Khotbah Pentakosta 1 Minggu, 24 Mei 2015: Kisah 2:22-38

TONDI I MARKAREJO DI GOLUNTA Minggu Pentakosta,                                                  Jamita      : B.A Rasul  2:22-38 Minggu, 24 Mei 2015                                               Sibasaon  : Mazmur 139:1-12 Patujolo. B aenon ni Angka Rasul on bolas do dohonon tarsongon buku lanjutan ni Injil Lukas. Harana na manulis sejarah barita nauli on pe si Lukas do. Na mambaritahon taringot tu parkarejoan ni Tondi Parbadia marhite angka Rasul (Kis 16:7). Jadi satutuna Injil Lukas dohot buku Baenon ni Angka Rasul inda patorangkon carito pambaenan ni jolma (rasul), tapi parkarejoan Tuhan Yesus do na markarejo dibagasan Tondi Parbadia. Pasal 1 – 12 dipajojor taringot tu parkarejoan ni si Petrus dungi Pasal 13 – 28 taringot tu parkarejoan ni si Paulus di nalaho mamaritahon hata ni Debata. Si Petrus dicaritohon taringot tu rasul na markarejo di kalangan halak Yahudi tapi anggo Paulus dicaritohon taringot tu rasul na markarejo tu luar ni halak Yahudi. Di hatiha i na ro do si Petrus dohot anggka sisean i tu punguan ni halak Jahudi na marjop ni roha mamestahon ari pentakosta ima pesta hatarimakasion hara ni hasil panen (bnd Ul 16:9-12). Perayaan on totop do dipestahon halak Jahudi ganop ari pa limapuluhon dung perayaan paskah. Ido umbaen na di dok halahi pesta on goarna pentakosta. Hata “Pentakosta” dibuat do sian hata Gorik (Yunani) “Pantekostos = Παντεκοστοσ artina limapuluh. Topet muse do di ari Pentakosta on ari Haroro ni Tondi Parbadia na masa dung 50 ari (minggu pa pituhon) dung ngot Tuhanta Yesus sian na mate. Muda tapardiatehon bagian paduahon do jamita ni si Petrus  na di turpuk on (ay 22-38) jana adong piga piga na bisa baenonta gabe dasar ni hatorangan tu jamita. Hatoranganna. 1. Dipatorang taringot tu hadirion ni Jesus (ay 22-24). Jesus na ditanda ni halahi na sian Nazaret jana disaksihon halahi do angka pambaenanNa marhite-hite halongangan dohot pangajarion di hata ni Debata, ido na dung ditontuhon Debata sandiri na gabe pagujungi ni angka baga-baga ni Debata taringot tu Sipalua i. Diparsilangkon pe Jesus, na dung gabe sangkap ni Debata hian do i, tapi inda tarpabonom hamatean i Ibana di banua toru dipabangkit do Ibana muse dung ditaluhon sorop ni banua toru. Anso momo panjagiton ni halak Jahudi taringot tu panorangionna, di patangkas si Petrus do ibana mar-hamaranggi dohot halak Jahudi jala sa-ama/sa-ompu do halahi maradophon si Daud. Jadi hara ni i ma gabe lapang di ibana hatiha laho mamaritahon taringot tu halumbaon sian si Daud tu haroro ni Jesus. 2. Halumbaon sian si Daud (ay 25-31). Hara ni halak Jahudi halahi di buka si Petrus do taringot tu parningotan ni halahi tu si Daud dohot janji ni Debata bahaso sian pomparan ni si Daud na giot mamarenta di tonga-tonga ni bangsoNa marhitehite na ni lumbahon ni angka panurirang. Jadi tarigot tu na masa on madung dilumbahon si Daud do i di Parnajian Nahonok (Mzr 16:8-11) jana di dok bahaso Debata pasahatkon Ibana tu portibi ni halak na mate. Na ni di lumbahon ni si Daud nada taringot tu dirina tapi tu pomparna, na dung dijanjihon ni Debata (Mzr 89:4-5). Ima Jesus, nada dipadiar dihamatean tapi dipabangkit do Ibana sian hamatean jana manaek tu banua ginjang. Dungi taringot tu hananaekNa i pe madung di lumbahon “juguk ma ho di sabola siamunKu” (Mzr 110:1). Dipatorang si Petrus, si Daud madung mate jana koburanna adong ditonga-tonga ni halahi. Maksudna halumbaan i nada taringot tu si Daud sandiri, tapi halumbaan ni si Daud taringot tu Mesias na giot ro i do. Jana Mesias i inda bisa ditahan banua toru nada bisa ditaluhon hamatean,  i ma na mangalumbahon taringot tu hangongot ni Mesias i sian tanomanNa. 3. Hamuliaon ni Mesias (ay 32-36). Dasar ni hamuliaon ni Jesus dibuktihon dohot halumbaan ni si Daud sandiri (Mzr 110). Menurut Petrus halumbaan ni si Daud on di boto halak Jahudi do, tapi maol do halahi manjagit halumbaan on di tujuhon tu Jesus. Tapi dohot gomos di dok si Petrus Mesias na ni lumbahon i ima Jesus (Mat 22:41-46) anso unang gabe salah paham halahi taringot Hamesiason ni Jesus di baen tu pangantusion na sasintongna. Harana salolot dingolu ni Jesus di pahami halahi do Jesus songon jolma biasa, anak ni si Josep partukang hayu i. Debata madung mambaen “Jesus i gabe Tuhan dohot Kristus” dung monang Ibana manaluhon hagogoon ni banua toru dohot sorop ni hamatean. Hara ni i porlu situtu ingkon botoon ni sude bangso ia hamamate ni Jesus inda pataridahon hataluonNa tapi pagonophon tugas na gabe partobus di sude jolma. Jala hamonanganNa madung tangkas marhite na ngot Ibana sian hamatean. HamoanganNa i ma na pabotohon dohot mamastihon hamonangan ni sasude halak naporsaya. 4. Angka parsidohot di hamonangan ni Kristus (37-38) Jamita marhite pangajarion sian Tondi Parbadia i tung mansai hona, jana mambuka pangantusion ni na mambege jamita ni si Petrus, jamita i songon pelor ni sinapang na mangonai ate-ate ni halak nabahat i. Gabe di sapai halahi ma “anggo songoni aha ma si baenon nami?”. Tanda ni panandaion di angka nahumurang dingolu ni jolma tontu angkon sapa-sapa do rohana, “aha ma luai si baenonku laho paturehonsa?”. I do sapa-sapa ni halak nabahat i. dung ditanda halahi hahuranganna jana ra halahi manjagit hasintongan dibagasan Jesus, tugas mangihut, aha ma si baenon songon tanda nadung di jagit haluaan i. Alus ni si Petrus “ Pauba hamu ma rohamunu sian angka na jahat, jana dipandidihon”. Hata kunci ima “bertobat dan dibabtis”. On ma na gabe inti ni haporsayaan ni halak Kristen anso tutu mandapot hapastian ibana si pardohot di haluaan na dung diparade ni Jesus di angka na ra mangkangoluhon parbatu ni haporsayaanna. Hahonaana : 1. Parsidohot do hita di hamonangan ni Jesus. HangongotNa i sian na mate gabe sada jaminan do dihita di haluaan sian dosanta. Jana managam di hangongot sogot dohot taruli hangoluan na na nanongtong ro di salolotnilolotna. 2. Sarupa do hita dohot si Petrus, angkon mambaritahon Barita Nadenggan sian Jesus Kristus marhite pikiran, hata dohot pambaenanta anso marroan halak dohot marsomba tu Ibana. 3. Di na mambaritahon Barita Nadenggan i, bahat do hamaolon na ro tu hita tapi inda sadia i martimbangkon ragam ni si jop ni roha na giot lehenon ni Jesus di hita. 4. Pentakosta paingothon hita di pandonganion ni Jesus marhite Tondi Parbadia laho manaluhon marragam hamaolon dingolutta tarlumobi margogo mangkanguluhon dohot mambaritahon Barita Nadenggan i. Hara ni i tajagit ma Tondi Parbadia i markarejo di bagasan hita. -          Torus do hita di gohi Tondi Parbadia sapanjang taoku Kristus na gabe Tuhan Sipalua, jana tarida di i di sude pardalanan ningolunta marhite pikiran, hata sanga pambaenanta. (Galatia 5:22-26). -          Unang ma soadahon Tondi ni Debata na mian dibagasan dirinta, anso dipargogoi hita laho marparbatu na denggan jana didongani hita laho mangalo hisap ni sibolis. Pdt.GP.Simbolon,S.Th Resort.P. Berandan