Sabtu, 22 Oktober 2011

Hatorangan ni Sibasaon Minggu, 18 Desember 2011: 2 Korintus 1 : 18-22

widgeo.net
Pamioon tu Janji; nada “Olo” sanga “Inda”


Minggu Advent IV
Tanggal, 18 Desember 201
Hatorangan ni Sibasaon
Nats : 2 Korintus 1 : 18-22

Patujolo
Bahat do hamaolon di bagasan pardalanan ni ngolu on, sapanjang sejarah ngolu di hajolmaon. Tuhan do nampuna sejarah i, jana sangkap ni jolma adong di bagasan. Songon on ma na tarjadi tu Rasul Paulus rap dohot angka dongan na, di bagasan marbarita na uli di luat Asia na menek. Parhancitan, hamaolon, ancaman na ro sian jolma dohot alam, parungkilon ni ngolu, boban na dokdok jana na borat situtu, bahkan pintu ni hamatean, manjonohi ngolu na sebagai naposo ni Tuhan i. Tapi nada heput ia maninggalkon parlagutan Korintus dohot na adong di Akhaya, na ni pajongjongnia i rap dohot angka dongan-dongan, si Timoteus, si Silvanus, dohot angka na asing i.
Diusahohon halahi i do anso pos situtu roha ni parlagutan i, bahasa hagiot ni Tuhan i nada na giot mambaen halak na porsaya i gabe mandele, tapi sintong jana bonar do janjiNia giot mambaen halahi gabe nampunaNia. Jana hara ni TondiNia na adong di ngolu ni naporsaya i, togu ma halahi marsada di bagasan Kristus, na mambaen adong jaminan tu sude na ni pasingkop ni Tuhan, manuju hajojop ni roha. 

Hatorangan
Ay. 18-20; Hum olo do janji na ro sian
                Kristus.
Di Parjanjian na Honok dipatorang do, Debata na nioku halak Kristen di bagasan pangajaran na sian Bibel, i ma Debata na universal. Sude sejarah na adong di Bibel, i ma sejarah ni Debata. Debata na ni tanda ni angka bangso na adong di tano on, i ma Debata na manghaholongi sejarah (=Deus Revelatus) na di hadirkon markitehon panompaon i. Debata na manguhumi hara ni hadosaon dohot hasesego ni tano on na di bagasan panompaon i (=Deus Absconditus), i ma bukti sian janji ni Tuhan markitehon angka na ni todoNia angka rasul/ parjamita na denggan i, bisa laho mamimpin pardalanan sejarah i manuju tu hadengganan.
Rasul Paulus patotahon mambaen anso pos roha ni Parlagutan Korintus, sude Jamita na denggan na nibaritahonnia, si Timoteus songon i si Silvanus, namarisi janji dohot hagiot ni Tuhan. Hara ni Kristus nadung mampartondi i (=mengurapi) halak gabe porsaya, hajojop ni roha i pe gabe jaminan mambaen janji ni Tuhan di ngolu ni halahi hum “olo” do. Hara ni i ma disumpahon ia, bahaso janji ni Tuhan na dung songon i tu bangsoNia, ima na mambaen gabe Ia ma Parnampuna, hum “olo” sajo do adong di si. Paulus barani manyumpahon, Kristus na nijamitahon ni halahi, angkon mambaen pos do roha ni halahi di janji ni si Paulus na giot ro mandapotkon halahi muse. Janjinia i nada “olo” sanga “inda”, dungi rap “olo” sanga ”inda”; tapi hum olo sajo do di si. Laing songon na ni dok ni Kristus na nijamitahon i muse do sangkapnia. Amen, ima janji haporsayaan na mambaen markiehon Kristus, gabe dipasangap ma Debata.   

Ay. 21-22; Togu marsada dohot Kristus
                Debata na universal i ma Debata na di bagasan na marsaringar habonaranNia, na bisa tarida nyato di pardalanan sejarah i, na gabe janji ni Tuhan i tu angka naposoNa. Markitehon turpuk bagian on, bisa do dihaporsayai, bukti ni Debata napatuluskon janji i di tongatonga ni bangso na nibaenNia gabe Ia parnampuna. Jadi dohot tangkas ma botoon, Debata sandiri do na mambaen parjamita na denggan i, dohot ruas ni Parlagutan i gabe togu marsada dohot Kristus; laing Ia muse do na mamiahi hasadaonta mambaen Tondi Parbadia marmian di bagsan haporsayaan. Anso gabe singkop ma pang”olo”hon di janji ni Kristus di ngolu ni halak na porsaya i, na gabe jaminan adong hajojop ni rohan pasangapkon Debata.
Hahonaanna/ applikasi

Togu urat ni bulu
Toguan urat ni padang
Togu ni dok ni uhum
Toguan na nidok ni padan (=janji)

Pandohan on i ma sada pamioon di tongatonga ni bangso ni na marpos ni roha tu na markuaso, adong Debata panompa sian na sa na adong. Suman do tu pamodaion na ni tuju tu halak na porsaya pandohan on. Hata ni Tuhan paboahon janjiNa tu bangsoNa madung ojak do tu halahi muloi sian si Jakob, pat. Jes. 43: 1. Bagi na aha pe na tarjadi tu bangsoNa i, tongtong do holong roha ni Tuhan. Hara ni aha ? Dibaen adong do pamioonNia anso masuk tu janji i.
                Pamioon ni Debata (=voca tio dei), markitehon goar i ma gabe sada tanda bahaso Ia do nampuna ngolunta. PamioonNia madung gabe janji na so muba jana nada mose sapanjangna. Gabe bukti hasatiaonNia ma on, anso di bagasan sada pangokuan hita jagit adong hapastian hum di Tuhan ma hasangapan i.

Pamioon na dimaksud tarjadi di bagasan dua sifat na digoaran dohot :

1.Vocatio Externa namarastuan; Debata mamiohon jolma na ni tompai gabe dakdanakNa, anso haruar sian bentukbentuk sihabiaran, parmusuon, hakejamon, ganaganaan dohot angka na asing i.
2.Vocatio Interna na marastuan; pamioon ni Debata mambuk ihon jolma i gabe dakdanakNa, nada harani proses panandaon sanga pangakuon, tapi Debata sandiri mamake maksudNia adong di bagasan ngolu ni jolma na ditompa i, basa 2 Kor. 5: 17.
Bahat do pamioon ni Debata laho pabotohon janjiNa. Parjanjian ni Tuhan dipamioonNa tu si Noak contoh na, i ma markitehon halibutongan, tu si Abraham markite sunat, pamioon ni Tuhan tu bangso Israel di tor Sinai tanda na, i ma mangarayaahon Sabat ari na diparbadiai anso pandonganion ni Tuhan mamboan haruruar sian tano Mesir mur tangkas di kehadiran ni tiang ombun dohot tiang api na tongtong raphon halahi. Pamioon ni Tuhan di turpukta on masuk tu bagasan janjiNia ”togu marsada dohot Kristus nadung mamiahi” anso mian tondiNia, gabe dibaen ma hita gabe nampunaNia disude situasi dohot keadaan, di sude tingki dohot inganan, pat. Rom. 14: 7-8; mambaen pujion ma Ia ro di salolotnilolot na. Janji i hum ”olo” do adong di si, nada adong hata ”nada”. Janji ni Tuhan gabe ”amen”, songon na pajongjong parsaripeon, na niolohon ni halak Kristen Angkola ”olo na marpadan ma au”, anso jeges hajongjongan ni hasadaon, na nipadomu ni Debata nada jadi sirangon ni jolma.
                Pamioon i sude martujuan tu hapastian di sada pangokuon, hot do anggo janji ni Tuhan tu angka na porsaya i, dibaen Ia mamiohon sude bangso na ro sian habincaran sanga pe sian hasundutan anso gabe dakdanakNia, laho mamuji dohot pasangap Ia na gabe Tuhan jana Sipalua di ngolu na.
Pangarimpunan

Pamioon i ma bukti sanga sada tanda na sian Tuhan anso adong hapastian ni janjiNia tu na sa bangso, anso digoari ma halak na porsaya i gabe dakdanak ni Debata. Ia ma gabe parnampuna.
                Pamioon, i ma anso dapotan haluaan dohot hapastian. Di na manomu-nomu haroroNia,  anso hasonangan na sian Debata mambaen mur jeges ngolu ni halak na porsaya i, na nihaholonganNia, i ma hita angka na dung manjagit haluaan na sian Tuhan Jesus Siapalua i.
                Hara ni pamioon ni Tuhan i, gabe digohi Ia ma janjNia tu angka na nitodoNia, anso dibaritahon tu sude bangso. Dibaritahon ma janjiNia i, nada janji tinggal janji. Sangkap ni jolma gabe martujuan tu na tunduk tu hagiot ni Kristus. Angke Ia ma na gabe alus dohot tujuan ni ngolu haporsayaan, anso gabe tota ma na nidokNia dohot na nidok ni angka todoanNia, janji ni Tuhan angkon tulus do, jana hum olo sajo do adong di si.
                Nada tarlambat hagogok ni janjiNia tu angka na porsaya i, anso maroban halahi tu haluaan. Jana pasti do i. Songon na ni dok ni ende i, “janjiMu s’perti fajar pagi hari-yang tiada pernah terlambat bersinar”.
                Mare ma hita pargunahon pamioonNia i, anso mur tapulukhon ma patuduhon pangakuon na satutuna i, Tuhan do nampuna goarta, dibaen pamioonNai tu hita gabe dakdanakNia. Madung dijanjihon Ia anso gabe songon i.
Pdt. B.M. Siregar
GKPA Depok

Tidak ada komentar:

Posting Komentar