JAMITA MINGGU, 26 SEPTEMBER 2010

Issu Gender

HATORANGAN NI JAMITA

Minggu 16 Dung Trinitatis

Minggu, 26 September 2010

Jamita  : Johannes 8:1-11

Sibasaon: Pangarataion 22:23-29

Patujolo

Muda tabasa buku na sian si Johannes nang songon i evangelium na tolu nai (Matius, Markus dohot si Lukas), adong do na mansai tangkas tarida hita pordomuan ni Jesus dohot angka Siboto Surat ima paraloan bolon na masa tingki i. Jana songon sada keunikan do i muda mamasa evangelium na opat i hita. Tontu paraloan i bisa dohononta paraloan ni Jesus na bonar roha (Johannes 14:6 dohot angka uluan ni ugamo (Farise/Saduse) na jotjot songon halak sipaula-ula (munapik), antong paraloan ni habonaran dohot kemunafikan do hape na nipatuduhon ni si Johannes ni bukuna i. Laing songon ido idaonta di turpukta ari mingguon ima taringot tu paraloan na masa antara ni Jesus dohot Siboto Surat.

Muda dipamanat posisi ni Uluan ni Ugama, mamungka sian Padan Na Honok lopus Padan Naimbaru idaonta do bahaso sada uluan ni ugamo nada holan di bagas joro ni Tuhan markarejo, tapi dohot do mangatur taringot tu na masa di tonga-tonga ni masyarakat ima laho martugas na gabe Panguhum (hakim-Judikatif) dohot na mandalankon/mamareso angka uhum na tarsurat di buku na badia i.

Jesus madung papatarkon diri-Na na gabe Raja (Markus 1:13-14) laho patuduhon bahaso Jesus ima uluan na nitongos ni Debata maroban hadameon dohot haluaan, harani ido dioban halak na torop (Siboto Surat) sahalak dadaboru pangalangkup (perempuan yang berjinah) tu Jesus laho mangaligi peran ni Jesus na gabe panguhum, tapi latarbelakang ni halahi maroban dadaboru i nada na laho mangido habonaran taringot tu pangalaho ni dadaboru i mangihutkon uhum na masa. Anggo tujuan ni halahi ima na giot manguhumi Jesus do, betak sai bia haputusan nanibaen ni Jesus mansalai tu uhum na adong di pikiran ni halahi.

Muda tabasa do Bibel na gabe buku nabadia na tapake sonnari, tarida ma di si muda agama Jahudi ima agama na mambaen bahat angka aturan-aturan di Joro ni Tuhan dohot di masyarakat, jana angka aturan ingkon dioloi doi. Muda nada, adong ma uhuman jana bahat do tarjadi lopus tu uhuman mangago hosa (eksekusi mati). Jadi agama jahudi nada be maroban hangoluan. Hombar tu na tarsurat di Pangarataion 21:21, dadaboru pangalangkup angkon dangguron ni sude halaklahi nasa kota mai. Jadi dung diboan Siboto Surat dadaboru na tardapot markamainan i, disangkapi roha ni halahi ma anso adong haputusan sian Jesus na targoar Raja Sipaluai.

Hatorangan ni teks jamita :

1-5 : Hamaolon dalan mangunjuni Jesus

Songon nadung dipatorang di patujolo ni jamita on, ima nadung masa paraloan bolon antara ni Jesus tu tokoh agama Jahudi. Sai tongtong do ro angka uluan ni halak Jahudi manangihon jamita/pangajaran ni Jesus, idaon burju do halahi manangihon tapi anggo sasintongna na giot manjalahi hasalaan ni Jesus do halahi bope nada jungada dapot halahi hasalaan i, sasigop-sigopna manian adong hasalaan ni halahi anso mantak sude karejo ni Jesus harana nada diparhagiot halahi haroro ni Jesus mamuruki angka uluan ni ugama hatihai. Tapi bahat do halak na manjagit pangajaran ni Jesus pola longang halahi mambege angka pangajaran  i angke maroban pangkirimon dohot hangoluan, songon ido idaonta kesan ni halak natorop mambege jamita ni Jesus songon na tarsurat di Johannes 7:46  "Nada adong dope pangkatai ni jolma songon i!". Jadi pangajaran ni Jesus mambaen dua sikap di natorop : mangalo ajaran sanga manjagit ajaran ni Jesus. Taringot ma hita tu  Hata ni Debata di Ibrani 4:12 ”Hata na mangolu jana na margogo do hata ni Debata; tumajom dope i sian podang sidua baba. Disirang ia do tondi dohot hosa, utok-utok dohot holi-holi, jana markuaso do i manguhumi pikiran dohot parrohahon ni ate-ate”.

Ido na masa dung ro Jesus tu portibion, na tongtong mangido haputusan sian halak na umbege pangajaran ni Jesus. Di bagasan turputaon ima kelompok na mangalo ajaran ni Jesus jana na sai tongtong manjalahi hasalaan ni Jesus.

Diboan halahi sada dadaboru na tardapot markamainan, dipangido halahi sada haputusan sian Jesus angke dipikiri halahi ia kasus ni dadaboru on ima songon halak na mangan pining sisungkot kola: Dipangan mate ama so dipangan mate ina, dipaadop ma Jesus tu alus na bisa serba salah. Muda dialusi Jesus do tutu do sala dadaborui jana angkon didangguran, berarti sarupa do dohot pangalaho ni Siboto Surat jana nada maroban hangoluan be Jesus, tapi muda asing sian i tontu pasalaon ni Siboto surat ma Jesus na so mangargahon aturan na adong. Songon dia do Jesus mangadopi hamaolon na nibaen ni Siboto Surat i?

Ayat 6-10 : dipasiding Jesus do pangalaho ”konflik terbuka”

Laho mangadopi siboto surat na gok pikiran na jahat, nada dioloi Jesus anso masa konflik terbuka mangadopi pikiran jahat ni halahi. Diboto Jesus do pikiran jahat ni halahi sian hakuasoonNa jana nada ditegor Jesus halahi secara langsung. Di bagasan turpuk on dipabotohon bahaso sikap ni Jesus ima marhite surat langsung. Disurat Jesus ma tanoi dohot jari-jariNia. Aha dehe na nisurat ni Jesus di tanoi? Nada pola tangkas didok di jamita on aha do nanisurat ni Jesus, tapi harani na sai didosak Siboto surat i Jesus gabe didokkon Ia ma  "Sanga ise na so mardosa sian hamu, padiar ma ia parjolo mandanggur anak boru on dohot batu." Dungi diuduti Jesus muse manyurati tanoi.

Di sada pertemuan na dipatupa ni YAKOMA PGI dohot GKPA na manaringoti diakonia taon 2003, sada teolog awam mangalehen tafsiran bahaso na nisuratkon ni Jesus ima goar-goar ni sude Siboto Surat na marpikiran na jahat i dohot pangalaho na so ture nanibaen ni halahi. Jadi dung didok Jesus  "Sanga ise na so mardosa sian hamu, padiar ma ia parjolo mandanggur anak boru on dohot batu."

Diligi halahi ma goarna disuratkon Jesus gabe markehean ma halahi sada-sada, angke nada adong sian halahi na ias pangalahona, sude do adong mangkarejohon dosa. Sian cara ni Jesus laho mangadopi halahi, tangkas do dipatuduhon bahaso Jesus manghalomohon hasesaan ni dosa dohot hangoluan jana nada adong sahalak pe sian jolma na malua sian pardosaon, sude do manghaporluhon hasesaan ni dosa. Apalagi muda taida annon di ujung ni turpuk on, mur tangkas ma taida hagiot ni Tuhan ima hamubaan ni halak parjahat do sian dalanna na so denggan, songon na tarsurat  di Yehezkiel 33:11 ” Dokkon ma tu halahi, mangasahon Au na mangolu, Tuhan DEBATA nada jop rohangKu muda mate halak parjahat i; tapi sugari mulak ma nian ia manadingkon angka dosana anso tongtong ia mangolu. Ale bangso Israel, antak hamu ma mambaen na jahat! Biasi angkon sai mate hamu?" muda Siboto surat i, nada haubaan ni roha dipangido halahi, tapi hamamate ni parjahat i do harani pangalahona.

Tangkas do tarida perbedaan orientasi ni Jesus dohot Siboto Surat i. Halahi sai na giot manguhumi halak parjahat ido rohana, tapi anggo Jesus patar do Ibana na manghaholongi jolma pardosa anso mulak halahi manadingkon dosana. Orientasi ni Jesus ima jolma pardosai, tapi orientasi ni Siboto Surat ima angka aturan-aturan do, harani ido didok Jesus di sada hatiha nada Ari Sabat dilehen Debata anso mangoloi jolma do, nada jolma na laho mangoloi ari sabat. Marhite sikap ni Siboto Surat i, agama nada be gabe mamboan jop ni roha dohot pangkirimon, tapi agama gabe sihabiaran dohot na maroban tu hamatean, nada tu hangoluan.

Di bagasan turpuk on, tarida hita bahaso angka uluan ni ugamo hatiha i sai na giot manguhumi halak pardosa do, tapi anggo Jesus patuduhon holong do tu halak pardosa. Ima sada haimbaruon nadipatudu ni Jesus taringot tu parugamaon ujui, anso unang sai diperalat halahi ugamoi laho manguhumi tapi giotna nian anso manghaholongi jana mamboan jop ni roha.

Tangkas do didok Jesus sikapna tu dadaboru i ima nanidokNia ”Au pe nada huuhumi ho”, Jesus nada maroban panguhuman saonnari tapi holong ni roha do anso mangolu jolmai, tapi unang hita lupa, di turpuk na asing muda ro Ia paduanolihon, tugas utama ima laho manguhumi halak na mangolu dohot na mate.

Ayat 11 : Tona ni Jesus tu jolma pardosa. Jesus nada manolopi pangalaho na mardosa, tapi na dihalomon ni Tuhan anso muba nian jolma pardosai manadingkon dalanna, ido tona ni Tuhan Jesus tu dadaborui ima nanilehenNia tona na arga sajo ima  ”Au pe nada Huuhumi ho. Kehe ma ho saonnari, ulang be datdati na mardosa tu pudi on”. Astuanna salolot hita mangolu dilehen Tuhan do kesempatan di jolma pardosa anso muba. Nada taboto andigan hita mate, harani i saonnari tingki adong dope kesempatan anso dipauba dadaboru ima pangalahona (harus ada pertobatan).

Pdt.Josep P.Matondang,M.Th.

Ka.Biro III GKPA