JAMITA MINGGU, 6 MARET 2011: Lukas 10 : 38-42

Mangkobasi Jesus dibagasan Jop ni roha dohot Sukarela Minggu Estomihi “Sai Ho ma na gabe Partanobaoan di au” Tangal, 6 Maret 2011 Jamita : Lukas 10 : 38-42                     Sibasaon : I Korintus 13 : 1-13. Patujolo : Sude do hita na pungu on jungada manjagit tamu di bagasta. Pasti. Ra rap taingot dope harepotanta laho paradehon inganan (podoman), kehe tu pasar laho mangalului ingkayu, mardahan, paiaskon bagas dohot na asing, anso laing haidaan sonang ni rohanta laho manjagit angka tamunta i jana sonang muse pangkilalaan ni halahi na ro i, apalagi mora i muse do tamu na ro i. Anggo na jolo di ingot muda ro Tulang, diceke do manuk. Tangkas nada pola sala karejoon laho patuduhon holong tu tamu na ro i. On do na nibaen ni si Marta laho manamuei Tuhanta Jesus di na ro tu bagasna. Songon ‘nyonya/tuan rumah’ na burju ibana, hetpot ma ibana laho mangkobasi sipanganon tu Tuhan Jesus. Porsaya do au, pasti do jop rohanta laho manjagit ‘keramahan’ na songon on. Na rohangku Jesus pe jop do rohaNa. Antong biasi adong persoalan dibagasan parsaoran i ? Biasi di ujung ni carito i di paingot Jesus si Marta jana si Maria di argai Jesus ? Na he rap marsibaen tugasna do halahi na dua dohot jeges ? Nasada mandongani Jesus mangkatai. Si Marta paradehon ‘komsumsi’ sipanganon di dapur. Sugari rap di dapur halahi na dua, songon na so diargai haroro ni Jesus, jana sugari rap di tonga halahi mandongani Jesus, bia siinumon dohot sipanganon? Antong na he rap denggan do na ni baen ni halahi ? Botul. Na holan on, adong hurangna. Jana i ro sian si Marta. Nada karejonia i sasintongna persoalan, tapi sikap, roha, pangkilalaanna na mangiburu tu anggina si Maria na holan juguk manangihon Jesus. Pangkilalaan nia, ia sajo do na karejo i, loja ia, naparduli halak disia. Gabe ro pangiburuon, mamikirkon diri sandiri. Roha pangiburuon on, maroban muruk, berontak, ido umbaen didok ia : "O Tuhan, ligi ma jolo anggingkon! Dipadiar ia do sada au sajo karejo. Suru ma anso ditolong ia au!" Tree in one M (Mangiburu, Mamikirkon diri sandiri, Muruk – cemburu, iri hati dan marah), mangarampas jop ni roha (sukacita) dohot sonang ni roha laho mangkobasi Tuhan. Jop ni roha maruba gabe ungut-ungut. Mago ma na porlu di ngoluna. Marhite i di Minggunta  sadarion (Estomihi = “Sai Ho ma na gabe Partanobaoan di au”), giot liginonta bia do carana anso burju hita laho mangkobasi Jesus dibagasan jop ni roha jana sukarela, jana anso dao roha na loja, mandele, mungut-ungut, roha tarpaksa. 1.   Fokus tu Tuhan Jesus, burju manatap tu Debata. Di ayat  42 didok “Hape hum sada do na porlu! Jana madung ditodo si Maria na denggan i, na so buaton be sian ia." Porlu do mangan, minum dohot angka na asing di na mangkobasi Jesus dohot parlagutanNa i. Tapi anso ulang mura hita loja, mungut-ungut na mangkobasi i, angkon jeges do parsaoranta (hubunganta) dohot Jesus nampuna parlagutan i. Angke muda parjolo do hita ganup ari mangalului Tuhan marhite na burju martangiang, manangihon HataNa, adong ma gogo, sonang ni roha dohot semangat laho mangkobasi karejoNai. On ma na nibaen ni si Maria. Ditangihon Ia Jesus. Donok ia jana juguk ia dilambungNa i. Gabe martua jana masonang ia. Dapotan na ummarga ia. Dungi gabe adong ma pandonganion ni Jesus di pangkobasionna i. Toruk ni roha laho juguk di pat ni Jesus mambege hataNa, dipuji Jesus!. Angke na ummarga di dapot ia. Tapi nada na mandok gabe holan na juguk si Maria, inda burju mangkobasi Tuhan. Di Bibelta adong do 3 (tolu) noli goar ni si Maria on tartulis. Na porjolo i ma di teks jamitantaon. Juguk ia di lambung pat ni Jesus. Na paduahon di Johannes 11 : 32 : “Dung lalu si Maria tu inganan ni Jesus jana diida ia ma Jesus, marsinggang ma ia di jolo ni Jesus mandok, "O Tuhan, sugari dison Tuhan i, nada jabat mate ibotongki!". Patoluhon : di Yohanes 12 : 3 :  “Dung i ro ma si Maria maroban hira-hira satonga liter narwastu, i ma miak na lobi huskus jana na arga situtu. Diusehon ia ma miak i tu pat ni Jesus jana diapus ia ma dohot obuknia. Gabe huskus ma sude bagas i hara ni uap ni miak na huskus i”. Di parsuoan ni si Maria dohot Jesus, taida sude mandok burju ia manyomba Jesus. Jana na parpudi diusehon ia miak na huskus tu pat ni Jesus, marhite obuknia, laho paradehon hamamate ni Jesus. (Bd. Joh.12:7) Jadi bope tolu noli didok taringot tusia, hape diboto ia do na giot usehonon ni Jesus mudarNa laho manobus jolma manusia. Haburjuon manyomba Jesus, mambege hataNa, maroban haporsayaan na togu marnida holong ni roha ni Debata tu portibion, gabe tubu ma roha na mangkobasi dohot denggan, burju jana sonang. 2. Ulang Banding-bandingkon dirimu dohot halak na asing. Sasintongna anggo dimulana i jeges do na nibaen ni si Marta. Diparade ia aha na porlu di Jesus secara jasmani. Tapi gabe fokus ma ia tu dirina sandiri. Dibanding-bandingkon ia dirina dohot anggina si Maria. Marhite i gabe mago ma holong tu Jesus dohot tu anggina i. Tubu ma roha mangiburu, mamikirkon diri sendiri, ‘mengasihani diri’ ma ia, gabe mago ma na jeges i. Na roha nia, panganon do na umporlu, hape lupa ia umporlu dope parsaoran na tabo. Na roha nia ma cukup holan mangkobasi roti sajo hape "Adong do tarsurat songon on: Nada hum sian roti sajo hangoluan ni jolma, tapi sian sude hata na nidok ni Debata do" Mateus  4:4. Roha sisongon ma mambaen gabe nada adong be pangurasion (urapan) ni Tondi Porbadia di angka pangkobasion, marhite i gabe terasa hambar, kering, membosankan jana gabe boban na borat ma pangkobasion i. Lupa ia, angkon sonang, jop do roha muda adong kesempatan laho mangkobasi Tuhan. Molo dung ro dope muse Roha 3 M (mangiburu, mamikirkon diri sandiri, muruk), maroban haloloja ma i di pangkobasion. Akibatna mandek, malas, seadanya/ sekedarnya ma pelayanan i, gabe nadong be hamajuon. Panutup. Sude do pangkobasion sanga aha pe i pasonang roha ni Tuhan. Harani i patut do angkon jop rohanta laho mambaen na denggan di parlagutan i. Muda tahobasi parlagutan i dibagasan arsak ni roha, tarpaksa, inda adong jop roha, pasti do mangarugihon, maroban boban na borat, gabe marisuang karejonta i nada adong gunana. Antong pasahat ma rohamu, ate-atemu, tondimu tu Jesus. Burju hita donok tu Ibana ganup ari. Martangiang, mambege hataNa, anso mangolu haporsayaanta.  Mangolu jop ni roha gabe sonang ma na mangkobasi parlagutan i.  Amen. Pdt. AHJ. Sibarani STh Biro II GKPA.