Selasa, 09 November 2010

Khotbah Minggu, 7 Nopember 2010: Pangarataion 4 : 1 – 10

widgeo.net
INDA MARDIA IMBAR DI DEBATA

HATORANGAN NI JAMITA



MINGGU XXIII DUNG TRINITATIS 
MINGGU, 07 NOVEMBER 2010

Jamita : Pangarataion 4 : 1 – 10
Sibasaon : 2Johannes 1 : 1 – 6


 I.   Patujolo

Molo ta dok hasetiaan di bagasan ngolu ni jolma di masa si nuaeng, ra bahat do jolma nuaeng di bagasan ngoluna nada gabe jolma na setia be tu Debata di baen angka na masa di tonga-tonga ni parngoluanna songon contoh : Ra do jolma mangadis agama na hara ni kedudukan, jabatan, hamoraon (arto), parsahiton dohot angka lan asing. Tapi molo ta i da do angka na masa dohot na paling ngeri di pangkilaan di bagasan angka na porsaya pe sanga pe angka porhobas (Naposo) ni Debata pe saonari nada gabe setia be tu Debata hara ni angka na tabo di potibi on. Hape taboto do molo nada setia hita tu Debata  gabe hasesega do ujung na. Jana I do turpukta nuaeng I ma sada jamita ni si Musa na manyosoi anso Bangso Israel tongtong setia tu Debata di bagasan ngolu na anso dapotan hangoluan dohot tarpasu-pasu halahi.

II.   Hatorangan na
           
Ay. 1 – 6 “soso-soso anso setia bangso Israel dohot mangkarejohon na di bagasan parngoluanna”. Ima jamita na ni pasahat ni si Musa tu bangso i anso magoloi sude aturan na ni ajarkon nia hombar tu parenta ni Debata maradopkon bangso Israel, anso mangolu halahi jana bisa mangingani tano na giot si lehenon ni Debata di halahi. Jana di pagomos si Musa do i anso unang adong na manambai dohot na mangurangi parenta ni Debata ni i. Jana di ida hamu sandiri do sanga songon dia na di patupa ni Debata maradopkon halak na marsomba tu Baal di dolok peor gabe di pusa Debata do i. Bahkan anso bangso Israel pe patuluskon bope patidahon hasetiaan na I tu Debata marhite parngoluanna anso bangso na marnida tu aturan pe gabe mandok  “Na bisuk jana na pistar ma antong bangso na godang on”. Harana halak na setia tu Debata gabe laing mangolu do lopus saonnari. Tapi molo ta pahombar do tu angka na masa si saonnari hara ni angka hamaloon bope kekuasaan ni jolma bahat do na gabe manambai bope na mangurangi angka aturan (parenta) ni Debata hombar tu kepentingan pribadi sanga pe na porlu tu kepuasan pribadina. Hara ni i do anggo satutuna di hita nuaeng angkon mangulahi do hita mulak tu dasar (Bibel) anso dapot hita keaslian (hasintongan na). Antong molo ta tarik be ma jolo tu bagasan ni rohanta be: “Naso mabiar be luai angka jolma bope halak na porsaya, parhobas (Naposo) ni Debata nada tongtong setia tu Debata?. Hape sian turpuk ta on (ay. 3) mandok : dipusa Debata do angka na so setia i. Antong marema setia hita tongtong tu Debata jana unang be ta alo parenta ni Debata i anso dapotan hita hangoluan dohot pasupasu na. Jana tapatuduhon ma i sian angka pambaenanta, pangkulingta, parohaonta dohot angka parkarejoanta songon tanda hasetiaan tu Debata. Jana anso tarida sian i songon habisuhon dohot hapistaranta di angka jolma humaliangta.
Ay. 7 – 8 “ Anso mamparrohahon humaliang na, sanga songon dia do maradopkon Debata ?”. Di ay. 7 on disuru si Musa do bangso i mamparrohaon jana mangaligi angka bangso na asing bo pe bangso na godang: songon dia ma Debata maradopkon halahi?. Nada adong dapot bangso na asing songon na tu Bangso Israel donok ni Debata hatiha di haporluhon halahi Debata. I ma tarida do i, na dialusi ni Debata angka pio-pio ni bangso i mangido tolong sanga na sadihari pe i.Harana anggo di Bangso na asing nada adong aturan i na songon i tigor na. Jana tutu do i di hita angka na porsaya pe, donok sajo do Debata tu hita. Hara ni i molo ta sapai pe dirinta pribadi, biasi gabe songon au tung jotjot pe mangido marhite tangiangku songon naso di alusi ni Debata do?. Sudena i hara ni angka pambaenanta do i, ima na jotjot gabe mamundalkon Debata di bagasan angka parngoluanta sang ape hita do na jotjot maninggalkon Debata. I do jotjot ta bege angka pandohan ni halak na malo : “Anggo tangiang na dohot jamita na marapi purun do jana salangka na i do ma anso masuk tu harajaan ni Debata tapi anggo parrohaon dohot pangalahona gabe sipahantuson do”
Ay. 9 – 10 “parsuruhon anso maniop dibagasan ngoluna dohot anso mambaritahon barita i tu sude pomparanna taringot sude pambaenan ni Debata”. Di ajak si Musa do bangso i anso mangingot songon dia pambaenan ni Debata maradopkon halahi lumobi na haruar halahi sian tano Mesir dohot hatiha di halongonan na di Habincaran ni Batang Aek Jordan halahi dohot na jongjong halahi di haron ni Tuhan Debata di Dolok Sinai. Ima na marsuru bangso Israel anso marlagut jana anso manangihon, marsiajar dohot marpangoloion tu hata ni Debata sapanjang mangolu halahi jana anso di ajari halahi muse dohot angka dakdanakna. Sian on pe dipangido do tu hita anso tongtong ta ajarkon hata ni Tuhan i lopus tu angka pomparta jana anso unang mantak di tongan dalan pangajarion i sapanjangna. Harana Hata Ni Debata do na gabe hangoluan di hita jolma manusia dohot mambaen donok hita tu Debata.


Penutup.

1.             Hasetiaan tu Debata porlu do i tongtong tapartahankon di bagasan ngolunta si ganop ari anso bage dapotan hita hangoluan dohot pasu-pasuNa. Jana unang ma gabe songon bindoran hita mangaligi situasi gabe muba-uba di bagasan parngoluanna. Tapi ta ida ma songon sada panangga  ( anjing ) na sangat setia maradopkon tuanna. Hape, sada binatang malo do setia tu tuanna. Jana bia do hita maradopkon  Debatanta???. Antong tongtong ma hita setia tu Debata di sapanjang ni ngolunta anso unang gabe hona hita di pusa-pusa ni Debata.
2.             Taparrohahon ma jolo humaliangta dohot ngolunta, songon dia do Debata tu hita ?. Adong de he na mandao do hita sian Debata sanga Debata na mandao sian hita?. Nada jungada Debata mandao sian hita. Tongtong do Debata manyarihon hita di bagasan parngoluanta. Songon hata ni ende i na mandok: “pidong na martonga-tonga langit pe di sarihon Debata do apalagi mahita jolma na porsaya ?. Antong marema tabaen sarupa pangalahonta dohot parkarejoanta jana unang ma nian holan hum na di pamangan sajo hita mandok malo. Anso unang di dok tu hita “Manis di bibir lain di hati”.
3.             Hata ni Debata I ma tatangihon dohot taparsijari jana na gabe sitioponta tongtong na gabe sulu-sulu di ngolunta. Bahkan anso tongtong ta pasahat tu angka pomparanta anso dapotan halahi hangoluan nasian Debata. Bdk. Mateus 6 : 33 : “Sai Jumolo Ma Jalahi Hamu Harajaan Ni Debata doho hatigoranNa, jadi lehenonNia ma di hamu sasude na songon i”. Amen

Tidak ada komentar:

Posting Komentar