Khotbah Minggu, 26 April 2015: Kisah 4:5-12.

MAROLOPOLOP TU DEBATA MA SANDOK PORTIBI ON Minggu 26 April 2015. BAR. 4:5-12. PATUJOLO. D ung husise turpuk on, taringot ma au dipangkataion rap dohot sada bujing-bujing na marungkil laho mampartahankon na di rohana. Songon on ma caritona. Hupangkulingi ma sada bujing-bujing namamake (kalung salib). Horas ito…, longang ma ibana. Na belanja do ito? Ningku ma muse manyapai. Tapi dialusi ma au dohot bahasa indosesia. Lagi nungguin bibi. Ninna. Au pe, hupasang ma bahasa Indonesia… boru apa ito??. Dialusi ma; dulu saya Simanjuntak. Tapi sekarang tidak lagi. Booohhh bia muse dehe namasa on ninna rohangku dibagasan. Tapi hara ni alus na i, murtubu ma dirohangku (penasaran) laho manyapai muse. Tinggalnya di mana ito? Aku orang Padang sedang berkunjung ke rumah bibi..ninna mangalusi. Hum didok halak Padang, manigor tapikir ma au tu gareja. Dimana gerejanya di Padang ito? Dialusi ma; aku bukan orang Kristen… Mur penasaran ma au, husapai ma muse kalau boleh tau, kenapa ito pake kalung salib?. Dipatorang ibana ma; Bapakna najolo marga Simanjuntak marugamo Kristen tapi umakna maragama Islam. Lungun do rohana laho mangihutkon Jesus (Kristen) tapi dung marujung ngolu ni bapakna i, putus ma harapanna. Holan borgok na marsilang i noma na pajop rohana. I pe, molo di bagas dimuruhi do ia mamake borgok i. Tapi molo tu ruar, sai torus do i dipake… Giot bahat dope nian sihataan nami, tapi manigor ro ma inanta pardiapi harani na dung sidung belanja sian pasar dock Dumai. Angke na rap paintehon na belanja do hami hatiha i…. Aha ma nagiot sibuatonta sian carito i?... ima taringot tu por ni roha tapi bahat mangambati. Songon nanidok ni umpasa i rupani; Por udan, gok palangka. Por roha, tonggong langka. Halak sisongon on, maol do on marolop-olop marjop ni roha. Damang/dainang na dihaholongan dibagasan Jesus… Dibagasan pardalanan ni ngolu namansai bahat angka na mandondoni hita. Bisa jadi harani angka nahurang dos ni tahi di runah tangga, harani angka dakdanak, harani angka haporluan siganop ari, harani angka parkarejoan, harani angka sirongkap matobang dohot na asing-asing dope, mangambati hita marolop-olop marjop ni roha. Sian sude ragam ni angka na mandondoni i, minggu on (jubilate) paingotkon hita ganup anso marjop ni roha. Ragam muse do namangonjar hita anso marjop ni roha. Isarana; muda dung dapot na ni hirim ni roha, martamba angka pancarian dohot na asing-asing. Na tutu ma i, tapi porlu botoon dohot ingotonta sadarion lopus tu ujungna bahaso na mangonjar olop-olopta dohot jop ni rohanta ima: 1.      Disarihon Jesus do hita. Harupe bahat angka dosanta , nada gotap roha ni Jesus marnida hita. Harupe nadung manaek Tuhanta Jesus tu Banuginjang, nada lupa Ibana tu hita. Dilehen do Tondi Parbadia tu hita ima pangapul nasumurung laho patoguhon roha dohot haporsayaanta, papir tondinta dohot manorangi pardalananta. 2.      Parbinoto do Jesus. Diboto Jesus do maol jana rahis dalan sidalananta. Diboto Jesus do bahat ni angka musunta na mangambati hita anso unang ro tu Jesus. Dinabinoto ni Jesus angka hamaolanta i, nada sip boti Jesus, dilehen do Tondi Parbadia mangurupi hita. Luar biasa do hagogoon ni Tondi Parbadia i laho mangubah sude hajolmaonta. Taida ma si Petrus na parbiar hian (mangaligi dadaboru pe mamabiar ia) gabe santak pulukna. Dung songgop Tondi Parbadia, gabe marroha naimbaru ma si Petrus. Salaku inda adong be biar nia apala otik laho manyaksihon goar ni Tuhan Jesus di jolo ni angka na sangap jana parkuaso. Torus torang do si Petrus mangalusi sapa-sapa ni angka pamimpin agama Jahudi mandok; Marhite goar ni Jesus Kristus na sian Nazaret i do, ima nadung dipasilangkon munu i, na dipangolu ni Debata sian namate. Songon ima panyaksihonon ni si Petrus di jolo ni rapot godang i, umpe adong biarna. Harani habaranionna i, longang do roha ni angka musuna, gabe diparhatutu do tanda hahomangan na nibaen ni Jesus marhite si Petrus. Harani habaranionna i, gabe dipalua do halahi dohot si Johannes sian kurungan jana dipaloas mulak  (malua). Damang/dainang nadihaholongan …. Aha do astuan ni batu parsuhi di turpuk on?... ima tudosan tu diri ni Jesus. Angke Jesus do ojahan na hot, sitiruon anso tigor ngolu on. Dihata Heber didok “rosh” astuanna naparjolo, uluan sanga nautama. Jesus ma nagabe uluan parjolo baen ojahan nahot jana natogu. Ibarat ni na pajongjong bagas, ingkon adong ojahan laho mambaen inganan ni pondasi ni bangunan i. Mangihut tusi ma guruhonon pajongjong bagas i. ima nanidok batu parsuhi. Ingkon tangkas do hapayahan ni batu parsuhi i jana ingkon gogo anso unang mura rekut bagas i. Ima tudosan ni Jesus na gabe batu parsuhi di ganop ngolunta. Marolop-olop ma hita angke inda adong goar na asing di toru ni langit dilehen tu jolma asing ni goar ni Jesus. Sipalua do goar ni Jesus. Sipalua sian dia do? 1.      Sipalua sian hamatean. Inda adong na gumogo di portibi on sian hamatean. Tarbukti do i. Dipatunduk hatean i do sandok na mangolu. Harupe songon dia gogona, malona dohot bahat ni sinadonganna. Songon dia pe umurna na menek sangape namagodang bope namatobang. Tapi dung mate Jesus, talu ma hamatean i mangolu ma hita. 2.      Sipalua sian gomgoman ni Sibolis. Najorbutan do pangalaho ni sibolis. Musu ni Debata do sibolis sian mulana pe. Targoar do sibolis i raja ni portibi ( Yoh.14:30 ) Marhuaso do sibolis i mamparhanciti dohot manguji jolma. Haru Jesus pe tehe diuji sibolis. Sibunu jolma do sibolis i. Pargapgap jana ama ni pargapgap (Yoh.8:44). Tapi harupe margogo sibolis i, dao dope gumogo Jesus. Talu do sibolis i dibaen Jesus.  3.      Sipalua sian dosa. Sian sude ragam ni dosa (pangalaosion, namanyirpang, hajahaton dohot napaula-ula) jotjot mandondoni hita gabe inda bisa hita marjopniroha, madung ditaluhon Jesus i di nadidokNa madung marujung.  Antong ra ma hita dipalua Jesus i, anso dohot hita na marolop-olop marjop ni roha. Damang/dainang..nadung dipalua Jesus. Ganop nadigohi ni Tondi Parbadia sai manyoarahon tu hamubaon ni roha do i anso marngolu na imbaru (bertobat). Antong mudape ingkon taadopi angka parhancitan, tekanan, taingot ma nadung parjolo do Jesus na burju roha i, Parmahan bolon i, tuan rumah na buas i mangalami i. Ditaon Ibana parhancitan i, anso malua dohot marolopolop do hita disi. Antong marolop-olop ma hita harani Goar ni Jesus na arga i, namangalehen Tondi Parbadia mampargogoi hita dipardalanan ni ngolu on manuju ngolu na salolot ni lolotna. Amen.  Pdt.Anton Pakpahan GKPA Hurase.