Jamita Minggu, 20 Nopember 2011: Matius 12:33-37

Hayu dohot parbatuna   Minggu 20 November 2011 Ujung Taon Parhuriaon Jamita : Mat 12:33-37 Sibasaon : Halumbaan 21:1-7 Patujolo Bahat do parumpamaan ni halak Batak na dipahombar tu hayu. Isarana; hayu na paet gotana tonggi do parbatu ni i. Astuanna parngoluon na gok parungkilon muda di hamonangkon parungkilon i gabe tonggi do muse hinorhon ni i. Nada denggan markusande tu hayu na burburon/ hayu na buruk. Astuanna; dijalahi halak do jolma pangalapan ni sinaloan tu keluarga na lebih suksuk sidabuanna, hurang dilehen halak do rohana laho manjalahi pembelaan tu na humurang parbinotoanna sanga sibaenonna. Songon hayu na ranggason. Astuana; Situasi manggambarhon kekurang makmuran. Angka unggas na mangkirim parbatu ni hayu i pe nada ra songgop apalagi marsilinggom di si, apalagi laho marasar mangalap gogo nada rai di hay na ranggason. Songon hayu sangkalan, astuanna tahan manaon sude angka boban na dipaporsankon,dna. Diturpuk on dipake Tuhan Yesus do hayu tudos-tudos tu angka sikap ni jolma. Isi/Bohal ni Jamita Ayat 33 : Hayu na denggan marparbuehon                parbatu na denggan. Bahat do faktor na menentukan pertumbuhan ni hayu. Isarana tano inganan hatubuan ni hayu i. Muda di topi ni aek sanga di lombang ni sada rura sai unsimbur do idaon pertumbuhan dohot perkembangan ni i, bulungna pe lomak, batangna pe mura magodang, uratna i pe butongan di aek.                 Di sisi na asing, adong muse do hayu i na jeges pertumbuhanna hara ni na cukup perhatian laho mangurusna. Isarana hayu na tubu di jolo ni bagas ni halak na cukup tingki dohot sibaenonna laho mangurusna namarpardomuon tu perkembangan ni hayu i. Muda dung denggan pertumbuhan ni sada hayu biasana denggan jala ramos do parbue ni hayu si songon i. Ido baen didok Tuhan Yesus tu angka halak Farisi i bahaso sian parbatuna tandaon do sada hayu. Sian pangalaho ni jolma tandaonma kualitas ni hajolmaonna.                  Kritik na cukup koras do hata on parjolo tu angka parise dohot tu angka siboto uhum ni hajahudion. Kritik on bersumber sian Tuhan Yesus harani na so saurdot parhatan dohot pangalahona. Pangkataina lemes-lemes, tapi parbatu ni hatana paet jala manyego-nyego hasadaon. Di hangogot ni jolma sian hamatean di ari paruhuman i masuk do tu perhitunga ni Debata angka pangalaho na denggan.  Ayat 34 : Anak ni ulok                  Ditudu Jesus do angka sikap parngoluon ni halak Parisi i tu na hurang mardai angka parbatu ni ulaonna i nada  denggan. Malah didok Jesus angka anak ni ulok do halahi. Astuanna ditudu Yesus do halahi pargabus songon si sibolis na jotjot digombarhon tu ulok. Parkarejoanna maralo tu jamitana. Pangalahona suman tu pangalaho ni parjahat. Muda mate parjahat nada bahat halak mangkonang i angke sikap na denggan do mambaen halak gabe huskus uapna. Di ari hamamatena pe bahat halak gabe marlungun ni roha. Ayat 35 : Gombaron ni ate-ate parbagasan                Dipadimpos Tuhan Jesus do tuduhanNa i maradopkon angka halak Parisi na hum malo manjamitai, na hombar tusi pangalahonai didok ibaNa dadioncar ni ate-ate parbagasan do i. Astuanna, ala jahat do angka parkarejoanna otomatis jahat do nang isi ni ate-atena.                 Muda denggan pangalaho hape risi-risi pangkataion laing lumayan dope i. Tapi muda jahat pangalaho mapasti isi ni simanjujung dohot ate-ate ni i pe angka na jahat noma i. Tuduhan na koras do i tu angka parise na manuhas Jesus mamake gogo ni si Beelzebul laho pausir setan, pamalum na mapitung dohot na ngungu (Mat 12:22) dna.              Pikiran dohot parange ni jolma na jahati mamboan jolma i tu hamatean. Tapi di bagasan Tuhan Jesus dihamonangkon do angka dosa ni parjahat na ra ro tu Tuhan Jesus. Su de jolma pardosa jala parjahat do tapi nada sude jolma ra ro manopot Tuhan Jesus. Antong hita namarhatopot Tuhan Jesus taingot ma ari hamamatenta anso ro hita tu Tuhan Jesus di si pe hita dohot dihamonangkon sian hamatean i. Ayat 36-37 : Hata gombaron ni Hadirion                 Di dok dihata Indonesia : Mulutmu adalah harimaumu. Muda so jamot sada halak manjago si mangkusapna laho mangkatahon hatana bisa doi gabe maroban sada-sada halak tu kehancuran. Hara ni i ingkon jamot do laho mangkatahon hata si hata hononkon. Didok halak batak ”jolo ni dilat ma bibir anso mangkatai”. Astuanna marmanat ma laho mangkatai ulang gabe melukai ate-ate ni dongan na umbegesa. Hombar tusi didok Jesus do bahaso sude jolma ingkon mempertanggungjawabkon pangkobarionna do muse di ari panghukuman i. Antong hata ni jolma pe hape termasuk do i gambaran ni hadirion ni jolma na sasintongna. Muda denggan mangkobari denggan do nang pangalahoni i, denggan muse do isi ni ate-ate ni i. Ngka jolma na mangkobari jala marparbatuhon angka na denggan di bagasan parngoluonna madung dohot mangolu muse angka halahi ngot sian tanoman ni Tuhan Jesus. Nada mabiar be hita anggosongon i tu hamatean angke naung dohot do hita hehe sian tanoman di bagsan Tuhan Jesus Kristus.  Suang songon i do nang keluarganta na mate parjolo sian hita di bagasan goar ni Tuhan Jesus madung parjambar halahi dihangoluan na so mantak marhite-hite hangongot ni Tuhan Jesus sian tanoman i. Pangarimpunan                Tapadenggan ma cara berpikir, tapadenggan ma pangkobarionta jala denggan ma muse pangalahonta anso ulang gabe porsuk partinaonan ditingki mangadopi ari panguhuman i hita sogot. Sude parngoluon na denggan i tudu-tudu do i tu haluaan naung tajagit, i ma haluaan sian tanoman i di bagasan Goar ni Tuhanta Jesus Kristus. Parbatu ni haluaan na tajagit i do parulaon na denggan i.                  Hadengganonta na sasintongna tercermin doi sian angka ianakonta. Antong angka na denggan ma tabonihon tu generasinta, generasi di keluarga dohot bangsonta. Di masyarakat dohot di huria. Angke I do parbue ni haluaon sian hamatean naung tajagit sian Tuhanta Yesus Kristus. Amin. Pdt.A.B Marpaung MMin MTh Ephorus GKPA