Jamita Minggu, 7 Agustus 2011: Yohannes 6 : 30 – 35

Hangoluan na marharoroan sian Tuhan Jesus HATORANGAN NI JAMITA MINGGU 7 DUNG TRINITATIS  MINGGU, 7 AGUSTUS 2011 Jamita : Yohannes 6 : 30 – 35 Sibasaon : Masmur 119:9-16 Patujolona : Di buku Kidung Jemaat N0. 412 ayat 1, didok hatana songonon : Tuntun aku Tuhan Allah lewat gurun dunia.   Kau perkasa dan setia, bimbing aku yang lemah.  Roti surga, Roti surga puaskanlah jiwaku, puaskanlah jiwaku.  Nigoaran do kelompok ni ende on : Panogunoguon ni Debata, harana sandok halak na umbegesa dipiohon do anso porsaya jana manjagit  kuaso ni Tuhan na mangalehen hagogok bope sandok haporluan ni hajolmaon.  Dipaingot do bope dohot hita anso rap manjagit Kristus nagabe Tuhan jana Sipalua.  Jadi ende i pe terkadang bisa do lobi mangondolkon sian jamita, muda dipaihut-ihut pandohanna.  Di halak hita batak jotjot do tabege pandohan : Ida ida nabutong, jora jora namale. Artina bahat do halak humin na ihut-ihut siborok ninna, nada harani na mangastui sanga harani na porsaya. Laing songonima halak na mangihutkon Tuhan Jesus, sebahagian nada harana porsaya tapi hara madung butong do halahi jana diligi halahi nadipabahat ni Jesus sipanganon marhita 5 biji roti dohot 2 ihan jana marlobilobi 12 karanjang.  Marhite i diihutkon halahi ma Jesus harana marpikir halahi jana mandok : On ma napatut pabangkiton nagabe sada raja, angke bisa tarlehen Ia hita mangan harupe nada markarejo hita ( basa  psl 6 : 14 – 15 ). Hatoranganna; 1. Kepribadian ni hajolmaon tergolong do tu sada hal na sangat unik harana memiliki sifat sanga ciri  khas antara lain : Pikiran, perasaan dohot hagiot ( basa  1 Kor. 2 : 10 – 11 ; Epesus 4 : 30 ; 1 Korintus 12 : 11 )  punya hak menolak sanga manghaporsayai.  Tapi harupe songoni, laing dipataridahon Tuhan Jesus do sangkap ni Debata sian mulana, i ma na laho paluaonNia do sandok hajolmaon sian pardosaon asal ma ra porsaya jana mangihutkon Tuhan Jesus marhita pangoloion so hara ni natarpaksa. Tutu sangat menarik perhatian do pandohan ni Jesus, di ayat 27 : Markarejo ma hamu anso dapot hamu sipanganon naso ra busuk bope namangalehen hangoluan na so mantak. Artina  : Bagi na bia pe sanga songon dia pe na masa, hangoluan na so mantak angkon jadi tujuan pokok na nasintongna, harana aha ma he gunana muda di hita pangisi ni portibion hape hita sandiri agoan hosa? (basa  Matius  16 : 26). Jadi angkon mangolu dibagasan Kristus, jana Kristus dibagasan hita do baru pe anso dapot hangoluan na so mantak. Marhite ciri khas nangkinani bahat halak Jahudi marungut-ungut, hara didokkon Tuhan Jesus : Ahu do roti na mijur sian banua ginjang. Hape halahi sandiri marpikir nada he anak ni si Josep dohot si Maria do bayo on?  Biasi ma barani Ia mandok Ahu do roti na mijur sian banua ginjang?  Marhite pandohan i jadi tubu ma  rasa  sanga  pikiran syak (curiga, kurang percaya)  maradopkon Tuhan Jesus, kecewa ma halahi jana di tulak halahi ma Tuhan Jesus. Gomos do diparrohahon  halak Jahudi pandohan “markarejo“ jana harani  ma disapai halahi Tuhan Jesus, aha ma napatut sikarejohonon nami.  Tarpatupa Ho de he tanda nagumodang sian na binaen ni si Musa, pola 40 taon ompu nami mangan manna dilehen ia di halongonan? Marhite pandohan on, nada diastui halahi haroro ni Jesus, nada tarbedahon halahi taringot di haporluan ni pardagingon dohot partondion.  Harani ma dipatorang Jesus, taringot tu nabinaen ni si Musa : Anggo sipanganon na nilehen ni si Musa nada na sian banua ginjang i. Muda sipanganon na sian banua ginjang, i ma hangoluan  na so mantak nanilehen  ni Damang   tu portibi on. 2. Marpardomuan dohot parsapaan ni halak Jahudi maradopkon Jesus, jadi tubu do roha na unduk jana porsaya, jana dipatubegehon halahi ma i marhite pandohan:  Lehen ma di hami sipanganon na songon i.   Dialusi Jesus ma natorop i jana didokma : Ahu do Roti hangoluan,  sanga ise naporsaya di Ahu, nada malean sanga manguas be ia   ( basa Yohanes  4 :  14 ).  Jadi ahama astuan ni pandohan ni Jesus : Ahu do roti hangoluan na mijur sian banua ginjang?  Artina : Dilehen Debata do tu sandok jolma pangisi ni portibi on na hampir mate,namalean jana manguas hara ni dosa, i ma ngolu namanongtong dibagasan pamatang ni Jesus Kristus. (Roti i ma sipanganon pardagingon siganop ari di halak Jahudi, jana muda di halak batak indahanma, jadi muda nada adong sipanganon nasongoninan, gale jana tangkuraparon ma hita alias  busung lapar mamben ngolu terancam). Muda giot manjagit Pamunan na Badia hita rap taengot do hata pasu-pasu na mandok : PamatangKu do i nanilehen tu hamatean humophop hamu, mudarKu do i naniduruskon humophop hamu baen hasesaan ni dosa munu ( basa Lukas 22 : 14 – 23 ). Partudosan sanga gambaran nadung pinatorang ni Kristus taringot tu Roti dohot PamatangNia, porlu sajo do astuanta anso rap umbotosa hita bahaso : Muda so hara ni Kristus, sandok hajolmaon angkon agoan di ngolu pardagingon bope partondion jana haujunganna tu hamatean nasalolotnilolotna. III. Hahonaanna. - Ganop halak na porsaya jana patuluskon hagiot ni Kristus angkon dapotan di pasu-pasu dohot hagogok ni partondion.  Muda angkon laing male sanga manguas di pardagingon, hum parsatongkinan sajo noma i, paima so di alap Kristus hita sian portibi on.  - Madung marsada hita dohot Kristus merkite panghophoponNia,  harani angkon dibagasanNia ma hita bope hatiha butong sanga hatiha male, marsonangsonang sanga dihatiha hasusaan. - Jesus do Roti bope aek hangoluan, sinondang ni portibi, parmahan na burju, hangongot,dohot dalan hasintongan, harani nada ganggu be rohanta laho mangihutkon Ibana.  Pdt. H. Nainggolan, STh Pdt. GKPA  Resort  Batam