Tongtong ma argahon donganmu dingolumu
Minggu 22 Dung Trinitatis
Tgl 08 Nop 2009
Jamita : Jesaya 58 : 4 – 12,
Sibasaon : 2 Korintus 9 : 6 – 15
PATUJOLONA
Songon jolma na tinompa ni Debata Jahowa hita di tano on, tontu umboto do Ibana satutu ni tutuna taringot tu hadirionta, dohot dingolunta jana laing ummaturan ma Debata mangaturhon sasude pardalanan ni ngolunta. Suang songoni do nang di hagiotta, dibaen natinompa-Na do hita, tontu gabe Debata sandiri ma na lumobi marhagiot di ngolunta on, artina muda bontar diroha-Nia, tontu angkon bontar do i, jana muda giot lomlom diroha-Nia tontu angkon lomlom juo do i. Harana hagiot ni Debata do di sasude natinompa-Na i. Jadi domu tusangkap dohot panompaan-Nia i tu sasude jolma, jana arga situtu do jolma natinompa-Na i di Ibana, dibaen i ma angkon laing argahonon ni natinompa i do donganna na ditompa ni Panompa i ! Dibaen i ma di na taargahon Debata dingolunta on marhite na mamarangehon hagiot-Nia, di pardalanan ni ngolu ni hakristenonta, jana anso hataridaan ni parngoluon ni naporsaya, na tutu situtu hita siihut Tuhan Jesus Kristus disandok panggulmiton ni ngolunta di portibion.
HATORANGAN NI JAMITA
Satutuna angkon tarajumi do bahaso sian ruar lalu tubagasan ni hadirionta, patar do i diadopan ni Debata, artina inda adong nabuni i di adopan-Nia, muda dibahasa Indonesia didok (tidak ada kepalsuan) di bagasan hadirion ni Ibana, dibaen i, angkon taparhatutuma di bagasan ngolunta, mangkangoluhon na tutu situtu, arian dohot borngin. Ulang muda arian hita halak karisten siihut Jesus !, hape muda borngin hita kristen siihut begu. Dongan sahaporsa-yaan haholongan ni Tuhan Jesus Kristus, diturpuk jamita diminggunta on, tangkas do diondolhon tu hita i ma :
1. Ulang gabe na paoto-oto dirinta hita dingolunta on; Tadok hita karisten, hape inda tutu taihutkon ajaran dohot parenta ni Jesus Kristus. Diayat 4 i didok marpuaso do hamu, tapi puasonta i, giot patubu bada dohot parsalisian, songoni dohot gogo ni pamatang. Satutuna parange sisongon i ma namambahen gabe inda lalu angka tariak dohot pangidoanta tu Debata Jahowa di habangsa-Niaan. Artina tarida ma nian sian parbatu ni pangkataionta, di parange dohot pambaenanta, anso gabe hasangapan di Tuhan Debata sasudena pardalanan ni ngolunta on.
2. Mangkangoluhon hagiot ni Tuhan Jesus Kristus ; Di ginjang ni sasude angka hata dohot pambaenanta anso ma nian, gabe na tumbuk tu roha ni Debata Jahowa ma tahangoluhon, dohot hata ni Debata na sian surat natarsurat di buku Nabadia i ma taparangehon, arian dohot borngin. Jadi muda songon sada naposo parhobas ni harajaan ni Tuhanta i hita, ulang ma hum arian sajo pangkobasionta i tahangoluhon, tapi laing manongtong ma i dingolunta, ulang gabe tubu angka pandohan ; (Parkobas ni Tuhan di arian, tapi muda borngin gabe bandit ni sibolis). Jadi nagiot tatapon ni Tuhan Jahowa sian habangsaNa i, inda hataridaan ni nasian ruar, tapi parange naharuar sian bagasan jana na manongtong. Muda songoni do tahangoluhon, ngolu ni hakristenonta, ngolu na dihagioti ni Tuhan Jahowa ma i, jana napasonang roha-Nia, dohot na mangargahon Ibana ma hita di sasude natakarejohon i. Jana gabe sinondang ma hita di portibion, tu angka donganta jolma bope naso porsaya dope, songoni dohot tu angka nadung porsaya.
3. Mangargahon sude dongan jolma dipardalanan ni ngolunta; Hapapatar ni pasu-pasu ni Tuhan Jahowa na tajagit i, inda hum mangkajopkon na adong dohot na tapangkilalahon i di ngolunta, tapi biado hita anso bisa marsipangalehenan nasada tu naasing (berbagi rasa), artina angkon mampu do hita mandokkon tu donganta; Ketale dongan tahajobkon pasu-pasu ni Tuhanta nadung hami jagit di bagasan na sadarion, di bagasan na sapokenon, di bagasan na sabulanon dohot di bagasan na sataon on. Anso di natabaen songoni tu angka donganta dohot tujuan, hum nagiot pabotohon denggan basa ni Tuhan Debata do hita disi, artina inda nagiot pataridahon haadongonta dohot parbatu ni gogo na takarejohon, bope angka usaho na tabaen. Tapi hum nagiot pasangapkon Tuhan Jesus Kristus do tujuan ni na taparangehon di ngolunta on.
4. Paluahon boban na dipabobankon ni portibion; Tutu dohot sasintongna do, diajari hita anso malo mangatur dohot mamake sasude pasu-pasu ni Debata na dipasahat tu hita, tapi ulang lupa hita, bahaso ummalo dope Tuhanta Jesus Kristus mangatur dohot paradehon naporlu situtu di hita. Bope i taringot di haporluon parngoluon siganup ari, songoni dohot angka parsaoranta di sandok pardalanan ni ngolunta arian dohot borngin. Angkon bisa do hita manjagit dohot manjaluangi angka donganta, bope adong na humurang tapangkilalahon panjagiton dohot pangkobasion ni halahi di kehadiranta, lumobi ma angka halak naso marpor ni roha tu pangkobasionta. Harana inda ditangihon Debata piopionta muda nada talupahon angka hahurangan ni donganta. Jadi muda taparangehon sisongoni dingolunta on, napaluaon halahi do hita sian angka hasusaan dohot boban na diadopan ni halahi, lumobi ma i sian hagolapan, namanggolapi ngolu partondion ni halahi sapanjang di portibion.
5. Gabe habaoran ni pasu-pasu sian Tuhanta ma hita; Di natapangkilalahon dohot tarajumi denggan basa songoni pasu-pasu ni Tuhan Debata di ngolunta on, gabe patubu pangkaposionta do i, dohot mur patoguhon haporsayaanta ma i tu Ibana. Dibaen i ma, angkon patar do i dipardalanan ni parngoluonta, jana gabe dalan dohot habaoran ni pasu-pasu ni Tuhanta i ma hita bahat jolma, didia pe hita mangolu. Jana angkon adong do di hita pangastuion, bahaso di na taurupi dohot ta tolong angka donganta sian angka hasusaanna, gabe sada sijop ni roha do on di hita, harana di na taparangehon/tahangoluhon sisongon i, gabe mur patubuhon gogo, dohot manambai pambaenanta do i, di adopan ni Tuhan, anso marhite i ma, tongtong diusehon Jesus Kristus pasu-pasu-Na sian habangsanaNa tu hita, jana di sisongonon ma patar kehadiranta, giot paulihon nahumurang, dohot padenggankon, anso mur tu padena parngoluon ni angka donganta.
PANUTUP :
- Jadi tabaen ma ngolunta gabe surat na mangolu
- Jadi sipangoloi di sasude Hata dohot parenta ni Tuhanta Jesus Kristus
- Jadi arga sajo do hita sasude na tinompa ni Tuhan Debata
- Jadi mangalehen dalan dohot solusi ni angka donganta ma hita
- Jadi dalan pasu-pasu ni Tuhan Jesus Kristus ma parngoluonta
- Jadi Tuhanta Jesus Kristus do haroroan ni sasude pasu-pasu, tuSia ma tapasahat hasahatan ni sude na tanhangoluhon dohot taparangehon. Amen.
Pdt John Hasiholan Pakpahan,STh
Pendeta GKPA Resort Khusus Psp-Timur
Tidak ada komentar:
Posting Komentar