JAMITA MINGGU, 6 MARET 2011: PAMUNGKAAN 3 : 8 – 19

”Mangalusi pio-pio ni Debata di     

  bagasan dosa”

MINGGU INVOCAVIT, TANGGAL, 13 MARET 2011

JAMITA : PAMUNGKAAN  3 : 8 – 19

SIBASAON : MASMUR  91 : 1 – 9

A. PATUJOLONA

Buku  Pamungkaan  mancaritohon taringot di panompaon ni Portibion dohot nasa isina, mula ni jolma, pangkal ni dosa dohot hasusaan di portibi, jana bia Debata marhubungan dohot jolma. Buku  on dibagi di bagasan dua bagian na porlu, ima:

1.  Ponggol 1-11. Panompaon ni Portibbion dohot mula ni jolma. Dibagasan bagianon ma dicaritohonan taringit tu si Adam dohot Hawa, Kain dohot Habel, Nuh dohot Aek Na oto/ banjir godang, jana Manara Babel.

2.  Pasal 12-50.  Asal-mula ni Ompu ni bangso Israel. Ompu ni naporsaya si Abraham. Natargoar harani haporsayaan dohot pangploion-na tu Debata. Di Buku on dipungka marhite penegasan bahaso Debata  naung  manompa portibi dohot pangisina jana dipaujung dohot janji panggomgomion ni Debata di bangso/ umat-Na.  Pemeran utama di buku on ima Debata namangadili dohot na manguhumi halak na mambaen dosa. Ibana do muse na manogu dohot mangurupi umat-Na jana manopa sejara nasida. Di buku Pamungkaan onma ditulis taringot tu haporsayaan ni sada bangso dohot muse mangurupi anso haporsayaan i torus mangolu. Turpuk on ima bagian na patorangkon pangkal dohot hasusaan harani dosa (3:1-24).

B. IMPOLA JAMITA : PAMUNGKAAN  3 : 8 – 19

I.Alus ni halaklahi (si Adam) di pio-pio ni Debata  (ay. 8-12)

Di andospotang hatiha mardalan TUHAN Debata di Porlak Eden pio-pio  ma Ibana tu si Adam, dibaen martabuni do ibana di holang-holang ni hayu. Dosa na manyegoi si Adam  madung mambaen ia mabiar dohot maranggapan  naso diida TUHAN sibunian-na, harani i do baen na  martabuni ia.

1. Suara pardalan ni TUHAN mambaen si Adam martabuni harani dosa (ay.8): mabiar halahi marsuo dohot TUHAN, harani pangalaosion di parenta-Na !

2. Sikap ni si Adam nada mangantak komunikasi ni TUHAN (ay.9): dipio TUHAN ma si Adam didia do ho? Dison ditantang kejujuaran sian si Adam!

3. Mangalusi ma si Adam (ay.10): dung hubege Ho ro, gabe martabuni au, angke marsaemara do au.  Dison taligi alasan na masuk akal dipatupa si Adam tu TUHAN, laho pa ago ribu tu ratus dihasalaan nadipatupana.

4. Di kojar TUHAN ma si Adam dohot sapa-sapa (ay.11): Ise na mandok tu ho namarsaemara ho…adong he dipangan ho batu ni hayu na Hurarang i panganonmu ?

5. Dialusi si Adam ma (ay.12): Dadaboru nadibaen-Mi gabe dongan-ku, ido mangalehen di au gabe hupangan !

Sian on taligi kecenderungan ni Jolma parjolo nasai manutupi hasalaan, marhite na mambaen alasan pembelaan na pailahon dohot alasan na masuk akal. Dibaen si Adam alasan harana maila marsaemara, gabe martabuni, harani dongan dadabori na dilehen ni TUHAN gabe mangalanggar rarangan ni TUHAN (seolah TUHAN dohot gabe sala mangalehen dadaboru na mambaen si Adam mardosa). Tapi nada targabusi Debata; diujungna habonaran do napatar di hatihana songon parbincar ni mataniari.

II.Alus ni dadaboru (si Hawa) di sapa-sapa ni Debata (ay. 13)

Lalu ma muse tu si Hawa disapai TUHAN: “Biasi diibaen ho songoni ?” Alus ni dadaboru ima:

1.Na dipaoto-oto ni ulok i do au, gabe hupangan batu ni hayu i. Sianona taligi alasan na dibaen ni si Hawa totop pasimbil/ mandanggur hasalaan tu ulok i. Nada dipaboa ia harani aha baen di lehen ia muse tu si Adam batu ni hayu i ! Hape sasintongna patar do tolu bentuk hasalaan na dibaen ni si Hawa di dison, hasalaan mangalanggar na ima: dirarang ni TUHAN, manyuru di Adam anso dohot mangan batu ni hayu na dirarang TUHAN dohot nada diokui si Hawa secara tuntas  hasalaan-na; artina secara tersirat si Hawa pe dohot do paoto-oto si Adam, anso mambaen dosa !

2.Akibat di hasalaan na dibuat ni ulok, si Hawa dohot si Adam gabe hona uhum ni Debata ma halahi dohot  tano na diingani nasida. Sian on taida do sada akibat na godang muda sai manuntun/mangalo
parenta/hagiot ni TUHAN. Harana nada targabusi TUHAN, dosa angkon do uhuman jana nada tarpasili uhuman ni TUHAN. Sude do na terkait tu karejo dosa gabe hona dampak di ujungna. Bisa do taligi keadaan on di bagian na mangihut.

III. Uhuman ni Debata harani pardosaon ni jolma parjolo (ay. 14-19)

01.Uhuman tu ulok harani dosa (ay.14-15):  Manjurur noma dohot butuha-na, abu noma panganon-na salolot mangolu. Marsihosoman-maramusu noma dohot dadaboru lalu tu pomparan-na (ropukkonon-na ma ulu-mu jana turbingon-mu ma tambihul-na)

02.Uhuman tu Dadaboru harani dosa (ay.16): Tambaon ma hasusaan hatiha denggan pamatang dohot laho manubuhon anak. Sai ro roha-mu tu halaklahi-mu jana anso sai dioloi ho halaklahi-mu.

03.Uhuman tu Halaklahi harani dosa (ay.17,18, 19): Gabe mangan simarata, angkon marsitutu markarejo salolot mangolu anso tuk panganon-mu, maradu loja karejo jana hodohan anso marhasil lopus mulak muse gabe tano.

04.Uhuman tu tano harani dosa (ay.18): Hona bura tano: partubuhonon-na noma ramba-ramba, duri dohot simarata (nada jeges be keadaan ni tano/alam lahan parkarejoan ni jolma).

Sianon taida ma hebat ni akibat dosa pelanggaran ni jolma parjolo, na lalu tu hita jolma pomparan sian sundut tu sundut: Gabe sego hubungan parsaoran dohot Debata (targanggu komunikasi) Gabe sego hubungan keutuhan hajolmaon diri sandiri (pamatang, tondi & jiwa) Gabe sego hubungan dohot jolma (tarmasuk lawan jenis) Gabe sego hubungan keharmonisan dohot tano/ alam humaliang (gabe loja karejo asa dapot mangan). Gabe dipaorot sian Kobun Eden na sonang (ay.22-23), painte mulak muse gabe tano (tinggal di portibi namangilas).

C. HAHONAAN NI JAMITA : PAMUNGKAAN  3 : 8 – 19

01.Marhite turpuk on murtangkas ma di hita biado akibat ni dosa na dibaen ni sia Adam dohot si Hawa jolma parjolo na torus marakibat tu sude pinomparna lalu tu hita sadarion. Sada do mangan sibodak hape sude margota-gota. Jolma parjolo do na madabu tubagasan dosa gabe sude pinomparna mananggung dohot manean diuhuman akibatna.

02.Tapi tapuji ma TUHAN-ta dibaen godang ni holong ni roha-Na, dipio do jolma, anso mananda dosana, mangoku, marhaubaan jana mulak muse marpangoloion tu TUHAN ngoluna.

03.Bako dosa na lohot tu ngolu ni jolma madung disalosehon marhite pangkopkopion ni Jesus di dolok Golgotha, anso malua sude jolma sian bura dohot uhuman akibat dosa.

04.Muda tung pe madabu hita tu dosa sanga hagaleon tertentu mambaen pangalaho na maralo tu TUHAN, tangi ma hita di pio-pio ni TUHAN, jana mangoku-marhaubaan (bertobat) ma hita andorang so tarlambat partinggkian-ta be.

05.Antong hot ma hita mangolu dibagasan parsaoran na denggan dohot Debata jana ulang be sai taoloi hagiot ni sibolis na manyego-nyego ngolunta. Amen.

Horas ma di hita sudena.

Pdt.B.Nainggolan, MTh

GKPA Resort Tanotombangan

Email: rev.bnainggolan@yahoo.com