BAHAN KOTBAH

“RADE MA AU SURUONMU TUHAN”
Mateus 9 : 35 – 37

Muda tabaca ayat on bisa do muse hita mangingot aha na dung dikarejohon ni Jesus di Galilea ima laho mangajari di angka bagas paribadatan, manjamitahon Jamita Na Denggan taringot tu Harajaan Ni Debata dohot pamalum angka na marnyae dohot halak na markahurangan (4:23). Angka jamita na dijamitahon ni Jesus i bisa ma i tabaca di ponggol na palimahon, paonomhon dohot papituhon jana hamamalum na di patupaNia tabaca di ponggol na pasalapanhon dohot pasambilanhon.
Bia do parbaritaon ni Jesus di luatluat na ni dalananNia i ? Di dalani Ia do sude luat na mansai pogos, nada holan luat na mamora na ni dalananNia bahkan lalu do Ia tu angka desa-desa. Di si ma Ia marjamita, dohot di si ma Ia pamalum angka namarnyae. Mansai arga situtu do di Jesus jolma manisia i. Harani i angkon lalu do tu halahi Jamita Na Denggan i. Na pogos dohot namora marsuo dohot Jesus, di kota dohot di desa pe. Di palalu Jesus do Jamita Na Denggan i tu sudena halahi aso rap dapotan halahi dihaluaan na dijamitahonNa i. Di dia do Jesus pasahathon Jamita Na Denggan i? Jesus sai dihalungunhon do mamongoti bagas joro ni Debata di angka hatiha paribadatan. Di Synagoge (jaha: Gereja) do Ia marjamita tu angka halak na luatluat i. Muda lalu ia tu sada huta sai parjolo do Jesus mamasuhi synagoge laho pasahathon Jamita Na Denggan i. Di synagoge i ma Jesus mamodai, mangajari marhitehite huaso na sian ginjang. Harana bahat do halak na sai malungun mambege hata ni angka panurirang di bagas joro ni Debata. Jana di hatiha i synagoge do pusat pendidikan dohot pangajaran ni halak Jahudi. Jadi mansai bahat do halak na adong di bagas joro ni Debata i. Aha ma na taparsiajari sian on? Naparjolo, Jesus ima sahalak parbarita nauli. Dipake ia do kesempatan pasahathon tona ni Debata tu angka halak na adong di luat na ni bolusNia. Jesus ima sahalak parbarita na uli na palaluhon tona ni Debata marhitehite angka pangajarion dohot angka poda na pasti jana na tutu situtu. Jamita na nijamitahonNia ima jamita na pangoluhon dohot na paluahon. Harani i diigil ayat on do hita aso gabe siboan barita na tutu situtu tu angka jolma na humaling hita. Ulang taboan barita na so pasti. Jamitanta pe angkon na pasti-pasti do nada tola jamitanta jamita na so pasti, na ragu-ragu. Biasi? Harana portibi na ta ingani nuaeng ima portibi na gok ketidakpastian. Haranii do porlu hita manjamitahon kepastian ngolu na manongtong tu angka halak na so porsaya dope. Di tongatonga ni ketidakpastian ima hita disuru Jesus mamboan barita haluaon na pasti, mamboan pangapuli na pasti, mamboan hangoluan na pasti. Napaduahon, Jesus ima guru/pangajari. Nada cukup holan hapastian-hapastian i sajo dipaboaboa dungi dipadiar songoni sajo. Tapi angkon patidahononhon do hapastian-hapastiani dibagasan ngolunta. Artina nada holan na mangajahon hapastian i hita tapi angkon tahangoluhon do hapastiani. Napatoluhon, Jesus pangubati na sumurung. Dung dijamitai dohot diajari Jesus halahi laos ihut ma muse dipatupa Jesus hamamalum tu angka namarsahit. Artina jolo dibaritahon do Jamita Na Denggan i dungi pe aso adong patupahon hamalumon ni sahit. Harani i tatulak do pangajaran na sai mangondolhon ibadah hamalumon naso pola mamaritahon Jamita Na Denggan i. Di partingkian sisaonarion bahat do halak na sai mandohoti KKR Kesembuhan Ilahi. Nada na talarang halak Kristen patupahon sanga mandohoti KKR Kesembuhan i. Bisa do dipatupa KKR Kesembuhan tapi angkon jolo dipatorang jolo Jamita Na Denggan i. Angke i do dipatupa Jesus hatiha i di Galilea dohot tu angka luat na ni bolusNia. Parjolo do Jesus marjamita, mangajari dungi pe aso dipatupa hamalumon ni sahit. Ulang tapabalik antong. Parjolo tabaen ibadah hamalumon baru pe marjamita. Di hatiha nuaeng ma lebih ekstrim angke adong do KKR Kesembuhan Ilahi na sopola adong be dibagasanna Jamita Na Denggan. Holan na pamalumhon karejo ni halahi. Kegiatan on mamanyalahi hakristenonta. Muda tapamanat muse Bibelta on nada adong di si tarsurat Ibadah Penyembuhan. Pandohan on ro sian angka malomalo ni angka parjamita sisaonarion do i. Di jaman ni Jesus nada adong ibadah penyembuhan, na adong ima pamalum na marnyae, namarsahit tapi inda dibagasan ibadah i dipatupa. Hombar tu tingki na pasahathon Jamita Na Denggan i do Jesus dipatupa pamalun na marnyae i. Jadi nada jungada Jesus kehe tu sada luat khusus laho patupahon pamalum na marsahit. Inda jungada i dibaen Jesus. Na dipatupa ni Jesus ima kehe tu luatluat laho mamaritahon Jamita Na Denggan. Angkon manat do hita manjagit angka podapoda na so hombar tu pangajaran ni Jesus. Ulang harani na giot malum hita gabe muramura hita manjagit angka poda na so hantus dope taboto artina.
Di pardalanan ni Jesus na mangebati huta tu huta i diida Ia ma angka halak na bahati ibo ma rohaNia marnida halahi, angke lebak boti gale do halahi idaon songon biri-biri na so marparmahan. Tubu ma sapasapa di hita, aha dehe na mambaen Jesus maribo ni roha ? Naparjolo, Jesus maribo ni roha harani parungkilon ni tano on. Diligin Ia ma angka namarnyae (Mt.14 :14), na mapitung (Mt.20 :34), na digomgomi sibolis (Mrk.9 :22). Napaduhon, Jesus maribo ni roha harani kesedihan dunia. Diligin Ia janda na di Nain na sedang mamboan bangke ni anakna tu kuburan (Lk.7 :13). Napatoluhon, Jesus maribo ni roha harani haleon di tano on. Nada jop roha ni Jesus marnida angka haleon na di tano on. Hara ni i do umbaen na dilehen Ia magan lima ribu halak aso ulang adong be na malean di tano on. Napaopathon, Jesus maribo ni roha harani halak na terpinggirkan (marginal). Misalna angka halak na hona sahit puru, hiv/aids, na hona penjara. Jotjot do halahon nada dijagit di parsaoran siganop ari. Hara ni i ibo ma roha ni Jesus.
Marnida bahat ni angka karejo na giot sikarejohonon dope di tano on, gabe ninna Jesus ma tu angka anak siseanNia i, "Bahat do na giot sabion, hape hum saotik do panyabi. Artina Jesus sangat membutuhkan tenaga pelayan laho patolhashon tugas panghobasion i tu angka jolma na siasian i. Nada seimbang antara tenaga parhobas tu angka sihobasanna. Memang diakui Jesus do bahaso bidang dope sisabion i tapi otik do anggo panyabina. Ise do na berhak marsuru angka panyabi i? Na berhak marsuru angka panyabi ima Tuhan. Ido umbaen didok Jesus, “Hara ni i pangido hamu ma tu nampuna sabion i, anso disuru Ia halak laho manyabi sabion i" Persoalanna sannari ise dehe na ra disuru tu sisabion i? Sadar do Tuhan bahaso na bolak dope porlak sisabion i di tano on. I do umbaen gabe sai manyapai Tuhan tu sandok jolma manisia, "Ise do sisuruonKu? Ise do na gabe sioban barita i?" Angkon tiruonta do pangokuan ni si Jesaya na mandok, "Dison do au suru ma au!" (Jes.6:8). Artina sude do hita tarpio tu tugas panghobasion i di tano on. Tergantung tu alusta be do i sudena. Taalusi ma Tuhanta hombar tu keberadaanta ikut telibat di panghobasion i. Sekecil apapun panghobasionta di jolo ni Debata Ama arga situtu doi di Ibana jana diparar Ia do hita gabe parkokasNa na matolpang. Angkon sude do hita mandok pangkuon ni si Jesaya on, "Dison do au suru ma au!". Di son do au suru ma au gabe Pandita, Guru Parlagutan, Bibelvrou, Diakones, Sintua, kontrkator, wirausaha, wiraswasta, pegawai negeri sipil, pegawai swasta, ruas na burju dohot angka naasing na laho marhobas pasahatho Jamita Na Denggan i tu sudena na humaliang hami. Artina dohononta ma tu Tuhan, “Rade ma au suruonmu Tuhan”.



Jakarta, Awal Desember 2007



Ramli SN Harahap