Selasa, 04 Januari 2011

JAMITA MINGGU,30 JANUARI 2011: Yohanes 2:1-12

widgeo.net
PAJOLOHON PANGURUPION



HATORANGAN NI JAMITA

MINGGU 3 EPIPHANIAS
MINGGU, 30 JANUARI 2011

Jamita : Johannes 2:1-12
Sibasaon : Rom 12:9-16


Patujolo

Muda tasise sude buku na nisuratkon ni si Johannes on bisa idaonta  sada pangajaran na sai tongtong tarida i ma Jesus do hangoluan. Tu tujuan i do hita tongtong di togu – togu si Johannes anso manghaporsayai Jesus anakNi Debata na mangalehen hangoluan. Marhite haporsayaan i gabe dapotan hangoluan ma hita. Marojahan tuson ma angka ahli padan na imbarau manggoari buku Johannes ima buku hangoluan. Muda taparrohahon isi ni buku ni si Johannes on marasing do i sian angka buku sinoptik ( Matius, Markus dohot Lukas ).    Harana di buku ni si Johannes on patar do dipajojor songon dia Debata na tasomba ima Debata Sitolu Sada (Trinitas), na mamake struktur ni keluarga : Debata Ama, Debata Ina (namanubuhon) dohot Debata Anak. Angka na mangihutkon Jesus ima na gabe angka kahanggi ni Jesus, sa Debata jana sa ama (Joh 20:17). Jadi adong sada konsep keluarga dipake apostol Johannes patorangkon tu hita taringot tu pardomuan ni Debata Trinitas dohot angka na porsaya   Muda nagkin tagoari buku ni si Johannes ima jamita hangoluan, astuan ni hangoluan ima muda dung masuk hita tu bagian ni keluarga Trinitatis i (Ligi Johannes 17:3). Anso bisa hita masuk tu hangoluani ima muda dung porsaya hita tu Debata Ama dohot Anakna Tuhan Jesus.

Di ponggol 20:31 didok “Umbaen na nisurat pe sudena na tarsurat di bagasan buku on, anso porsaya do hamu bahaso Jesus do Kristus i, i ma Anak Ni Debata; jana anso dapotan hangoluan hamu markite-hite haporsayaan di goarNia”. On ma tujuan muda tatangkasi jamita sian si Johannes anso dapotan hangoluan ma barang ise na porsaya di Jesus, jana ingkon adong do haputusan sian sude jolma.

Hatorangan ni Jamita
Turpuk on ima turiturian taringot tu tanda hahomangan na parjolo na dipatupa ni Jesus, na maringanan di Kana. Huta Kana ima sada huta na menek di Galilea, hurang lobi sambilan kilo meter sabola Timur ni laut Nasaret. Masa di tingki i sada pesta parbagason, tontu na niontang ma keluarga ni Jesus anso dohot marjop ni roha di pesta parbagasoni. Sada tudu-tudu doi di hita bahaso masyarakat Jahudi manghajopkon parbagason marhite pesta.
Nada pola dipabotohon ise na gabe suhut bolon ni pesta i, na gabe tanda bahaso turi-turian on nada na giot pailahon suhut bolon harani na hurang sibaenonna, jana laos pabotohon doi tu hita na gabe tokoh cerita on ima Jesus sandiri.

Muda halak napatupahon pesta, ingkon marhite sada rencana doi hombar tu sadia bahat naniontang jana aha sipatupaon (sipanganon/siinumon) di si, porlu direncanahon anso unang sanga maila muda hurang silehenon tu angka na ro. Hape di pesta nanidohotan ni keluarga ni Jesus on, tubu ma sada hamaolon ima na hurang sibaenon inumon anggur (wine). Manginum anggur di halak Jahudi sada hasomalan doi jana gambaran ni jop ni roha, Muda inumon anggur ima nanibaen sian parbatu nianggur marhite permentasi, murlolot dipermentasi (dipabusuk) mur denggan do daina, jana tahan doi marratus taon.
Tolu ari dung dipio Jesus si Natanael gabe siseanNa, kehe ma halahi dohot angka sisean na asing mandohoti pesta parbagason, tapi anggo si Maria inang ni Jesus madung parjolo diparpestaan i (ayat 2). Di bagasan jop ni roha do halahi mandohoti pestai, tapi di bagasannii adong sada hamaolon ima di nahurang sibaenon, nada tuk be anggur sipatupaon tu na torop.

Bisa do tahilalahon muda tapatupa pesta, jana dung dapot hatihana hape hurang sibaenon, tontu maila ma hasuhuton bolon di si. On ma na manjujui inang ni Jesus mangido tolong anso diurupi Jesus unang sanga maila hasuhuton i. Ro si Maria paboahon  tu Jesus “Madung habis anggur ni halahi”.  Dipabotohon si Maria hamaolon i, tontu dohot arop ni roha anso adong dipatupa Jesus mangalusi na porlu tu pesta i. Alus ni Jesus di son ima  "Aha do na dihagiotimu sian Au, inang? Napodo dapot dope hatihangKu." Alus ni Jesusi, suman do na so parduli ia di hamaolon naniadopan ni parpesta i. Jana adong angka penafsir mangastui alus ni Jesus pabotohon haDebataonNia

Nada pola adong alus ni si Maria, tapi  porsaya do ia bahaso Jesus rade mangurupi suhut patukkon na porlu di pesta i. haranii do langsung dipasahat si Maria dohot sada kepastian, bagi aha disuru Jesus patupaon ni parkobas ni pestai anso dioloi halahi, tontu harani sada kepastian doi di rohana na ingkon urupan ni Jesus parpestai. Jana napatuduhon nadung diboto ni si Maria do adong sada kuaso ni Jesus patupahon tanda hahomangan.

Muda didok Jesus nada dope dapot hatihangku, tapi muda mangihutkon jamita on nada mangambati hatiha nadung ditontuhon anso mangkobasi Jesus. Sada prinsip do on laho mangurupi angka na marhahurangan ima adong fleksibilitas (kelonggoran/nada marhata ingkon). Astuanna nada diambati Jesus laho mangurupi halak na ro tuSia harani angka alasan-alasan partingkian. Jesus mangkarejohon na hombar tu hagiot ni Debata, songon nanidokNa di Joahannes 5: 30 "Nada tarpatupa Au sanga aha pe anggo sian roha-rohangKu sandiri. Sanga aha na niparentahon ni Debata tu Au, hombar tusi do Au manontuhon uhuman. Hara ni i, adil do na Huputuskon i, angke nada na mambaen roha-rohangKu sandiri Au. Hagiot Ni Damang na marsuru Au, i sajo do na Huoloi”.
Jesus segera mangurupi parpestai, nada holan harani pangidoan ni inang ni Jesus sajo tapi hagiot ni Debata do na parjolo sanoli dikarejohon Jesus. Jana ingkon idaonta do dison Jesus  marnida si Maria sarupa dohot angka dadaboru na asing angke nada bisa roha-roha ni si Maria laho mamarenta Jesus patupahon tanda halongangan (jana adong do penafsir mandok hata “inang” na dipake ni si Johannes sasintongna ima ale “dadaboru”). Muda songon i marastuan mai bahaso si Maria sarupa do dohot angka dadaboru na asing nada pola adong baenon halobianna songon nanibaen ni gereja katolik na jolo, Jesus dibaen posisi na saotik ditoru ni Jesus tapi di ginjang ni jolma, bisa parhitean ni Jolma tu Jesus di bagasan tangiang.

Tapi si Maria sandiri mamboto na ingkon urupan ni Jesus do na marhahurangan songon dia naniadopan ni  suhut bolon na marpesta i, harani ido umaben na tangkas didok Ia tu parkobas anso mangkarejon aha pe na nidok ni Jesus. Tutu do nada lolot be disuru Jesus ma parkobas ni pesta laho manggohi angka gunci dohot aek. Haubaan na tung mansai tangkas masa ima aek gabe anggur,  jana disuru dilehen tu pangurus ni pesta mandai naniparade ni Jesusi, jana nada diboto pangurus ni pesta i aha na tarjadi. gabe ro ma pangurus ni pesta i mambaen sada protes tu bayo pangoli angke didai halahi, bahaso anggur nanipatupa ni Jesus ima anggur na dumenggan do (kualitas terbaik), hape somalna kualitas terbaik ido parjolo disurduhon tu na torop. Bisa doi antusanta angke manggohi na humurang do Jesus, hape dibaen Jesus do na dumenggan manggohi hahurangani, tontu gabe nada diastui pangurus ni pesta i biasi songoni, angke nada diboto halahi Jesus do na patupahonsa.

Na umporlu di hita mambasa jamita on ima pangurupion ni Jesus nada holan sekedar mangurupi, tapi mangalusi aha do na gabe akar masalah jana hombar tu si do diurupi Jesus. Sada teori dohot praktek do on dibagasan pangurupion anso muda patupahon pangurupion nada holan anso diida halak na asing bahaso na mangurpi hita, tapi na satutuna ingkon maralus ma nian tu akar persoalan anso bisa tarurupi halak na marhahurangani.

Muda mangihutkon turi-turian on, tangkas do idaonta adong sada tujuan ni si Johannes manyurakon turpuk on ima pabotohon hasangapan ni Jesus di portibion marhite tanda hahomangan na dipatupaNia  di pesta parbagason on ima aek gabe anggur, jana marhite hasangapan ni Jesus i gabe porsaya ma angka siseanNa.

Hombar tu parpayak ni turiturian on ima di bagasan udut ni pamioon ni Jesus tu angka siseanNa, berarti adong sada maksud patoguhon (penguatan/empowering) parsaoran ni Jesus rap dohot angka siseanNia, gabe porsaya halahi diSia. Nada he marhite na porsaya do jolmai gabe mur mangoloi?.

Jadi turpuk jamita sadari on na gabe intina ima di ayat 11 ido na mandok  “i ma tanda hahomangan na parjolo dibaen Jesus; i ma na nibaenNia di Kana na di Luat Galilea. Dipatuduhon Jesus ma hasangapanNia markite-hite hahomangan i. Gabe porsaya ma tuSia angka siseanNia I”.
Hasapon ni Jesus ima marhite tanda hahomangan. Dohot hata na asing bisa dohononta hasangapon ni Jesus ima marhite pangurupionNa tu na marhahurangan.

Sipahusorhusoronta :
1.    Minggunta sadarion ima na margoar minggu epipanias, na marastuan minggu hapapatar. Jana hombar tu turpuk on dipapatar Jesus do hasangapanNia na parjolo marhite-hite pangurupion. Haroro dohot kuaso ni Jesus dibaen Ia laho mangalusi angka na marhahurangan gabe di si do Ia marsangap. Di sejarah ni gareja na parjolo, marhite pambaenan na mangurupi gabe bisa do gareja na parjoloi menguba keadaan gabe sangap gareja i di tonga-tonga ni parbegu gabe bahat halak porsaya tu Jesus. Hagogoon ni hakaristenon maringanan di pangurupion do, nada di angka penampilan na sian luar, muda murbahat mangurupi gabe murporsaya do halak na asing tu hagogoon ni Jesus di bagasan portibion.
2.    Nada diambati  Jesus laho mangurupi suhut bolon ni na marpestai hara na so dapot dope hatihaNa. Sada prinsip na denggan do on di hita na mangihutkon Jesus, secara khusus dibagasan karejo pangurupion, ingkon adong do sada prinsip songon na nibaen ni Jesus on, nada terfokus Jesus tu masalah hatiha na so dapot dope, tapi focus ni Jesus ima patupahon pangurupion harani hagiot ni Daman a sian banua ginjang. Adong sada prinsip pajolohon pangurupion sian angka aturan nadung ditontuhon. Tardok hita maon prinsip pleksibilitas hombar tu karejo pangurupion.
3.    Jesus mangurupi, nada holan sekedar tapi ingkon mangalusi lopus tu akar persoalan. Harani i anso manat hita laho ,mangurupi bahat do pangurupion ni halak nada mambaen hatotogu tapi mur tu segona angke nada akar persoalan nadialusi. Haranii laho mangurupi pe porlu parsiajaran songon dia Jesus mangurupi gabe porsaya angka siseanNa tuSia jana murmarsangap Ia. Muda mangurupi hita anso mur porsaya ma nian halak na asing jana marsangap Tuhanta.
4.    Minggu epipanias on berarti minggu anso patar do hasangapan ni Jesus di portibion marhite angka karejo pangurupion ni halak na porsaya.
5.    Songon kerangka besar penulisan ni si Johannes ima sada pangantusion bahasao halak na porsaya mananda Debata songon struktur ni sada keluarga, nadung gabe kahanggi ni Jesus do hita di bagasan hangoluan na so manta mamungkua sian nadung porsaya hita. Muda sada keluarga do hita di bagasan Jesus ingkon prinsip rade laho mangurupi ido na umporlu di hita, anso marsangap Jesus uluan ni Parlagutani.


Pdt.Josep P.Matondang,

Tidak ada komentar:

Posting Komentar