Jamita Minggu, 18 Desember 2011: Lukas 1 : 39-45

Tulus do na ni dok ni Tuhan  Minggu Advent IV Tanggal, 18 Desember 2011 Jamita : Lukas 1 : 39-45 Sibasaon : II Korintus 1 : 18-22 Patujolo Di bagasan sada panatapan ni angka parjamita, di sapanjang sejarah; namaolan do mambedahon hagiot ni Tuhan dohot hagiot ni jolma di parsaoran, pangkobasion dohot hasaksian, na adong di Parlagutan i. Tapi ditangiang tongtong do ganup na porsaya mangido anso tulus hagiot ni Tuhan di Banua Ginjang, anso laing songon i di tano on. Sipata jumojjot do tarjadi, hagiot ni jolma didok do i gabe hagiot ni Tuhan, jana sabalik na hagiot ni Tuhan madung gabe hagiot ni jolma. Mansai andul do i. Biasi ? Sanga adong muse na marpandapot hagiot ni jolma angkon tunduk do di toru ni hagiot ni Tuhan, denggan ma i; tapi na tarjagi hagiot ni jolma gabe patutoruk hagiot ni Tuhan. On adong do tujuan na, di bagasan na porsaya hita adong hagiot, pangaramotion ni Tuhan dohot partolonganNia gabe nyato. Ima na nigoari dohot “providentia Dei”. Di turpuk jamita minggu advent IV on, adong do hubungan na sangat kontal taringot tu anso tulus hagiot ni Tuhan dohot martua ma jolma i hara na porsaya gabe tarjadi ma. Ta paihutihut ma ! Hatorangan Ay. 39-44; Hata horashoras na gabe pasupasu dohot hamogaan. Hasomalon ni masyarakat Timur do muda markunjung tu sada bagas ni ise pe i, pasti marhata santabi, jana pasahatkon hata horashoras. Si Maria na baru sajo dope dapotan parsuoon na denggan dohot Surusuruan, sian na so nitagam rohaNa jana inda mungkin; "Tondi Parbadia do mangarajai ho jana kuaso ni Debata ma manggohi ho”, gabe sada kejadian na mungkin. Na dung mangandung do si Maria sian Tondi Parbadia, tapi denggan muse do ia mangalusi aha na disampehon Surusuruan i tu sia; “Naposo ni Tuhan do au, sai tulus ma di au songon na nidokmi”, ay. 34-39. Di situasi na songon i, manigor do si Maria kehe tu bagas ni si Zakaria na manangkok tu huta Juda, ima tu edana si Elisabet, jana manabi ia dohot hata horashoras. Disi dibege si Elisabet hata horas-horas ni si Maria i, manggulot ma manigor dakdanak na di bagasan pamatangnia i. Gabe digohi Tondi Parbadia ma si Elisabet. Dung i mangkuling ma ia marhite sora na gogo, "Dipasupasu do ho sian sude dadaboru jana dipasupasu muse ma parbatu ni butuhamu. Ise dehe au on umbaen na ro ina ni Tuhanku mandapotkon au? Disi hubege nangkin hata horas-horas na nidokmi, manigor manggulot ma dakdanak na di bagasan pamatangku hara ni mogana. Dua ina na mangkilalahon sian na so mungkin, bisa dapotan hamogaan dibaen angkon tulus jana tarjadi do hagiot ni Tuhan markite halahi. Sonang nai hape pangkilalaan ni dua ina on, di na pajumpang halahi laho mancaritohon na masa tu halahi, dohot tangkas na sian siubeon ni si Maria na gabe Tuhan songon na ni dok Surusuruan;  “jadi gabe raja ma Ia di angka pomparan ni si Jakob ro di salolot ni lolotna. Nada marujung be HarajaanNia", ay. 33 Ay. 45; Tulus do na nidok ni Tuhan. Porsaya do hita, bahaso sude na nidok ni Tuhan pasti angkon tulus do. Tapi bia do hita laho mambuktihon i ! Memang Tuhan sandiri do mandok “angke nada adong na so tarpatupa anggo di Debata”, ay. 37. Porsaya do si Elisabet na dung di masa hatotobang na anso mangandung ia, angke ro do (=sorang) si Johannes pandidi markitehite ia. Songon i muse do si Maria porsaya bahaso na gabe ina ni Tuhan i ia. Angke markitehite ia do sorang Sipaluai. Porsaya do si Josep, bahaso markite na ni jagitnia si Maria gabe tunangannia gabe mur magodang ma Jesus jana marbisuk laho mambaen imbaru ngolu paribadatan dohot ngolu hamasyarakaton di luat Judea. Jerusalem dohot sakitar na. Sian sasude na i, angkon tulus do memang na ni dok ni Tuhan. Inda bisa inda tarjadi. Angkon do tarjadi. I ma umbaen na nidok panyurat Ibrani; ”Haporsayaan i ma jojahan ni roha taringot tu angka na niarop ni roha dohot hapastian taringot tu na so niida dope, Ibr. 11: 1. Martua do hape angka na porsaya, muda dung angkon tulus hagiot ni Tuhan i di bagasan ngolu na. Jana i muse do na gabe pangajaranNia dung mangkobasi Ia di portibi on laho mamaritahon Harajaan ni Debata, di bagasan tangiang jana pambaenanNia siganop ari tu hapontingan ni halak na bahat, γενηϑητω τόϑέλημα σου, genetheto to thelema su, hagiot ni Tuhan, ima hapastian na ro sian haporsayaan  angkon do tulus jana tongtong tarjadi. Hasonangan dohot hadameon di bagasan jop ni roha, na mambaen hagiot ni jolma tunduk di toru hagiot ni Tuhan ima ngolu na martua, ngolu na giok dohot pasupasu.      Hahonaanna/ applikasi Pardalanan ni ngolu ni halak na porsaya i pasti do maradopan dohot bahat angka sapasapa, na memang ditandai dohot manjalahi hagiot ni Tuhan. Diajarkon Jesus sandiri do tu hita “tulus ma lomo ni rohamu di Banua Ginjang anso laing songon i di portibi on”, Mat. 6: 10. Di suru muse do hita anso porsaya bahaso: “diboto Amangmunu na di banua ginjang i do, sude na porlu di hamu”, Mat. 6: 32b. On ma “providentia Dei”, astuan na disadiahon Tuhan jana dibohali do ngolunta tu angka hagiotNia, anso tulus i.                 Pangokuon taringot tu si, nada mararti bahaso hita on hum tinggal paimahon laho manjagit parbaritaan sian Tuhan sambing taringot tu hagiotNia. Providentia dei, nada hum lalu lintas saarah, hum Tuhan na manontuhon, tapi songon lalu lintas dua arah do, didia Tuhan songon i dohot jolma mardalan manontuhon hagiotNia. Dilehen do tu hita jolma hamampuon marpikir dohot hasanggupan mambuat partimbangan, anso di na manjalahi hagiotNia, hita pe porlu aktif marpikir anso marsuo di bagasan hagiot ni Tuhan. Jadi nada sarupa pangastui ni hagiot ni Tuhan di sude tangiang dohot sude ugamo. Martangiang do hita halak Kristen, tapi laing martangiang muse do halak na so Kristen. Adong de he hamungkinan na, i sarupa ? Nada ! Aha do na mambedahon tangiang ni Kristen dohot angka tangiang na asing i. Hum sada do; ima, muda angka tangiang na asing umum na manangiangkon “Thy will be changed”, maruba ma hagiotMu, tapi tangiang ni halak Kristen ima “Thy will be done”, tulus ma hagiotMu.                   Memang angkon adong do na ingkon maruba di ngolunta on, jana wajar do i muda haubaan i maroban hajojop ni roha dohot hamogaan, tapi muda tapamanat do, hagiot ni Tuhan nada maruba i, muda dung didok Ia angkon tulus do. Ima na tarjadi tu si Maria, Elisabeth dohot si Josep. Parsoalan na beha do hita. Manjalahi anso marsuo dohot hagiot ni Tuhan nada momo sambing. Harana manurut panatapan ni Tuhan mansai bidang do sasaran na. Nada cukup hum aha na bisa na niida ni mata, tapi dohot do hasanggupan anso porsaya jana angkon tulus gabe tarjadi. Van Niftrik dohot BJ. Boland di Buku Dogmatika Masa Kini mandok; “ di hatiha jongjong hita di adopan ni Tuhan, sadar ma jolma bahaso cara na Ia mamarenta portibi on tongtong do rahasia. Tapi di bagasan mangadopi rahasia si songon i, halak na porsaya mangoku; au porsaya (=mamporsayahon diri) tu Tuhan na giot mambaen sude na na adong na marragam rupa i anso denggan situtu. Hagiot ni Tuhan mambaen hagiotta tunduk dibagasan hagiotNia. Songon ima anso tulus hagiotNia namaroban angka tanda na mambaen adong hahomangan, sian na so mungkin gabe tarjadi ma. Nada salah jolma adong hagiot na, tapi angkon diingot do bahaso Tuhan do tujuan ni hagiotta i anso tulus i. Jolma marsangkap, tapi Tuhan do anggo na manontuhon, pat. Poda 16: 3 Pangarimpunan Tujuan ngolu na bertumbuh di bagasan haporsayaan dohot na mararop ni roha tu sifat na imbaru di portibi on, ima na mambaen anso tulus hagiot ni Tuhan di jamita minggu adven IV on, ima anso dipasangap Debata, I Kor. 6: 20. Sude sitaonon na tabolus saonnari nada tarpatudos dope i tu hasangapan na giot papataron ni Tuhan di hita, pat. Roma 8: 18. Hagiot Ni Debata direncana ni ngoluon, angkon gabe na umporlu ma, anso mamora hita di angka pambaenan na denggan, Mat. 5: 16; 25: 31-46. Jolma na mangarimangi ngolu jana marnida adong tujuan ni ngolu i, laho mangkarejohon  hagiot ni Tuhan nada momo mandele, maheu, diangka sitaonon bahkan ra kecewa. Tuhan pasti do tongtong mangalehen ragam cara, napabotohon diriNa di haporsayaan ni halak Kristen songon sada bukti kehadiranNia, angke manongtong  jana hot do habonaranNia. Jolma na tujuan ni ngolu na marragam rupa, pasti do momo kecewa, hara na umbahat kemungkinan nada lalu tu tujuan na, sanga pe gagal. Bisa do hita marsangkap timbo situtu, tapi angkon manyora do tu Tuhan jana dipikirkon dohot na sasuai tu rencana ni Tuhan.                 Arop ni roha ni dakdanak ni Debata tu na giot tarjadi sogot (=eskhaton), sahaligus do paingothon haporsayaan na maradopan dohot na manongtong. Kristus madung gabe Tuhan di ngoluon, jana Ia sandiri madung gabe patumonaan na nitompa ni Debata, na he Ia noma gabe ama sanga parnampuna (Rom 14: 7-8) dingolunta sebagai dakdanak ni Debata ? Patumonaan ni Tondi hangoluan (i ma Kristus) tu angka arop ni roha ni dakdanak ni Debata mur nyato do i  di hatiha sobar hita painteintehon tu na so taida dope, i ma hatarbukaon di haporsayaan taringot tu ngolu na giot ro, madung dimuloi jana madung tarjadi saonnari, jana dipasanggam ma i di haluaan godang sogot muse (=Joh.3:16). Hagiot ni Tuhan na umponting i ma anso bisa jolma i bertumbuh di bagasan sifat dohot parrohaon songon Kristus, basa 1 Joh. 2: 6: mur maju di bagasan toruk ni roha, mangolu dohot marroha di bagasan halambohon, hajujuron, habadiaon, hasatiaon, jana tarida ma i sian parbatu ni holong (pat. I Tim. 4: 12). Ima umbaen hagiot ni Tuhan di bagasan ngolu ni si Maria, si Elisabeth, si Josep gabe marhamogaan dohot gabe pasupasu, marhasonangan, gok dohot jop ni roha, hadameon gabe martua mangolu ni angka na porsaya i.                 Dibaen hagiot ni Tuhan do anso Kristus i sorang sian Tondi Parbadia, gabe hagiot ni Tuhan pe anso tulus di bagasan portibi on, ima hara ni nadung porsaya hita. Jadi Tondi i sandiri do mangadop Debata dohot angka pandohan na so tarpajojor jolma. Jadi tangkas ma botoon ni naporsayai bahaso Tondi i ma na gabe parkitean (=mediator sanga pengantara) na tinggal di bagasan hita, bnd Joh.14: 16.  Tondi Ni Debata muse do na mangurupi hita di bagasan parjuangan mangalo dosa dohot laho manuju ngolu na imbaru. Tondi ni Jesus na maringanan di bagasan hita, pat. Rom. 8: 11, i do martangiang jana mangadop Debata. Dikarejohon Ia do di hita sian aha na so mampu hita mangkarejohonsa. Jana harani i, Tondi i ma na markarejo di bagasan rohanta sian aha na nikarejohon ni Kristus di habangsa ni Debata, pat. Joh. 14: 12-13. Domu tusi, madung dilehen Ia tu hita tanda paboa na Ia nampuna hita jana dilehen Ia maringanan TondiNia di bagasan rohanta na gabe jaminan ni sasudena na nipasingkopNia i di hita, 2 Kor. 1: 22.Antong ta dokkon ma; advent IV di minggu parpudi hatiha manomunomu harororo ni Kristus i, gabe tingki hamubaan ni roha, di ari ni Tuhan i sanga panguhumanNia, anso gabe sorang ma Kristus i di ngolunta on. Di na mangarayahon pestapesta natal pe hita tulus ma hagiot ni Tuhan na mambaen martua hita jana marmogamoga madung rade Sipalua i mangalehen hasonangan dohot pasupasu. Pdt. B.M. Siregar,STh GKPA Depok