“HOLONG NI ROHA DOHOT ASI NI ROHA NI DEBATA DO TU HITA,
UMBAEN NA TUBU JESUS, SIPALUA I ”
JAMITA TU BORNGIN ARI NATAL, KAMIS, 24 DESEMBER 2009
JAMITA : Lukas 1 : 26-33
Sibasaon : Jesaya 12 : 1-6.
PATUJOLO :
Syalom, Selamat Natal ma di hita sude!
Angkon taoku bahaso borngin na sonang, gok jop ni roha dohot dame do di hita angka na porsaya tu Jesus borngin on. Angke madung 4 Minggu antong marturut-turut taparade rohanta marhite Minggu Advent, laho mamestahon Pesta Natal borngin on. Marhite i, ganup keluarga do ro tu Pesta on. Bahkan na so jungada mar-Minggu (maribadah tingki ari Minggu) jop do rohana laho ro tu pesta Natal on. Harani i marisi do angka bangku (bahkan adong na mambaen tenda) di kota dohot di desa muda dapot ma borngin Natal songon na tapestahon borngin on. Sude pangisi ni tanoon, na menek na magodang, na dangol, na kuaso, na pogos na kayo, na oto, na pistar, marolop-olop tu Debata hara ni denggan ni basa dohot holongNa tu hita tingki on.
Marhite i turpukta pe borngin on, dipabotohon do tu hita bahaso ”HOLONG NI ROHA DOHOT ASI NI ROHA NI DEBATA DO TU HITA, UMBAEN NA TUBU JESUS, SIPALUA I”
1. Dipake Debata do jolma manusia na gabe parkokasNa (alatNa).
Muda taparate-atehon turpukta saborngin on, Debata sandiri do na na markarejo marhite holong dohot gogoNa laho parohon haluaan na tu portibion.
Painte so ro Suru-suruan Gabariel tu si Maria, dipabotohon do taringot aha naung masa tu si Elisabeth dohot si Sakarias ( ay. 5-25), i ma naung denggan pamatang ni si Elisabeth bope naung matobang/ginjang umurna. Sannari marhite si Maria ma, sada bujing-bujing naung martunangan dohot si Josep dipabotohon, paboa na giot ro Sipalua ni hajolmaon on. Si Elisabeth madung matonbang jana nada marhauntungan, tapi si Maria, sada bujung-bujing na so marhasohotan dope. Nada halak na kayo, boru ni kota, jana nada na ’terkenal’ (artis, pemain sinetron, penyanyi, ilmuwan dll) halahi, tapi halahi do ditopot, dipaias jana dipake Debata na gabe parkokasNa, alatNa na gabe saluran berkat tu portibion.
Disuru Debata ma Suru-suruan Gabariel (ay,26 b), paboahon bahaso Debata do na markarejo. Pandohan ni suru-suruan i pe tangkas do ”Horas ma di ho, bujing-bujing na nipasupasu ni Tuhan! Sai rap do Tuhan i dohot ho” (ay.28) Pabotohon bahaso bope inda jolma na sempurna, bahkan bujing-bujing dope si Maria, madung di asi i, di puldit, dipaias, jana di pasu-pasu Debata ia, gabe saluran ni asi ni roha dohot pasu-pasu ni Debata ibana tu portibion. Didok ’nadi pasu-pasu ni Debata do ho, (ay.28), di ayat 30, didok : ..dibaen jop do roha ni Debata mida ho’ (sebab engkau beroleh kasih karunia dihadapan Allah’). Jadi hara karejo ni Debata do on, ulang mabiar. Porsaya ma tu Tuhan, na mandongani dohot mamasu-masu karejoon.
Na menarik, nada ditulak si Maria pamillitonnai, toruk do rohana, jana dipabulus rohana laho manjagit tugas tanggung-jawab na nipasahat ni Debata tusia. (bd. Ay. 38) Hape tugas na borat, na maol do on disia, angke bujing-bujing jana na martunangan dope ia, hape angkon denggan ma pamatangna jana tubuan anak ia muse.
Marhite i, taida bahaso sanga ise pe hita on, na menek, namagodang, na kayo, na pogos, na pistar naoto, parhuta-huta, par-kota, dna, giot pakeon ni Debata do hita gabe parkokasNa, alatNa laho gabe saluran berkat/pasu-pasu tu bahat jolma, asal ma ra hita burju manjagit tugas, tanggung-jawab i sian Debata. Ia do na mamio hita, na paiaskon hita, na mengutus hita, anso bahat jolma manjagit haluaon i.
2. Jesus na sorang i, i ma Anak ni Debata na Gumincat, Raja na Markuaso.
Tujuan ni Suru-suruan i manopot si Maria, i ma laho patuluskon Rencana ni Debata tu portibion, naung dilumbahonNa hian marhite Nabi, Raja dohot angka naposo ni Debata. Jesus ma baenonna goarNa, artina SIPALUA – Yosyua, Yehssyua (Heber), marlapatan : Jahowa (Jahwe) menolong atau menyelamatkan. Paingotkon si Maria dohot bangsoNa bahaso si Josua do (ganti ni si Musa) dipake Debata laho maroban bangso i sian parhorsihan (manaripari aek Jordan dohot mangaroncohon tembok Jerikho), laho masuk tu tano parjanjian Kanaan.
Jadi Jesus ma antong na gabe Sipalua, laho paluahon hita jolma sian pardalananta di portibi on tu hasonangan naung ni parade ni Debata di Surgo. Raja na Tumimbul, Anak ni Debata na Gumincat, jana Raja ni angka Raja do Jesus. Markuaso laho paluahon sian gomgoman ni dosa dohot sibolis.
Harani i, Tondi Porbadia do mangarajai dohot kuaso ni Debata do na manggohi si Maria anso tulus sudena i. Nada kuaso ni jolma, tapi kuaso ni Debata do.
Jadi bope bujing-bujing jana dadaboru na sederhana si Maria, Debata do patupahon sudena karejo on. Jana Debata sandiri do na giot sorang on. Na giot paluahon sudena jolma manusia.
On ma sihajopkononta borngin on, ma sorang be Raja Gumincat, Raja na Markuaso, bope inda songon pamarentaon ni harajaon portibi, lumobi do kuasoNa sian nasa raja na adong di portibion. Di Filipi 2 : 10-11 didok, ”Anso marsinggang ma dibagasan goar Jesus, sandok na di banua ginjang na di tanoon dohot na di toru ni tano on. Angkon torang ma okuan ni halahi paboa Jesus Kristus do Tuhan...”
Raja ni portibion terbatas, kuasona, harajaanna, gogona dohot umurna. Tapi Raja na sorang on, Jesus Kristus, Tuhanta, Raja na markuaso paluahon hita sian sude gomgoman ni dosa dohot sibolis dohot hamatean, jana Raja na naung paradehon inganan na sonang ni nasonang nada terbatas, tapi salolot ni lolotna.
3. Tajagit ma haluaan i jana tabaritahon ma i tu bahat jolma.
”Naposo ni Tuhan do au, sai tulus ma tu au songon na nidokMi”, (ay.38) Pandohan dohot alus on ma na patut dongkononta tu barita haluan na ni pasahat tu hita borngin on. Bope bahat angka hamaolon, bahat dosa, bahat na so tabo pangkilalaanta tingkion. Tapi madung dibaritahon tu hita haluaan i, hara ni i tajagit ma. Tahaporsaya i ma. Tapabulus ma rohanta laho manjagit barita i.
PANUTUP
Bope naung jotjot do tabege barita Natal on, laing dipaingot jana dibaritahon do tu hita borngin on barita Haluaan on tu hita, anso taingot karejo ni Debata do patupahon haluaan tu hita jolma manusia. Tutu dipake Debata do hita jolma manusia, sanga ise pe hita on laho palaluhon bahaso Jesus madung ro gabe Raja ni angka Raja, Tuhan ni angka Tuhan, TAHAPORSAYA I MA HOLONG NI ROHA NI DEBATA NA SONGON I GODANG NA, LAHO PALUAHON, LAHO MANDONGANI HITA TONGTONG (IMMANUEL), jana burju ma hita laho paboahon, patuduhon tu dongan jolma. Bahat do tingkion donganta jolma na tangis, na dangol, na pogos, na maringanan di na golap, na sangat membutuhkon perhatianta, anso dohot halahi manjagit haluaon naniparade ni Debata di hita jolma.
Amen.
Pdt. AHJ. Sibarani STh
Kantor Pusat GKPA
Tidak ada komentar:
Posting Komentar