Bacaan Minggu, 26 April 2015: Masmur 23:1-6

MANGHAGODANGKON DOHOT MANGHATINDANGKON KUASO NI TUHAN. Masmur 23. Minggu, 26 April 2015 PATUJOLO. T urpuk on bolas dohonon nadung marpupu jana marulakulak tabege. Harani jotjotna dibege turpuk on, mabahat angka dongan mangubah sangape mangaransemen gabe sada logu bope marhite koor sangape ende huria. Bahkan adong dope na mamili turpuk on gabe ayat emas (hasoloman ni rohana). Natutu ma memang i. Molo taparrohahon do turpuk on, mansai luar biasa do hape sonangna  namangolu i dibagasan parmahanion ni Tuhan. Dihatindangkon si Daud do hadirion ni Debata songon siparmahan nadenggan, namarpanyarihon di sude angka naporlu tu biri-birina ( 1-4 ) dohot songon Suhut Sihabolonan (tuan rumah) sanga partamu napatupahon sada pesta, nause rohana paradehon sipanganon natumabo tu angka tamuna, lopus tu na mangondihon tamuna i sian angka mususna (5-6). HATORANGAN NI ANGKA AYAT. 1.      Jahowa do Siparmahan di au. Ninna pamasmur i. Muda ta ida di bible ta i, holan si Daud do ima pamasmur on dohot si Josep (Pamungkaan 48:15) na jungada manghatindangkon bahaso Debata do siparmahan di ibana salolot di ngoluna. Dibagasan parmahanion ni Debata, dipangkilalahon ibana do nada adong na hurang. Songon sada biri-biri di habanan na diparmahan ni Debata, nada adong haporluannna na so digohi. Sude tupa. Muda sahalak parmahan di dunia Timur, gambaran ni sada hagogoon do i. Angke ingkon bersedia do parmahan i paradehon dohot patupahon sude na ringkot di angka na pinarmahanna anso denggan biri-biri i dapotan ngolu. Harani i do tudosan ni parmahan di honahon tu angka raja di dunia Timur, tarmasuk di tonga-tonga ni halak Israel dung marraja sandiri halahi. Harani na Debata do siparmahan ni pemasmur i gabe nada holsoan be ia di ngoluna, angke sude naringkot gabe tupa. Inda porlu mabiar taringot tu ngolu on. 2.      Sai dipili parmahan i do na dumenggan tu habanan ni biri-birina, i ma jampalan nalumomak laho jampalanna dohot aek hasonangan ( batang aek nasopola doras pardalanna) laho parminumanna. Sai dihalungunkon angka biri-biri do jampalan na lumomak, anso mura butong jana dung butong mura ma muse laho modom-modom mangalap hosa. Tontu suhar-suhar ni ima jampalan naharsang sanga parhorsihan, ima inganan nagok abu. Tamba ni i mansai lambok jana tenang do aek na nipatopet ni parmahan i tu biri-birina, nada aek namarsasak mangganggu hadameon bope  ketenangan (purpur). 3.      Di naloja pangkilalaan ni pamasmur i dipaulak Debata do gogona (dipaulak hosa nadung loja) gabe margogo (segar ) ma muse pangkilalaanna. Tamba ni i ditogu do ibana di dalan hatigoran, ima dalan na tigor na mura didalani angka biri-birina. Dihalungunkon biri-biri do perhatian na tangkas sian parmahanna tingki di togu mandalani sidalananna anso ulang adong nalilu sangape mago. Panogu-noguono i nada mamake  hagogoon na mamaksa (kekerasan) tapi sudena  dipatupa Debata hara ni GoarNa. Bako ni Debata i ma sipangurupi jana parmahan. Harani i mansai sonang do roha ni pamasmur dibagasan pangaramotion ni Debata na tong-tong manyarihon, manogu-nogu dohot mangondihon ibana. 4.      Ia di dalan si bolusonna i, mansai bahat do angka parmaraan. Rura na golap jana marbengkukbengkuk, jarang dibolus jolma (hurmuk) bisa jadi mambondut ibana tu hamatean. Tapi harupe songon i nada mabiar ibana. Nada dihabiari bahat ni angka parmaraan na sai talpe mangonggop ibana. Tarida hita do i dipandohan ni pamasmur on: Angke Ho do mandongani au, tungkotmu . Dison, muba ma gambaran ni Tuhan sian si Parmahan gabe sada suhut sihabolonan sanga partamu na sai burju manjaluangi angka tamu sanga angka halak na hona ayak-ayak ni angka musuna, na ro maporus manjalahi parlinggoman tu bagasna. Mansai buas do nampuna bagas i paradehon meja inganan ni sipanganon di pamasmur i. Harani sonang ni pangkilalaanna, gabe tarbaen ibana ma marhasonangan laho mangaakon sipanganon sian meja ni nampuna bagas i, so pola mabiar be maradopkon musu. Bagas ni Tuhan ido na bisa haporusan ni angka na hona ayak-ayak di portibi on. Songon na nialaman ni pamasmur i, dijagohon Tuhan i  do nasa na ro angka tamu tu bagasna. Meja sanga lage manigor dipahembang, suk-suk angka sipanganon dihobasi, panginuman digohi ganop tongkin. Dipengalaman na songon i, tangkas ma dihilala pamasmur denggan basa dohot asi ni roha paihut-ihut ibana saleleng mangolu. Painte so i, holan musu do na mangayak-ayak ibana gabe so marhasoan. Tapi dung mian ibana dibagasan parsaoran dohot Tuhan i, di tonga-tonga ni bagasna, denggan basa ni Tuhan i noma na manggohi rohana. Di si tangkas ma dialami ibana haroro ni Tuhan songon parmahan, songon partamu na buas jana pangondian. SIPAHUSORHUSORON 1.      Panindangion ni pamasmur on, madung digohi dibagasan Jesus Kristus. Ibana do Parmahan na denggan roha (Joh. 10:1-29), jana partamu nabuas maradopkon hita parlagutanNa. Dibaen i nada hum holong parmahanion ni Yesus  na diaga-bagahon ni pamasmur on, tapi dohot do haburjuonNa martamu songon suhut sihabolonan na marpanyarihon. Dibagasan diri ni Jesus panganon na manongtong ro di salolot ni lolotna bisa ma daionta songon na ni dok ni Jesus tu angka Siseanna; 2.      Hasaksian ni pamasmur on, ima nian na gabe hasaksianta, marhite na ra hita diparmahani Jesus di ngolu on. Ibana do parmahan na denggan na mamboto, mananda dohot na pasingkop na tahaporluhon. Tangi ma hita di soarana na manguluhon hita dipardalananta anso unang adong na manyimbil sian habanan i. Sandok, muda rap dohot Jesus bisa ma sonang rohanta, tentram dohot tondinta. Pdt. Anton Pakpahan GKPA HURASE