Selasa, 04 Januari 2011

JAMITA MINGGU, 9 JANUARI 2011: MatIus 4 : 12 – 17

widgeo.net
Dipapatar Jesus diriNia tu halak
na dibagasan  hagolapan dope



HATORANGAN NI JAMITA

MINGGU EPIPHANIAS

MINGGU, 9 JANUARI 2011

Jamita : Mateus 4 : 12 – 17
Sibasaon : Jesaya 42 : 1 – 7

I. Patujolona :

Nigoaran do si Johanes sada halak sitotas dalan tu haroro ni Kristus. Rap sadongan do halahi diparkarejoan laho pararatkon harajaan ni Debata, tapi merasa do ia nagumodang do  Jesus  pado ia sandiri (basa Matius 3 : 14).  Nada jungada nian si Johanes manyimbil sian karejo nadung dipasahat di sia, tapi harani jamita nia na karas, muda istilah di hita sannari on didok si tulduk mata ni horbo ninna, jadi tarsinggung ma bahat halak jana termasukma si Herodes Antipas  harana di tudu ia  raja i markarosuan dohot si Herodias dadaboru ni si Pilipus anggi nia.  Dipahurungkon raja Herodes  Antipas ma si  Johanes jana didok angkon bunuon, (basa Markus 6 : 14 -  29).

II.  Hatoranganna :
1.      Lalu ma barita tu Jesus nadung tarkurung si Johanes Pandidi, i ma panurirang namarka rejo sungguh luar biasa, nada jungada ia pagodang dirinia  harupe didok halak ia panurirang Elia na di Parjanjian na Honok, tapi laing dipatutoru ia do dirinia mandok : Sora napio-pio di halongonan i do au (basa  Jeaya 40 : 3). Nada harana mabiar Jesus umbahen na kehe Ia maninggalkon Nazaret jana mardalan tu Galilea.  Muda pe angkon tangkupon Jesus jana angkon bunuon songon nadung dilumbahon ni  si Jesaya, tapi nada podo dapot tingkina (basa  Yesya  53 :  1 – 12). Angkon palaluon ni Jesus do barita haluaan i tu angka jolma, jana angkon  delegasihononNia do barita i tu angka anak siseanNia (basa Matius  28  :  19 – 20).  Pardalanan ni Jesus manuju  Kapernaum  marpardomuan ma i pataridahon sada kerejo na godang marhite tanda hahomangan.  Di kota on ma Ia masuk tu Sinagoge, dibari tahon Ia ma taringot tu kewajiban mambayar pajak, jana dipamalum Ia ma sada halak naonyangon. Kapernaumonma  sada kota perbatasan napinarenta ni si Pilipus dohot hahana si Herodes Antipas (basa Matius  9 : 9)  tapi di ujungna  ditilakoi Jesus do Kapernaum i jana didok  : Marjaya ma ho Kapernaum, angke tu naroko noma ho ambungkonon, harana nada parguna di ho tanda hahomangan (basa  Matius 11 : 23).    

2. Haroro ni Jesus tu daerah Galilea mambaen bahat halak taruli, nada humin Kapernaum, tapi laing  dohotma tano Zebulon dohot Naftali.  Sian najolo laing namarkancit ma pangisi ni luaton, harana tarimbas di hajahaton ni halak Asyur.  Laing na di hagolapan ma halahi maringanan salolot  inda ro dope Kristus, tapi dalam kesempatan pardalanan ni Tuhan Jesus dapotan sondang hatoranganma pangisi ni luat i jana marnida pasu-pasu na ro sian Tuhan.


Aha nadung dibagabagahon sian na robi jadi patar dibaen Jesus marhite haroroNia tu Galilea.  Madung  ungkap angka hagolapan na gabe pangambati ditongatonga ni Zebulon dohot Naftali dibaen sinondang ni Jesus .  Ia do sinondang ni portibion na di pagodang di tano Galilea jana na gabe inganan HapapatarNia marhite karejoNia selaku Mesias.  Suman ma pangisi ni huta i songon sada na mapitung na dipamalum,  jadi marnida hatorangan ma halahi na ro sian banua ginjang. Hatorangan i jadi hapapatar ma  di angka bangso di luar ni Israel, jana hasangapan di halak Jahudi. Marhite haroro ni Kristus i patarma hagolapan ni angka bangso parbegu,  tapi di halak Israel jadi hamuliaan, dohot hagogoan. Didok Apostol Paulus, aha na so jungada diligi mata jana naso jungada binege ni pinggol, dipasingkop Debata markite-hite  hagogoonNia anso dapot job ni roha  angka jolma na porsaya (basa 1 Kor.2: 9). Madung dipasingkop Debata sandok haluaan i di adopan ni angka bangso, anso sude halak mangaligi jana parjambar dibagasan..

3. Nada jungada tarlambat sangkap ni Debata, harupe angkon jolo marumur Tuhan Jesus 30 taon  baru pe anso marbarita Ia. Harana muda mangihutkon aturan ni halak Jahudi, nada podo layak sada halak goaran guru muda nada masuk dope tu tingkat umur dewasa.  Jadi memang on ma na tepat di Jesus laho marbarita jana didok ma  : Pauba hamuma rohamunu.
    Nada terbatas sanga mardia imbar tujuan ni pandohan on, namagodang sanga namenek, na kayo sanga na pogos,  sude angkon paubahon roha  marhite hata dohot pambahenan, luar dohot dalam (Metanoia – Ephystrope).  Muda si Johanes Pindidi mandok : Pauba hamu ma  rohamunu dibaen pungkaon ni Debatama  pangarajaionNia.  Artina disi  angkon patari dahononma  :  Muda  roha natangkang hinan angkon ungkap ma marhaburjuon, pangalaho na jogal angkon rade laho mananginagi.  Jadi nada humin tu halak  parbegu soso-soso anso marhaubaan  tapi dohot do tu halak nadung paimaimahon haluaan i. Tarbarita ma goar ni Jesus di sandok luat Galilea jana sude huta manaringoti hagogoan dohot kuaso nadung  pinapatar ni Kristus.

III.  Aplikasina :
- Madung tarayahon hataridaan ni holong ni Debata di portibion ima marhite-hite pesta Natal.  Holong ni Tuhanta i madung magodang jana patar markite-hite parkarejoan ni Kristus.  Harani angkon solpuhononta ma roha, pikiran, pangalaho hagolapan, jana  angkon rade hita manjagit sinondang  na maroban haluaan i.

- Markite haroro ni Kristus madung dipukka jana dipajongjong harajaan ni Debata  i ma na gabe ojahanta mandalani ngolu ni haporsayaanta.  Didok si Paulus : Ia harajaan ni Debata i nada sipanganon sanga na  siinumon, tapi hatigoran, hadameon dohot job ni roha marhite  Tondi Parbadia do (basa  Roma 14;17)  Jana anso dapotan hita di si, angkon rade ma hita dohot paubahon rohanta.                                             
                                                                                                  
GKPA  Resort Batam
Pdt.H.Nainggolan,STh

Tidak ada komentar:

Posting Komentar