BAHAN KHOTBAH

“HOT DO HAHOLONGAN NI TUHAN I DI HITA”
Jesaya 46:3-4

Angka debata ganaganaan nada margogo i paluahon dirina sandiri apalagi ma giot paluahon halak na asing (1-2). Debata Bel[1] dohot Nebo[2] ima ganaganaan ni halak Babilonia. Madung lolot dewa on disomba halak Babilonia laho manghirim hamajuon dan hasukseson (pat. Dan.5:4). Disomba halahi do dewa on hape nada bisa mangurupi halahi jumpa masa hamaolon di ngoluna. Nada jugada margogo patung i laho mangalo musu ni halahi na sai torus mamorangi halahi. Gabe dianggap halak Babilonia do sarupa Bel dohot Nebot tu Jahowa. Harani i dipaboa Debata do tu halahi aha na giot tarjadi tu ganaganaan ni tangan ni halahini i. Ditutungi jana ditapori halahi angka debatana, dibaen nada i Debata. Hum patung na nibaen sian hayu dohot batu sajo do i antong na nibaen ni tangan ni jolma; hara ni i do umbaen na bisa disegoi jolma. Na jumorbut muse ro ma angka mara tu tongatonga ni bangso i marhitehite bangsi Asyur hape nada margogo muse patung na disomba ni halahi i paluahon halahini sian parmaraan i.
Debata na sintong nada jungada mangagohon bangso-Na. “Ale pomparan ni si Jakob, tangihon ma Au…” Pandohan on pataridahon Debata na mangolu nada padiarhon angka bangso-Na ditaluhon musuna. Nada sarupa hagogoon ni Jahowa dohot debata Bel sanga Nebo. Mamungka sian bortian, Hutuhuk hamu; mamungka sorang, Huhunti hamu. Holong ni rohan ni Jahowa tu na porsaya i mamungka sian bortian lopus matobang jana ubanon obuk. Artina Jahowa manjagahon bangso Israel sian nasa mara. Nada dipaloas TUHAN sanga ise pe manyosak halahi; digorahon Ia angka raja laho mangondingi halahi (pat. Ms.105 :12-15). Songon halihi na mangajar anakna habang, ditarehon habongna anso ulang madabu. Songon i do TUHAN manjagahon Israel, anso ulang madabu (Pangarataion 32:11). Madung taida sanga aha Na dibaen Tuhan maradopkon halak Mesir, jana sanga songon dia dibaen Tuhan maroban bangso Israel mardongan kuaso na godang songon unggas rajawali na maroban anakna di ginjang ni habongna. Musa nada sabar di tingki na mamboan bangso Israel haruar sian Mesir, tapi Tuhan sobar do mangaramoti sude ngolu ni bangso i (Ba.Rasul 13:18). Madung diramoti Tuhan halahi sian bortian dope lopus tu sadari on. Muda songoni ma sobar dohot holong ni Tuhan mangaramoti ngolunta siganop ari, antong tama ma tutu sombaon jana pujionta denggan basa dohot holong ni rohaNa i tu hita. Harana sanga ise na tubu dibagasan Tuhan i pasti do diramoti Ibana ro di ujung ni ngoluna. Pangaramotion ni Tuhan i nada tanggungtanggung. Tanggung jawab ni Tuhan i nada golomgolom riaria. Tapi pasti ro di salolot ni lolotna. Hara ni i tapuji ma Tuhan i tongtong angke Ibana partobus hian.
Marjanji do Tuhan paboa nada tadinghononNia bangsonai. Au Debatamunu, giot mangondihon hamu; lopus matobang jana ubanon obukmunu. Au na manompa hamu, sai na sarihononKu do hamu, sai na paluaonKu jana urupanKu hamu. Muda pamatang ni jolma i muda mur matobang mur tu galena nama. Nada lobas ia be bagi namahua. Tapi anggo holong dohot pandonganion ni Tuhan nada mur gale. Tapi sai na dongananNa do halak na porsayai dung matobang halahi. Muda pe nada adong be donganna na ra mangurupi ia di hagaleonna, na sai rade do Tuhan i mandongani halahi di hatotobangna. Sai tongtong do Debata na gabe pambelanta; tanganNa na so ra mantak i panungkolinta. Dipaorot Ia musu sian jolonta, disuru Ia hita mangaropuk sude alonta (Pangarataion 33:27). Pangaramotion ni Tuhan lobi sian pangaramotion ni sahalak simatobang tu angka anakhonna. Na giot idaonta sian on ima : naparjolo, sude bangso Israel i angkon torus do manghirim di pangaramotion ni Tuhan di ngoluna. Harana holang pangaramotion ni Tuhan do na manongtong ro di salolot ni lolotna. Paduahon, pangaramotion ni Tuhan nada jungada manadinghon bangso i, tapi muda pangaramotion ni jolma adong do batasna. Nada tarbaen jolma mangaramoti dirina sanga pe keluargana lopus tu na matobang. Isarana sada simatobang na dung tobang situtu belum tentu bisa diparorot angka anakhonna dohot denggan. Tapi Tuhan torus do mangaramoti halahi di hatotobangna. Patoluhon, hot do pangaramotion ni Tuhan sian dakdanak lopus tu na matobang. Muda dung dihaholongi Tuhan nada dipadiar Ia na di haholonganNa i marsiak bagi. Tapi holong ni Tuhani torus di mandongani hita di pardalanan ni ngolunta.




Jakarta, Awal Desember 2007





Ramli SN Harahap

[1] BEL (bel), (bal): goar pamioon ni debata Bah (sanga BAAL), di Padan Na Honok dohot di buku Apocrypha digoaran do on si Marduk sanga pe Merodach, dewa na manggomgomi Babilonia (pat. Jes. 46:1; Jer 51:44; Barukh 6:41). Adong muse do halak namanyarupahon Bel dohot Baal; adong muse do na manyarupahon ia dohot Belus, bahkan adong na mandokhon ia raja ni halak Babilonia na parjolo dung habis angka ganaganaan. Nebo dianggap halahi do songon panurirang Disarupahon muse ma Bel songon si Belshazzar, Nebo songon Nebuchadnezzar.
[2] NEBO (ne'-bo) (nebho; bahasa Asyria Nabu): ima debata ni halak Babilonia. Di bagasan mitos ni halak Babilonia Nebo ima anak ni Bel-merodach (Jes 46:1). Ingananna na khusus ima di Borsippo.