Na manjagit Jesus gabe angka dakdanak ni Debata
PESTA NATAL PADUAHON
Sabtu, 26 Desember 2009
Jamita : Johannes 1 : 9-14
Sibasaon : 1 Johannes 2 : 7-10
Patujolo
Parsaoranta hatiha on ima ari paduahon na laho mamestahon hasosorang ni Tuhan Jesus. Pola dua ari hita marpungu laho marjop ni roha di bagasan pesta natal, na patuduhon songon ima ringkot na hasosorang ni Tuhan Jesus di pardalanan partondion (pengalaman spiritual) ni halak na porsaya. Tapi di bagasan hataridaan na di tonga-tonga ni parlagutan nada pola bahat ruas ni parlagutan i na ro tu gareja. Tutu dehe ringkot sajo pesta paduahon i?. Tontu angka hita be ma na mamasa turpuk on laho pahusor-husoron i, na pasti di kurikulum ni gareja sai tongtong dope disangkapi jana dibaen anso sude halak na porsaya marlagut mamestahon haroro ni Jesus, astuanna sai nadung dipangkilalahon angka uluan ni gareja na ingkon marlagut hita marningot hasosorang ni Tuhan Jesus. Nada tuk nian holan sadari laho pahusor-husoron angka tona na sian Debata di hasosorang ni Tuhan Jesus. Bahat na ingkon begeonta jana simomosanta di ari i.
Turpukta di pesta paduahon on ima taringit tu ”Hata na mangalehen Hangoluan”. Di angka parsermonan jotjot do tarida pandapot taringot tu turpuk on bahasa ponggol sada sian evangelium ni si Johannes maol astuan, harana nada songon pandohan ni angka parpilsafat do turpuk on, jana nada songon sada surat na marisihon turi-turian. Tapi sasintongna nada na maol astuan turpuk on muda tasulingkit, taihutkon ma hatorangan na di di toruon.
Muda taida tu evangelium na asing, parmulaan ni pambaenan ni Debata taringot tu Jesus dipungka marhite-hite karejo ni tokoh Johannes Pandidi. Di Matius 3:1-17 dipabotohon taringot tu pangkobasion ni si Johannes Pandidi dohot na dipandidihon ni si Johannes Tuhanta Jesus. Markus 1 :1-8 : Pangkobasion ni si Johannes Pandidi, Lukas 1 :5-25 taringot tu hasosorang ni si Johannes Pandidi. Nah.. sasintongna evangelium Johannes pe dipungka do sian panandaion ni si Johannes pandidi, tapi diihutkon mai dohot sada ende liturgi ni huria na parjolo na marisihon kristologi (sada hymne) dipamasuk tu bagian patujolo ni kisah Johannes songon na adong di hita sonnari. Jadi songon na nidok ni si C.H.Dodd, evangelium Johannes asing sian angka evangelium na asing harana evangelium ni si Johannes nada dipungka parkarejoan ni Debata di tano on, tapi di banua ginjang.
Mamungka sian ayat sada, jumpang hita pandohan ’’Hata i ’’ na marharoroan sian hata ’’logos’’. Muda filsafat Yunani, na marcampur rap dohot ajaran mistik gnostik, logos ima sada wujud na so haidaan na parjolo haruar sian hatutuan na marisihon nasa na adong jana manjoloani nasa na adong. Pandohan na ummura astuan patorangkon logos jumonok tu pangantusian ”pikiran”. Di zaman ni si Johannes, Palestina ima bagian ni budaya Hellenis, jadi nada pola longang roha muda angka pandohan filsafat (istilah-istilah Filsafat) dipake angka na manyuratkon evangelium laho patorangkon taringot tu haposayaan. Asing ni pengaruh Yunani, panyurat patoruskon sada tradisi Yahudi na ro sian Padan na Robi, ima konsep ”Bisuk” (Hikmat) na adong rap dohot Debata di tingki manompa na sa na adong (tangkasi ma jolo Poda 8:22-31 anso pe dilanjutkon bahasan on).
Jesus ima khidmat dohot logos, jadi Jesus rap dohot Debata tingki manompa na sa na adong, jana di bagasan Jesus adong hangoluan (Gorik :Zoe), jana nasing muse di Johannes ponggol sada on Jesus disarupohon dohot Sinondang (Gorik: foos). Sinondang i laho tu jolma. Jadi Jesus ima hangoluan dohot Sinondang nadung ro tu Portibion, ima na gabe jamita di pesta natal di ari paduahon on.
Hatorangan :
Ayat 9 : Torang (sinondang) na tutu na manorangi sandok jola madung ro tu portibi. Andorang so ro Jesus Kristus tu portibion, madung adong sinondang i, tapi di tingki haroro ni Jesus madung dibaen Ia gabe sinondang na satutuna jana na sintong. Sian pangantusion on do hita mandok Jesus ma na gabe hagogok (kepenuhan) ni sude angka sinondang na dilehen ni Debata, jana na gabe lalu hita tu pangajaran ”Kristocentris” ima berpusat tu sinondang na adong di Kristus Jesus.
Ayat 10-12 : Jesus ro tu bagasan kosmos. Muda diterjemahan Bibel Angkola dibaen do hata on “BangsoNa”. Tapi kosmos bisa di bagasan dua pangantusion ima portibi sanga pe sekelompok oranga i ma bangso Israel, naditompa ni Ibana, tapi nada ditanda kosmos i Ibana. Kosmos di bagasan turpuk on ima nasa jolma (di bagasan pangantusion kolektif), nadung ditompa ni Jesus, harani na nitompa ni Ibana, gabe nampuna ni Jesus, tapi nada dijagit jolma i Ibana. Jolma di bagasan pangantusion di son ima saluhutna nasa jolma na di portibion, jadi-jadian ni Debata na mangalo Ibana, tapi bisa do muse di bagasan pangantusion na paduahon ima : sada kelompok ni hajolmaon “halak Jahudi”, ima na di bagasan evangelium Johannes na manulak jana na tongtong maralo rap dohot Jesus, na ditulak ni halahi ima Jesus na gabe Anak ni Debata. Tapi naumporlu di hita saonnari hombar tu turpuk on (ayat 12) ima : bope sian halak Jahudi sanga sian hajolmaon sudena, sanga ise na manjagit Jesus gabe angka dakdanak ni Debata mai. (Gorik: Tekna Theou). Angka dakdanak ni Debata di son na sian hata Tekna jotjot doi dipake laho patuduhon status naniangkat sian hatoban (Anak Partubu tongtong do sian terjemahan Huios).
Astuanna di si muda anak angkat sian hatoban, taboto do muda hatoban nada adong di si hak (hak mangkatai, hak manontuhon dohot hak manean), holan na mangoloi tuanna do hatoban, tapi muda diangkat Jesus gabe angka dakdanak ni Debata gabe tangkas ma statusna di harajaan ni Debata; tangkas ma na gabe parsidohot ia di harajaan ni Debata, tola mangkatai jana manontuhon di haputusan nang songon i gabe panean di harajaan ni Debata. Debata do namanubuhon angka dakdanak ni Debata i. Bisa pabagasonta hatorangan ni on taringot “Tubu Padua-nolihon” songon pangkataion ni Jesus rap dohot si Nikodemus (ligi ma di Johannes 3). Muda tatangkasi taringot tu si bisa ma idaonta hubungan ni Hata na gabe Anak Ni Debata, jana Debata na gabe Ama songon i muse Tondi ni Debata na patubuhon angka anak ni Debata. Konsep Debata si tolu sada digombarhon si Johannes di son.
Ayat 13-14 : Angka naso tubu sian mudar sanga sibuk, sanga sian hagiot ni pamatang ni halaklahi (nafsu), tapi naditubuhon ni Debata. Di son tangkas ma idaonta naso mangihutkon ide taringot tu proses ni haportibion (natural). Hata mudar na dibagasan hata gorik disuratkon di bagasan bentuk jamak, ima songon dia proses alami, mudar ni natorasna dua-dua. Jadi ise do nadimaksud di son? Angka napaubahon roha jana haruar sian kelompok kejahudian sanga sude jolma do nadung paubahon roha jana namangoku Jesus Kristus sian sude bangso ?. Tontu napaduahon ido astuanna di son, lumobi mai di ayat 14 didok : bahaso logos madung gabe jolma. Di hata Gorik didok “sarx astuanna sibuk”, na patuduhon tu jolma sudena, ima na laho paluahon jolma na dibagasan hagolapan.
Jesus madung ro tu portibion sian banua ginjang, na gabe jolma sarupa tu jolma na asing, tapi Ibana na marsangap (mulia), gok asi ni roha (charitos) dohot hasintongan (aleteia), harana Jesus ima monogenus para patros “Anak ni Debata nasasadai”. Hata sanga logos nada na sorang sian Debata, tapi didok rap dohot Debata jana Debata sandiri. Jadi AnakNa na sasada i (dipaboa doi muse di ayat 18) patuduhon hasadaon dohot jonokna Jesus dohot Debata. Pandohan “madung di tonga-tonganta” hata hita di son ima angka namamasa evangelium Johannes di hatihai, tapi laing na patuduhon na sahat doi tu angka namamasa egangelium on tu hita sadarion. Hita pe madung manyaksihon hamuliaonNa, hita pe madung manyaksihon logos/hata i madung gabe jolma. Jana tontu muda angka na manjagit “hatai do hita na gabe dakdanak ni Debata ma hita : adong statusta na tangkas di Harajaan ni Debata.
Hahonaanna.
1. Ingkon pangkilalahononta do jop ni roha ni portibion nadung dapotan Sinondang, na manorangi saluhutna jolma, jana ima na gabe jop ni rohanta di pesta natal ari paduahon on. Sada pambaenan halongangan na sian Debata doi lopus tu hita sadarion.
2. Jesus dipatudos tu hata na rap dohot Debata, jana nadung gabe jolma di portibion ima na mambaen adong parsaoranta rap dohot parbanua ginjang, jana dison ma tangkas astuanta bahaso Debata madung mardenggan rap dohot jolma.
3. Jesus dipatudos muse rap dohot Sinondang : Muda sifat na tumangkas sian sinondang ima tongtong do mago hagolapan muda ro sinondang. Jana muda adong sinondang gabe tangkas ma taligi dalan siboluson anso lalu tu tujuan. Muda halak na mardalan di hagolapan, jotjotan mai gabe lilu. Antong didok di turpuk on : Sanga ise na manjagit sinondang i ima Jesus sandiri gabe monang ma hita manaluhon hagolapan, sanga manaluhon sibolis. Muda tongtong tatiop Sinondangi, gabe tangkas ma hita didia mardalan ima di dalan hasintongan jana lalu ma hita tu Harajaan ni Debata.
4. Digoaran do angka namanjagit Hata dohot Sinondang i gabe dakdanak ni Debata. Taingot ma muda angka dakdanak ni Debata do hita gabe pasti do hita panean di Harajaan sogot, antong nada tama angka dakdanak ni Debata marpangalaho songon sada hatoban dohot mian di hagolapan sanga mangihutkon hagiot ni sibolis. Amen-horas jana selamat natal.
Pdt.Josep P.Matondang.
Ka.Biro III
Tidak ada komentar:
Posting Komentar