Jumat, 12 November 2010

Cerminan: MANJAGIT TONGOSAN SIAN NA MATE

widgeo.net
MANJAGIT TONGOSAN
SIAN NA MATE




Di sada huta na so unjung dibege pingol goarna adong ma sada bagas na martarup ijuk. Bagas i holang sian bagas na asing. Suang songon naung tarbuang do bagas i idaon angke alamanna I ma songon gasgas na poso. Tolu halak do dakdanak dadaboru na so marina di si. Siangkaan goarna si rumondang, panggodangna tar jarajara ma i muda ni partundoskon tu manuk. Na paduahon margoar si Riris, panggodang ni i hirahira manuk na langkalangka indalu. Na ummenekna i si Mutiha  na ha bekbekanna mangatai songon pidong antarias di sangkarna.

Amang ni halahi mate di tampul halak hatiha manjago tobat borngin. Bidang ni tobat ni halahi i andok ni ama ni Marpulihodong i na sa bolak ni dano marsabut ma. Anggo inang ni halahi mate tinggang do hatiha mulak sian pancur. Dompak ni ngolu ni simatobang ni halahi, tardok paradongan ma halahi. Amang dohot inang ni halahi na ringgas do karejo dompak di ngoluna. Songon na masa on tar songon anggota ni Operasi Maduma amang ni halahi i.

Dung mate simatobang ni halahi, uda ni halahi doma manghalumang halahi. Tai rupa hum na giot mambuat arta i do udana i. Ujungna  disuru ma halahi mangulahi tu bagas ni halahi dung sun dihorussa artana i.

Jotjot do daganak na tolu i mangkihili urat ni lalat na nibolgang gabe daon rapar ni halahi baen hurang sidabuan. Koum sisolkot, ulang benidok dongan sahuta nadong na ra mangantureskon halahi. Di na sakotu dompak mardahan si Rumondang dibege ia ma rap tangis angginia i. Mambege i humalumpat ma ia mandapotkonsa. “Mahua hamu anggi nangkin, bia lakna baen na tangis hamu. Dia na hatcit anggi, adong he male hamu tonkinna i mangan ma hita da anggi. Hum simarata doma na so lampot”, ningia mangapoisa. Tai jaru pe songon i tong do didatdati angginia i na tangis.

Dung lolot dielek ia anginia i, ro ma si Riris mandok, “Sugari mangolu amanta sanga inanta angkang, nahe ma ditabusi na bajunai pakeon tu ari pesta songon na niobanna na dongan na sian poken nagkin.
Dipaboa halahi nangkin tu hai hape na haduan ma ari pesta, sorang ma Jesus di gareja ningi halahi. Pajojorkon ma halahi, hape hai na pajojorkon baen na so marama so marina  hita”, ningi angginia i tangis beutbeut muncungna i.

Mambege dangol ni hita ni angginia i, manyikur songon na niapus ni begu ma pangkilalaannia, songon na so jongjong di lante be pangarasaannia mambege hata ni angginia i, tai di papir ia rohania  lalu marhosa ginjang mandok “O Tuhanku !” Ditatap ia tu ginjang anso ulang jabat diida angginia i na marobak ilunia.
“Sobar hita anggi, bia baenon ma songonon on jolo siak ni paruntunganta. Dijaorkon amanta dohot inanta do hita anso sonang halahi modom di huta balianan, ulang be tangis hamu anggi. Muda dumpang hatihana dapot hita do bajumunu, asal ma tapupu na martangiang. Anggo hara ni pesta i dehe anggi, haru so dohot pe hita tusi diboto Jesus na sorang na nidokmunu i do i” ningia songon na posposkon roha ni angginia i.

Di na modom borngin i umpe sampeldep mata ni si Rumondang dapotan. Lingolingoan ia di hata ni anggiania i namandok “sugari mangolu amanta ma ditabusi ia bajunai. Haduan ari pesta ma… sorang ma Jesus di gareja” ninna. Hara ni hatcitna pangkilalaannia jabat do marbosar matania na tangis borngin i. Mapola jabat disarsari ia salendangnia giot panyingkotannia. Untung do manaili ia tu bohi ni angginia na lebaklebak modom i mambaen marulak pangarohania. Baen marsak dilala ia gabe tarpaida ma disia amang dohot inangnia i  ro mandapotkon ia.

“Amang inang hatcitna ooonn !” ningia mangangguk mambaen tarsunggul angginia na dua i.” Didia amang, didia inang angkaaaang !” ningia halahi mangambur mangaranggutkon si Rumondang di tonga borngin i. dihatiha na manyampiar i angginia i, ompot ma mago simatobangnia i.

Dapot manyogotna i dung simpul mangan, por ma roha ni si Mutiha mangaligi gambar ni Tuhan Jesus na sangkot di dorpi i. didokkon ia ma si Riris mambuatna. Dung dapot gambar i rap ma halahi mangaligisa. Tubu ma diroha ni halahi giot paiaskon kaco ni gambar i, tai harupe dipaias halahi sian duru laing holom do kacona i, dipio halahi ma si Rumondang  paboahon na so ra ias kaco ni gambar i.

“Angkon dibuka doda anggi kaco na on anso tarpaias sian bagasan muda na giot torang gambar i idaon” ningia lalu mangumpati pakuna i sian pudi, dung tabuka karotes na hapal (karton) langkop ni kaco na sian pudi i, jesss ninna madabu ma sada karotes na bontar marlompit opat tu ampuan ni si Rumondang. Dijomput jana dipamanat ia karotes i hape surat ni amangnia i do dijaha ia.

Isi ni surat i mandok , “Hudon Loyang inganan  ni hepeng dohot barang sere i di bara hambeng i do hutanom di toru ni tiang parsiambirang di taruma i” ninna. Humitir bohi ni si Rumondang manjahasa lalu mondok, “Ma indon inboan Jesus tongosan ni amanta dohot inanta naung mate i sibaenon tu ari pestanta ”ningia tu angginia i marsuapsuap ilu. Ujungna rap marsihaolan marsiummaan halahi na tolu rap tangis pasombu lungun haru pe hurang mangarti angginia i di astuan ni hatania i.

Dung sidung dipaias halahi gambar i, disangkotkon halahi mangulahi tu ingananna hian. Dung rap mundur ma halahi na tolu mundukunduk masuk tu bara  ni hambeng i manghuraki tano na donok tu tiang sangon na nidok ni surat i ma. Marnida i mangulahi ma rap tangis halahi di bara ni hambeng i hara ni jop ni rohana.

Isi ni hudon Loyang i hepeng karotes na sasibangke ma godangnna nirahutan dohot bonang manalu, tamba ni i barang sere dihalahi, lobi sian na patut pakeon ni halahi muda tu bagasna halahi museng.

Dapot ari pesta kehe ma halahi tu gareja iabo pe so dohot halahi pajojorkon. Na ditanda halak be halahi baen ma rap bujing be halahi. Pandita i ma parjolo mangkulingkon halahi dung sun sude nibagi lampet tu na torop dohot silua tu angka na mabalu.

“Hamu borungku na tolu ancogot noma nipatupa silua tu hamu baen nada adong be na lobi borngin on. Pos ma rohamunu inang” ningi pandita i tu halahi lalu manetekkon iluna mayolsoli rohana na so marningot daganak na tolu simanjujung na tinggal menek na so diingotnia i.
“Ulang pola marsak pandita i manyarihon hami. Ma hai jagit natuari tongosan ni amang dohot inang naung mate i dioban Jesus” ninna si Rumondang manatap mata ni pandita i.

Mambege hata ni si Rumondang i songon na diiris ma ateate ni pandita i dilalaia lalu bukbak iluna mangido sala anso mardame halahi baen borngin dame do ninna pandita i borngin i.

“Dame do rohanami panditanami. Tutu do na hudokkon i, madung hami jagit tongosan ni damang dohot dainang naung mate i dioban Jesus” ningia lalu paboahon na masa i tu halahi.

Mambege barita ni si Rumondang i sude na mambege marsiapus iluna boti marsitompuk andorana baen na so diantureskon ni halahi jolo na tolu tompaan ni Tuhan na marsiak bagi i salolotna on. Ujungna sude na saparlagutan i manjalang halahi na tolu. Tai bope songon i Selamat Ari Pesta ma di hita sude.

Tidak ada komentar:

Posting Komentar