JAMITA TAON NA IMBARU EPHORUS GKPA

JAMITA TAON NA IMBARU 1 JANUARI 2010

LIGI JANA DAI MA DENGGAN BASA NI DEBATA
Jamita : Masmur 34:8-11 Sibasaon : Halumbaan 2:8-11


PATUJOLO

Selamat Taon na Imbaru ma di hita sudena
Damang, dainang na nihaholongan ni Tuhanta Jesus Kristus
Dibagasan serep dohot toruk ni roha ma hita pasahatkon puji-pujian dohot tarimakasi tu Tuhanta pardenggan basa i na dung manogu hita taripar tu bona ni taon 2010 on. Tangkas do tapangkilalahon holong dohot denggan basa ni Debata na mandongani pardalanan ni ngolunta di na mamolus taon 2009 i harupe laing adong sipikiran dohot angka hamaolon na taadopi. Saluhut na ragam ni na masa i tabaen ma gabe pangalaman na mararga laho mandalani taon na imbaru on. Dibagasan jop ni roha tabolus ma taon na imbaru on marojahan tu Hata ni Tuhanta na tarsurat di Masmur 34:8-11, na mandok “Ligi jana Dai ma Denggan Basa ni Debata.” Dipuldit do tema on marningot na dung masuk hita tu taon napaopatkon di periode on, ima periode Bergiatlah dalam pekerjaan Tuhan” (I Kor “15:58b). Muda tarimangi sian segi waktu madung patut hita mangharopkon angka parbatu ni pangkobasionta di na manohapi tema ni periode on. Tema na tapuldit sadri on ditujuhon do tu ganup hita anso parsidohot nian hita manghaposi holong dohot denggan basa ni Debata i, holong dohot denggan basa na dung diparade tu hita, lumobi di na dung tapataridahon situtu ni rohanta laho manjata sangkap dohot pangidoan ni tema ni GKPA, songon na dung tatotopkon marhite sinode XV.
Di na giot pungkaonta ma mandalani taon on laing tama do tasuratkon di bagasan rohanta angka karejo na porlu siadopanta tu tingki nagiot ro painte so tapaujung dope periode on di taon 2011. Angka karejo na giot siadopanta ima: Kongres Wanita di taon on, Pesta Olopolop 35 taon GKPA di bulan Oktober laing ditaon on, Kebaktian Ucapan syukur 150 taon Hakaristenon di Luat Angkola disekitar bulan April 2011, dohot Synode Am XVII GKPA, sanga Synode Periode disekitar ni bulan Juli taon 2011. Pos do rohanta sude karejo on na gabe parhitean ni Debata ma i laho patuduhon denggan basaNa tu GKPA, anso marsangap-marmulia ma Goar ni Tuhan Jesus ulu ni Parlagutan i.
Damang, dainang na nihaholongan ni Tuhanta Jesus Kristus.
Hombar tu turpukta sadari on porlu do tangkasanta aha do denggan basa ni Debata i na gabe tema di hita sadari on, jana porlu do botoonta aha do na masa tu si Daud di tingki i anso maurtangkas tarida hita impola ni jamita on. Antong mare ma tapaihut-ihut hatorangan ni jamita on dibagasan sonang ni roha.
Porlu do apaanta: Aha do na masa dibaen na tubu pandohan ni si Daud di ayat 8: “Ligi jana dai sandiri ma hadengganan ni Tuhan, martua ma na maronding tuSia?” Muda tapamanat ayat on marboncir do i sian pangalaman ni si Daud na disuratkon di 1 Samuel 21:10-22:1, na gabe ojahan laho manyuratkon Masmur 34. Masmur on disuratkon si Daud hara na dipalua Debata ibana sian parmaraan. Salolot on, sian na so pamotoan ni si Daud torus do marusaho si Saul laho mambunu ia. Adong do keyakinan ni si Saul bahaso saleleng mangolu si Daud inda bisa anaknia gabe raja, songon na ni dok nia tu si Jonathan: “Na so diboto ho dehe anggo salolot mangolu si Daud na so tarbaen ho gabe raja di luat on? Saonnari suruhon ma halak manjalahi dohot maroban ia tuson, harana angkon mate do ia”(1 Samuel 20:31). Usaho ni si Saul na jahat on mambaen mabiar jana maporus si Daud tu luat Gat. Dung lalu ia disi hape bahat do halak na mananda ia jana marende mamuji ia, gabe mabiar ma ia tarboto tu raja Akhis, sangape raja na nigoaran raja Abimelek namarkuaso di luat i. Laho paluahon dirinia sian raja Abimelek dipaula-ula ia ma rintik di jolo ni raja i, dijomahi ia ma pintu horbangan ni kota i jana dipadiar ia ma maderder dedenia lalu tu janggutnia. Marnida i goyak ma roha ni raja i diporot ia ma si Daud sian luat i, gabe malua ma si Daud sian parmaraan i. Marnida partolongan ni Debata on diendehon ia ma masmur 34 on. Jadi sian masmur 34 tangkas tarida haluaan do dengganbasa i, tapi ihut tusi adong do tolu na porlu sitangkasanta sanga na sipahusor-husoronta na marhadomuan tu jamita on, ima:
Naparjolo: Aha do Denggan Basa ni Debata i?
Muda tapaihut-ihut hatorangan na diginjang i tangkas ma tu hita bahaso denggan basa ni Debata na nipatorang ni si Daud ima; naparjolo haluaan. Haluaan sian habiaran (ayat 4), haluaan sian pardangolan (ayat 6) dohot haluaan sian bahaya (ayat 7). Bisa do tagoari haluaan on gabe haluaan sian hamatean, hamatean natorus disangkap roha ni raja Saul maradopkon si Daud. Songon jolma na marakal sehat maol do hita mangastui biasi torus biraraon (benci dan marah) raja Saul marnida si Daud, hape angka nadenggan do dipatupa ia tu si Saul. Diurupi ia do raja Saul marporang lalu tu na manaluhon sude musunia. Tapi haru pe songon i laing torus do adong hosom (dendam) di rohania, torus tubu iri di rohania, gabe torus ma si Daud dibagasan biar, mardangol pangkilalaanna, tapi malua do si Daud sian parmaraan i hara ni pangurupion ni Tuhan.
Denggan basa napaduahon ima haradeon ni sipanganon. Loja, manguas jana male do pangkilalan ni si Daud na nikojar-kojar ni raja Saul i. Maporus do ia lalu tu luat Gat inda mangan inda minum. Hara ni posi ni pangkilalaannia dibaranihon si Daud ma manopot Malim Ahimelek laho mangido roti na adong disia. Dilehen malim i do roti haul na adong disi anso adong panganon nia dohot naposona. Marhite malim i diparade Debata do na porlu tu pamatang ni si Daud songon pangokuon nia na mandok: “Sanga ise na burju mangoloi Debata nada dumpang hahurangan. Angka singa pe markancit hara ni na malean hape dilehen do sude na denggan anggo tu halak na manjalahi Tuhan” (ayat 9-10a). Bahat pe ragam ni sitaonon na ro tu si Daud tuk do tangan ni Debata laho mangondihon ngoluna, di diramoti Debata do ia anso malua sian na malean, malua sian hamatean i.
Damang, dainang na nihaholongan ni Tuhanta Jesus Kristus
Muda tapamant do na masa i maragam do hape dalan ni parmaraan i ro tungolu ni naporsaya i, bisa do i hara ni na sangajo disangkap dongan jolma na margoyak ni roha tu hita, bisa muse hara ni na adong iri ni dongan tu hita, dohot angka na asing-asing dope na so tarpajojor hita. Antong na umporlu siingotonta ima padaohon dirinta sian roha na sompit, sifat na hum mamikirhon dirinta-sandiri, na hum mamikirhon keluarganta, sanga na hum mamikirhon garejanta. Muda tapadao hita sifat na sompit i baru ma tarjagit hita dongan na asing, tarjagit hita karejo na asing karejo na gumodang na so unjung dope tapikirhon, karejo na dung diparade ni Debata tu hita. Muda tapahan-pahan parohaon ego dohot iri ujungna bisa do i manogu hita tu dosa na gumodang, tu dosa na tega mabunu dongan jolma songon na tarida sian pangalaman ni si Saul. Sabalikna angkon marsiajar do hita sian sifat ni si Daud na gok holong dohot toruk ni roha, na so ra mamaloskon hajahaton ni si Saul harupe adong disia kesempatan i. Songon dia pe pangalaho ni raja Saul inda ra ia manilakoi i, tongtong do di bela ia jana dipasangap ia sapanjang ni ngoluna. Sikap na songon on ma na parade dalan mangaligi jana mandai denggan basa ni Debata.
Di taon 2000 na salpu dicanangkon Dewan Gereja sedunia do Dekade Anti Kekerasan. Sampulu taon lolotna dung dimulai program on ima sian taon 2000 lalu tu taon 2010. Dipangido do sude gareja anso dohot mangurahi hajahaton na masa di portibi on. Taon 2010 on ma ditotopkon na gabe taon evaluasi, menilai sanga na adongdo pengaruh ni program i sanga inda, sanga murak dehe hajahaton i muda dibandingkon tu angka ari na dung salpu? Muda na so murak dope toruskonon ma program on lalu tu taon 2020. Gareja sanga halak na porsaya do na parjolo diharopkon na gabe sioban dame, napadamehon angka parbadaan (konflik horizontal) na tarjadi di portibi on anso murbahat halak na taruli di Denggan basa ni Debata, ima dame sanga haluaan sian pardangolan dohot hamatean, antong jop ma rohanta manohapi karejo i.
Napaduahon: Aha do baenonta anso parsidohot hita mangaligi jana mandai Denggan basa ni Debata i?
Sian tiruan na nilehen ni si Daud di Masmur 34 on adong do tolu tiruan na porlu situtu siihutkononta, ima:
A. Patogu haporsayaan tu Debata. Masa pe pandugaan na marsiki-soluk dingolu ni si Daud inda na gabe mabaen ia mandele jana mandao sian Debata, tapi na gabe patoguhon haporsayaannia tu gogo dohot bisuk ni Debata na sanggup patupahon haluaon di ngolunia. Di dok si Daud do dibagasan haporsayaana:”Martua ma sanga ise na maronding tuSia” (ayat 8b). Malua do si Daud di na maronding tu Debata. Porlu do tahangoluhon pangokuon na songon on na gabe impola ni haporsayaanta, haporsayaan na tarida diparngoluonta siganup ari. Di deba hita mura do nian mangoku porsaya tu Debata tapi laing dipaihut-ihut do pikiran ni hajolmaonna ujungna gabe ra mandele lumobima i muda jotjot ro na manyosak keselamatan ni ngolunta. Jot-jot sapa-sapa rohanta mandok; Na so ditatap Ho be au ale Tuhan di pardangolan on? Punjung pangkilalaan i sian dongan na dua-tolu. Tapi anggo si Daud, di situasi si songon on pe murdipatogu ia do haposayaannia tu Debata, ima tiruan na denggan tu hita.
B. Papos roha martangiang tu Debata. Jotjot do digambarkon tangiang songon hosa niparngoluon. Masa jop ni roha porlu martangiang, ro pe hasusaan laing torus martangiang. Di ngolu ni si Daud tarida do porlu ni tangian (ayat 4,6,). Tarida do i sian pardalanan ni ngolunia na disuratkon di Buku Masmur dohot Sejarah ni Raja-raja ni Bangso Israel. Hara ni tangiang jotjot do masa angka tanda halongangan na dipatupa Debata tu si Daud dohot bangso Israel, dialusi Debata holos dohot pangidoan ni halahi. Ditingkinta saonnari bahat do na masa diluar ni paretonganta, masa demo, masa porang, ro banjir, tompu ro lalo na gogo, martamba hajahaton, martamba hagaoron dohot angka na asing na mambaen hita mabiar. Di na laho paposkon rohanta di ngolu on, anso ulang ra hita putus asa tapagomos ma rohanta martangiang, angke marbinege do Debata tu adu-adu ni halak na di bagasan hagogotan. Debata do na margogo dohot na marbisuk mangatur sude pardalanan ni ngolunta. Ulang marnaloja martangiang.
C. Mandasdasi roha anso torus mandok tarimakasi tu Debata. Roha tarimakasi, ende pujian dohot tangiang simora-mora angka on ma napasonang roha ni Tuhan. Muda martangiang biasona hita pasahatkon pangidoan sajo tapi muda mandok tarimakasi ima na pasahatkon job ni rohanta dohot pamujion ni rohanta tu alus na nipasahat ni Debata, anso marsanagap-marmulia ma gaoarNia na patupaho angka na denggan i. Halak na margogo mandok tarimakasi di sude keadaan ima tanda ni halak na dung matoras dingolu ni partondion, angke barangdia pe na masa dirajumi sanga dijagit ia do i sian parbinotoan ni Debata, songon na tarida dingolu ni si Daud.
Damang, dainang na nihaholongan ni Tuhanta Jesus Kristus
Napatoluhon: Aha do tanggungjawabta songon halak na dung parsidohot mangaligi dohot mandai Denggan basa ni Debata?
Di ayat 11 turpukta on didok si Daud do: “Tangihon ma, sude hamu angka dakdanak, huajari hamu pasangaphon TUHAN.” Ayat on patorangkon bahaso tanggungjawab na parjolo ima paradehon roha laho pararatkon denggan basa ni Debata marhite namangajari dongan jolma anso parsidohot halahi mandai denggan basa ni Debata. Madung ditompa Debata hita na gabe parhitean laho pasahatkon pasu-pasuNia anso marhite ngolu ni halahi murrarat ma hasangapon ni Tuhanta na dung padumpangkon denggan basa i. Bahat do hape ragam ni pangajaran na bisa tapatupa laho pararatkon dengaan basai ni Tuhan, tapi na parjolo situtu tapararat ma i marhite tiruan ni ngolunta, ima parbatu ni denggan basa ni Debata na dung ta dai.
PANUTUP
Damang, dainang na nihaholongan ni Tuhanta Jesus Kristus
Sian jamita sadari on madung tangkas tabege denggan basa ni Debata na dilehen tu halak naporsaya. Songon paninggalkonta di taon na buruk i laing songon i ma tatinggalkon roha iri, dohot roha ego, sanga roha na hum mamikirkon dirina sajo, angke roha na songon on do mula ni hajahatan i songon na patar tarida dingolu ni raja Saul. Inda tarjagit roha ni raja Saul muda na so tu anaknia, sanga tu horongnia madabu harajaon i, harupe satutuna Tuhan do namangalumbahon harajaan i tu si Daud jana inda tarpabege-bege pinggol ni raja Saul puji-pujian ni bangso Israel na mandok, si Saul manaluhon musu maribu-ribu tapi si Daud manaluhon mapulu ribu (1 Samuel 18:7). Hape sian pambaenan tangkas do tarida si Daud do na patut gabe raja, ia do na manaluhon si Goliat, ia do na manaluhon musu ni bangso Israel harana ia do na mangkarejohon lomo ni roha ni Debata.
Antong tapadao ma rohanta sian roha pardagingon, taparayak ma tu lomo ni roha ni Debata anso murtogu haporsayaanta, murgomos hita martangiang. Ulang mandele muda ro pe pandugaan, tapasahat ma sudena i dibagasan roha na mandok tarimakasi tu Debata, dungi taligi jana tadai ma denggan basa ni Debata i. Amin.
Selamat taon na imbaru ma di hita sudena.
Pdt. A.L.Hutasoit,MA
Ephorus