Jamita Minggu, 14 Agustus 2011: Jesaya 2 : 1-5

”Bagas ni TUHAN ANGKON JONGJONG PATAR DI ARI PARPUDI” HATORANGAN NI JAMITA MINGGU 8 DUNG TRINITATIS  MINGGU, 14 AGUSTUS 2011 Jamita : Jesaya 2 : 1-5                     Sibasaon : Epesus 5 : 8-14 A.    PATUJOLONA          Buku on digoari hombar tu goar ni panurirang godang, panyurat na mangolu dohot mangkobasi di Jerusalem di bagian paduahon abad pasalapankon andorang so Masehi. Isi ni baritana dibagi dibagasan tolu bagian: 1.   Ponggol 1--39 marasal sian zaman hatiha Juda, harajaan selatan, diancam halak Asyur, negara tetangga mansai gogo. Disadari si Jesayas do bahaso satutuna na mangancam ngolu ni halak Juda nada gogo ni halak Asyur, tapi dosa ni bangso i sandiri do i, naso mangoloi dohot hurang porsaya tu Debata. Marhite hata dohot pambaenan, panurirang Jesayas mandorong  rayat dohot angka pamimpin anso mangolu mangihutkon hagiot ni Tuhan jana marlaku adil. Di paingot ia do bahaso umat ni Tuhan angkon cilako dohot hona pusa muda so ra  manangihon Tuhan. Jesayas manurirangkon pardamean ni dunia dohot haroro  ni Raja na dihalungunkon. 2.   Ponggol 40--55 marasal sian masa pambuangan halak Juda di Babel.  Halahi dibagasan ate-ate na maronco so marpangkirimon.  Si Jesayas mamaritahon bahaso na sadia honok nari paluaon ni Debata ma umat-Na jana maroban halahi mulak tu Jerusalem, laho mamungka ngaolu naimbaru. Tema penting bagian on ima: Debata do Tuhan na  manguasai sejarah, dohot Ia manyangkapi mangutus umat-Na tu sude bangso anso di pasu-pasu marhite halak Israel.  Ayat-ayat taringot tu  "Naposo ni Tuhan" gabe sada bagian na mansai terkenal sian Parjanjian Na Honok. 3.   Ponggol 56--66 Umbahat ditujuhon tu bangso nadung mulak di Jerusalem.  Porlu halahi dipatogu bahaso gohan ni Debata do janji-Na tu bangso i.  Parhatian khusus diarahon tu cara ngolu na bonar dohot ha adilan; songoni cara mamertahon ari Sabat, manghaulkon kurban dhot tangiang.  Ayat-ayat na poerlu  ima ponggol  61:1-2 na dipake Yesus laho manyatahon pamioon-Na hatiha Ia mamungka pangkobasion-Na di Portibion.        Turpuk on  marpardomuan tu bagian parjolo na marisihon tona tu Suku Juda dohot Jerusalem taringot tu nagiot masa tu bagas ni Tuhan di ari na parpudi (2 : 1--5) B. IMPOLA JAMITA : Jesaya  2 : 1 – 5 I.       BAGAS NI TUHAN ANGKON PATAR DI ARI NA PARPUDI  (ay. 1-2) Tona on dipasahat tu marga Juda na manggambarhon garis rumpun pomparan keluarga Mesias (na tarpasu-pasu). Jana Jerusalem songon pusat Kota Kanaan na di pasahat ni Debata tu bangso Israel. 1.     Dolok inganan ni bagas ni Tuhan angkon jongjong di julu ni angka dolok,  jana tardas di ginnjang di angka dolok. Manggambarkon hajongjongan na strategis na manyalpui/ mangalobi i angka tempat ibadah na asing.  Didok angkon tarjadi di ari na parpudi, patorangkon lumba-lumba taringot na giot masa di ari na giot ro. Sada hapastian naso tarambati panggohionna dibaen sian Tuhan harorona ! 2.     Hajongjongan ni bagas ni Tuhan na tardas jana strategis i, mandorong angka bangso ro marudur manopotna (ay.2 kalimat parujung). Æ Sude keadaan on patorangkon arga ni bagas ni Tuhan secara fisik (gedung) songoni secara partondion/ rohani na ditujuhon tu Parlagutan ni halak naporsaya. Marhajongjongan di inganan juluan na gumincat, jana tardas manyalpui angka tempat ibadah na asing.  Harani hajong-jongan Bagas ni Tuhan nadenggan i gabe manarik halak/ bangso ro marudur anso marsuo jana marsaor dohot Tuhan. II.SASOARA MAMIOHON TU DOLOK NI  TUHAN MANJAGIT PANGAJARAN   (ay. 3) 1.     Manangkok ma hita tu dolok ni Tuhan, dolok Sion, dolok na marbenteng. Goar na asing laho manggoari Jerusalem dohot pangisina na dipasu-pasu. Ajakan on di dasari pangantusion nadenggan taringot tu fungsi Bagas ni Tuhan na mangalehen pangajaran na patut baenon dohot dalan siihutkonon jana marsaulihon pasu-pasu artina: mur patar ma muse on marhite tritugas Gereja: Parsaoran = Koinonia, Panghobasion= Diakonia dohot Hasaksian= Marturia !’Ä khususna dung di Parjanjian Naimbaruà    2.     Ditegashon do muse na sian Jerusalem dohot Sion do asal ni poda ni Tuhan.  Martujuan patorangkon hakhususan ni bangso Juda songon bangso na dipio dohot dipili ni Tuhan. Æ Sianon taida hasadaon ni soara laho mangajak halak anso ro t u Bagas ni Tuhan manjagit pangajaran dohot mananda dalan siihutkonon jana marsaulihon pasu-pasu.  Jana  panandaion na tangkas di posisi ni Dolok ni Tuhan, dolok Sion dohot Jerusalem ro di pangisina na dipasu-pasu. III.      BANGSO NI TUHAN GABE PANGUHUM & JURI DI TONGA NI ANGKA BANGSO  (ay. 4-5) Dison di patorang tugas ni bangso ni Tuhan songon panguhumi di tonga-tonga ni angka bangso dohot juri tu marga ni bahat bangso. Sada fungsi na manontuhon penilaian dohot na mandabu uhuman. 1.     Tugas manguhumi dohot manjuri i sian bangso ni Tuhan tu bangso na asing. 2.     Maruba fungsi ni podang gabe mata ni bajak jana tombak gabe piso cukur. Harana nada be masa porang antar bangso jana nada porlu marsiajar marporang. Sudena on dihasilhon ngolo namardame hara nadung marsiajar sian hata ni Tuhan jana mangihutkon panoguon di dalan hagiot ni Tuhan. 3.       Pomparan ni si Jakob di ajak mardalan dibagasan sondang ni Tuhan. Artina anso sudena pomparan ni si Jakob jana nada hum marga Juda sajo dapot sondang panuturion dohot pasu-pasu hadameon sian Tuhan. Æ Dison tarida ma peran ngolu ni bangso ni Tuhan/ halak na porsaya na manyirai dohot manyondangi bangso na asing anso dohot marsaulihon dame dohot pasu-pasu sian Tuhan. C. HAHONAAN NI JAMITA : Jesaya  2 : 1 – 5 01.    Turpuk on sada panurirangon taringot tu na giot masa tu marga Juda di masa na giot ro, jana madung digohi sabagian di masa sannari tu marga Juda dohot tu ganup naporsaya; khususna marhite dohot dibagasan Kristus Sipalua Jolma naporsaya. 02.    Bagas ni Tuhan angkon patar ni ari na parpudi: bisa do diastui on dibagasan dua pangartian ima bagas secara fisik/ gedung gereja dohot bagas secara partondion ima jolma naporsaya nagabe bagas ni Debata. Hapapatar i dipatardas marhite nadung tarsilang Jesus di dolok Golgotha laho paluahon pardosa nagabe porsaya. Patar manyalpui sanga mangalobi i dolok na asing artina sada halobian na punjung jana strategis giot diharoani halak laho manangihon pangajaran sian Tuhan. 03.    Najadi masalah hatihaon jotjot hajongjongan ni Gareja dohot pangisina solot jana buni sian panatapon ni halak nabahat, gabe inda manarik jonohan dohotan ni halahi (dao sian hapataron). 04.    Biado muse pengaruh ni kehadiran ni haporsayaanta di humaliang sasoara do mambeta-betai halak anso manangkok tu dolok bagas ni Tuhan ? Sanga betak nagabe hita do pangambati halak rot u bagas ni Tuhan marhite  pangkataion dohot parkarejoan na so mardai (harani na maralo pandohan dohot pangalaho) di tonga ni jolma humaliang hita ? Taparade ma dirinta gabe panggohion hapapatar ni bagas ni Tuhan. 05.    Ngolu nadung mardame dohot Tuhan gabe mambaen ganup naporsaya margogo maroban dohot mangadongkon pardamean; jana dipake Debata muse martugas parsidohot manguhumi dohot manjuri i angka bangso. Peralatan porang (podang) pe gabe maruba  tu hagunaan gabe piso cukur. Sudeon dapot naporsaya dibagasan pertumbuhan ni ngoluna na torus dibohali parsiajaran hata ni Tuhan. Antong taparayak ma ngolu dame, anso dohot hita sioban dame tu halak na so mardame dope harani ihot-ihot ni dosa. Amen. Horas ma di hita sudena Pdt. B. N a i n g g o l a n , M.T h GKPA Resort Tanotombangan  Email: rev.bnainggolan@yahoo.com