Selasa, 04 Januari 2011

BACAAN ALKITAB MINGGU, 20 PEBRUARI 2011: 2Timotius 4:6-10

widgeo.net
Job ni roha managam pasu-pasu



HATORANGAN NI SIBASAON

MINGGU SEPTUAGESIMA
MINGGU, 20 PEBRUARI 2011

Jamita : Lukas 17:7-10
Sibasaon : 2Timoteus 4:6-10

I. Patujolona.
Nada adong jolma naumboto sanga naandigan ia maninggalkon portibion laho manopot banua ginjang.  Muda pe adong halak namandok nada lolot be au di portibion ninna, tapi  taringot tu hatihana angkon alapon ni Tuhan, humin namangira-ngira sajo do, sanga na memprediksi harana hasintonganna pasti do angkon mangihutkon lomo ni roha ni Tuhan. Apostol Paulus paingotkon si Timotius anso manjadi nian ia kaderisasi, penerus ni parba rita na denggan tanpa terpengaruh di pangajaran na lilu nahumin manghaporluhon hagiot ni pardagingon.  Muda pe angkon markancit si Timotius harani parbaritaan i, di patorang si Paulus do anso sobar ia mangihutkon Jesus nadung parjolo hinan manaon sasudena i.  Harana muda taringot tu parkancitan i, madung dipatorang Jesus do andorang so mate Ia di hayu parsilang, bahaso barang ise na giot mangihutkon Ibana, angkon rade ma ia mamorsan silang, manghalupahon dirinia sandiri artina :  Mandokkon nada maradopkon hagiot niba sandiri, tapi mangoloi  pandohan ni Debata  (basa  Matius  16 : 24).   

II. Hatoranganna.
1. Madung dapot hatihana mate au…  Pada umumna muda laing hipas dope hita, laing ro do pe biar manopot hamatean, kecuali memang humin na payak sajo noma harani namarnyae, justru ro pio-pio tu Tuhan mandok, alapma au ale Tuhan.  Ternyata si Paulus laing horas torkis do ia hatiha nanidok nia madung dapot hatihana.  Muda tarimang-rimangi do sanga aha maksud ni si Paulus mandok madung dapot hatihana, ternyata na marpardomuan dohot parsadaan nia tu si Timotius do nadung dipulnit nia  gabe sada naposona, nanitugaskon nia anso mangihutkon pangajaran nadung binegena, nadung disaksihonna jana nadung dihapor sayai anso laing toruskonnia i selaku generasi penerus.  Harupe angkon mate ia harani na di uhum di masa pemerintahan Kaisar Nero, tapi laing bertekat do ia dohot sada misi marhite pandohan : Harupe mate au, nada tola mantak parbaritaan taringot tu Jamita Nadenggan, jana marhite si Timotius karejo namarpardomuan tu tanggungjawab ni sada naposo angkon mardalan do baen hasangapan ni Kristus Jesus. Nada tarukur songon dia godang ni pengor banan marhite hata dohot pambaenan nadung pinatupa ni si Paulus, jabat do digambarkon ia dirinia songon haul tu Debata.  Tutu haul nadigambarkonnia nada  bersifat panghophopon songon nabinaen ni Kristus maradopkon pangisi ni portibion, tapi  pengorbanan i laing tanda na pataridahon panyarihononnia baen hasangapan di Tuhan Debata.  Digambarkon ia do dirinia songon sada peserta lomba pertandingan, namarusaho sogogona anso dapotan upa sanga piala (basa  1 Korintus  9 : 24 – 27).

Perlombaan na di maksud ni si Paulus, i ma  sada gambaran ni hamaolon sanga pergumulan naniadopan ni sasada halak laho manghajongjongkon hasintongan ni haporsayaan.  Harana haporsayaan, pada umumna nada mardalan mulus tapi justru mengalami banyak hambatan tapi laing hatiha nasongoninan do murtogu jana tarida parbatuna.  Bisa do taumpamahon tarsongon sada hayu na tubu jana magodang di ginjang ni sada dolok, muda murjotjot hayu i diombus alogo laing murpir jana murmabagas ma uratnai manjulur tu tano i mambaen mur matogu muse dihajongjonganna (basa 1 Petrus 1 : 6 – 7).  Songon i ma si Paulus patudos kon haporsayaan i angkon dipartahankon lopus tu ujungna anso layak manjagit tuku hango luan na pinasingkop ni Debata di angka namangoloi Ibana.   Madung rade tuku habonaran i, jana dioku si Paulus nada humin di sia sajo di parade Tuhan Debata, tapi laing dohot do di angka halak namangolu dibagasan hasintongan, i ma namangulahon hagiot ni Debata hatiha dingoluna (basa  2 Timotius  3 : 16)

2.  Sude hajolmaon do membutuhkan dukungan, antara lain : moral, moril dohot naasing, apalagi ma muda hatiha dihapunjungan sanga parkancitan.  Laing marhite situasi nasongonon do baen na ro pandohan;  Teman yang baik adalah apabila dia berada di saat kita mende rita atau terisolir.   Songonima nanialaman ni si Paulus hatiha tarkurung dope ia di kota Roma. Dipangido rohania do anso sigop nian ro si Timotius mandapotkon ia, harana  madung ditinggalkon si Demas, si Krekes dohot si Titus ia, harani haporluan ni portibion.  Nada satia halahi selaku naposo mangihutkon uluanna, tarlumobi ma i hara parkancitan binaen ni halak.
Suman tu bahat halak kristen na parjolo na adong di tano batak, nada mampu halahi bertahan di situasi nasangat menyosak hara mandao angka donganna, hurang pelayanan sian angka par barita na denggan jadi mulak halah muse tu ugamo na parjolo.     

III. Aplikasina.
- Tugas ni sada naposo do angkon siap berkorban membela tuanna, bahkan haru pe mamolus hamatean, songon na binaen ni si Petrus tu angka soridadu ni  Malim Godang harani holong ni rohana maradopkon Tuhan Jesus (basa Yohanes  18 : 10)

- Nada tola hita maninggalkon karejo partondion nadung dipasahat Tuhanta, angke muda setia hita lopus tu ujung ni ngolunta, laing saksihonon ni Kristus ma hita di adopan ni Debata na patut parjambar manjagit tuku hamonangan (basa  Matius  10 : 32 – 33)  

GKPA  Resort  Batam
Pdt. H. Nainggolan, STh

Tidak ada komentar:

Posting Komentar