Selasa, 02 Agustus 2011

Bacaan Minggu, 31 Juli 2011: Mateus 28 : 16-20

widgeo.net
PARENTA LAHO MAMARITAHON JAMITA NA DENGGAN


HATORANGAN NI SIBASAON

MINGGU 6 DUNG TRINITATIS 
MINGGU, 31 JULI 2011

Jamita : Pangarataion 7:6-12
Sibasaon : Mateus 28 : 16-20


Patujolo

Mamungka Tuhan Jesus manjou dohot mangajari angka anak siseanNa i fokus do pangajaranNia tu harajaon ni Debata naung ro ditonga-tonga ni portibion. Hataridaan ni harajaan i ima dibagasan hadirionNia. Marragam do metode ni Tuhan Jesus laho mamodahon harajaan banua ginjang nadung diobanNia i. Dipodahon Ia do i dohot cara na mangungkapkon parumpamaan, dohot cara mandohoti parkarejoan ni angka halak natorop lalu tu na terlibat di bagas joro ni Debata.

Isi/Bohal ni Parjamita
Ayat 16-18: Huaso Banua Ginjang

Saleleng Tuhan Jesus rap dohot anak siseanNai mangajarkon taringot tu Debata dibagasan hadirionNa sosot do diparateatehon angka anak sisean i cara hidupNia. Nangpe songon i bahat do naso diastui angka anak sisean i aha na dipikiran ni Tuhan Jesus. Hususna taringot tu hamamate, hangongot dohot hagogoon na dijagit ni Tuhan Jesus sian Debata.
Dilumbahon Jesus do tu angka anak siseanNai bahaso disada tingki na angkon pasuo halahi di dolok na adong di Galilea. Terjadi do tutu sisongon i, dung mulak mangolu Jesus sian hamatean pasuo do halahi di dolok Galilea hape sopola adong be nian dipikiran ni angka anak sisean i marningot hata ni Tuhan Jesus na mandok sisongon i. Dibagasan roha ni angka anak sisean i, Ia Tuhan Jesus madung mate, muda pe hehe sian tanoman i ndada pola sai manghirim be halahi pasuo dohot Tuhan Jesus.
Andorong so lalu dope halahi tu dolok i madung parjolo Tuhan Jesus lalu tu inganan i. Tutu si tutu do nadihobarkon ni Jesus naoni. Longang do roha ni anak siseani jala manungkap do halahi manyomba Tuhan Jesus paboa na tutu situtu do halahi tunduk tu Guru Godang i.
Mangihut tu ayat 17b adong dope sian tonga-tonga ni anak sisean ni Jesus si sabolas halak i. (Judas sudah bunuh diri) na ganggu taringot tu kehadiran ni Jesus di tingki i. Diboto Tuhan Jesus do kesangsian dohot ketergangguan ni roha ni anak siseanNai. Mangadu na di roha dohot paposhon roha ni na ganggui didok Jesus ma hataNa, ”sude kuaso na di banua ginjang dohot di tano on, madung dipasahat tu Au.........”. Astuanna ulang be adong sian tonga-tonga ni anak siseanNai na ganggu dikuaso naadong di bagasan hadirion ni Tuhan Jesus harana haru hagogoon banua ginjang pe madung dipasahat tu Jesus.
Sasintongna sugari tutu si tutu anak sisean Na i porsaya tu Jesus naung hehe sian tanomannai sekalius porsaya doi tu hagogoon ni Debata naung dipasat tu Tuhan Jesus. Baen hogogoon ni Debata na mian di hadirion ni Jesus do markarejo baen na bolas Jesus kehe sian tanoman i.

Ayat 19-20 : Kehe ma hamu tu sude
                      bangso
Parenta ni Tuhan Jesus tu angka anak siseanNai anso kehe halahi tu sude luat portibion. Karejo ni halahi ima laho mangajarkon taringot tu Tuhan Jesus naung ro tu portibion maroban harajaon banua ginjang. HuasoNai adong di bagasan hadirionNa i ma napaluahon sandok na porsaya sian kuaso ni sibolis, kuaso ni hamatean, manaluhon kuaso ni portibi.
Harapan ni Tuhan Jesus anso sude bangso manyomba Debata marhite-hite goarNa.Anso gabe si ihutkon Jesus ma sude angka nadung mambege barita na Uli i. Muda dung dijagit halahi Jesus sipalua angkon didihoni anak siseani ma halahi dibagasan goar ni Debata Ama, AnakNa Tuhan Jesus Kristus dohot tondi Parbadia.
Dipaingot Tuhan Jesus do angka anak siseanNai anso laing dipodahon tu angka na ra manjagit Tuhan Jesus si anso gabe sioban parenta dohot na ra mangkarejohon aturan ni Tuhan Jesus halahi. Ima parenta na dipodahon ni Tuhan Jesus tu anak siseanNai. Ia impola ni poda ni Jesus ima laho mangkaholongi Debata dohot mangkaholingi dongan jolma. Mangkaholongi musu, mambaen na denggan alo ni na jahat,dohot angka naasing.

Jaminan na dilehen ni Tuhan Jesus tu angka anak siseanNai anso ulang adong ganggu ni roha nihalahi laho padalankon karejo na dipasahat ni Jesus tu halahi harana sai donganan ni Tuhan Jesus do halahi sahat rodi ujung ni portibion. Gogo nasian banua ginjang secara otomatis do mandongani angka anak sisean i dinamangkarejohon karejo hombar tu na dipasahat ni Tuhan Jesus tu halahi.

Pangarimpunan
Parenta ni Tuhan Jesus anso disegala abad, di sude inganan gabe siparjamita ma sude angka jolma naung porsaya tu hagogoon ni harajaan banua ginjang naung di oban Nia tu portibion.
Astuanna, lalu do sahat tu sadarion di ingananta be anso si parjamita ma hita tu lingkunganta. Impola ni jamitanta napataridahon gogo ni Debata dibagasan Jesus Kristus tongtong markarejo di bagasan ngolunta.

Marjamita nada na gabe ingkon pandita, sintua sanga guru huria dna, sude do hita naporsaya tu Jesus angkon gabe parjamita marhite-hite parenge na denggan. Harana jamita na sun do tajomna sikap ta nadenggan i, cara berfikirta nadenggan, cara pangkataionta na denggan. Jamita na tajom doi songon podang sidua baba. 
Antong songon sada anak sisean ni Tuhan Jesus ditingkion tapadenggan ma sude lapisan ni ngolunta anso maroban pengaruh nadenggan i tu dongan jolma di humaliang hita, Amin.

P.Siantar, 10 November 2010
Pdt.A.B.Marpaung, M.Min, MTh.

Tidak ada komentar:

Posting Komentar