Selasa, 02 Agustus 2011

Bacaan Minggu, 14 Agustus 2011: Epesus 5 : 8-14

widgeo.net
Mangolu di natorang dibagasan TUHAN
  


HATORANGAN NI SIBASAON

MINGGU 8 DUNG TRINITATIS 
MINGGU, 14 AGUSTUS 2011

Jamita : Jesaya 2 : 1-5                     Sibasaon : Epesus 5 : 8-14



A. PATUJOLONA

Surat ni Apostel Paulus tu Parlagutan di Efesus mangondolkon bahaso rencana ni Debata anso "Sude potibion, denggan songoni na di surgo dohot na di tanoon gabe marsada dohot Kristus  songon ulu" (1:10). Surat on gabe songon soso-soso do tu halak naporsaya/ umat ni TUHAN, anso manghayati  maksud sangkap na godang sian Debata laho pasadahon sude jolma marhite dohot dibagasan  Yesus  Kristus.
Di bagian parjolo surat Efesus oni dipatorang  bia haja-jadi ni hasadaon i. Dipatorang marhite carito biado Debata mamiliUmat-Na,  bia Debata marhite Yesus Kristus, Anak-Na, manyesa dosa dohot paluahom umat-Na sian dosa, jana biado  janji ni Debata i dijamin Tondi ni Debata. Di bagian paduahon, disuarahon tu pembaca, anso halahi mangolu, anso targohi/ tarlaksana hasadaon ni halahi songon Umat naporsaya tu Kristus. Laho patuduhon nadung sada umat ni TUHAN, harani namarsada dohot Kristus, dipake do piga-piga hiasan/ gambaran.  Parlagutan ima songon pamatang jana Kristus ma songon ulu-Na, sanga songon sada bangunan natarsusun jana alas fondasina ima Kristus, sanga muse songon sada ina namarsaripe jana Kristus ma songon Amana. Marhite ungkapan ni si Panyurat tarida do hahomangan ni rohana dinamaarningot godang ni asi niroha ni Debata marhite Kristus, gabe marsigorgor do pangkilalaanna mandok tarimakasi dohot pasahat puji-pujian tu TUHAN. Satap ia sian holong ni Kristus, panghopkopion-Na, Panyesaon-Na di dosa, hadengganan ni rohana dohot habadiaon-Na.  Turpuk jamita on marpardomuan tu keadaan ngolu naimbaru songon halak Kristen/ naporsaya nadung manjagit haluaon sian Kristus (4:1- 6:20).

B. IMPOLA JAMITA  Epesus   5 : 8 - 14
I.       MANANDA HADIRION NAIMBARU BAGASAN TUHAN  (ay.8-9)

1.     Sian hagolapan hian gabe tu natorang  (ay.8) 
Manggambarhon keadaan ni hajolmaon andorang so porsaya tu Jesus na mangolu dibagasan dosa, nadi sarupohon tu keadaan hagolapan (keadaan terselubung dohot hahodaron na kacau harani dosa). Tapi dung gabe halak naporsaya jana marsaulihon panghopkopon ni Jesus gabe masuba statusna sian nagolap gabe na torang (keadaan tarbuka dohot taratur di bagasan hadengganan/ habonaran), gambaran haiason/ habadiaan harana nadung malua sian bura ni dosa marhite panghopkopion ni Jesus. Disi dung tarjadi perubahan status mamungka ma sian hajolmaon naimbaru, jana tarjadi ma pertumbuhan perkembangan songon angka dakdanak ni hatorangan.
8 Hamu sandiri pe di hagolapan hian do najolo. Anggo saonnari madung gabe na torang hamu di bagasan Tuhan i. Hara ni i, mangolu ma hamu songon angka dakdanak ni hatorangan i.
9 Angke sian na torang *NA TORANG: Dipiga-piga-piga naskah narobi didok: Tondi Ni Debata.* i do haroroan ni sasude ragam ni parange na denggan jana na bonar di panatapan ni Debata.

2.     Sian na torang do sude haroro ni parange na denggan jana na bonar (ay.9)
Dison dipatorang si Paulus do asal muasal ni sasude pangalaho na denggan jana na bonar na ro sian na torang dipanatapan ni Debata. Muda taingot andorang so panompaon ni portibion di Pamungkaan didok do:  Nada marrumang dope sudena i jana mamolngit do pangalahona. Laut bidang na margalumbang na mangalingkup sasudena boti golap bulita, …..Jadi mangkuling ma Debata, "Jadi ma na torang" gabe adong ma na torang (Pamungkaa 1: 2-4). Jadi tangkas do sian Debata do mula ni na torang dohot hataraturon tu portibion.
Songoni muse ma sasudena ragam ni hadengganan angkon do marsiajar hajolmaon tu nadiparhagioti Debata, artina burju secara hajolmaon nada otomatis dihagioti Debata, tapi angkon do tunduk haburjuon ni jolma tu na nihagioti ni Debata (band. Rom 12 : 2)

Æ Sian hatorangan on mur tangkas ma di hita hadirion ni halak naporsaya tu Jesus, namaruba sian ngolu nahonok tu ngolu naimbaru dibagasan TUHAN. Jana dibagasan status hadirion baru dibagasan ngolu naimbaru ima muse angkon diisi dohot pangalaho na denggan dibagasan hagiot ni TUHAN.
     
II.        USAHAHON MA MANANDA NA PASONANG ROHA NI TUHAN (ay. 10-11)

1.     Marusaha mananda napasonang roha ni Tuhan (ay.10)
Mungkin sapa-sapa do rohanta biado caranta mananda na pasonang roha ni Tuhan ? Di buku Rom 12:1 didok do anso dipasahat diri gabe haul na mangolu, na badia jana na tumbuk di roha ni Debata, i ma na gabe hangoluanmunu na sapatutna. Gabe onma langka parjolo, baru marudut tu usaha mananda aha pangalaho napasonang roha ni TUHAN. Pasomal-somal diri marsaor dohot marhadaulaton tu Debata, anso mur mananda sifat dohot pangalaho na di hagioti TUHAN.

2.     Ulang mandohoti jolma na mambaen parange na golap naso marguna (ay.11)
Dison dipaingot anso ulang mulak mangkarejohon sanga dohot mambaen na golap naso marguna. Sude angka bentuk pangalaho na rorang, napaoto-otohon, gabus, karejo na jahat dohot naasing-asing. Sebalikna gumonan ma manggorahon angka na mangkarejohon nasongoni, anso mantak.
Ä Sianon taligi hasitutuon ni TUHAN na mangalehen status natorang, ngolu naimbaru di halak naporsaya naporlu tangkas dipanandaon ni umat-Na. Jana panandaon nadenggan ima muse mandorong anso marsitutu mananda dohot mangkarejohon napasonang roha ni TUHAN.

III.    NGOTMA NA MODOM, JONGJONG SIAN HAMATEAN (AY.12-14)

1.     Angka na nibaen dinabuni, maila iba mangkobari (ay.12) Manggambarhon sada karejo naso patut hobaran harani pangalaho napailahon.

2.     Sabalikna sudena muda dung dipatangkas di natorang, angkon laing tangkas do i tarida (ay.13) manggambarhon parkarejoan na jujur sanga pangalaho na bonar (band.Mat.5:37)

3.     Sudena natarida tangkas torang doi sanga na torang ido napatidahon sudena dohot tangkas (ay.14). Patorangkon status natorang sekaligus marguna patangkaskon keadaan na golap (papatar na humurang jana patuduhon dalan nadumenggan). Harani ma muse didok anso "Ngot ma ho na modom i, jana jongjong ma ho sian hamatean! Giot marsinondang ma Kristus di ginjangmu."
Laho manghehei sanga mandungoi angka halak naporsaya na tarpodom sanga tarlalap diangka tugas tanggungjawabna mangkarejohon nadenggan dibagasan sangkap ni TUHAN.  Na hebatna adong do halak Kristen nadung marmudarhon hajahaton jana inda ra sanga bisa mambaen na denggan. Artina marsak ibana mangaligi halak sonang jana sonang rohana muda marsak/ marhancit ngolu ni halak. Tu halak na songon on ma digambarkon songon halak na dihamatean na si gorahon anso jongjong laho manjagit sinondang ni Kristus.
Æ Sudena on manegaskon parbedaan ni status natorang dibagasan ngolu naimbaru jana ngolu na torang do si pengendali na manghamonangkon hagolapan. Muda pe tarjadi keadaan na tarpodom sanga tarlalap mangkarejohon pangalaho napasonang roha ni TUHAN, ngot ma na modom jana jongjong sian hamatean, dibaen giot marsinondang ma Kristus di ginjangna. 

C. HAHONAAN NI JAMITA:
     Epesus  5 : 8 - 14

01. Marhite turpuk on lalu ma sapa-sapa tu ganup hita naumbegesa: songon halak naporsaya madung dohot do hita dapot status natorang dibagasan ngolu naimbaru ???
02. Muda nadung tangkas do hita na marsatus natorang marngolu naimbaru di bagasan Kristus, bia muse do hita manghangoluhon pangalaho dohot pambaenan di natorang.

03. Muda nadung tahangoluhon do di natorang dipaingot do anso hot jana torus marusaha mambaen napasonang roha ni TUHAN.

05. Tu halak na tarpodom dohot payak di hamatean dihehei anso ngot sian na modom jana jonjoong sian hamatean; laho mangharinggaskon pambaenan nadenggan, napasonang roha ni TUHAN, dibaen giot marsinondang ma Kristus di gintangna.  Amen.

Pdt.B.Nainggolan,M.Th
GKPA Resort Tanotombangan Email:  rev.bnainggolan@yahoo.com.

Tidak ada komentar:

Posting Komentar