Jumat, 01 April 2011

Jamita Minggu, 17 April 2011: Markus 14 : 3 – 9

widgeo.net
JESUS DIURAPI


Minggu Palmarum, Tgl,17 April 2011
Jamita            : Markus 14 : 3 9
Sibasaon       : Johannes 3 : 14 - 15

Patujolo

Hombar tu hasomalan ni halak Jahudi sai dirayahon halahi do ari raya Paskah, ari raya Roti na so marragi dna. Partingkian laho mangarayahon ari raya Paskah dohot ari raya Roti  naso marragi i ma murdonok. Angka imom ni halak Jahudi dohot ahli Taurat  ma mur manyantak manjalahi hasalaan ni Tuhan Jesus anso adong dalan laho mamunu Jesus.

Bohal tu Parjamita:
Ayat 3-4: Di Betania, di bagas ni si Simon si kusta, sada halak dadaboru maminyahi Tuhan Jesus dohot minyak narwastu murni, minyak namansai arga situtu. Marnida situasi i adongdo halak naso setuju gabe muruk. Alasan ni muruk nihalahi harana dietong rohana do sikap ni dadaborui sisongon i merupakan pemborosan. Sikap nadietong naso pola maroban manfaat, keuntungan tu halak na bahat. Gari ada digadis minyak i bisa doi baenon laho manutupi kebutuhan ni angka halak na miskin ninna rohana.

Ayat 5-7: Muruk do halak Jahudi  dohot halak na bahat i maradopkon dadaboru i tapi dibela Tuhan Jesus do dadaborui. Dipincang Jesus do dohot cara na cukup halus angka na mamuruki dadaboru i huhut dipatorang Ibana bahaso pambaenan ni dadaboru i tutu situtu na denggan doi.
            Didok Tuhan Jesus, “ianggo halak na miskin hot do i adong di tonga-tonga munu”, jala molo adong do rohamunu laho manolong angka halak i bisa do hamu manolong halahi di siganup tingki. Hape Au hum satongkin do rap dohot hamunu nada be bisa Au laho manjagit na denggan sian hamu? Nina Tuhan Jesus.
            Pemikiran na sasintongna, hum alasan ni angka halak Jahudi i do mangangkat issu orang miskin na giot si parate-ate hononton ni halahi. Nada na keluar sian ate-ate parbagasan alasan i. Harana nada jungada magotap halak na miskin sian parngoluan ni halahi hape so jungada halahi laho mengorganisir halak na mora laho memperhatikan halak na miskin, so jungada halahi mambaen aksi tali kasih laho manolong halak namiskin i. Nada jungada binoto halak siboto surat mangkatai dohot angka na mora laho mamikiri nasib ni na pogos.
            Dohot singkat hata sipalencem do hata ni horong ni si boto surat i. Dalan laho manjalahi hagaleon ni halak na mambaen na denggan maradopkon Jesus do sasintongna halahi, huhut memancing sikap ni Jesus atik bia adong muse na sala muda dipaadop tu hukum ni halak Jahudi na bisa muse baenon alasan nabaru laho manangkup Tuhan Jesus.
Pemahaman na asing, hamenehon sanga pe hapogoson partondion ni angka siboto surat i do na terselip di bagasan hata ni Jesus i. Astuanna, sikap-mental-perilaku, ni siboto surat i sandiri do nadimaksud ni Tuhan Jesus gombaran ni hapogoson i. Saleleng nada maruba pikiran ni halahi marnida Jesus saleleng ni i ma hapogoson i mangaliliti parngoluan ni halahi.
            Jadi muda nagiot berubah do sasintongna parngoluon ni jolma sian hapogoson manuju tu hamoraon angkon parjolo do merubah cara berpikir-sikap-perilaku hidup ni halahi lumobi mai maradopkon Debata di bagasan Jesus.

            Bisa do mamora jolma secara materi tapi dao sian Debata jala jolma sisongon on hum materi do na di hopkop ni on. Jala targoar do halak sisongon on na pogos saleleng so berubah sikap-pikiran terhadap Debata di bagasan Jesus. Harani i ale angka  dongan ulang manigor salut hita tu angka dongan na mamora di sibaenon anggo na holang do halahi sian Debata isarana pardatu-datu, pangula-ula, pargabus, panipu, penindas, dll.

Ayat 8 : Pambelaan ni Jesus tu dadaboru i, ima na terkait tu pangalaho ni anak boru i hombar tu kemampuanna. Ditingki i mampu do ibana mambaen nadumenggan tu Jesus. Ima maminyaki Tuhan Jesus dohot minyak na arga . Astuanna nada menahan diri anak boru i laho mambaen na undenggan maradopkon Jesus. Nada menahan kemampuan si anak boru i laho pasangapkon Tuhan Jesus.
            Di tradisi ni hajahudion pengurapan dohot minyak narwastu sasintongna tu halak naung monding do dibaen i. Nian sian sisi i agak andul do perlakuan ni si anak borui. Biasi ma baenon nia kebiasaan nadipatupa tu namate tu halak na mangolu. Laing adong mada sisi na patut siparsapahononton di si. Marhite-hite hatorangan na binaen ni Jesus di ayat on murtangkas do nian taastui. Ianggo upaya pengurapan na tu Tuhan Jesus i urapan pengantar patujolo mai manuju tu pengurapan ni hamamateNia. Angke di roha ni Jesus madung patar dalan hamatean sibolusonNia tinggal na paitteon arina noma.
            Nang pe dipikiran dohot diparbinotoan ni jolma buni dope persoalan i. Tapi na jelas dung terjadi sude rangkaian carito hamatean ni Jesus gabe taringot do tu peristiwa on jala tutu situtu dijagit angka na porsayai do bahaso tudu-tudu tu hamatean ni Tuhan Jesus do parkarejoan ni anak boru i.
            Astuanna, na hum alat pelaksana do ra ibana anggo perencana dohot inisiator Debata do. I do gabe di dok Jesus bagina na andigan pe barita hasintongan i di baritahon anggo barita haburjuon dohot ketulusan ni anak boru nalaho pasangapkon Tuhan Jesus on angkon tongtong noma i songon sitempel nagogo laho marningot ia.

Kesimpulan

Hamu ale angka dongan nada adong be partingkian dohot hita laho pasuo dohot Jesus secara fisik songon si anak boru na di bagasan teks jamita on. Muda ingkon paiteonta do ro Tuhan Jesus mandonohi hita anso tabaen na denggan laho pasangap Tuhan Jesus sampe tu ujung ni ngolunta pe nada jumpang hita i.

Haporsayaanta tu Tuhan Jesus do na mangonjar pengakuan nadung pasuo hita dohot Jesus jala singkat ni parsuoan ni jolma dohot Jesus sai tantong do mangkorhon parulaon si jop ni roha, namenarik perhatian dohot na paiaskon roha ni angka jolma na asing.

Muda tutu situtu do nadung porsaya hita tu Jesus, marsuo do hita dohot Ibana di bagasan partondionta jala hinorhonni i ingkon luluanta do angka napalaskon roha ni dongan jolma. Muda bisa tabaen ma jop ni roha ni dongan jolma harana termasuk do i indikasi ni parsuoanta rap dohot Jesus. Amin.
GKPA Resort Pematangsiantar
Pdt.A.B.Marpaung, MMin, MTh.          
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

Tidak ada komentar:

Posting Komentar