Jamita Minggu, 17 Juli 2011: Pamungkaan 50:15-21

PARGADONGAN GABE  PARHUNIHAN, PARDANGOLAN GABE  PARSAULIAN HATORANGAN NI JAMITA MINGGU 4 DUNG TRINITATIS  MINGGU, 17 JULI 2011 Jamita :Pamungkaan 50:15-21 Sibasaon : BAR 19 : 1-7 Damang-Dainang na nihaholongan di bagasan holong ni Tuhanta Jesus Kristus…! Ra madung sering tabege pandohan na mandok: Nirimpu Parhunihan hape pargadongan; nirimpu parsaulian hape hamagoan. Tapi marhite turpuk jamitanta sadarion ima na nibuat sian buku Pamungkaan 50 : 15 – 21, suhar-suhar ni pandohan i do i ma na mandok: Nirimpu pargadongan hape parhunihan, dimulana pardangolan, tapi diujungna parsaulian. Damang-Dainang na nihaholongan di bagasan Jesus Kristus…! Si Josep ima anak ni si Jakob na nitubuhon ni si Rahel.  Muda tapamanat barita ni Bibel salaho tu si Josep, ra tangkas dope taingot bahaso parngoluon ni halahi ima marhite na marmahan pahan-pahanan. Dibagasan pardalanan ni ngolu siganop ari bolas do dohonon sai na unholongan do roha ni si Jakob tu si Josep martimbangkon tu na 12 na i anakna i ima si Ruben, Simeon, Lewi, Jehuda, Dan, Naftalin, Gad, Asser, Isakhar, Zebulon, Benjamn, dohot boruna si Dina. Hara ni na unholongan si Jakob tu si Josep martimbangkon tu na asing i, gabe sun do goyak/sogo ni roha ni angka abangnai midasa. Mariari ma di sada hatiha di namarnipi si Josep na ingkon do marsomba amangna, inangna maradu sude angka abangna i tusia. Di sada hatiha martahi na jat do angka abangnai ima na giot mambunu si Josep. Tapi hara ni hata ni si Ruben ima anak buha baju ni si Jakob, gabe nada jadi si Josep dibunu. Tapi gabe diambungkon/ didabu tubagasan sumur nadung buang, sian i digadis tu halak Ismael, sian i digadis tu si Potifar ima sahalak parpangkat na gabe kapala ni pangawal ni harajaan ni raja Parao/Firaun na di Mesir. Si Jose pima sahalak doli-doli na ginjang na godang jana na tongam. Dung adong sadia hodok ia tinggal di istana Mesir, mamungka ma ro roha ni ripe ni si Potifar tu si Josep, jadi dipiohon ia ma doli-doli i rap modom. Tapi nada ra si Josep, angke di ajari jana dirajai Debata do ia (Pmk 39). Hara ni ulah/ pangalaho fitnah ni ripe ni si Potifar i, gabe dihurung/dipenjara do si Josep.   Damang-Dainang na nihaholongan ni Tuhan Jesus Kristus…! Si Josep sian sahalak narapidana, sian sahalak nadifitnah, nanikucilkan ni angka abangna, sian sahalak na mardangol, hape diujungna taruli parsaulian, gabe sahalak na tarbarita jana sahalak penguasa di istana ni raja Parao na di Mesir. Damang-dainang na nihaholongan ni Tuhan Jesus Kristus…! Di bagasan pardalanan ngolu ni hajolmaon, tontu muda tatarik tu hadirionta na masa tu si Josep ra dohononta do wajar muda giot baloskonon ni si Josep sude angka pangalaho na jat na nipatupa ni angka  abangna i. Pangalaho na so denggan na nibahen ni angka abang ni si Josep i laing tangkas muse dope diparningotan ni angka abangna i. Marningot sudena i, lomos jana mabiar situtu do angka abang ni si Josep i, betak na baloskononnia do angka pangalahonta na uju i, betak na bunuonnia noma hita; angke sonnari madung halak na beteng jana na marpangkat ia (ning roha ni angka abangna i). Tangkas do diboto angka abang ni si Josep i bahaso si Josep tutu do halak na pantun marsimatobang, hara ni i diperalat angka abangna i do situasi i; gabe disuru halahi ma suruanna mandapotkon si Josep jana palaluhon pesan na direkayasa sian amangna si Jakob anso unang muruk be si Josep jana rade memaafkan angka hahurangan/kesalahan ni angka abangna na salpui, angke ido tona ni si Jakob ninna taran di ngoluna. Ra madung gabe bako di angka jolma parjahat laho menghalalkan segala cara muda dung so tolapsa be mardalih/paluahon diri songon na nipatupa ni angka abang ni si Josep i, mampargunahon halak na asing (mangalului pembela), bahkan manjehehon halak na asing demi keselamatan sendiri (Biarlah orang lain tumbang/tumbal asalkan kami selamat). Satutuna nada dihagioti Debata parrohaon sisongon i, tapi hamumulak ni parjahat i do maninggalkon  hajahatonna jana mangulahon na denggan na nihalomohon ni Debata anso taruli ngolu dohot hangoluan. Damang-dainang na nihaholongan ni Jesus Kristus…! Hara ni hasalaan, gabe tubu do biar ni roha, mangkorhon dosa jana tu hamatean. Biar ni roha ni angka abang nisi Josep i, diupayahon nasida do laho manobus i, marhite na ro halahi mandapotkon si Josep jana marsomba tu si Josep (tulus nipi ni si Josep i). Astuanna, dioku jana ditopoti angka abang nisi Josep i do angka hasalaanna i, marhite ro halahi marsomba jana menyerahkan diri biar pe na gabe naposo nisi Josep. Marnida i didok si Josep ma tu halahi, “Ulang pola mabiar hamu; harana nanggo Debata au. Haru pe nadung satahi hian hamu laho mambaen na jat tu au, hape diuba Debata do hajahaton i gabe tu hadengganan, anso marhaluaan bahat halak na mangolu saonnari markite-hite pangalaho na masa na salpu i. Ulang gamang hamu, sarihononku do ngolumunu dohot ngolu ni dakdanakmunu.” Damang-Dainang na ni haholongan ni Jesus Kristus…! Muda tapamanat sikap dohot alus ni si Josep i maradopkon angka abangnai, nada ra ia  mamaloskon angka hajahaton ni angka abangnai dohot hajahaton. Angke tangkas do dioku si Josep bahaso pangalaho na jat dohot na mangulahon dosa nada dihagioti Debata (39:7-10), angke didok do di Pangarataion  32: 24-25 dohot Ibrani 10:30, hak ni Tuhan do pamaloson dohot mandabu uhuman. Tutu ma tahe pandohan i, “Nirimpu pargadongan hape parhunihan, nirimpu hamagoan hape parsaulian.” Angka abang ni si Josep hara ni hasalaanna madung managam na ingkon muruhan, na ingkon baloskonon ni si Josep angka pangalaho ni halahi na so denggan I dohot na so denggan, gariada madung rade halahi na gabe naposo nisi Josep. Tapi aha do na tarjadi, andul do sian na di roha ni halahi, gabe dihaholngi, ditangisi si Josep do halahi, disarihon si Josep angka na ringkot dingolu ni halahi bahkan lopus tu angka dakdanakna, gabe hasonangan do tahe na tarjadi. Songon i muse do dimulana, muda di roha ni angka abang nisi Josep i, muda dung didabu tu sumur i, sumurut ma rohana, bahkan muda dung digadis tu naso siihutkon Debata, tontu gabe marhancit ma ngolu ni i gariada mate ma i muda dung lalu tu Mesir, songon i ma muda pkiran ni jolma. Tapi aha do na tarjadi, na marsangkap do jolma, tapi anggo na manontuhon jana na pasautkon Tuhan Debata do. Hara ni i taingot ma, dijehehon halak pe hita songon si Josep i, ingot ma adong do Debata na mampardulihon ngolunta. Diparkanciti pe hita, muda mabiar jana hot do hita di Tuhan gabe taruli parsaulian ma hita muse sian Ia na gok asi ni roha i,,, amen …!!!                                                                                      Pdt. Laorensus Pasaribu,STh Praeses GKPA Distrik I Angkola-Mandailing