JAMITA MINGGU, 23 JANUARI 2011: MatIus 2:1-12

“TASOMBA MA TUHAN I DIBAGASAN JOP NI ROHA” HATORANGAN NI JAMITA MINGGU 2 EPIPHANIAS MINGGU, 23 JANUARI 2011 Jamita : Mateus 2:1-12 Sibasaon : Efesus 3:2-6 PATUJOLO : Syalom ! Horas ma di hamu sude. Baru dope tarayahon Natal dohot Taon Baru. Suasana jop ni roha laho mamestahon Hasosorang ni Jesus, huhut maroban hita tu taon 2011 mambaen marbuldak roha laho pasahatkon roha tarimakasi tu Debata. Sora ni suru-suruan na mandok :  "Hasangapan ma di Debata na di ginjang, dame ma di tano on di angka jolma halomoan i!" laing marsaringar dope lalu tu tingkion. Somba-somba ni parmahan tu Jesus na sorang di bara ni pinahan i, laing torang dope diparningotanta. Jala dung dilaon-laon ni ari, ro ma piga-piga halak angka parilmu bintang sian Habincaran laho manyomba Jesus,  Disapai halahi ma, "Di dia do Dakdanak na sorang i, i ma na gabe Raja ni halak Jahudi i? Na hami ida do bintangNa bincar di sabola Habincaran, jadi na giot marsomba tuSia do umbaen na ro hami." Giot marsomba tu Jesus do haroro ni halak Habincaran on (Halak Majus-ahli filsafat, angka malim, ahli bintang, terpelajar malo taringot tu astromi, agama dohot meramu angka ubat, William Barclay mandok : “Para Majus adalah orang-orang yang mengetahui filsafat, ilmu kedokteran dan ilmu alam. Mereka juga mampu menafsirkan mimpi serta meramalkan hal-hal yang akan terjadi….orang Majus adalah orang yang baik dan suci, yang selalu berusaha mencari kebenaran”. Antong halak na terhormat/terpelajar, halak na kayo, halak na malo jana angka anak ni raja do halahon). Marhite i, pangalaho na maroban tu hahomangan do na ni baen ni halak parhapistaran on, angke bope halak na kayo, na sangap, na malo halahi, marsitutu do halahi ro sian Habincaran, huta na dao, pola ribuan kilometer, mar-ari-ari mardalan di parhorsihan, khusus laho manyomba Jesus. Marsomba na marlapatan do i : Mangundukkon pamatang, menghormat sanga mamayakkon pamatang tu lante. Bisa juo diartihon mangumma tangan, marsinggang huhut mangalehen haul. Tapi muda ni dok marsomba nada gabe murdao jarak ni si panyomba dohot na ni somba, sabalikna do, mur ni somba Debata, mur donok hita tu Debata. Di Poda 3 : 20a mandok : ”Muda mardongan dohot halak na marroha, gabe marbisuk iba”..., jadi muda mardongan, bergaul erat dohot Tuhan, mur jeges do parrohaonta jana mur dapotan pasu-pasu do hita. Sada Ama ni Gareja ima St. Gregorius Nazianze (wafat 389) menyampaikan khotbahnya, “Marilah kita tinggal dalam sembah sujud; dan kepada Dia, yang guna menyelamatkan kita, merendahkan Diri hingga ke tingkat kemiskinan yang begitu rupa dengan menerima tubuh kita, marilah kita mempersembahkan tidak hanya kemenyan, emas dan mur…, melainkan juga persembahan-persembahan rohani, yang lebih luhur daripada yang dapat dilihat dengan mata” (Oratio, 19). Antong di Ephipahia 2 on, Mare ma marjop ni roha laho Manyomba Jesus na gabe Raja dohot Sipalua ni hajolmaon. Bia do hita manyomba Jesus Tuhan i dibagasan Jop ni roha : 1. Angkon adong do pengorbanan, rade mambayar Harga, 2. Angkon adong do pangokuon huhut patutoru diri, 3. Angkon rade do mangalehen na dumenggan. Angkon adong do Pengorbanan, rade mambayar harga. Di Mateus 2 : 1 .... Jadi ro ma di hatiha i piga-piga halak angka parilmu bintang sian Habincaran tu Jerusalem. Hamu na ni haholongan ni Jesus, Giot manyomba Raja na baru sorang i, adong do pengorbanan na godang. Halak Parhapistaran i, nada pengangguran, na so adong karejona. Ma di patorang nangkin, bahaso halak na kayo, na beteng do halahi, hape angkon tinggalkonon ni halahi ma keluarga ni halahi, dungi angka na tabo, na sonang dna, jana dalanan ni halahi ma ribuan kilometer, tano parhorsihan na gok parmaraan, isarana panyamun, angka binatang, cuaca na milas jana na ngali dohot angka na asing. Di Pangarataion 8:15 didok : ”Dipimpin TUHAN do hamu mamolus parhorsihan na bolak jana na jorbut i, disi bahat ulok na marbisa dohot hala. Di tano na mahiang na so maraek i Biasi dibaen angka Parhapistaran i songon i ? Na he raja do halahi ? On ma na ni dok : “PENGORBANAN”, adong LUNGUN NI ROHA (kerinduan, rasa lapar), laho marsuo dohot Jesus, Raja, Sipalua ni hajolmaon jana Tuhan ni sude, gabe ra halahi mandalani na maol situtu. Diboto halahi do, on ma masona laho mangaligi Jesus, anso marsuo jana tarsomba halahi Ia. Diboto halahi do bahaso adong do masona inda dapot halahi be Jesus i di portibion/di Jerusalem/Betlehem. Di Amos 8:11-12 “Didok Tuhan DEBATA i ma, "Dapot do i hatihana paroonKu haleon potir tu luat on. Malean ma jolma, tapi nada malean di sipanganon. Manguas ma jolma tapi nada manguas di siinumon. Malean dohot manguas di tonangKu do halahi. Mado-ado ma halak sian Utara tu Selatan dohot sian Habincaran tu Hasundutan anso dapotsa nian tonangKu tapi nada dapot halahi be i. Di Jesaya 55:6 didok : “Jalahi ma TUHAN dompak tarbaen dope dapot, pio hamu ma Ia salolot laing donok dope Ia”. Paingotkon hita marmasa do hita laho mangalului Tuhan, adong do hape hatihana, malean, nguasan jana loja hita mangalului hata ni Tuhan inda dapot hita be. Tingkion do hape, tingki parasian ni Debata, anso tapabangkit roha na manguas, malean dohot roha na burju mangalului hasintongan i, anso tasomba Yesus i. Marhite halak Parhabincaran on, diajari do ma hita tutu, muda giot tasomba Jesus i, angkon adong do pengorbanan, angkon rade do hita mambayar harga. Angkon adong do hanguason ni tondi, hanguason ni roha. Ma sadia godang, sadia bahat ta-haulkon-/kita korbankan laho manjalahi Jesus i??? Angke muda par Hapistaran i ditogu-togu bintang laho pasuo dohot Jesus, tingkion pe ditogu-togu hataNa do hita anso pasuo dohot Jesus Sipalua i. Sanga songon halak parise, siboto surat, angka malim i do hita, ma tangkas taboto  ise Jesus, tapi nada ra hita mangalehen tingkinta, gogonta laho manyomba Jesus Raja ni Parlagutan i. Sanga songon si Herodes do hita, dung taboto tangkas ise do Jesus i, gabe talului cara laho padaohon diri sian Ibana, bahkan mangalalui cara laho mangela-ela angka dongan ulang dohot marsuo dohot marsomba tu Jesus i.             Adong adong do Pangakuon huhut patutoru diri. Mateus 2 : 2 Disapai halahi ma, "Di dia do Dakdanak na sorang i, i ma na gabe Raja ni halak Jahudi i? Na hami ida do bintangNa bincar di sabola Habincaran, jadi na giot marsomba tuSia do umbaen na ro hami." Nada dibaritahon bibelta bahaso tingki pasuo halahi dohot raja Herodes, manigor marsomba halahi tu Raja i. Tapi disi halahi pasuo dohot Jesus didok ......marsomba ma halahi...bahasa Indonesia :.. ”lalu sujud menyembah Dia”.. (ayat 11). Raja, anak ni Raja, na mora, na sangap do halahi. Tapi disi pasuo dohot Jesus (tingki i, dakdanak dope Jesus, nada marhamuliaon, nada kayo, nada sangap), tapi manigor marsomba unduk do halahi diadopanNa. Marhite i adong pangakuon ni halahi sian toruk ni roha bahaso gumodang, sumangap, unpistar jana lumobi sian halahi do Jesus i. Di Jesaya 9 : 6-7 didok : ”Madung sorang di hita sada dakdanak; dibasa-basahon di hita sada anak. Ia ma na gabe pamimpinta. Digoari do Ia: "Panuturi Na Marroha", "Debata Parkuaso", "Ama Salolot ni lolotna", "Raja Ni Hadameon". Mur tu godangna do kuasonia, jana tongtong dame harajaannia. Ia ma raja na songon panggonti ni si Daud, marojakan tu hatigoran dohot hasintongan do harajaannia sian mulai saonnari lalu tu salolotna. Angkon tulus sudena i baenon ni TUHAN Na Markuaso i. Antong sian toruk ni roha ma hita mangoku bahaso na tutu do Raja Jesus i, sumangangap, markuaso, anso marunduk ni roha hita marsomba unduk di joloNia ganop ari. Burju mangalehen na dumenggan. Di Mateus 2 : 11 : “Masuk ma halahi tu bara i, diida halahi ma Dakdanak i dohot si Maria inangNia i. Dung i dibuat halahi ma panyimpanan ni silua ni halahi, marsomba ma halahi pasahatkon silua, angka sere, hamonyan *HAMONYAN: Arga situtu do on, na nibaen sian sajenis hayu.* dohot miak na huskus. Manyomba Tuhan, nada holan mangundukkon pamatang, mangalompit tangan dohot marsora na gogo : Haleluya…, tapi dohot do mangalehen na dumenggan sian ias dohot burju ni roha. Par-Habincaran, di na ro halahi manyomba Jesus, manigor dibuat halahi do silua ni halahi i ma : Mas, Hamonyan dohot miak na huskus. Wlliam Barclay dohot bahat penafsir mandok : Mas, tanda somba-somba tu sahalak Raja, Hamonyan somba-somba tu sahalak Malim, jana Miak na huskus somba-somba tu halak na mate (adong mandok tu Panurirang). Tapi na jelas, Par-Habincaran na pistar, na sangap jana halak na so halak Jahudi/Kristen dope tingki i madung pasahat haul, somba-somba tu Jesus dibagasan jop ni roha dohot naso tarpaksa. Ma diboto halahi aha na nidok ni Tuhan taringot tu haul di II Kor. 9:7 ”Angkon marguru tu na nionjar ni rohana be ma mangalehen. Ulang pola hara ni na alang-alangan sanga hara ni na tarpaksa, angke dihaholongi Debata do sanga ise na mangalehen sian jop ni roha” Songon i di Poda 3:9-10 “Pasangap ma TUHAN marhite na manghaulkon na dumenggan sian suha ni tanomu tuSia, jadi gabe gok eme ma angka talobatmu; jana aek ni anggurmu pe marlobi-lobi lopus nada tuk be inganan panyimpananna. Dohot di Amsal  21:27 Nada jop roha ni TUHAN tu haul ni jolma na so hasaya, lumobi muda na dihaulkon mardongan maksud na targora. Pasahat haul sian jop ni roha, nada angkon na mararga, tapi sian bulus ni roha – Hati yang tulus, laho manyomba Jesus naung bahat mangalehen na denggan di hita. Halak na so mangoku bahaso Debata burju di ngoluna, maol do laho mangalehen haul, sabalikna, halak na manghilala denggan basa, asi ni roha ni Debata na marbuldak-buldak ganup ari, minggu, bulan, taon, pasti sian ias ni roha, ni onjar jop ni roha, bulus jana burju do mangalehen haul na dumenggan tu Harajaan ni Debata. Penutup : Di Minggu hapapatar ni kuaso ni Debata tu hita jolma, naung mangaramoti hita ganup taon, lalu tu taon 2011 on, taon asi ni roha angke madung 150 taon hape hakaristenon di luat Angkola, mangonjar hita do i laho marjop ni roha laho maribadah, martangiang, marsaor dohot Debata. Bope adong arga, pengorbanan ni tingki, arto, ngolunta, hobby dohot angka na asing, tapi mur padonok diri, jala mur okuonta do bahaso Debata do mangalehen aha na porlu di hita. Jana nada alangan be hita maroban haul na dumenggan sian suha ni karejonta tu harajaan ni Debata. Amen. Pdt. AHJ. Sibarani STh. Ka.Biro II Kantor Pusat GKPA.