na maringanan di Jerusalem. Sian on diajari do hita paboa Jesus sai mangharingkothon mandohoti sude angka karejo di tonga-tonga ni masyarakat dohot di tonga-tonga ni parlagutan i (pat. Ibrani 10 :25).
2. Di Jerusalem adong ma sada "Horbangan Biri-biri," jonok tu paridian na digoari di bahasa Heber Bethesda. Paridian on dipajongjong aso adong inganan paridian dohot parlangelangean (patudos B.Rasul 27:43). Marragam rupo do pandohan ni paridian on, adong na mandokhon: Bezatha, Bethzatha, Betzetha, Belzetha, Belzatha, Berzeta; dohot Bethsaida. Tapi na paling jotjot didokhon goarna ima Bethesda, muda di bagasan bahasa Heber (Bethchasdah) narmarlapatan ma i bagas asi ni roha (the house of mercy). Harana di paridian on adong asi ni roha ni Debata Ama laho pamalumhon sudena angka na marsahit dohot angka na marsitaonon. Inganan paridian on nada pola manggarar agia aha pe harana holan mangasahon huaso ni Tuhan do umbaen na malum sahit ni na marnyae i. Halak Jahudi sandiri pe nada jungada marpikir laho manjagit pajak sanga bayaran sian angka halak nadung malum sian paridian Bethesda i.
3. Mansai bahat do angka na marnyae na so tolap gogo be. Tapi sian sude na marnyae i, holan sahit na tolu on do na dipaboa tu hita ima na mapitung, na timpang, dohot na pangpangon. Biasi holan on di paboa si Johanes? Angke holan na marsahit na sitolu rupo on do na so margogo mandabuhon dirina parjolo tu paridian i, muda manggulsak aek Bethesda i. Gabe sai lumolot ma halak na marnyae sitolu nyae on malum sian sude angka namarnyae di inganan i. Na mapitung i, nada bisa diligi ia muda manggulsak aek i, gabe nada tarbaen ia parjolo be marlange di paridian i. Songoni muse na timpang i. Diligin ia do aek manggulsak tapi nada bisa ia hipas manimbung tu paradian Bethesda i. Mur ma muse na pangpangon i, atik pe diboto ia madung manggulsak aek i, tapi nada tarbaen ia morot sian podoman ni i laho manimbung tu aek paridian i. Jadi muda so adong halak na mangurupi halahi, sapanjang manyahena nada bisa halahini malum sian nyaena i. I do umbaen pola 38 taon sada bayo nada jungada dope ia dapotan kesempatan parjolo dung manggulsak aek i. Gabe lolot ma ia marsitaon on. Ise do na ra mangurupi ia aso dapot ia hamalumon i? Holan Jesus do na ro mangaligi ia di nyae na niadopan nia i. Dung ro Jesus gabe dipamalum ma ia so pola ingkon masuk tu aek i. Hita angka dongan, bahat do nuaeng di tongatonganta na gale angka na mapitung, na timpang dohot angka napangpangon naso tarbaen halahi haruar sian nyae ni halahi i. Adong do nuaeng on angka keluarga marpulupulu taon diarsahi angka anakhonna, adong do angka keluarga na marpulupulu taon marhosom ni roha tu angka donganna, dohot angka na asing i. Sapa-sapa di hita nuaeng, ise do na ra mangurupi halahi haruar sian sahit ni halahi i? Alusna ima hita angka na porsaya na rade rohana manyurduhon tanganna mangurupi halahi na mapitung, na timpang dohot napangpangon i, aso dapot halahi hamalumon na sian Tuhanta i. Mansai bahat do angka donganta na marsahit di Rumah Sakit, na marsitanonon di penjara, natumatangis di sihabunian. Hita ma kehe tu si laho mangubati roha ni halahi na gale, na magopu aso margogo halahi dapotan haluaan na sian Tuhan Jesus.
4. Hamamalum na sian paridian Bethesda i mijur marhitehite surusuruan ni Tuhan tu bagasan paridian i, manggaor aek i. Jana sanga ise sian na marnyae i parjolo masuk tu paridian i hatiha manggulsak aekna i, malum ma nyaena i; sanga na nyae aha pe angkon malum. Pangubation na sian surusuruan i, ima huaso na sian Debata do i na marhuaso laho pamalum sudena angka ragam ni nyae. Surusuruan ni Tuhan margogo manggulsak aek i paradehon hamalumon tu sude na dung paintehon hamalumon ni sahitna be. Suang songoni do panghobasionta di tongatonga ni parlagutan i. Surusuruan ni Tuhan i sasintong na torus dope manggulsak hamalumon ni sahit ni angka na porsaya i marhitehite aek hangoluan i. Di pake Jesus do sude angka panghobasionta di tongatonga ni Parlagutan i pabaorhon hamalumon ni nyae na adong di pardagingon dohot partondion ni ruas ni Tuhan i.
5. Taligi ma jolo sada bayo nadung tolu pulu salapan taon honokna marnyae. Nyae nia i mansai poran situtu. Madung gale ia pamatangna, nada marguna be angka pangurupi na dipake ia salolotna on laho pahusorhon pamatang ni i tu paridian Bethesda i. Hira na di bagasan penjara do panghilalaanna, angke nada adong na bisa tarkarejohon ia be. Lumolot noma ia marnyae sian na hisar jana pola do giot mago panghirimon nia tu hamalumon. Sianon taida bahaso nada jungada hape do angka Malim, Farisi, Siboto surat tu paridian (Rumah Sakit) Bethesda on. Nada adong program ni halahi mangurupi na gale pamatang na di rumah sakit Bethesda i. Di situasi si songoni ro ma Jesus tu RS Bethesda i jana pasuo dohot bayo na dung lolot payak dipodomanna i jana huhut didodok Jesus ma tusia, "Giot dehe ho malum?". Angke diboto Jesus do nadung lolot sajo bayo i payak dipodomanna jana nada adong namangurupi ia muda marhusor aek i. Dialusi bayo na marnyae i ma, "Nada adong donganku dison Tuhan na pamasuk au tu paridian i muda hatiha manggulsak aek i. Jadi hatiha giot masuk dope au tu paridian i, hape ma dipajolo halak na asing masuk." Sian alusi diboto Jesus do bahaso malungun do bayo i di hamalumon. Sian on taligi bahaso di kesibukan ni Jesus mangajari dohot manjamitai angka na porsaya i, disompathon ia do mangebati inganan ni angka na marsahit ima rumah sakit. Ro do Jesus tu inganan ni na gale pamatang laho mangurupi halahi di hagaleonna bahkan mangalehen haluaan marhitehite hamalumon ni nyae ni halahi. Antong sada tugas na arga do on di hita angka sisean ni Jesus sadarion. Aso taharingkothon manangianghon huhut mangebati angka donganta na gale pamatangna harani nyae na ampe di pamatangna. Ai donganta do halahi na di haholongi Jesus. Hita pe angkon tahaholongi ma halahi jana tapaboa jamita na denggan i tu halahi aso dapotan hamalumon halahi sian nasa nyaena be.
6. Sapasapa ni Jesus on angkon porlu begeonta. Harana nada holan tu namarnyae si 38 taon i sapasapa i. "Giot dehe ho malum?". Sapasapa on lalu ma tu hita muse. "Giot dehe ho malum sanga sesa dosamu?". Bahat do halak Kristen nuaeng nada ra ia sesa dosania. Nada jop rohania malua ia sian hajahaton. Umjop do rohania mangolu di hagolapan sian mangolu di hatorangan. Muda bayo i, 38 taon ma ia marnyae gabe malungun do ia hamalumon. Muda hita mapiga pulu taon hita di bagasan dosa, ma piga pulu taon hita mangolu dibagasan hajahatan. Giot dehe hita malua sian i? Muda giot do hita malua sian i sudena alusi ma Jesus di tingki on aso malum dihilala ho (pat.Mat.8:3).
7. Namangihut muse muda taparateatehon cara ni Jesus giot pamalum bayo na marnyae i, agak andul do sian na somal. "Jongjong ma ho, oban lagemi jana mardalan ma ho" Biasana muda giot malum na marnyae angkon marlange do ia tu paridian Bethesda i dung jolo manggulsak aek paridian i. Tapi hatihai Jesus pamalum bayo i nada pola disuru Jesus ia masuk tu paridian i, holan sandok hata do gabe malum ma dilala bayo i. Biasi songoni? Naparjolo, Jesus patuduhon bahaso cara pangubationNia jumeges sian aek paridian Bethesda i. Harana hamalumon ni bayo i nada holan malum boti ia, tapi gabe margogo situtu do ia mamboan lagenia i jana mardalan. Paduahon, Jesus paboahon bahaso sanga na ise pe na marnyae muda ro tu Jesus angkon dapotan hamalumon atik pe di ari Sabat i. Napatoluhon, Jesus mangalo tradisi hamalumon ni halak Jahudi tingki i, nada holan sian aek paridian Bethesda sajo dapot hamalumon tapi dibagasan Jesus sandiri do mual ni hamalumon na sanggam.
Tidak ada komentar:
Posting Komentar