Bacaan Minggu, 31 Mei 2015: Wahyu 4:1-11

MAHULIGIN DEBATA Halumbaan 4:1-11 PATUJOLO T aon 90-98 M dibagasan hamaolon do halak naporsaya. Kaisar Romawi manontuhon sada aturan namansai kejam ima anso marsomba tu sia dohot tu dewa-dewa na disomba nia, muda inda ra mangihutkon parenta i bunuon ma i. Di hatihai dipake Debata do si Johanes, ima na gabe panurirang. Si Johanes ima sada rasul namanaon parhancitan hara ni kekejaman ni kekaisaran Romawi, tapi diginjang ni sude na ditaon nia i tongtong do Debata mandongani ngolu nia. Dipataridahon Debata do diriNa tu sia. HATORANGAN Naparjolo di halumbaoan pasal 4 on dipatorang si Johanes do ima pangaliginan nia dohot parnibegean nia taringot tu sada habangsa. Tarbuka pintu dibanua ginjang jana dibege ia ma hata namandok: "manaek ma ho tuson jana patidahononku ma tu ho sanga aha nagiot tulus dung salpu on". Dibagasan bahasa Indonesia habangsa diterjemahkon dohot takhta. Takhta ima sada simbol namanggambarkon kedudukan sangape kekuasaaan. Dibagasan hata Yunani tahta diartihon dohot hata 'tronos'. Tronos dikitab Wahyu tarida 47 kali, pengertianna inda holan mangacu tu takhta ni Debata tetapi dohot muse do mengacu tu tahta ni si bolis (Pasal 2:13). Hataridaan ni habangsa na di tuliskon di ayat 2 dipatorang adong sahalak najuguk di si. Na dipatorang taringot tu najuguk i ima bohina marsinondang songon intan Jaspis dohot sardes. Intan Jaspis ima batu namararga, biasana dipake angka dadaboru dohot digadis jana arga do i. Nada didokkon sanga ise nadihabangsa i, tapi digombarkon muse do nadihaliangi halibutongan songon zamrud do habangsa i. Natarida sian na dipaorang nisi Johannes ima taringot tu keindahan ni Tuhan dohot hamuliaon ni Tuhan. Di Jerusalem baru dihatai do taringot tu intan Jaspis; dihatiha nadipajojor si Johanes hajegeson ni Jerusalem didokkon ia"marsilo-silo do kota i idaon songon batu simata naum jeges, songon batu simata jaspis ias songon kristal. (Halumbaan 21:11). Sinondang i marsilo-silo mamancarkon warna na jeges, ima sada tudosan namanggambarkon hajegeson ni hamuliaon ni Tuhan. Hajegeson i ima sinondang naso bisa dijonohi harana sian Tuhan do i, nada sahalakpe na tola mangaliginsa (1 Timoteus 6:16). Tapi harupe songoni dilehen Debata do asi ni rohana namarhataridaan ma i marhite simbol halibutongan namanghaliangi habangsa i namaratusan ma i asi ni roha. Dipabotohon muse habangsa i dihaliangi dua pulu opat habangsa martingko manghaliangi habangsa i jana juguk do dua pulu opat angka pangituai marpakean na bontar jana martuku sere. Halak namartuku sere biasana ima halak na monang, harana tuku sangape mahkota sangape 'stephanoi' dilehen tu halak na dung monang do i. Posisi parjuguk ni angka pangitua i menggambarkan kehormatan, ketenangan dan kepuasan. Tarlumobi ma i pataridahon hubungan na jonok tunampuna habangsa i. Songon angka nadipamonang ni Dabata do angka pangitua i, tarbaen halahi juguk manghaliangi habangsa i. Dibalik nihataridaan ni hajegeson ni habangsa i di ida si Johanes muse do mangaronggur habangsa i jana marsinondang songon sinondang ni hilap namarnyala-nyala. Hataridaon najorbut di paadop tu angka naporsaya songon sada hataridaan ni hadaulaton ni parkarejoan ni Debata na maol antusan ni jolma namangsahon angka pikiranna; adong najeges, adong najorbut. Hataridaan ni Tondi Parbadia na pitu i, dipajojor ima namaringanan di jolo ni ni habangsa i. Hataridaan ni Tondi i ima mengacu tu kesempurnaan dohot tu pemenuhan ni sude parkarejoan ni tondi i. Adong muse do tarsongon laut sorminan maringanan muse do i di jolo ni habangsa i, lan songon kristal. Disuratkon sahalak napistar do taringot tu pangantusion tu laut sorminanon, ima keadaan namanggambarkon sada perubahan; ngolu ni halak naporsava namangadopi hamaolon dibaen Debata gabe gok dohot hadameon dohot hasonangan. Dipatorang muse taringot tu pangalaho ni opat mahluk humaliang habangsa na ditonga-tonga i, Na menarik ima pangoloionna dohot pamujionna tu Debata. Nada ra mantak arian dohot borngin marende i, mangendehon habadiaon ni Debata dohot angka ende napasangapkon Debata. Nada holan mahluk naopat i napatuduhon sikap namarpangoloi tu Debata tapi dipatorang muse do taringot tu pangitua i na 24 halak i, namamayakkon tuku nihalahi dijolo ni habangsa i. PANUTUP Angkon ta antusi do sasude na di ida ni si Johanes ima dibagasan Tondi, dungi dipajojor ia dibagasan bahasa ni jolma, harani i do umbaen nabahat taida angka simbol-simbol dohot bahasa hiasan. Na di ida ni si Johannes ima habangsa ni Debata na gok hasangapon dohot hamuliaon na dipadop dohot uhuman dohot asi ni roha ni Debata. Na siingotonta ima bahaso saluhutna na masa i di ida ia dibagasan pandonganion ni Tondi Parbadia. Tontu na gabe prasyarat anso didongani Tondi hita ima angkon mangolu dibagasan habadiaon dohot marpangoloion tu Debata. Ra tahalungunkon do marnida habangsa ni Debata, hara ni ima dipangido tu hita anso songon 4 mahluk na humaliang habangsa i dohot 24 pangituai i. Talehen ngolunta arian dohot borngin mamuji pasangaphon Debata dibagasan ias ni roha. Tutu do adong do habangsa i, atong rap ma hita parade roha, pikiran dohot pamatang dinalao mangaligi i sasudena. Amen Pdt. Take Sister Harianja, S.Th Pendeta Resort Simanosor