Jamita Minggu, 31 Desember 2011: Lukas 12 : 35-40

  

SiseanNa na Gabe Sioloi Kristus                                                                                       Akhir Tahun                                                                                     31 Desember 2011 Jamita : Lukas 12 : 35-40 Sibasaon : Haruruar 13 : 20-22 I. Patujolo : Hatiha i marribu halak na marlagut giot mambege pangajaran ni Tuhan Jesus (12:1). Marragam do angka pangajaran na sian Tuhan Jesus tu halak na bahat i: dipaingot do halahi anso marmanat tu halak Parise, pangalancap i (12:1-2); ulang mabiar tu sibunu pamatang (12:4-7); ringkot ni namangoku Jesus diadopan ni halak (12:8-12),dna. II. Hatorangan ni Turpuk : Turpunkta khusus pangajaran tu angka anak sisean ni Jesus (12:1-53) jana bisa do turpukta on tapahombar tu na tarsurat di Mateus 25:1-13 laho mangastuisa. Didok Jesus tu angka sisean anso marjago-jago halahi mangadopi sanga aha na ro (na martujuan laho manyego-nyengo haporsayaan) jana angkon totop markohos gonting ni halahi (songon na martanding dohot marporang) dohot tongtong gara palito ni halahi (laho mamorangi hagolapan). Ia parngoluon ni halahi diportibi on, tudosma i tu halak na painteintehon hamumulak ni tuanna na sian horja haroan boru : Ia naposo na burju, na sai painteintehon tuanna, hatiha ditektek tuanna i pintu i, manigor bukaonna ma pintu i (muda panangko, inda diboto nampuna bagas harorona). Arga situtu do sinadongan ni tuan i harani i porlu tongtong diradoti naposona i angka i, ulang nayang sanga na jais rohana disi. Didok Jesus, songon i ma naposo na burju. Martua ma naposo na burju sisongon i angke  dipajuguk Jesus do ia jana ro do Jesus laho mangoloi ia (bd.Mrk.10:45;Joh.13:4-5). Songon pangujung ni pangajaran on, didok Jesus tu halahi anso laing hobas halahi, angke di hatiha na so panagaman ni halahi, disi ma ro anak Ni Jolma i. Jesus giot ro songon Anak Ni Jolma na marsangap. III. Hahonaanna : 1.                   Nang pe inda taboto tingkina (ari dohot jomna), na pasti ro do Tuhan Jesus paduanolihon. Ia harorona na paduahon i ima haroroNa songon Raja na giot manguhumi (laho manyirang sorigala sian biribiri) sandok jolma. Harani i : a.     Marjago-jago ma hita jana jonggor ma hita  na masa sanga na aha pe dompak di    portibi on dope hita. Tongtong ma hobas hita dibagasan hasobaron, haburjuon laho mangoloi Tuhan jana setia tuSia. b.     Bahat do na giot magalalaplalapi roha dohot pikiranta di portibi on anso ulang ingot hita tu Tuhan, inda porlu marTuhan jana nayang na marTuhan i. Harani i ulang ra hita tarpodom tapi tongtong ma talatik parngoluon ni partondionta nang pe masa bahat angka tantangan dohot hamaolon. 2.     Songon siihutkon Kristus hita, tama do hita mandok tarimakasih harani holong ni roha ni Debata na marmudumuduhon hita lopus tu ujung ni taon 2011 on. Ta evaluasi ma pangoloionta tu Ibana di taon 2011 on anso i ma na manyungguli roha dohot pikiranta laho padenggankon pangoloionta di taon 2012 na giot ro. ------Amen----- Pdt. T.S. Simatupang,MTh Sekjend GKPA