Acara PARTANGIANGAN KELUARGA JAM 00.00

PARTANGIANGAN KELUARGA JAM 00.00 Minggu, 01 januari 2012 (Bahasa Batak) Thema: JAHOWA MARDALAN DI JOLONTA “Jala Jahowa mardalan di jolonasida, ia arian marhitehite ombun na marsijongjong manogihon nasida di dalan i, ia bornginna i marhitehite api na marsijongjong manulu nasida, asa tarbahen nasida mardalan arian dohot borngin” (2 Musa 13: 21) 01.  Joujou Tu Partangiangan        U:      Di bona ni taon 2012 on patut do hita mandok mauliate tu Debata Parasiroha jala Pardengganbasa naung tangkas situtu mangaramoti, manogunogu dohot mandongani hita mamolus taon 2011 na salpu.        R:      Pinuji ma Debata, Ama ni Tuhanta Jesus Kristus naung pabongothon hita tu taon 2012.        U:      Tama do di bona ni taon na imbaru on tasulingkiti dirinta sandiri angka aha ma naung tapatupa di pardalanan ni ngolunta na mambahen las roha ni Debata dohot donganta jolma.        R:      Ale Tuhan, sintap ni na tarula hami do hupatupa hami sai pasupasu jala jalo ma i bahen sangap di goarMu. Sai marpamuati ma rohaM molo ndang apala marsitutu do pe hami patupahon songon na ni dok ni hataM.        U:      Molo tapatupa rujiruji di pardalanan ni ngolunta di taon na salpu, ndang tarbahen so marlaok dosa hita di hata nang di pambahenan maradophon Debata nang tu donganta jolma.        R:      Sai marpamuati ma rohaM di dosa dohot pangalaosionnami ai Debata parasiroha jala pardengganbasa do Ho.        U:      Antong tapuji ma Debata marhite ende sian buku ende No.70:1+2 2.    Marende BE.70:1+2    “Naung salpu taon na buruk I”        Naung salpu taon na buruk i. Ho ma hupuji Tuhanki. Ai diramoti Ho tongtong tondingku dohot dagingkon. Ai diramoti Ho tongtong tondingku dohot dagingkon.               O Jesus sai asi rohaM, paian denggan basaM. Muse di taon na’mbaru on di nasa huriaM tongtong. Muse di taon na’mbaru on di nasa huriaM tongtong. 03.  Votum        U:      Marhitehite Goar Ni Debata Ama dohot Goar Ni AnakNa Tuhan Jesus Kristus dohot Goar Ni Tondi Parbadia na tumompa langit dohot tano on.        R:      Amen        U:      Unang ho mabiar, ai Ahu do siluluhon ho; nunga pola hujou goarmu, Ahu nampuna ho. Ai molo dibolus ho aek, donganmu do ahu, manang ditaripari ho angka batang aek, ndang umbanganna ho. Tung sura pe mardalan ho di bagasan api, ndang mosokkononna ho, jala ndang gor ho bahenon ni dila ni api.        R:      Ai Ahu do Jahowa Debatam, na badia ni Israel, sipalua ho.        U:      Dibahen na arga do ho Huida, marmulia jala Ahu mangkaholongi ho, jadi Hulehon jolma singkatmu, jala angka bangso singkat ni tondim. Unang ho mabiar ai donganmu do Ahu!        R:      Hamu do angka sitindangingKu, ninna Jahowa, dohot do  naposongKu naung Hupilliti, asa ditanda jala dihaporseai hamu Ahu, jala mangantusi rohamuna, paboa Ahu ibana! Jumolo  sian Ahu ndang adong tarjadi Debata, dipudingKu pe ndang tagamon adong!        U:      Ahu tutu, ahu do Jahowa, jala ndang adong silehon tua dungkon ni ahu. Alai hamu do angka sitindangingku, ninna Jahowa, jala ahu do Debata. Haleluya.        R:      (mangendehon) BE.64:5                   “Naung moru do muse sataon”                  Dibahen i antong hupuji denggan basaM sadari on. Ai pineakhon rujiruji i do na dapot sai tongtong. O Jesus na marholong roha ingkon hupuji goarMi, dibaen saluhut denggan basa tu ahu pinasahatMi.        U:      Martangiang ma hita:                  Ale Tuhan mauliate dohot pujipujian dipasahat rohanami tu Ho ala asi ni rohaM na mangaramoti, manogunogu dohot na mangaramoti hami mamolus taon 2011 na salpu di pabongot hami tu taon na imbaru taon 2012 on. Hupangido hami ma tu Ho nang mamolus taon na imbaru on tongtong ma asi dohot holong ni rohaM na mangiringiring hami ai ndang tarlangkahon hami sallangka na ture anggo so mardongan Ho. Di tongatonganami ma Ho di partangiangannami on sian na mamungka sahat ro di na mangujungi. Jalo ma pamujiannami dohot pangidoannami marhitehite AnakMu, Tuhan Jesus Kristus, Sipalua hami. Amen. 04.  Marende BE.No.69:1+3      “Jesus sai urupi hami”        Jesus sai urupi hami dohot di taon baru on. Paimbaru gogonami mangihuthon Ho tongtong. Pasupasu ma muse na porsea sasude.                  Taon parasinirohaon baen di au sandok taon on. Lam pahot ma hasesaan ni dosangku di au on. Holan Ho do Jesuski, tuk pasaehon dosangki. 05.  Refleksi Taon Baru        U:        Molo manaili hita tu pudi tu taon na salpu marragam do angka na masa naung tabolus, las ni roha nang arsak ni roha pe, keberhasilan nang kegagalan pe. Mauliate ma tadok tu Debata ai diloas do pe hita sahat tu taon na imbaru on. Apala di bona ni taon na imbaruon manatap ma hita tu jolo. Sungkunsungkun do rohanta aha ma angka na naeng siadopanta? Boha do hita di angka ulaonta siganup ari? Aha ma angka na masa di tongatonga ni masyarakat? Dohot angka sungkunsungkun na asing na tubu di bagasan rohanta. Ndang dapot hita alus tu sungkunsungkuni. Antong aha ma na ingkon sihangoluhonta asa unang mabiar hita mamongoti jala mamolus taon na imbaruon.         R:        Tahangoluhon ma hata ni Tuhanta di Josua 1:7 na mandok “Asal pir tondim, jala marsihohot situtu mangaradoti dohot patupahon hombar tu sude patik, angka na tinonahon ni si Musa, naposongki tu ho. Unang manimbil ho sian i tu siamun manang tu hambirang, asa marmulia ho manang dompak dia ho mangalangka”        U:        Pir ma tondinta jala unang hita manonditnondit. Debata ma tapangsahon di angka ulaonta, Ibana ma tahaposi jala tapaserep ma rohanta asa ditongos Debata tu hita pangurupionNa.        U+R:   (mangendehon) BE.66:1                      “Debata baen donganmi”                    Debata baen donganmi lao mangula ulaonmu. Baen Ibana haposanmu sae paserep rohami. Debata baen donganmi, Debata baen donganmi.        U:        Ditaon na imbaruon boi do na lam  tumaolna dalan na naeng sidalananta. Pangunjunan pe  sonson di jolonta na boi mambahen hita lilu sian dalan na sintong. Alai molo Debata tabahen donganta jala tahangoluhon hataNa tung so tarelaela portibion do hita. Ai didok hata ni Tuhanta do di Psalmen 119:105 “hataMi do sulusulu ni pathu jala hatiuron di dalanku”.        U+R:   (mangendehon) BE.66:2                    Debata baen donganmi, molo Debata donganmu. Ndang tarbahen ho be lilu, sai ture do langkami. Debata baen donganmi, Debata baen donganmi.        U:        Tontu di taon na imbaruon godang do angka na tasangkapi na naeng siulahononta dohot sipatupaonta. Hata ni Tuhanta di Johannes 15:5c mandok “ai ndang tarula hamu agia aha, anggo so mardongan Ahu”        U+R:   (mangendehon) BE.66:3                    Debata baen donganmi, sai na saut do ulaonmu. Sai na tulus do sangkapmu jala sonang rohami. Debata baen donganmi, Debata baen donganmi.        U:        Nunga tangkas pandonganion ni Debata di ngolunta di na tabolus taon 2011 na salpu. Pos ma rohanta nang tu taon na imbaruon tongtong do hita donganan ni Debata. Mangolu ma hita dibagasan biar mida Debata, taulahon ma angka ulaonta mardongan Ibana jala pangalahonta pe naeng ma imbaru hombar tu lomo ni roha ni Debata.        U+R:   Ale Tuhan, sai Ho do haporusannami marsundutsundut! Sai parroha i ma hami mamilangi angka ariarinami, asa dapotan roha na bisuk hami. Sai pataridahon ma tu angka naposom angka  pambahenanmu dohot hamuliaonmu tu angka pinomparnasida. Sai songgop ma tu hita habasaron ni Jahowa Debatanta, sai  ditumpak Ibana ma pambahenan ni tanganta, olo tahe, sai ditumpak ma pambahenan ni tanganta i! 06.  Marende BE.68:1+5     “Masilelean angka taon”        Masilelean angka taon ro di ujungna sogot. O Jesus lehon parrohaon na naeng tongtong marningot. Dihalalao ni aringki huhut manimbang ujung nii.               O Jesus sai urupi au di taon na ro mamboan, parbue angka na sai tau padaohon hamagoan. Sai pargogoi ma au tongtong pasangap Ho di ngolungkon. 07.  Renungan:  2 Musa 13:20-22        (dijaha na manguluhon partangiangan)        20) Jadi borhat ma nasida sian Sukot, jala marsaro di Etham, di partalpahan ni halongonan. 21) Jala Jahowa mardalan di jolonasida, ia arian marhitehite ombun na marsijongjong manogihon nasida di dalan i, ia bornginna i marhitehite api na marsijongjong manulu nasida, asa tarbahen nasida mardalan arian dohot borngin.22) Ndang dung morot sian jolo ni bangso i ombun na marsijongjong arian dohot api na marsijongjong bornginna i. “Jahowa mardalan di jolonta” Hata ni Debata di borngin on sabagian sian barita pardalanan ni bangso Israel haruar sian Misir bukkas tu tano parpadanan, tano Kanaan. Bukkas manang bongot tu tano parpadanan ndang sada sipilliton ni bangso i, alai parenta ni Debata do i na ingkon sidalanan ni bangsoNa. Di parhorsihan dolok Sinai, ditongihon Debata do bangso i mangaliat sian dalan tu halongonan mangihutihut Laut Arung. Ndang dapot hapikkiran ni jolma jalan hal na aneh do dalan na tinontuhon ni Debata sidalanan ni bangso i, ai ndang lam pajonokhon pardalanan tu tano parpadanan dalan na tinontuhon ni Debata baliksa lam padaohon do. I ma dipikkiran ni jolma alai ndang songon i dipikkiran dohot disangkap ni Debata. Ai marhite angka na maol antusan ni jolma disi do dipatuduhon Debata huasao dohot hamuliaonNa. Di pardalanan i ma ditogutogu jala diiringiring Debata bangsoNa marhite ombun na marsijongjong dohot api na marsijongjong. Ombun dohot api na marsijongjong patuduhon na di tongatonga ni bangso i do Debata jala marhite i ma diida bangso i pandonganion dohot panogunoguon ni Debata laho bongot tu tano parpadanan i. Songon i do nang hita mamongoti taon na imbaru on, ndang sada sipilliton i di hita alai parenta ni Debata do na ingkon sidalanhononta. Ndang tarbahen hita mulak muse tu pudi tu taon naung tabolus (2011), ingkon bongotanta do taon na imbaru on jala dalananta nang pe ingkon adopanta angka hamaolon dohot parungkilon. Hata ni Debata di tingki on naeng patoguhon haporseaonta dohot panghirimonta na mardalan do di Debata di jolonta di na tabongoti jala tabolus taon na imbaru, taon 2012 on. Memang ndang boi taida dohot simalolongta ombun na marsijongjong dohot api na marsijongjong, alai na boi do panghilalahononta pandonganion dohot panogunoguon ni Debata di ngolunta. Adong ma tolu na mansai ringkot sipahusorhusoron ni rohanta sian turpuk on na patoguhon haporseaonta mamongoti taon na imbaru, taon 2012 on: Parjolo: Papataron ni Debata ma panogunoguon dohot pangaramotionNa di hita molo tongtong hita satia tu Ibana. Sian pamerengan ni jolma panogihonon ni Debata tu bangsoNa mardalan mangaliat sada pardalanan na aneh ala ndang lam pajonokhon pardalanani alai lam padaohon nasida do sian tano parpadanan i. Nang pe songon i dioloi jala unduk do bangso i tu panogihonon ni Debata. Dipangoloion ni bangso i ma dipapatar Debata pangiringonNa tu bangsoNa marhite ombun na marsijongjong di tingki arian jala api na marsijongjong di tingki borngin. Songon i nang hita mamolus taon 2012 on, taihuthon ma lomo ni roha ni Debata, mangolu ma hita hombar tu hataNa jala tadalani ma dalan na pinatuduhonNa, ai diboto Debata aha na ringkot jala na dumenggan di hita saluhutna. Paduahon: Holong dohot hasatiaon ni Debata ndang manadinghon hita. Di Nehemia 9: 19 didok: “Alai laos so olo anggo Ho manadingkon nasida di halongonan sian asi ni roham angka na godang i; ia ombun na marsijongjong ndang meret sian lambungnasida arian, laho manogihon nasida di tongan dalan; api na marsijongjong pe songon i bornginna i, manulu dalan sidalanannasida i”. Ombun na marsijongjong dohot api na marsijongjong songon hataridaan na mian Debata di tongatonga ni bangso i mangaramoti bangso i gabe ndang tarhahua ni angka musuna. Ra di taon na imbaru on marragam do hamaolon na ingkon siadopanta alanii ingkon mardalan do hita dibagasan bisuk dohot hapistaran na sian Debata. Mian ma bisuk dohot hapistaran na sian Debata molo mangolu hita dibagasan parsaoran na rosu dohot Debata. Ndang tadinghonon ni Debata hita, ramotanNa jala pargogoonNa do hita di angka ulaonta siganup ari. Ala ni i, Debata ma tabahen uluan di ngolunta, na mardalan di jolonta. Unduk ma hita tu lomo ni roha ni Debata. Mardalan ma hita di dalan na pinatuduNa di bagasan lomo ni rohaNa, unang pahatophu unang palambathu. Taulahon ma ulaonta dibagasan tangiang jala taulahon ma na denggan jala tingkos asa marhite sude panggulmiton ni ngolunta marmulia jala marsangap Debata. Patoluhon: Marparsaoran na rosu ma hita dohot Debata asa taboto lomo ni rohaNa. Hata ni Debata di Johannes 10:14-15 mandok: “Ahu do Parmahan na denggan. Hutanda do angka na di Ahu, jala ditanda nasida do Ahu. Songon Ama i na tumanda Ahu jala Ahu tumanda Ama i, jala huseahon do hosangku humongkop birubiru i”. Ombun dohot api na marsijongjong patuduhon hubungan dua arah antara ni Debata dohot bangsoNa. Molo sintong do responta tu Debata parbuehonon ni i ma angka na denggan di bagasan ngolunta. Ditanda Debata do soaranta jala hita pe ingkon tandaonta do soara ni Debata. Saluhut hadirionta ndang adong na buni di adopan ni Debata, patar do di adopanNa angka na masa di panggulmiton ni ngolunta. Boha hita? Tatanda do soara dohot lomo ni roha Debata? Unang holan hita naeng tangihonon ni Debata, hita pe ingkon do manangihon soara ni Debata. Naeng ma hita mangolu di hubungan langsung dua arah dohot Debata (tang ni haporseaon/kedewasaan iman). Alani i, mamongoti dohot mandalani taon 2012 sude ma hita sekeluarga marpadan na tongtong hita satia jala marparsaoran na rosu dohot Debata. Mian ma hita di padan na mandok: “Alai ahu dohot dongan sabagas holan Debata do oloannami” (Josua 24:15c) Barita taringot tu pardalanan ni bangso Israel haruar sian Misir boi do idaonta i nang dipartingkian on. Nunga dipapatar Debata angka tanda halongangan di panggulmiton ni ngolunta di na tabolus taon 2011 na salpu nang di na mandalani taon na imbaru hita tongtong do papataron ni Debata tanda halongangan i na manjagai ngolunta. Pangido ma tu Debata asa tongtong asi ni rohaNa mangula di ngolunta. Debata do mardalan di jolonta asa manang na tudia pe dipatuduhon Debata dalan sidalananta tu si ma hita mangalangka. Ibana ma taihtuhon ai diboto Debata angka na ringkot dohot na dumenggan di hita. Horas ma hita mandalani taon 2012. Dipasupasu Debata ma hita. Amen. 08.  Marende BE.238:1+2     “Ihuthon au sude hamu”        Ihuthon Au sude hamu didok Tuhanta Jesus. Sai soadahon dirimu hatangKu ma patulus. Alai bolonghon ma sude parulaonmu na so ture.               Sai Au panondang di hamu di dalan hangoluan. Naeng unang lili be hamu dao dohot hamagoan. Au parhitean di hamu tu hasonangan situtu. 08.  Mandok Hata: ·                     Di pungka sian na umposo, manang ·                     Dipillit ma na mewakili ianakhon dungi natoras 09.  Marende BE. 753:1…       (pelean tu huria)        “Dipardalanan Jesus di jolongku”        Dipardalanan Jesus di jolongku, holong ni tanganMi manogu au. Ndang di ngolungku Ho do sombaongku tung sonang mardalan raphon au. Huboto do tangkas panoguonMu, di iringiring Ho do langkangki. Sahat ro di ujung ni pardalanku, togu ma au jonok tu lambungMi.                  Sipata lilu haporseaonhu, nililianan ni portibi on. Alai dung Ho hutatap, O Tuhanhu, margogo do au on di ngolungkon. Huboto do tangkas panoguonMu, di iringiring Ho do langkangki. Sahat ro di ujung ni pardalanku, togu ma au jonok tu lambungMi.        Patogu ma Tuhan haporseaonhu, asa polin tu Ho manghirim au. Tu surgo i patulus pardalanhu, TondiMi maringan ma di au. Huboto do tangkas panoguonMu, di iringiring Ho do langkangki. Sahat ro di ujung ni pardalanku, togu ma au jonok tu lambungMi. 10.  Tangiang Panimpuli ·      Tangiang Ale Amanami (rap mandok) ·      Pasupasu (molo partohonan) ·      (mangendehon) Amen…Amen…Amen… 11.  Marsijalangan SELAMAT TAON BARU 01 JANUARI 2012