Jamita Minggu, 04 Desember 2011: Jesaya 63 : 15-19; 64 : 1-3

Tuhan ma baen gabe Ama

Minggu Tanggal, 04 Desember 2011

Jamita : Jesaya 63 : 15-19; 64 : 1-3

Sibasaon : Lukas 21 : 28-33

Patujolo

Adong do dua bagian na niondolkon ni buku panurirang Jesaya na porlu botoon ni halak Kristen sebagai halak na porsaya sian jamita on: 

a.Hasurirangon ni si Jesaya taringot tu uhuman na giot masa, na dihonahon tu bangso Israel, songon i muse do maradophon dohot angka bangso na asing.

b.Pangapulion sian holong ni Debata taringot silehen-lihen ni Tuhan di bagasan Jesus Kristus, i ma harani hasosorangNia, sitaononNia/ parhancitanNia, dohot hamonangannNia na nisurirangkon i, gabe patar ma Jesus gabe Sipalua (=Mesias). Jana tangkas sajo do i tarida hita, dohot dipangkilalahon di bagasan haporsayaanta, mur imbaru sian ari tu tingki na mardalan.

Barita taringot tu haluaan dohot keadaan na giot tarjadi (=masa depan) na di bagasan pamarentaon ni Raja na nigoaran Sipalua, manongtong jana hot do i ro di salolot ni lolot na. I ma umbaen Mesias i digoari gabe Ama, jana na so marnaloja mamarateatehon bangsoNa. Nada so boti Ia manatap sian habangsaNa, angke taluhononNia do angka musu-musu ni Israel, anso marmulia Ia di tonga-tonga ni portibi on.

Hatorangan

Ay.15-16, Nada mangkohom anggo Tuhan di pangalaho na patoguhon haporsayaan ni bangsoNa. Madung magopo sude roha ni bangso i, hara na adong tekanan, adong hamaolon, adong roha na gabe mandele, mandate, pangelaela ni angka musu, maheu jana inda be mararop roha, madung gale jana daedae. Sandok madung dao halahi sian Tuhan. Hatiha na songon on ma, dipake halahi hatiha dohot tingki, anso mangarimangi pambaenan ni Tuhan na robi, di bagasan ompu ni halahi si Abraham- si Jakob, na so ditanda halahi.

Impola ni sude pangidoan di bagasan Buku Na Badia i, memang angkon do “anso nian Tuhan marpamuati rohaNa, mamareso dohot mamarateatehon, bahkan mulak rohaNa tu bangsoNa”. Pangidoan ni bangsoNa i, ditujuhon do tuSia na maringanan di banua ginjang, napatutoruk roha, anso ibo rohaNia, Ama na maribo roha. Jana bisa do dohonon, martujuan mangangkat bangsoNa sian sude angka na masa na ni dok di ginjang. Porlu memang pangokuon bahaso Tuhan ma na gabe ama, napaluahon anakNa sian ATM (=Ancaman-Tantangan, Masalah/ Maut). Gabe dijalo ma na maruba di hubungan na denggan mangulahi, songon na dung ni patuduhon ni ompu ni halahi. Gabe pola do Tuhan mandok “Tapi saonnari, songon on do hata ni TUHAN, na manompa ho ale Jakob, na mambaen ho ale Israel: "Ulang mabiar, harana madung Hutobus ho, madung Hupio ho marhite goarmu, Au do nampuna ho”, basa Jes. 43: 1..    

Sikap ni Tuhan on ma, na dung nyato sian na robi; di dia do pangiburuMu dohot hagogoonMu? Di dia do holong dohot ibo ni rohaMu? Di dia do diparrohahon Ho hami? Ulang ma nian manghohom Ho tu hami. Hagiot napaluahon i, anso ulang be gabe tartahan. Angke Tuhan madung gabe Ama tu na nidokna Israel gabe dakdanakNia, basa Ay. 8 jana pat. Jer. 31: 20. Didok pe Israel gabe “anak dohot pahompu ni si Abraham”, pomparan ni sian Abraham, pat. 51: 1-2; Joh. 8: 39, songon i didok pompar ni si Jakob, pat. Pang. 1: 3; 4: 44, tapi anggo ompung ni halahi “ompu raja i jolo (=leluhur)”, madung mate jana nada adong be gogona, Parj. 9: 10. Saonnari hum Tuhan noma Ama ni Israel, i ma Tuhan i sandiri, Pang. 4: 22-23; Hos. 11: 4, na gabe kapala keluarga na manobus angka anak angkatNia, pat. Jes. 41: 14.

Ay. 17-19, Mamarenta do Tuhan tu bangso na, jana Ia ma na gabe parnampuna tu bangso Israel. Tapi biasi Ama i nada mangambati anakna sian angka hajahatan ? On manggombarkon ngolu dihajolmaon, nada bisa mangambati rencana ni Tuhan, harana pasti do pangalaho on manyirang ama tu dakdanak na. Tapi muda di Tuhan bisa do mangatasi parkaro on, nada pola gabe tarpisah ama dohot anak.

Di bagasan haporsayaan, Israel marbalik do mangulahi sian angka hajahatan na, mulak tu Debata. Nang pe ia marsala, Tuhan tongtong do gabe nampuna ia, nang pe mambarontak, rade do ia muse mangoloi Tuhan. Harani i ma puluk roha na mangulahi di bagasan pangidoan, anso Tuhan nada padiarkon musuna dohot alona  mandegedege inganan na pinrbadiaan ni Tuhan. Hasosombu (=pemulihan) pamarentoan ni Tuhan, mangulahi di pajeges dohot marsangap ma Tuhan, pat. 64: 5.   

64: 1-3, Kuaso ni Tuhan na so bisa tunduk tu alam, angke na nitompa ni Tuhan do i. Bolas dohonan bagian on digoari do masmur na mangarataratai hatiha ni Tuhan mambaen tarjadi hamaolon godang di tonga-tonga ni ngolu bangso Israel, hara ni pangalaho ni halahi sandiri di bagasan ngolu na sai mangalo, mambarontak tu Debata. Gabe Tuhan sandiri do na mambaen ro uhuman dohot hasesego ni Jerusalem na niadopan ni bangsoNa i. Tapi parmasmur di son sangat berkesan do manyuarahon dohot mambaranihon, jana porsaya bahaso holong ni Tuhan na sangat nyato, i do saringar na tarjadi dibagasan panogunoguonNa tu bangsoNa i. On mambuktihon, mangulahi do Tuhan di hatiha na mangalehen haluaan tu halahi, pat. Msm. 44: 2-9; 74: 2; 80; 2^b, basa muse ma Jes. 63: 1-7.

Mararop ni roha situtu do bangso Israel anso ro Tuhan sagiro. Biasi ? Tujuan na anso tarida ma kuasoNia na sangat luar biasa laho mamorangi musu-musuNa, jana didida bangso i sandiri. Anso manyikur jana heput. Salang angka dolok dohot portibi on, dioku halahi do di bagasan haporsayaan Israel bisa manghutur dolok dohot heput.  Astuan na, karejo ni Tuhan na sangat luar biasa, mangalobi i sian angka kuaso na adong.

Jadi masmur on patorangkon alus ni Israel maradophon Hata ni Debata, na nibaritahon panurirang taringot tu barita uhuman, uhuman na angkon jagiton ni halahi. Jana hombar tu si, bahaso Tuhan tongtong do holong rohaNa mida Isarel, songon holong ni ama tu dakdanakna. On karejo ni Tuhan na luar biasa na so diambang ni roha. 

Applikasi-Hahonaanna

Ganop taon do hita mangarayahon minggu advent. Tapi taboto dehe astuan na ? O, botul ta astui ! Advent, i ma “hatiha pangaradeon di haroro ni Kristus” (Advent = kedatangan), na gabe Sipalua, Raja Dame, Mesias dohot Almasih alaihi salam. Dung opat minggu advent, lalu ma hita tu natal! Natal marastuan ”hasosorang”, sanga na jotjot di bagasan ende pamujion, tapuji marhite ende “hatotopak”. Hara ni i, muda saonnari ma natal, tung mansai tangkas do bahenon, songon dia hita mangarayahon i. Gaba-gaba, lampion, pohon natal, lilin, ende; numma jumpang muse ari pesta i; sonang i borngin i, Ari Na Denggan, Di Bethlehem do Sorang; dohot angka na asing i do pe. Jadi muda di minggu-minggu Advent-beha do hita mangarayahon i ? Hatiha dohot roha na songon dia do, na adong, anso botul-botul advent gabe marmakna di ngolunta ! Rade de he hita  ? Denggan!

Jolma bisa mangastui dohot mangkilalahon, jana mangarimangi advent, i ma dihatiha namangalami dohot sadar, situasi nasib buruk namangkonai dohot mambolit diri na, dohot hagolapan dihatiha na giot masa tu jolo! Na umponting, dipangkilalahoin dirina do, bahaso situasi na humancit, i ma akibat na ro sian diri na sandiri. Hara ni i nada hum adong sora na mangarar, sitaonon dohot parkancitan, tapi huhut do dohot habebernit ni panyolsolion (=ratap tangis). On ma harohaon na nihilalahon di hatiha Israel mangido tolongan sian Tuhan, muda tauduti ayat na mngihut sian jamita on :  

         

Muruk Ho tu hami, hape laing hami pupu mardosai tutu pardosa do hami tu Ho sian na robi. Halak na hodar do hami sude, salang hadengganannami pe hodar boti dursun muse, songon bulung-bulung na malos diombuskon alogo, hara ni hajahatannami sandiri, hami pe mago, Jes. 64: 5^b-6. 

Sadar, mangoku dohot marungkil di angka dosa dohot hajahaton; sadar jana mangoku, marungkil songon i ma hancit na jana marjaya hita, muda rimas ni Tuhan mandondoni ngolunta ! Hara ni i, nada hum manyolsoli hape, ngeri jana hancit hape, tapi mararop ni roha tu Tuhan, jana marsitutu marsigantung tu Sia, i ma tujuan anso marimpola haporsayaan na mambaen “Tuhan gabe Ama” di ngolu on, ay 16, jana pat. 64: 8; “Tapi haru songon i pe, Ho do ale TUHAN, Amangnami, tano liat do hami, jana Ho noma manggana hami. Karejo ni tanganMu do hami sude”.  

Adong pangaredoan diri, manyora diri tu Tuhan di bagasan hadirion na manyolsoli, jana satutuna mangalehen roha tu Sia. Adong de he tapangkilalahon na songon i ? Godang hamungkinan na nada songon i ! Hampir sude do halak mangoku bahaso diri na inda sanggam, tidak sempurna, sai adong do hahurangan na, cacat jana adong tihas na, adong sala na, jana mardosa. Songon i muse do hita on, ‘kan ! Botul ! Tapi, manyolsoli de he hita di baen i ? Jana botul do hita manyolsoli hara ni i ! Sanga anggap enteng do hita di si, huhut ta dok, maklum, ‘kan jolma do hita on ?

On ma hasomalon, kecenderungan ni jolma. Tongtong manganggap remeh tu dosa na sandiri. Muda dosa sanga hasalaan ni halak ? Wow, tataropong dohot kaca pembesar, pat. Mat. 7: 3; Luk. 6: 41 ! Tapi, dosa dohot hasalaan sandiri, tataropong dohot kaco na so hasaya. Maol do memang laho mangampuni, manyesa dosa ni dongan jolma, tapi songon i ma momo na mamaafkon dosa ni diri sandiri. Songon i do, tahe ?

Salolot pangalaho (=mental) na songon on do marmiam di ngolunta, nada mungkin lalu hita tu marhaubaan ni roha, μέτάνοιά (=bertobat). Giot muba roha na songon dia, salang marsala pe nada. Muda inda porlu marhaubaan ni roha, paturehon pangalaho dohot mambaen mur imbaru ngolu, porsaya ma bahaso di hatiha songon i nada tahaporluhon Sipalua. Tu aha porlu na Sipalua i, muda nada mangkilala aman (=safe) dohot denggan-denggan sajo ? Muda inda porlu Sipalua i, hita pe nada porlu tarpaima haroroNia, mararop ni roha jana malungun di haroroNia i ? Advent gabe inda adong arti na di hita.

Adong do hatiha na, hita pe botul jana sintong tarpaima di kehadiran sasahalak di ngolunta on. Muda dung songon i, wah..samenit dipangkilalahon gabe songon na dung sajom. Biasi ? Harana hita mansai mamorluhon kehadiran halak na tadok nangkin. Sadari, gabe songon nadung saratus taon. Marjaya ma hita, muda nada jadi ro na taintehon i ! Hadameon ni rohan ta sangat targantung do tu kehadiran ni na taintehon-haroronia. Harani i ma, hatiha sian na dao do pe hita marnida ro ia, panghilalanta pe gabe sonang jana dame. Pamangan pe, sian na so roha giot marsurak, songon i mu se simanjojak ta ipe giot mangalojong, jana tanganta pe sagiro giot manghaol. Ngolu na manyuraka marbalik manjadi roha na dame jana mamuji.

Tontu jungada do hita, sanga pe jotjot do inda sobar, paintehon Tuhan i anso ro ia tu ngolunta. Ro ma Ho, Tuhan ! Sigop ma haroroMi tu hami ! Saonnari ma ! Marjaya ma hami, muda inda jadi Ho ro. Andigan do ? Di hatiha ngolunta on di bagasan na krisis, pasti do i. Dihatiha hita sadari adong mara godang mangancam, hatiha songon i ma hancit na baro ni pamatangta i, di hatiha madung gale situtu jana daedae nada adong be na mangurupi. Hatiha songon on tasadari do, ngolunta on nada adong artina, nada margogo, muda Tuhan inda mangalehen partolonganNa. Songon na hatiha na hohom gabe apdol tangiangta, situtu, khusuk, hatiha na songon i. Sabalik na, muda ngolu on mardalan normal, biasa sajo, mungkin hita paulak do Tuhan tu latar na ni pudi, ditundalhon. Ro Ia, sanga nada ro pe Ia, mandosdos jana inda adong manghilalahon bagi na aha. Jotjot Tuhan i dibaen gabe songon petugas kebakaran. Muda dung suasana normal, aman, nada tahaporluhon be. Songon i muse nada ta ingot be aha nadung dikarejohon halahi tu hita. Tapi muda adong kebakaran, wah..songon i ma hape porlu na halahi di hita. On ma ciri khas dohot sifat ni jolma. “Habis manis sepah dibuang”. Muda Tuhan inda tahaporluhon, hara ni sude angka ondeng bisa do hita atasi sandiri. Tuhan i ta simpan di gudang. Pasti adong do na songon i. Sian hita na mambasa jamita on. Parsoalan na, andigan do rupani hita haporluhan Tuhan di ngolunta ? Muda taastui do Tuhan i songon “barang na di gudang’, memang adong do hatiha na hita mamorluhon barang i, tapi adong muse do hatiha inda pola tahaporluhon i.

Muloi do sian buku Pamungkaan di Bibel i, madung didok do, Tuhan i nada songon barang na di gudang, tapi Ia ma na gabe hosa hangoluanta sandiri. Dilehen Ia hosa hangoluan i di hita, anso mangolu. Hosa i do mambaen hita sian orbuk (=lempung yang mati) gabe jolma na mangolu. Jadi, muda taastui songon i; Tuhan gabe Oksigen (O²), jungada de he hita inda manggunahonsa? Ganup tingki jana di sude inganan ta haporluhon do Ia.

St. Agustinus, ama ni Parlagutan i mandok anso Advent gabe marmakna situtu di ngolu on; “hita sadari ma bahaso hita jolma on suman do songon halak na sedang mogap di batang aek”. Hara ni i, marusaho do hita dohot sagogo ni roha giot salamat, Tanganta mandadap dohot manjata aha na bisa sitiopan, pamatangtai melgokelgok marluga mangido tolong, marusaho mangangkat simanjujung ulang sampe bonom sian aek i. Anso beha ? Laho manjalahi udara sanga O², anso bisa marhosa. Hara na taboto do, ima sada cara na pasti mambaen bisa hita martahan mangolu. Jadi sasintong na ma halak Kristen manjalahi Tuhan songon jolma na giot bonom i, jana dapotan O². Ngolunta on tongtong ma maniru jana gabe rumang ni adven. Adong ma nian hasariuson di na manjalahi Tuhan, songon jolma na giot bonom i, na marsitutu serius mandapot O². Hita sadari do, bahaso manjalahi jana marsuo dohot Tuhan, ima parsoalan mangolu sanga mate (=to be or not to be ?). Songon i ma hape gabe jolma na marjaya ma au on muda nada lalu au on marsuo dohot Tuhan jana Tuhan inda manjumpangi ngolungkon !

Pangarimpunan

Pangastuion taringot tu adven songon i dohot natal anso ulang gabe hambar, angkon hita ingot ma, bahaso di na manomunomu Tuhan i, uhuman na sapatutna jagiton ni jolma pardosa, didapotkon Tuhan i do jolma i di bagasan holongNia anso malua sian paruhuman. Tuhan i do na gabe Sipalua na nitagam ni halak na porsaya di haroroNa, laho manomunomu haroroNa i gabe hajojop no roha godang. Tuhan i do na gabe Ama di hita na nihongkopNa i, anso malungun ma hita laho manomunomu, mandapotkon haroroNia jana anso marhangoluan ma hita nadung nipiohon Ia gabe bangso hapunjunganNia, na gabe dakdanak ni Debata manjagit haluaan i.

Martin Luther jungada do mandok, jana memang bonar do on; Jolma bisa mangalami dai dohot tabo na, jana jeges ni haulion pangampunan ni Tuhan, muda disadari jolma i do, naso adong artina gogona mangalo na sa dosa, jana songon ima marjaya ngoluna muda tongtong dosa mangarajai hadirionna ! Hum hara ni na mangkilala hita porlu dapotan partolongan, taida jana tapanghilalahon ma, giot tarjadi denggan ni partolongan i. Ima na ro, jana marsumber sian Tuhan Sipalua i.

Musu-musu dohot hajahaton na di portibi on madung ditaluhon Tuhan, jana mangarade ma holongNia mangerbang tu sude bangso na sapatutna dapotan uhuman, gabe marjop roha. HolongNia i do namanjadihon ngolunta on gabe mararti dohot mararga, imbaru mambaen pujion ma Ia sapanjang ma nyahe na. On ma pangaradeon siparayahonta anso mangastui; haroro ni Kristus di bagasan daging di na ro Ia muse sogot di bagasan hagogoon dohot hasangapan.

Adven, on ma gabe mamaritahon parkarejoan ni Tuhan na nyato dohot gok holong. Di bagasan na manomunomu hita haroroNia, markarejo muse do tondiNia manguba hita masuk tu sada situasi na imbaru, anso partolonganNia gabe dalan tu marhaubaan ni roha, mamungka haporsayaanta manjalahi Ia-jana Ia pe marsuo dohot hita. Hangoluan i pe gabe dalan hajojop ni roha angke Ia na giot ro na hita tagam i pe, Sipalua do hape. Hita haporluhon ma Tuhan i di sude ngolunta on masuk tu sude hatiha dohot di sude inganan, angke hagoluan do Ia ro di salolot ni lolot na.

                       A m e n !!!

 Pdt. B.M. Siregar

GKPA Depok