Jamita Minggu, 21 Agustus 2011: Mateus 7 : 24-27

Na Pistar dohot na Bodo   HATORANGAN NI JAMITA MINGGU 9 DUNG TRINITATIS  MINGGU, 21 AGUSTUS 2011 Jamita : Mateus 7 : 24-27     Sibasaon : Masmur 40 : 9-12 Patujolo : Umpama ni Tuhan Jesus, i ma taringot tu dua halak na pajongjong bagas na, na di ginjang batu dohot sada nari bayo na pajongjong bagasna, diginjang pasir. Carito na sarupa taringot tu parumpamaan ni Tuhan Jesus, taligi di buku ni si Lukas pasal 6 ayat 48 ohot 49. Halak na pistar mambangun bagas na di ginjang batu, i ma manggombarhon halak na manangihon hata ni Tuhan huhut dikarejohon do dibagasan ngoluna hata ni Tuhan i. Muda halak na bodo, pajongjongkon bagas na di ginjang pasir, sarupo mai halak na manangihon hata ni Tuhan , tapi nada dikarejohon di bagasan ni ngoluna. Sada pondasi na bisa manahan angka goncangan dohot alogo na gogo, angkon di tanom di ginjang batu nada di ginjang pasir (inganan na dayuk) songon i ma ngolu ni jolma, angkon ditanom do haporsayaanna di bagasan hata ni Tuhan. Songon hata ni Tuhan mandok songon on, tapi gabe na patulus hata i ma hamu, ulang hum na manangi-nangi sajo anso ulang dipaoto-oto hamu dirimu. Hatorangan na : Na patulus hata ni Tuhan i, angkon songon sada usaha/mangkarejohon sian mula na lopus sahat salose/rampung na maroban hasil na bisa di banggahon dohot dipargunahon. Tutu, na mambangun sada bagas porlu adong perhitungan na tepat jana na matang. Mulai sian parsiapon modal tu bangunan i sandiri nang pe lokasi i sandiri di dia do na paling tepat bagas i di pajongjong. Parsaoran dohot Tuhan, dipa na marlinggom di sada bagas, ulang udan dohot lasniari. Pokok na ulang adong gangguan-gangguan sian luar tu nampuna bagasi gabe targanggu ketenanganna, na giot melaksanahon kegiatan siganup ari. Apalagi hita bandingkon tu halak na so adong bagasna, tarbiama bisa sonang ngoluna. Hata ni Tuhan na ta jagit, jana ta hangoluhon di bagasan ngolunta siganup ari, gabe jaminan ma i laho manghadapi angka gangguan-gangguan dohot tantangan-tantangan na ro sian luar ni dirinta sanga sian luar ni parsaoranta. Jadi masai porlu do taperhitungkon masak-masak ulang gabe tarulang apalagi marisuang sude na dung tapersiapkon dohot tahalojahon na pajongjong bagas i doskon tu haporsayaan tan a du ng hita perjuangkon sapanjang ni ngolunta, sian ias ni roha dohot sian roha na ias, satia hita na mandalankon hata ni Tuhan di sude panggulmiton ni ngolunta, on ma na nigoaran bagasta i na dung tapajongjong di ginjang batu na pir/kokoh mud ape ro udan, halisungsung, lasniari sangaaha pe tahe i nada gabe malua hita jana aman do hita berlindung/marlinggom di bagasan bagas i. Muda halak na bodo, na hurang do parhitungan na matang gabe fatal do akibat na di taon na. Bagas na di bangun di ginjang ni pasir, tarbia ma i togu manang kokoh na laho Manahan angka bencana alam na rot u bagas i?. Angka bencana alam jotjot tarjadi di luar ni dugaan sanga parhitungannta. Biar pe bagas i memakan biaya na godang, tapi muda pasir do na gabe pertahanan ni fondasi i, pasti do rumpak songon i ma, di patudos Tuhan Jesus tu halak na hum manangi-nangi sajo tu hata ni Tuhan i. Inda hot haporsayaan na, hata ni Tuhan disepelehon, ai Tuhan i sandiri do hata i (Joh 1 : 1). Antong na mamulak hata i dos ma i na manulak Tuhan i sandiri. Tontu muda ro do ujian i tu bagasan ngoluna, on ma halak na mura-mura mardandi, mandele jana inda pola gabe segan-segan ia marbalik sian haporsayaan na tu haporsayaan na asing bahkan gabe marhaposan tu gogo ni na adong di portibion do ibana. Hahonaan na : Bahat do jolma sannari, na so perduli be tu hajongjongan ni haporsayaan na. Pokok na adong ugamo na, adong haporsayaan na! sarupo ma i adong do bagas na tapi inda parduli ia didia do hajongjongan ni bagas na i, di inganan na karas (batu) sanga inganan na dayuk (pasir). Hita na dung gabe dakdanak ni Debata, tontu horong na pistar do hita horong na marbisuk, jana na dung parjambar do hita di ngolu na manontong i jadi, anso ulang sayang boti/parcuma haporsayaan na tahangoluhon na sahanok na on, si tutu ma tapatuduhon huhut takarejohon  di bagasan ni ngolunta siganup ari, muda ro pe ujian sian si bolis sanga sian portibion, na dung dipargogoi do hita di bahen Tuhan i marhite-hite TondiNa i. Amen. Pdt. DRP.Hutabarat GKPA-Res. Aek Bingke