Sabtu, 14 Mei 2011

Jamita Senin, 13 Juni 2011: Pamungkaan 11 : 1-9

widgeo.net

Pentakosta 2

HATORANGAN NI JAMITA

MINGGU TRINITATIS 
SENIN, 13 JUNI 2011

Jamita : Pamungkaan 11 : 1-9    
Sibasaon : Mazmur 118 : 15-18

Patujolo

Carito taringot tu Tugu (menara) di babel, carito na tarbarita do i di Padan Na robi dohot di hita halak na porsaya. Jolma di paserak Debata tu sude luat portibion (ay.8). Asing ni i, turpuk on, jotjot dipake parjamita manaringoti taringot tu ginjang ni roha ni jolma (keangkuhan manusia) maradopkon Debata marhite parbinotoan (bisa do marhite teknologie) ni jolma.

Harana di Pamungkaan 1 : 28, didok Debata do anso gohan ni jolma ma nian portibion-...lopus sude sisik ni tano on diingani jana dirajai pomparanmunu,  hape di ayat 4 nangkin didok do bahaso martahi do jolma i,...anso tarbonggal goarta sandiri jana anso ulang marserak hita di tanoon.

Sasintongna di tingkion, hara ni teknologi, iptek, komunikasi madung sabahasa, sahuta hita dohot sude jolma na satanoon. Nada pola maol be mangastui hata ni bangso na asing hara adong langsung na men-terjemahkon di internet dohot na asing. Jana inda masalah be masalah hata, huta,  budaya dohot angka na asing i, tapi marhite turpuk on, anso ulang ginjang rohanta, ulang tapake angka parbinotoanta i, hamaloonta i, iptek dohot angka na asing i laho mangalo dohot mansoadahon Debata.

Marhite i di Pesta paduahon ari Haroro ni Tondi Porbadia sadarion, Anso sude nian angka rencana, sangkap na tabaen anso hombar tu panuturion ni Tondi Porbadia.

1.   Sude sangkap ni jolma muda maralo tu Debata, nada tulus i.
Dung sidung aek na oto, dipasupasu Debata do si Noak jana didok :”Maranak marpahompu ma hamu, anso diingani pomparanmunu tanoon sudena”. Hape ro ma jolma i martahi : Inda ra hami mangingani sude tanoon. Baenon nami ma tugu, inda porlu di hami Tuhan. Hami do na porlu, asal ma marsada hami, tarbaen hami do sanga aha pe giot nami. I ma ginjang ni roha. J.Vernon McGee mandok, ”menara babel adalah pemberontakan terhadap Allah...menara ini menyatakan arogansi, pemberontakan manusia terhadap Allah”.

Si Paulus pe di Roma 1 : 21- 22 tangkas do didok : ”Ditanda jolma do nian Debata, hape nada ra jolma i pasangapkon Ia songon Debata, jana nada ra halahi mandok tarimakasi tuSia. Tu angka naso marguna do dipikiri halahi gabe manggolap roha ni halahi. Dipikir halahi gabe na bisuk, hape gabe na oto do halahi”.

Visi, Nipi, rencana dohot tujuan dohot Por ni roha (angan-angan) ni jolma i songon i ma jegesna, godangna, hebatna, songon ’Proyek Mercusuar’, bia nian anso adong Tugu lalu tu langit, adong sada ugamo, sada budaya, sada bahasa, bope ugamo i ugamo na mangalo Debata, budaya na so dihagioti ni Debata. Na ponting sada hita. Hape nipi i hara so hombar tu hagiot ni Debata, inda cocok (tidak berkenan bagi Allah) gabe disego-sego Debata. Akhirna sude ’proyek’  mercu suar na godang i, gabe sarsar, margoar Babel (Kekacauan-Masarsar).

Ido na taida di tingkion. Bahat do rencana, visi, nipi ni bangsonta na songon i jegesna, godangna, bia nian anso gabe ’masyarakat na adil jana makmur’, hape bahat dope rakyatta na pogos, na so marsikola, na so jeges kesehatanna. Taida ma angka dakdanakta bahat naso sikola, maol dapot karejo, sarsar, kacau, inda adong masa depanna. Bahat dope inganan na so tarjangkau ni hamajuon dohot angka na asing dope tahe.  Malo do nian hita mambaen visi, rencana, hape sarsar do hita, angke angka halak na malo holan sai marbadai dope, (saling kritik), angka Politisi marsibaen rohana, angka pegawe bahat na korupsi dohot angka na asing. 

Bahat do ra nipi ni rumahtangganta, organisasi/punguan parsahutaonta. Nipi, rencana ni Parlagutanta, di Parlagutan, Resort, Distrik dohot Pusatta. Bisa do jeges, godang, denggan idaon, tapi muda inda sahombar tu hagiot ni Debata, gabe marsarsar do i. Kacau. Sego. Inda marsiantusan. Habis hepeng, gogo, dohot angka na asing tapi inda adong hasilna. Inda denggan mardalan visi, rencana na jeges i.

2.   Pasahat ma dalanmu tu Jahowa, dungi patureonNia ma ho.
Rencana ni Debata pasti na denggan, na dame dohot na mangalehen na dumenggan. I do umbaen dilehen Ia anakNa Jesus Kristus tu portibion laho manobus nasa dosanta. Dijanjihon Ia do anso ro Tondi Porbadia tu portibion laho mandongani dohot manogu-nogu hita tu sude hasintongan. Mangurupi hita martangiang, maroban holong ni roha tu hita. Jana paboahon aha do hagiot ni Debata di ngolunta. (bd. Yoh.16:14-15).

Marhite i dipangido turpukon do tu hita, jeges do muda tapake angka iptek, hamaloon, gogo, hepeng dohot angka na asing i. Jeges do, muda tabaen angka rencana, visi. Jana ido na na sasintongna, tapi ulang lupa hita di ’PERANAN’, di huaso ni Debata, Huaso ni Tondi Porbadia na patuluskon angka hagiot bo sangkap ni ngolunta, rumah tangganta, Parlagutanta dohot Negaranta.

Marhite i denggan do ra tapamanat angka program, rencananta marhite :
a.      Betak nada be tapadohot Debata di angka rencananta songon i di pardalanan ni ngolunta / muda masa hamaolon sanga pe jop ni roha di siganop ari.
b.     Tingki taboto tangkas hagiot ni Debata, tapi nada tapardulihon
c.      Tingki hagiotta (kepentingan pribadi), tapajolo sian hagiot ni Debata.

3.      Marsada ma hita dibagasan panogu-noguon ni Tondi Porbadia.
Painte so mate Tuhan Yesus, ditangiangkon Ia do anso marsada, saroha angka na porsaya i (Yoh. 17). Tondi Porbadia pe i do karejona di ngolunta dohot di Parlagutan i. Dilehen Ia do angka silehen-lehen (karunia Roh) na marragam-ragam, anso singkop parkarejoan ni Parlagutan i.  Sisada pamatang do hita, pamatang ni Yesus. Sisada ama, do hita i ma Debata Ama, si sada tondi do hita i ma Tondi Porbadia, sisada haporsayaan do hita jana sada do pandidionta (bd Efesus 4)
Hasadaonta, nada laho mangalo hagiot ni Debata, tapi anso marsangap do Debata.

PANUTUP.
Pesta paduahon haroro ni Tondi Porbadia do sadarion di hita. Di suru Debata Ama dohot AnakNa Jesus Kristus do ro Tondi Porbadia anso adong mandongani hita. Mangalehen pos ni roha, pagomoskon haporsayaanta tu Debata, jana anso marparbatu haporsayaanta marhite parbatu ni Tondi Porbadia (Bd. Galatia 5 : 22-23)

Antong tapadao ma ginjang ni roha,bope bahat angka donganta na satahi. Tapi martoruk ni roha ma hita mamake angka parbinotoan, iptek dohot angka na asing i marhite angka perencanaan, visi, nipi na dibagasan tangiang dohot hata ni Debata.

Amin.
Pdt. Agus H.J Sibarani STh
Ka Biro II.

Tidak ada komentar:

Posting Komentar