Selasa, 09 November 2010

Khotbah Minggu, 21 Nopember 2010: 2Korintus 5 : 1 – 10

widgeo.net
MANGOLU DI BAGASAN HAPORSAYAAN NA TOGU



HATORANGAN NI JAMITA

MINGGU UJUNG TAON NI PARHURIAON
MINGGU, 21 NOVEMBER 2010

Jamita : 2Korintus 5 : 1 – 10
Sibasaon : Yehezkiel 39 : 1 – 7 


Patujolo
Di huria Korintus masyarakat kristen hira bahat do na berlatar belakang Yunani-Gnostik (halak Yunani na mangasahon parbinotoanna laho manjalahi haluaan). Adong dua kelompok na muncul di tonga-tonga ni luhutan ni halahi. Na parjolo, i ma halak kristen na dung di babtis di bagasan goar ni Tuhan Yesus Kristus jala marhite babtisan i dirajumi do dirina naung dohot di bagasan hamamate ni Tuhan Yesus jala dohot muse ngot di bagasan hangongot ni Tuhan Yesus sian hamatean.
Harana naung mangolu halahi di bagasan Tuhan Yesus Kristus na badia i di rajumi halahi do naso berkuaso be dosa di bagasan diri ni halahi. Sehingga aha pe hajahaton na dikarejohon ni halahi nada margogo be i mengubah status ni halahi naung di pabadia ni Tuhan Yesus i. Pahamna lilu do paham on. Di bagasan surat ni si Petrus na padua nolihon pe pasuo do hita dohot latar belakang pemahaman na songon on songon i muse di surat ni si Paulus tu si Timotius tarida do upaya antisi pasi ni si Paulus anso ulang terpengeruh si Timotius tu paham si songon i. Di surat Petrus di goari do halahi guru-guru pargabus angke diajarkon halahi pangajaran na sala na so hea diajarkon Tuhan Yesus dohot angka anak siseanNa.
Kelompok na paduahon, i ma halak na porsaya di bagasan Tuhan Yesus Kristus na memahami naso tola sohot, menikah, marbagas/muli, kawin. Angka naung terlanjur kawin ingkon sirang ma i. Latar belakang pemikiran on marojahan tu pemahaman bahaso pernikahan, perkawinan i selalu berbarengan dohot sex, sementara sex dipahami secara kaku, nang pe sex ni angka na marsaripe dipahami doi hal na kotor, dosa, mangambati angka na denggan.
Di sisi na asing muda didongkon halak kristen ditandai do i marhite-hite na manjagit pandidion jala pandidion i dianggap naung pabadiahon jolma. Jolma naung dipabadia nada tola mangkotori dirina termasuk mai tindakan sex. Nang pe angka naung kawin di bagasan hakaristenon harana dianggap do dosa i. Konsekuensina termasuk naung menikah ingkon gabe sirang. Balik ni pemahaman na bebas sian kelompok na parjolo i ma pemahaman ni kelompok na paduahon on.
Di sisi na asing muse marungkil do Si Paulus laho mangadopi huria Korintus angke bahat do halak kristen na di si na so mangoku i harasulon ni Paulus, didongkon do ibana na so malo mangkatai, na hurang terampil markarejo, jolma na membebani huria. Persoalan-persoalan na masa di huria Korintus i ma na berkaitan tu soal sex, perkawinan, sipanganon na halal dohot na haram, pakean ni angka dadaboru tu ibadah, soal silehen-lehen na badia tu angka jolma, bahasa roh, dohot angka na asing. Hara ni i bahat do usaha na di patupa ni si Paulus laho paingotkon huria i anso gabe ruas na badia, na mardame, na toruk roha halahi lumobi sian i anso gabe huria na mansohot halahi di pangajaran na sintong i ma pangajaran na sian Tuhan Yesus.

Hatorangan/Bohal ni Parjamita

Ayat 1-5: Bagas Na Badia
Dipatorang si Paulus do bahaso pamatangta si saonnari on   i ma songon sada bandar na marasal sian portibi on. Saleleng taingani bandar i jotjot ma i ro angka holso na bersifat portipi juo isarana holso na nionjar ni angka parungkilon hara ni maolna laho manghureskon ngolu-ngolu siganop ari.
Di balik ni i dipatorang si Paulus do muse bahaso adong do bandar na sian Debata. Bandar na sian Debata nada jadijadian ni jolma i, nada ra sego bandar i, nada adong disi na hurang hara ni i nada hea tarbege di si holso ni angka jolma, nada adong di si boban na borat, inganan ni patang na sian banua ginjang do bandar i. Tangkas do di haporsayai angka halak naung magoku kristen bagas dohot pamatang na sian Debata i harani i diigil roha ni jolma i do nian anso sai soluk ro pamatang na sian Banua Ginjang i tu bandar na di portibion. I do pangkirimon ni jolma tu haroro ni pamatang dohot bandar na indohan tapi laing na so hea do pe ro lalu tu sadari on harana ambat do pangalaho na jorbut sian hadirion ni jolma mangambati haroro ni pamatang dohot bagas na badia i.
Ia pamatang dohot bandar banua ginjang i sada gambaran si tujuon ni angka halak na porsaya tu Tuhan Debata di bagasan Tuhan Yesus Kristus do i. Ulang gabe ganggu jolma di hasintongan ni inganan si tujuon i dilehen Debata do TondiNa Tondi Parbadia tu portibi on  laho manjamin  habadiaon ni jolma anso margogo muse halahi maralohon angka haramunon di portibi on anso ditingkina bisa jolma i mardongan habadiaon masuk tu inganan habadiaon na di banua Ginjangi.

Ayat 6-8: Malua sian hagiot ni daging
Jolma na porsaya tu Hata ni Debata tongtong do i marpanghirimon di ujung ni ngoluna ingkon lalu tu inganan bagas na sian Debata harana di rajumi haporsayaan ni jolma i do bahaso di ujung ni ngoluna do puncut ni perjuangan ni haporsayaanna laho menentukan masuk sanga inda tu bagas Habadiaon ni Debata. Saleleng di portibion dirajumi do dirina na tinggal di duru ni Bagas Ni Debata. Astuanna ise pe sian tonga-tonga ni huria na sai tongtong mangoku di bagasan pangajaran portibi nanpahombar tu hagiot ni pamatang dope i jala jolma parduru dope gambaran ni i.
Satutu na nada hea dope tarida Bagas Ni Debata secara pisik haporsayaan ni jolma do na mampu marnida dohot manyanksihon i angke sai marguru tu hasintongan ni Hata Ni Debata jolma i (hita) angka na porsaya tu Debata. Angka halak na marguru tu hasintongan ni Hata ni Debata nada marguru tu natarida sajo haporsayaan ni i jala jop do roha ni halahi sugari sura bisa malua sian bagasan hagiot ni pardagingon, pamatang portibion anso masuk halahi tu inganan ni Debata na sai marhagiot tu Hata dohot parsaoran Ni Debata. 

Ayat 9-10: Parayak ma sonang ni Roha Ni Debata
Tangkas do pangajaran ni si Paulus bahaso porlu situtu do parayakhon sikap tu hagiot ni Debata angke i do hadirion ni haporsayaan na sintong, hadirion ni halak na malungun laho rap dohot Debata di bagasan Bagas Na Badia. Sikap na hombar tu hagiot ni Debata nada hum di Bagas Ni Debata na bisa mangkarejohon i. Tangkas do didongkon si Paulus bahaso saleleng tinggal hita di bagasta na di portibion sangat do bahatna kesempatan, peluang di hita laho mangkarejohon parkarejoan na denggan na parayakhon hita laho masuk tu Bagas Habadiaon Ni Debata di Banua Ginjang.
Muda tapahami arti ni pangalaho na pahombar tu hagiot ni Debata i ma angka pangalaho na padaohon sian ragam ni naso suman dijolo Ni Debata jala pahombar parkarejoan tu hagiot ni Debata. Di janjihon Debata do angka upa na sumurung sijagiton ni angka na mangkarejohon angka karejo na denggan dijolo ni Debata. Upa na dijanjihon Ni Debata tu angka siulahon na denggan i ingkon pasahatonNa ma i di ari panguhumani harana pajongjongon do jolma i di jolo ni Tuhan Yesus Kristus di ari paruhuman i huhut paadophon jolma i tu timbangan parbuatanna na denggan dohot na jat di tingki ni ngoluna. Angka na denggan jala na burju roha dapotan upa ma i sian Tuhan Yesus Kristus satontang tu pambaenanna. Gabe porlu do hape mangkarejohon angka na denggan saleleng mangolu hita di portibion.

Pangarimpunan
Muda tutu situtu do hita porsaya tu Debata tapatuduhon ma i marhite-hite pambaenan na rumang di jolo ni Debata dohot di jolo ni dongan jolma. Angka jolma na porsaya tu hata Ni Debata jala mangulahonsa di bagasan habadiaon, di bagasan ketulusan dapaotan upa ma halai satontang tu parulaonna. Antong harana nada marugi hita mambaen na denggan i takarejohon ma karejo na denggan di joloni dongan jolma dohot di jolo ni Debata. Amin.


Pematangsiantar, 2 Maret  2010.

Pdt. Adolv B. Marpaung, M.Min., MTh.
Pdt.GKPA Resort P.Siantar

Tidak ada komentar:

Posting Komentar