Hatorangan ni Jamita
Minggu 16 Dung Trinitatis
Minggu, 27 September 2009
Jamita: Rut 2:8-16
Sibasaon: Pilippi 2:1-11
“PARASI ROHA”
Tema ni minggunta sadarion i ma manaringoti kepedulian: empati/parasi roha. Di minggu na dung solpu hita diajak anso peduli tu angka naposo ni Debata. Jana di minggu on penekananna peduli tu sude jolma.
Turpuk jamita sadarion mancaritohon kehidupan ni sada ina namargoar si Rut na dung ditinggalhon ni amang siadopanna (halaklahi/suami). Sada ina na mabalu na so tubuan anak. Sada ina na marasing suku sian halaklahina. Sada ina na sabagas rap dohot namboruna si Naomi.
Diparungkilon na niadopan ni si Rut tarida ma tangkas bia do ngolu parasirohaon i di ngolu ni keluarga. Marasi roha do si Rut tu namboruna (simatuana). Marasiroha do si Naomi tu parumaenna na dung mabalui. Marasi roha muse do si Boas tu si Rut.
Biasi bisa halahi rap marasi ni roha? Alusna angke adong roha holong ni Debata Ama di bagasan ateate dohot roha ni halahi. Holong ni Debata na maringanan dibagasan roha ni halahi mangojar halahi marasi ni roha. Angka jolma na sai manghangoluhon holong na sian Debata Ama, angka halahi do na mampu marasi ni roha. Tapi muda hum holong ni hajolmaon do na adong di ateate dohot rohanta, maol jana bangkol do rohanta marasi ni roha tu dongan jolma.
Adong pigapiga hal na taida sian jamita on. Naparjolo, Dipake Debata Ama do sude jadijadian-Na laho patulushon asi ni roha-Na. Muda taida angka sejarah, dipake Debata Ama do halode laho pasingothon si Bileam. Diramoti Debata do si Elia marhitehite pidong sigak. Laho mamboan parhapistaran sian purba tu Jesus di Betlehem dilehen Debata do sada bintang gabe tudutudu di pardalanna. Siani tarida bahaso asi ni roha ni Debata bisa do dilehen ia tu angka nanitompana marhite huasoNa.
Napaduahon, Debata mansai kreatif laho manogunogu haholongan ni roha-Na.
Ditogutogu Debata Ama do parngoluon ni si Rut marhitehite si Boas, diurupi Ia do si Jona marhitehite ihan, bahkan dipalua ia do si Ishak marhitehite na manggontihon ia dohot domba. Artina, asi ni roha ni Debata laho paluahon na porsaya di Sia marragam rupa carana dibaen Ia. Memang Debata na kreatif do ia laho manogunogu haholongan ni roha-Na.
Napatoluhon, Fakta na tarida nada mangotapi asi ni roha ni Debata.
Fakta di bagasan carito on patidahon na pogos do si Rut, nada adong bagia aha nia, nada adong masa depan na na denggan, bahkan mardalan pe ia di kobun ni si Boas tanpa adong ijin dohot jaminan sian ise pe. Tapi si Rut nada marungutungut ia, dohot inda putus asa, harana dihaporsayai ia do dibalik ni hapogosanna, parhancitanna, pasti adong pangurupion sian Debata Ama na bisa manguba ngoluna. Jana kenyataanna, diurupi Debata do ia marhite si Boas. Artina, asi ni roha ni Debata nada tergantung tu hapogosanta, asi ni roha ni Debata tergantung tu togu ni haporsayaanta maradophon Debata silehen ngolu ni jolma.
Antong muda songoni asi ni roha ni Debata tu hita angka jolma manisia on, bia nama muse hita nadung dapotan asi ni roha ni Debata on dipardalanan ni ngolunta? Naparjolo, haholongi ma donganmu jolma sian asi ni roha ni Debata. Muda taligi angka donganta na marsitaonon harani ekonomi, pendidikan, parkarejoan, persoalan dakdanak, persoalan rumahtangga, persoalan karierna, marema talehen rasa empati dohot perasaan na mendalam laho mangurupi halahi. Mangurupi angka dongan sisongoni angkon ro sian roha holong na sian Debata. Roha na marasi nada hum na mangaligi parhancitan ni halak dungi tapartatai.
Napaduahon¸ hajopkon ma ngolumu. Halak na mura marasi roha i ma angka jolma na manghajopkon ngoluna. Namanghajopkon ngoluna berarti mampu ia manjagit fakta ni ngoluna. Jolma si songon on mura ma mengidentifikasi dirina, mura mengindentifikasi diri ni donganna na marsitaonon jana manigor mura ma ia muse mangelehen pangurupion tu halahi.
Napatoluhon, berpikir na denggan. Halak na mura marasi roha i ma angka halak na denggan pikiranna. Marasi ni roha di bagasan denggan ni pikiran mamboan faedah na mansai denggan. Tapi marasi roha dibagasan jut ni pikiran mambaen mara bahkan mamboan hasesego tu diriniba dohot tu dongan.
Napaopathon, bayun ma pardonganan na denggan. Parasirohaon mardalan muda denggan hubungan dohot dongan jolma. Maol do halak laho marasi ni roha tu angka jolma na hurang parsaoranna. Harani i, aso mura hita marasi ni roha, tabayun ma pardonganan na denggan tu sude dongan jolma.
fidei-gladys
Kantor Pusat GKPA, Agustus 2009
Ramli SN Harahap
Email: ramlyharahap@yahoo.com;
www.ramlyharahap.blogspot.com
Tidak ada komentar:
Posting Komentar