Hatorangan ni Sibasaon Minggu, 10 Nopember 2013: Amsal (Poda) 26: 17-28

HAJAHATAN NI PAMANGAN SANGA HAJAHATAN PAMBAENAN ? Hotorangan ni Sibasaon: Minggu 24 dung Trinitatis                          Sibasaon : Poda 26: 17-28 Tanggal, 10 Nopember 2013                                                          Jamita     : Rom 12: 17-21 Patujolo Marragam do jenis dohot bontuk ni hajahatan na tarjadi adong di ngolu ni jolma. Mulai sian hajahatan na ro sian pamangan, hajahatan pambaenan, hajahatan na buni (tarselubung), hajahatan struktural, hajahatan sosial, hajahatan rohani, hajahatan hagolapan, hajahatan pers, hajahatan teknologi, hajahatan politik, hajahatan HAM (Hak Asasi Manusia), dohot bahat do pe na adong menggejala di ngolu  ni jolma na di portibi on. Hajahatan i adong do na terorganisasi, adong muse pangalaho nanitean sian sada keturunan tu keturunan na mangihut (isarana; vendetta, mafioso na adong di Italia), adong muse perlakuan spontanitas hara ni panyosak ni situasi, persengkongkolan, adong muse harani parmusuon na dung lolot (dondam, teanan), panyosakon dohot akibat mambela diri dohot angka na asing. Sandok sude na i mulai sian hajahatan rohani lopus tu hajahatan rohana, madung pasti pambaenan na mangarugihon, adong korban, tarjadi parsalisian, porang, teror, hagunturon, hakorason, pamunuon, pambaenan na so adil, pangayahion, parmusuon, hotel (hosom, olat, teal, elat, late), gutgut, jana madung gabe virus na maol situtu sibanterason. Bisa dohonon mulai sorang jolma i tu portibi on, madung sude na ni dok di ginjang i dongan na tubu. Tapi Raja Salomo Raja na marsahala i, jana na bonggal gabe halak na paling marbisuk di jaman na, mangalehen poda na mararga situtu bahaso muda dikarejohon ma i, gabe marisuang jana gabe sisoada do “Patik Raya Holong” nadung ro tu jolma dohot portibi on. Hara ni i ma hape, porlu do hita manyigati duhut na simbur partubu nai-anso ulang mambaen tarulang na denggan i, mangharhari bonang na rundut i-anso marguna, jana porlu manguhal Hata Ni Tuhan baen gabe marbisuk hita jana pasupasu tu ganup jolma dohot pangisi ni portibi on. Hatorangan Ay. 17, partongkaran nada adong guna na Tektek do mula ni gondang-giri do mula ni bada, paingothon hita jolma anso ulang paurushu marhite hata manang pambaenan, dohot mancampuri na so urusan sandiri. Angke muda ni karejohon na songon i, sanga na beha pe ujung-ujung na partongkaran na parohon mara tu diri sandiri bisa tarjadi. Apa lagi ma muda dohot hita mancampuri partongkaran ni halak na sai martongkari. Turpuk on paingothon hita anso ulang mangurus na so urusan ta, angke tudos do i songon na manangkup pinggol ni anjing gila. Muda tapaksahon ma dohot hita, anso gabe songon sada pahlawan kesiangan mamboan dame dipartongkaran ni halak, sarupi do i mandonohi maniop pinggol anjing gila. Marmara hita. Apalagi muda gabe disarbut, rabies na masuk tu pamatang ta, bisa marujung ngolu sanga gabe fatal. Na ponting di si, ima ulang partongkaran na masa di halak marsumber sian hita, jana dohot hita martongkari tu angka na so marguna. Ay. 18-19, margonjak sada pargirian manipu mamparalat halak Mamparalat jolma tu na parohon parlaboan tu diri, sada tehnik manajeman na jitu do i di bagasan sada tiori hapamimpinon. Hara na sanga na beha pe muda malo do pamimpin mempengaruhi na adong di wilayah hapamimpinonia i, gabe motor na bergerak do i laho mangkarejohon angka hamajuaon. Tarida ma wibawania, jana gabe arga situtu do angka keberhasilan na di capai. Songon i muse do di usaho sanga boniaga na dikarejohon, angkon malo do mempengaruhi jolma anso bahat dapot langganan jana maruntung. Na paling ponting di si, ima manajemen na jitu jana na denggan na so mangarugihon tu na sada, jana nada hauntungan tu na asing sanga pe sabalikna. Nada adong di si tiputipu. Parrohahon ma horbo na dung sidung margulu jana margonjak di bustak na di sabai, dung sidung markubang pintor jongjong jana marjomur ma pamatang na, ro do si unggas jalak songgop tu pamatang na i laho mangankon angka hutu jana goya na adong disi. Segar ma pamtang ni horbo i, jana butong ma si unggas jalak nangkinane. Om ma na nidok dohot ekosistim na mambangun hubungan sanga simbiosis mutualisma. Rap maruntung. Tapi sabalikna do di podahon jamita on, muda mamparalat jolma hita, tapi nada parohon paruntungan, tapi di ujung na didok namargonjak do au di si, sarupa do i dohot halak na rintik namarmayamkon sinjata parmaraan. Manajemen na denggan dison mansai andul do dohot manipu manuju paruntungan. Angka na rintik do di dok bisuk ni poda ni Raja Salomo na mangkarejohon usaho na so parohon parlaboan i. Apa lagi na hum mangulahon angka karejo na so sikatutu, madung mamparalat (mempengaruhi) jolma, hape mambaen na marisuang di ngolu on. Manajemen na denggan (manajemen na jitu) gabe sinjata (mamparalat jolma tu tujuan na denggan) tu usaho dohot pambaenan na denggan, tapi manipu (sinjata parmaraaan) muda pe adong labo dijagit sasahalak disi, sarupa ma i songon halak na rintik na manembakkon panah api, panah maut, sanga sinjat parmaraan. Ay. 20-21, siruak baba pagara api na manyurbu jana mangararati Risirisi hata ni jolma-lamamlamam hata ni begu. Hata na risirisi na nihatahon muda adong maksud na jat, madung  mardongan begu ma ia mangkatahon sihataon na, jana mambaen hagunturon na mangararati. Lamamlamam na nihataon ni jolma, parohon begu do ia di si angke gabe momo ma karakter namanggunturi baenon. Hara na, turpukon patorangkon tu jolma angka na marbisuk, bisa do mangaramoti, hata na nihatahon na gabe hata bisuk na parohon situasi dohot keadaan na dame dohot sonang. Hata do mambaen adong komunikasi na denggan sanga pe komunikasi na apdol. Tapi sian hata i muse do bisa tarjadi partongkaran na manjurus tu pambaaenan na so pade. Sedikit bicara banyak berbuat, i do na marhadomuan tu hata bisuk di jamita on. Muda angka siruak baba, hara ni bahat ni hata naniharuarhon na, jabat nada adong be bisa mangaluarkon hata sian dongan na naasingi adong ma di si gara ni api. Sada hata bisa do manyurbu sada kota. Sada hata muse bisa do mambaen tarjadi partongkaran na so bisa mantak. On ma songon hayu arang na gara nada ra mintop jana torus gara. On do karakter ni siruak baba na pagara api na manyurbu jana mangararati. Ay. 22-24, tabo do na mambege hata na lambok, tapi  marasok bisa gabe sipaotooto Halak na olo sai patubutubu hata, apa lagi parmasuk ni hata na nidoknia masuk akal, masuk tu roha, gabe jotjot do parohon angka na hurang pade. Mamondut, jana sada fitnah bisa tarjadi. On ma na nidok, dosa gosip. Halak na sai ra patubutubu hata holan late do na adong di roha na. Holan gabus do na dipikiran na. Holan gutgut do na nikarejohonna. Holan lancap do dibagasan ngoluna. Namangotootoi do ulaonna. Holan na jahat do na sai tongtong tarida di sude na na nikarejohonnia. Songon hudon tano na disopu dohot perak, jeges ligion di luar jana saksak, bahkan marlinang; tapi hum sakkidop bisa do hansur jana nada adong be artina dohot guna na. Berantakan. Hata na lambok pe, tabo do begeon. Tapi muda mardongan dohot na jahat do hata na lambok na nidok ni sasahalak, bisa do berakibat fatal. Harana holan gabus, manipu, mamolamola, manggosip, hum mangjalakjalahi hasalaan ni dongan, fitnah, dohot angka pambaenan na jahat, gabe cara na jolma mandabuhon sahala manang bisuk na adong. Muda sipaotooto ma, na mangaluarhon hata, na paloaskon si bolis do mangarajai diri na disi.  “Air tenang menghanyutkan”, aek ni susu dipadomu dohot aek ni tuba, beha ma botoon jadina i. Margizi jana tadok tabo, tapi muda diminum bisa do mambaen hamatean ro.     Ay, 25-26, pargoar sibunibuni siago anak ni halak Sanga songon dia pe bungkus na manabunihon angka na jat, mulimuli muap do na bau. Patar do di Tuhan angka pambaenan na denggan nang pe pambaenan na jahat. Sanga na bia pe lambok ni hata ni parjahat, hara ni karakter na madung jahat, nada sihaporsayaan ia. Gutgut do na dung manggohi roha na. Muda antar diakui ia pe hajahatan na, dibunihon ia hajahatan i marbungkus hata na lambok, didok madung maruba au di si, i pe sipamanatonta do. Harana sogo ni roha na solot di ateate na naso tarida, sai na gabe botoon ni jolma do. Samalomalo na, si bolis menyamar sebagai halak na bisuk, halak na burju, halak na ringgas, angkon botoon ni haka di ia tutu si bolis. On ma na nidok pandohan ni halak Batak; Hujur mundimundi-martotoran hau halak; pargoar sibunibuni-siago anan ni halak. Ay. 27-28, hata na tabo dohot karejo na di roha denggan, gabe parohon mara Sian pamangan do haruar hata-hata. Jana hata na nidok i, bisa do pasupasu sanga sabalikna bisa gabe bura. Markuaso do hata laho mangarayak aha na giot ro jana tarjadi. Hombar tu hata na tadok i, bisa do, i gabe tarjadi. Contona; natoras na sai jotjot muruk tu anak,  na sai sigorahonon mulak sian sikola, didok “na oto ma ho”, markuaso do hata i annon pataridahon botul do jana tarbukti gabe halak na oto anakna i. Ise na mangkuar lubang tu halak na asing, ia sandiri do runcur tu si, dohot sangan ise manggulang batu ido na nidondonan na. Hahonaan na Anso bisa hita halak na porsaya i padaohon hata na jahat sanga pambaenan na jahat, angkon gabe halak na marbisuk do hita. Marbisuk songon ulok jana marroha songon darapati na didok hata ni Jesus, marastuan do i; “ bohi on bisa do ulok tapi roha angkon darapati. Tapi jotjotan do hita jolma sabalik na bohi darapati, hape roha ulok”. Hata bisuk na so mardongan na denggan ima sada haotoon. Hagogoan na so mardongan hasintongan mambaen boncir hasesego. Hamoraan inda mardongan holong nada na satia ia di Tuhan. Hata na denggan na so mardongan pambaenan na denggan haporsayaan na mate do i. Sude hamampuan ni jolma dibagasan sude hata, nanihatahonna, pasti do bisa manolong jana maroban diri na gabe mananda Tuhan. Gabe halak na marbisuk gabe adong hadameon jana pasupasu. Di bagasan teologi reformasi adong do pandohan “finitum non possit copere infinitum”, na marastuan;  na tarbatas nada mungkin mangastui na so tarbatas, manang na marisuang nada mungkin i mangastui na manongtong. Hata, sambolus do i dungi salpu, tapi bisuk marudut do i tapi parohon pangastuion na tabo. Hata na denggan santongkin do i, tapi pambaenan na denggan angkon marpupu do dikarejohon sebagai halak na porsaya tu Tuhan na dung manghaholongi hita. Panandaonta tu holong ni Tuhan nada dibagasan kognisi sanga rasio sajo. Tapi dohot sandirina do, na nigoaran “cognito dei insita”, dibaen madung dilehen ia tu hita bisuk anso marhata na denggan dohot marpambenan na denggan. Hara ni i, muda ma marbisuk hita, hata dohot pambaenan pe tu angka na denggan ma. Sian pikiran na so denggan, siang roha na so denggan, dohot sian nanikarejohon na so denggan, madung bisa dipastihon hajahatan ni hata dohot hajahatan ni pambaenan mambaen mari suang jana sisoada ngolunta tu Tuhan dongan jolma, dohot tu lingkungan ta. Pangarimpunan: Lomo jana sonang do rohangku (tapi nada hubuoto rohamunu dongan)  muda manonton film laga (action) na ni bintangi Steven Seagal. Di ganup aksi na, nada bahat ia patuduhon gerakan na niparsiajarinia namangguruhon moncak di Jepang. Di hatiha musu ro menyerang, jagoan on hum  patuduhon saotik gerakan sajo, tapi madung mampu manaluhon (melumpuhkan) alo na. Digunahon ia do jurus Aikido. Ilmu beladiri na sian Jepang on memang unik, harana dipargunahon jana dimanfaatkon do tenaga dohot serangan ni alo laho mampartahonkon diri. Dibagasan hubungan sosial, bisa do hita manggunahon jurus Aikido on laho mampartahankon diri. Tapi gabe adong sapasapa taringot tuson. Aha do na jotjot tapatuduhon dihatiha, na martongkari sanga tarjadi parbadaan ? Marusaho do hita ‘manghabisi alo’, tasalahon do sude hata dohot pambaenan  ni musu sanga alo.  Nada adong gunana cara sibaenon na songoni ? Sahali nari nada. Angke bisa do dipamanat sian kejadian partongkaran na tarjadi, bahat do marujung dibagasan hancit ni roha, jana masing masing mampartahankon pandapot na. Boto ma urat ni partongkaron ima parbedaan ni pandapot Tacuba ma jurus Aikido on. Carana: bege ma sude hata ni alonta i. Dapot do annon adong di si pigapiga hata na tasetujui, sian angka hata ni musu na haruar maraburan i. Ulahi ma hata na tasatujui na nidok alo i, huhut dok ma,  :”Satuju do au dohot hatami, hatamon ima “...........” dohot satorus na, tapi ulang lupa pake bisuk, pamasuk ma pandapotmu dohot manjoloani pandapot na i. Markitehon i, cara on, mambaen namarsipanasan (gara ni api nangkin) bisa gabe marangsur medep. Hapanason ni partongkaran nangkin, hara ni nadung tapamasuk parsatujuanta di hata na, jana taholangi pamasungkon pandapotta, gabe angka parbedaan i na jotjot manjurus tu parbadaan gabe sabalikna do, ima tu partataan.  Dohot pabidang ma pangastuion na, gabe adong parsatujuan di wilayah angka na  mambaen adong hasepakaton, gabe tarjadi ma jana pasti partongkaron marujung tu dame. Antong partongkaron i nada marguna. Partongkaron i paginjang parmusuon. Partongkaran i mambaen adong haruar hata na so denggan. Partongkaran i mambaen adong tindakan na so pade. Partongkaran i mangharuarkon hatahata sian pamangan. Partongkaran maroban tu sada rencana hajahatan na giot sibaenon. Antong partongkaran i, hajahatan ni pamangan do i, sanga hajahatan ni pambaenan ?  e n                                                                                                                Pdt. B.M. Siregar