Parsidohot
di Harajaan ni Debata
muda dung ro tingkina
MInggu ADVENT 3
13 Desember 2009
Jamita : Lukas 13 : 23 - 30
Sibasaon : 2 Tesalonika 2 : 13-17
PATUJOLO
Dumenggan do hita sise turpuk on mamungka sian ayat 22, harana sude do Bibel manyuratkon Lukas 13:22-30 na gabe sada hasadaan. Nada binoto nian biasi ingkon gail na sada ayat i nada dipadohot gabe turpuk jamita minggu on. Mangihutkon pandapot ni panulis jamita on, dumenggan do tapamasuk ayat 22 harana adong hatorangan na tung mansai porlu botoonta parpayak ni jamita on, i ma di tingki pardalanan ni Jesus na mamolus angka huta dohot pagaranna laho masuk tu Jerusalem.
Porlu na ingkon botoonta hatorangan tingki dohot inganan i, ima patuduhon sada gombaran na nipangkilalahon ni Jesus hombar tu pangajaran na dibaritahonNa. Harana umbahatan do angka na mangarangrangi (ahli tafsir) buku ni si Lukas mangaligi sada paraloan na bolon na masa di tonga-tonga ni Jesus maradopkon angka malim Jahudi (Halak Parisi dohot Saduse). Muda adong tingkinta tapamanat ma sian ponggol parjolo lopus tu ujungna bisa do tapangkilalahon paraloan i. Paraloan i ma na gabe ciri khas Injil Lukas, na berpuncak di Golgata di hayu parsilang.
Pangarimpunan ni turpuk on, tarida do i di ayat 30. Angka pandohan na adong di ayat 30 on, madung jotjot dihatahon Jesus di angka ragam-ragam situasi (ligi Markus 10:31, dohot Mateus 19:30;20:16).
HATORANGANNA
Ayat 22-27 ; Si Lukas paingotkon hita bahaso Jesus di bagasan pardalanan laho tu Jerusalem. Tu angka na mambege jamita ni Jesus saotik nai noma tingki na laho mangauhon (mengambil keputusan) i ma mangolopkon Ibana sanga manulak Ibana. Di bagasan keadaan i ma dipasahat si Lukas sapa-sapa songon na tarsurat di ayat 23 “Ale Tuhan otik de he halak na dapotan hangoluan?. Sapa-sapa on muda dipahombar tu ciri khas ni buku Lukas, na patuduhon paraloan na bolon, tontu marpardomuan do i tu pangantusion dogmatis ni halak Jahudi taringot tu ise de he na dapotan haluaan. Mangihutkon buku ni si Jesayas 60:21 bahaso halak Israel i ma bangso na nipuldit, jadi alus na biasa tu sapa-sapa ayat 23 ima : tu sude halak Israel sajo do dapotan haluaan, muda nada mambaen dosa na borat sajo. Bisa ma taparrohahon na niigil ni halak na mambaen sapa-sapa i : adong kehe porso on ni Jesus ma pangantusion dogmatis nadung bahat dihaporsayai halak Israel, jana adong kehe pandapot ni Jesus hum saotik do na manjagit haluaan i.
Tabo sajo do idaon cara ni Jesus mangalusi sapa-sapa i, harana nada langsung tu pikiran dogmatis dialusi Jesus, tapi tumpol do tu roha sanga ate-ate ni na marsapa i, jana angkon gabe mambuat sada haputusan di ngoluna; nada porlu sisapaan ise jana sadia bahat na giot malua tapi “gogoi ma anso ho sandiri masuk tu pintu na sompit i”.
Muda tapamanat di Matius 7:13-14 (songon sada sinopsis- turi-turian na hampir sarupa), di ayat 24 turpuk on dihatai holan taringot tu pintu na sompit, nada dalan na sompit, harana gombaran i di ayat 25 marpardomuan ma taringot tu sada bagas “muda jabat jongjong nampuna bagas i manggoruk pintu i”. Manggoruk pintu marastuan ma i nada adong be hatiha laho muba. Songon i ma di sada hatiha tu ari na giot ro pamasaon tu sandok portibion dohot sude na jolma, nang songon i tu marsasada halak, na ingkon tutup on ma pintu sanga naso adong be kesempatan dapotan haluaan na sian Debata. Jadi sanga ise na ro tarlambat na marastuan sanga ise na tarlambat mambaen haputusan, nada adong be hatiha laho manjagit haluaan i, nada adong be gunana manuktuki pintu. Sian bagasan bagas i roma alus muda manuktuhi dope “nada huboto sian dia hamu ro sanga nada hutanda hamu”, astuanna nada adong pardomuan di antara ni hita (ligi ma Mat. 25 :1-13).
Ayat 26 digombarhon songon dia angka halak na jongjong di luar ni bagasi di bagasan borngin na tung mansai golap mancubo laho masuk tu bagas i, tapi nada bisa be sanga marisuang noma karejo nai. Angka alasan na dipasahat ni halak na di luar ni bagas i, paingotkon hita songon na tarsurat di Matius 7:22, di si dipake Jesus do hata “Au”, Jesus sandiri ma mandok hata tu halahi “nada jungada hutanda hamu”. Hata hamu di Mat. 7:22 lumobi mai manudu tu halak na pasuman-sumankon gabe siihutkon Jesus; tapi muda di bagasan turpuk on diondolhon tu halak na marpandapot bahaso halahi sabangso rap dohot Jesus jana madung rap sa panganan dohot sapanginuman. Muda tapahombar tu Masmur 6:9, bahaso na ingkon ditulak do halahi; songon i muse di Yes. 60:21 angka halak na manganggap dirina halak na bonar jana ingkon taruli di haluaan na sian Debata, dibaen madung gabe bangso na tarpili halahi, hape ditulak do halahi jana digoari “angka halak na jahat”.
Na gabe catatan penting sanga pe pangarimpunan ni bagian ayat 22-27 bisa ma dohononta : ima pio-pio ni Debata anso mamake tingki dohot hatiha na dilehen ni Debata tu ganop jolma anso marhaubaan ni roha jana marusaho masuk sian pintu na sompit, tapi na tutu situtu tarbuka dope pintui, unang sanga ditutup.
Ayat 28-30 : Dung tangkas sian hatorangan ni ayat 24-27, gabe bisa ma idaonta parbedaan ni halak Jahudi na manulak Jesus dohot angka halak na so Jahudi na mangihutkon Jesus. Di ayat 28 di hata Indonesia didok “di sanalah”, jana muda di Parjanjian na Imbaru, hata Angkola terjemahan taon 1977 tarsurat hata “disi ma”, porlu hami pabotohonon harana hombar tu hata aslina sian hata Gorik, na marastuan disi ma di luar ni bagas, di inganan na golap i ma na gabe gombaran inganan ni angka halak tangis patungaripon, harana manyolso-li dohot muruk tu dirina sandiri dibaen madung sala sajo haputusanna na so ra mamake tingki dohot hatiha laho mangihutkon Jesus.
Di ayat 28-30 on ditaringoti do Harajaan ni Debata, na ingkon ro jana patar dibagasan hasisingkopna (kesempurnaan), jana di bagasan ni Harajaan i, tarida songon parsaoran di bagasan Pamunan Na Badia. Angka halak Jahudi na manulak Jesus harupe di goari halahi bangso na tarpili, tapi nada bisa halahi rap sajuguhan dohot si Abraham, si Isak, si Jakob dohot sude angka panurirang. Angka halak na asing do na marroan sian Purba dohot Pastima; sian Utara dohot Dangsina (sian sandok Portibi on) na gabe sajuguhan di meja harajaan ni Debata.
Laho mangantusi ayat 3, ingkon parrohanonta ma nada adong dibaen songon bolat-bolat na berlaku secara mutlak. Nada adong didokkon taringot tu sude halak Jahudi na gabe angka na parjolo, sanga pe sude halak na so Jahudi na gabe parpudi, tapi ingkon idaon ta ma di sude hatorangan ni si Lukas di perkembangan gereja na parjolo i di portibi on di tonga-tonga ni angka bangso : Angka na parjolo gabe parpudi marastuan mai angka halak na manggoari dirina bangso ni Debata (halak Farisi dohot Saduse) tapi na so manjagit Jesus; jana na parpudi gabe parjolo ima angka halak na bahat na dipaasing-asing ni halak Jahudi songon si jalo beo, nanigoaran halak pardosa,dohot angka na asing tapi nadung ro manopot Jesus, porsaya jana mangihutkon Ibana.
Pendek na : Angka halak Jahudi nada dipincang gabe ingananna di luar bagas sanga pe di luar Harajaan ni Debata, tapi bisa do gabe di luar halahi harani haputusan ni halahi manulak Jesus, dohot angka halak na so Jahudi nada gabe otomatis halahi dijagit di Harajaan ni Debata narani bangso na so jahudi halahi, tapi harani haputusan ni halahi do ra muba, porsaya jana satia mangihutkon Jesus. Di son ma idaon prinsip taringot tu Harajaan ni Debata na “inklusif” astuanna, tarbuka tu sude halak. Tu sude halak na ra marsiranggut laho masuk sian pintu na sompit i, marhite-hite na ro mangoku dirina pardosa jana satia mangihutko Jesus angka ido na gabe parsidohot di Harajaan ni Debata, tu hita saluhut na salolot di portibi on, tarbuka dope pintu; astuanna adong dope tingki dohot hatiha laho marsiranggut mamolus pntu (dalan masuk) tu Harajaan ni Debata.
SIPAHUSOR-HUSORON :
1. Di Minggu Advend tongtong do hita marningot jana pahusor-husoron di rohanta na di bagasan pardalanan do hita di bagasan tingki dohot hatiha na ingkon lalu tu sada hatiha na parpudi. Dibagasan hatiha dohot tingki ido hita mardalan jana mambuat sada haputusan di ngolunta na gabe siranggutkononta (perjuangan) anso gabe parsidohot hita di bagasan Harajaan ni Debata.
2. Muda tapahombar songon sapa-sapa na adong di turpuk on ”ise jana sadia bahat na dapotan haluaan”, nada sala sapa-sapa tapi inda marguna; na umporlu gabe sapa-sapa tu ganop dirinta do madung dehe tagogoi/taparsiranggut/taparjuangkon di ngolunta anso tabolus sanga tahangoluhon hata ni Tuhan na gabe jaminan anso masuk hita tu bagasan harajaan ni Debata.
3. Nada bisa baenon hape na gabe jaminan muda targoar halak Israel gabe bangso na tarpili, sanga pe hita nadung targoar halak Kristen gabe otomatis masuk tu Harajaan ni Debata, jana nada bisa i baenon alasan anso dibuka pintu nadung margoruk, jadi nada bisa baenon sada goar/gelar maroban hita masuk tu harajaan ni Debata, tapi sian haubaan ni roha dohot na manggogohon ngoluna laho mangihutkon Jesus i do na masuk tu Harajaan ni Debata.
4. Saonnari buka dope pintu i, antong tahangoluhon aha nadung tahaporsayai tu Jesus painte so digoruk pintui. Amen
Pdt.J.P.Matondang,MTh
Ka.Biro III
Kantor Pusat GKPA
Tidak ada komentar:
Posting Komentar